လ်ုအ်ုဝီႉဍးအိုဝ် လ်ုဏံင်းဖါဍောဟ် လ်ုဏံင်းဖိုင်ဏှ် ယး၊ ခၠါ်၊ ဍေထိင်ထုံလ်ုဖး အှ်ကုံဝေ့အးမာႉလှ်၊ လ်ုယဝ်ဏှ် ဆ်ုခေါင်ႇစွးဝေ့တာႉ ဏံင်းဖါဍောဟ်ဏှ် ထီ့သာ်ဆာ့ဆေဝ်ႉလှ်၊ ထံင်ဏှ် တ်ုဝါန့်ဖေါဟ်သီး ဍးယးဏှ် မ်ုသာသာ်ခွိက်ဏံင်း လဝ်လေါဟ်သာဟှံင် လ်ုဏံင်းဃှံင် မူႉနုက်ခဝ့် ထီ့ခေၠါဟ်အှ်ၜုဂ် အ်ုခေါဟ်ကျံင် ၜုဂ်ဏေဝ်ႉ မ်ုလံင်ႉ ကျံင်းဖါဍောဟ်ဟှံင် ဆေဝ်လင်ဝေ့ လါင်ႉတိုင်လှ်။
ယးဂမၠိင်ႉသီး သှ်ေယာ့ဝေ့ တ်ုဝါန့်ဖေါင်ဆေဝ်လင်လါင်ႉတိုင် မ်ုသာသာ်ဏံင်းလ်ုၜၠင်တာႉ သာက်ုတဝ်အှ်ကံင်း လဝ်ထါင်လေါဟ်သာလှ်၊ ယးဖေါဟ်အွာ၊ ယးလူႉ၊ ယးဍံင်သီး ကုံၜးဏင်ႉမိင်လိုင်အေး လေဝ်ဝေ့လ်ုခၠါ်အှ်အိုဝ်လှ်။
ခၠါ်ဍေထိင်ထုံလ်ုဖး လဝ်ထင်းဝေ့ 'မွာဲပ်ုဏှ် ၜးက်ုတဝ်အ်ုလင်ႉအှ်အေး ဏံင်းသာ်ခွိက်လာႉဏင့် ပ်ုလုဂ်လင်သာ လ်ုဖိက်ပါပိုင်ဖင့်လအှ် ဆ်ုဍး ပ်ုဏင်ႉဟှာအေး ဏ်ုသီးအေက်ုတဝ်ဏှ် ကုံးဍးဏ်ုသီးဝေ့ဆာ်၊ လဝ်ဖှ်ေဝေ့ယးသီးဏှ်လ်ု။
ယးဂမၠိုင်ႉ အှ်လ်ုသှ်ေလိုင် လေဝ်ကုံထါင်ဝေ့ လ်ုယးဖၠါႉဓံင့်အှ်အိုဝ်လ်ုၜၠင် ယးဖၠါႉဓံင့် လဝ်ဖှ်ေဝေ့ က်ုတဝ်ဆ်ုဏင်ႉမိင်လ်ုဃှေဝ် ယ်ုကုံးၜးယုဂ်တ်ုဝါန့်ဖေါဟ်ထင့်လင်လါင်ႉ အေသာထီ့ခိုဟ် ယးလူႉ ယးဍံင်လ်ုဖး စါင်းဝိင်ဝ မောဝ်သဝ့်ဏံင်းဖိုင်ဏှ်ဆာ်၊ ယးဖေါဟ်ယးလီလ်ုဖး လေဝ်အှ်ခိုဝ်ဝယ်လ်ုလါင်ႉခေါဟ်ထိုဝ်အိုဝ်ဟှံင် ဆ်ုဍုင်းလင်ႉခိုတ် နုက်လင်ပျလါင်ႉဖိုင်ထါင်လင်ပျထီ့ လ်ုထီ့ခၠေါဟ်ဖိုင်အိုဝ်ဆာ်၊ ထီ့ၜုဂ်မ်ုသာ်ခိုဟ် ယးလူႉ ယးဍံင်သီး နုက်လင်ပျ ကိုဝ်ႉၜိင်း ကိုဝ်ႉၜိင်းဏှ် ၜးဏါႉမုက်သာကိုဝ်ႉၜိင်းဍေဆေဝ်ႉလှ်။
တ်ုဝါန့်ဖေါဟ် ထင့်လင်လါင်ႉ ယာဲၜိင်းဟှံင် သာဝေ့ထီလ်ုၜၠင်ယးလူႉ၊ ယးဍံင်လ်ုဖး ဃှာင်ႉဝိင်ၥ ဏံင်းဖိုင် မောဝ်တ်ုယှာႉ က်ုလုဂ်ဟှင်းအာဆေဝ်ႉလှ်၊ ယးဖေါဟ်ယးလီသီး ထါင်ပျထီ့ နုက်လင်လါင်ႉဖိုင်ဖံင်ခွိက်ဝေ့ဆ်ုသီ့ဆေဝ်ႉလှ်။
တ်ုဝါန့်ဖေါဟ်လ်ုဖး ဍးယးမောဝ်အး မုက်သုင်းမုက်သာစွးယောဝ်ႉၜုဂ် ယးဖေါဟ်ယးလီလိုင်အေး သာတ်ုယှာႉထီ့ဏှ်တာႉ ယးဍံင်ဖူ့ဖတၟိုင့် ယးလူႉဖူ့ဖတၟိုင့် ယးဖၠါႉဓံင့်သီး ဖူ့ဖခွိက်တၟိုင့်ဟှံင် ထါင်လင်ဝေ့ လ်ုထီ့ခၠေါဟ်ဖါဍောဟ်ဖိုင် လုက်ဆိင့်ဏှ်လှ်၊ ၜးလ်ုကေမူႉဏါအ်ုခေါဟ်ကျံင် တ်ုဝါန့်ဖေါဟ်သီး လံင်ခၠုဂ်ဏင်ႉၜိင်းအေး။
သာသာ်ဏံင်း ထီ့သာ်လ်ုၜၠင် တ်ုဝါန့်ဖေါဟ်သီး စါင်းလင်ဖံင်းယးဏှ်တာႉ ဍးယးဏင်ႉၜိင်းလိုင်အေး တၟေင့်ဆိုင်သာ ကိုဝ့်ဟှာဍေလ်ု၊ မာဏေဝ်ႉဖၠါင် လံင်ဆေဝ်ခၟုက်အူးဖင့်ႋလလ်ုၜၠင်တာႉ ဏေဝ်ႉအင်းသာ့ဝေ့က်ုယာဲ ခၠါ်ဍေထိင်ထုံသီးလုက်ခၠါဏှ်လ်ှ။