ယးအူးထီ့ယိုဝ် မွာဲဝေ့ဍး ဆိက်ဖေါဟ်ဆာႋ က်ုလုံ့ဖေါဟ်ဆာႋသီး ဆ်ုအင်းလ်ုအ်ုအုံးထုက် ကဲထင်းၯာင်ႋၜျာထုက် ဆးအင်းလ်ုမိင်ၮှ်လှ်။ အေအင်းၜးမေဝ်ဍေ ယးအူးထီ့ၯေဝ်ၯေဝ် ၯုဂ်ဖုံ့ကါကါၮှ်စါ်ၜိုဝ် ၯယ်ဆ်ုမာသိင်ႋၮီခၠံင်သီး ကဲဝေ့ဍးဆေဝ်လှ်။
ယးအူးထီ့ဍာဍာၮှ် ထံင်ႋလင်ပျဍေယးၰါင့် ဍေသိုင့်ခေါဟ်သးၯံင်လယ်လင်ဆ်ုၯဲသးၰာင့်မုက် ၯေဝ်ၯေဝ်ၮှ် အေအင်းၜးစါ်ၜိုဝ် က်ုလုံ့ဖေါဟ်ဆာႋလ်ုဖး အင်းဝေ့အုံးဝေ့အွာ ကိုဝ်ၯာဍေဆေဝ်ႋ၊ ယးအူးထီ့ ဍာမၠိက်နိုင်နိုင် ဍေဆ်ုဍိုဝ်ဆ်ုလးၯေဝ်အွာ အေအင်းၜးၮှ် အင်းအုဲးဝေ့ ကိုဝ်ၯာဍေလှ်။
ယးအူးဖိုင်ၮှ် အါဟာရဓါတ်(ၜီတာမေန်) အေ၊ ၜီ၊ စီ၊ ဍီ၊ သီးပါၰုက်အးဝေ့အ်ုခေါဟ်စံင် ၯါင်ႋၜျာအှ် ကဲထင်းဖါ်ယး မွာဲၜိုဝ်လှ်။ အင်းမေဝ်သိုင့်ၯေဝ်ယုဂ်လာၮင့်သီး ယးအူးထီ့လ်ုပါၜး လင်ဆိက်လင်မိင့် ၮေဝ်ႋဟ်ုအှ်အေး။
ယးအူးယိုဝ် ၜးတါင်ၮေဝ်ႋ "ယးဖေါဟ်အူး" လ်ုအ်ုၯေဝ်ၮှ်လှ်။ ယးဖၠိက်၊ ယးလူႋ၊ ယးဖေါဟ်အွာသီးၮှ် ဖင့်ခွိက်အ်ုအ်ေု လ်ုဃွှိက်ၯံင် ၜးသီ့ယာခွိက်ဍေထီ့ ဆိင့်ဆိင့်ပၠင်ပၠင်ၮှ်လှ်။ သီယာ့ခွိက်ၯံင် ၜယ်သူ့ထင်း ထံင်ႋအ်ုထီ့သါ်ၯံင် ဖိုင့်လင်ထီ့လး ဆီႋဍိင်ၜးၯဝ်ႋ အှ်ကှ်ေအူးထင်း သါ်ထါင်ထဝေ့ လ်ုၮါလှ်။ ဆ်ုဖါန်ထင်းထါင် အင်းလူ့ၰာင့် ၮီ့သိုင့်သင့်ၯံင် ထုံဍူးထင်း ၜေ့မေဝ်အာင်ဍူးသိုဝ် လ်ုလံင်းလ်ုလံင်းၯံင် ၜးအင်းလူ့ၰာင့်ထါင်ဝေ့ ၮီ့သိုင့်သင့်ဍဝ်လှ်။
အင်းလူ့ၰာင့် ယးအူးၰာင့်ၯံင်ၮှ် ဆူ့လင်ဆုင်းဖိုင် ၜးယှိုဝ်ၜၠေထါင် ဍေမေဝ်ၮှ်လှ်။ ယးအူးၰါင့်ၮှ် အေယှိုဝ်ၜၠေဍေမေဝ်စါ်ၜိုဝ် ယးအူးၰါင့်ၮှ် ဖိက်ထင်းဝေ့လှ်။ သါ်လင်မံင့်ဖိုင်အ်ုဖင့်ခေါဟ် ၜေ့ဍူလာလ်ုဍီးၜးသိုဝ် သါ်လင်ထထီ့လးတင်းတင်းၯံင် ကါၜါ်ထအ်ုခေါဟ်ၯေဝ်အွာ ၜးအှ်ကှ်ေထဝေ့လှ်။
လ်ုယးအူးမံင့်ၮှ် ယးအူးစင်ထီ့၊ ဆ်ုၯင့်ထီ့ ၯယ့်ထင်းဝေ့လှ်။ ယးအူးၮှ် အှ်ကှ်ေလာၮင်သိုင့်ၜိင်းၯံင် အင်းဝါင်အင်းကဲဝေ့လှ်။ ယးအူးသီး ၮ်ုတါင်အင်းလ်ုသှ်ေၜးခးသှ်ေ နိုင့်စါ်သှ်ေ ဝေ့လှ်။ ယးအူးအေၯေဝ်ၮှ် အင်းဝါင်ထင်းဍာဍာ လယ်လင်ဍေဆ်ုၯဲဍာမၠိက် နိုင်နိုင်လ်ုၜၠင် ဟ်ုအင်းအုဲးဝေ့ ကိုဝ်ၯာဍေလှ်။