ဖူ့ကျာ်စာသိုင့်(စိန္တာကွိက်)ယိုဝ် ဖၠုံထီ့ခါန်ႋ၊ ဍုံထ်ုအင်ကၞင့်၊ လ်ုထိုင့်ပ္တါင် အိင်ထာဲတ်ုဝါန့်အိုဝ်ဏှ် အ်ုဏိင်း ၁၂၀၀ ခါ့၊ အံင်ထင်းဍေဝ် အ်ုဖၠဲဖာထင်းဝေ့လှ်။ မောဝ်ႋဖာႋဏီ့ၯာအ်ုမိင််ဏှ် ဟ်ုသှ်ေယာ့ၜး ဏင်ဟှာလိုင်အေး။ လ်ုအ်ုဟှင်ပေဝ့်ခါ့ မောဝ်ႋဖာႋကိုဝ်လဴဝယ် မွာဲဝေ့ "စဝ်စာသိုင့်" ဏှ်လှ်။
စဝ်စာသိုင့် အ်ုယုက်ထင်းၜါ (၉) ဏိင်းခါ့ မောဝ်ႋဖာႋလေဝ်လင်ဖ်ုအောဝ်လ်ုခွဲါက္ၜင် ဘာႋဍာ်တ်ုရိုဝ် ဖူ့ကျာ်အွာအှ်အိုဝ် ဏှ်လှ်။ စဝ်စာသိုင့် ဖဝ်ႋအ်ုယုက်နုက်လင် (၁၅)ဏိင်းခါ့ မောဝ်ႋဖာႋသယ် လေဝ်လင်ကိုဝ်ဏေဝ်ႋၯံင် ထာင်ဍုဂ်ထင်းဝေ့တ်ုပိုဲလ်ုမျပေဘာႋဖာဍောဟ်အိုဝ်လှ်။ တ်ုပိုဲဏှ် ဖၠောတ်ထင်းဝေ့အ်ုၜွဲမိင် မွာဲစိန္တာကဝိဏှ်လှ်။ လ်ုမျပေဘာႋဖာဍောဟ်ဏှ် ထာင်ပၠံင်အှ် ထာင်ဝေ့ လ်ုခွဲါက္ၜင် ဘာႋဍာ်တ်ုရိုဝ်အိုဝ်ၯံင် မာလောဟ်ဏေဝ်ႋထာင်ဝေ့ လိက်ဖၠုံဍေလိက်ပ်ုယင် ထံင်အ်ုသှ်ေ ကၠ်ုခၠင့်လ်ုဆင့်လှ်။
ထံင်ဏှ်ၯံင် ၯယ့်ထာင်ထံင်ထာင် လ်ုမျပေဘာႋဖာဍောဟ်အိုဝ်လ်ုၜၠင် လ်ုၜုဂ်လ်ုယာင် ဍေမျပေ, အိင်ထုက်တ်ုဝါန့်, ယောဝ်ဘာႋသံဃာ့ဖာဍောဟ်အှ်အိုဝ်ဏှ် မာလောဟ်ဏေဝ်ႋထာင်ဝေ့ လိက်ယောဝ် လ်ုၜၠင်ဍဝ်ဏှ်လှ်။ စဝ်စာသိုင့်အ်ုယုက်ပါင် (၂၀)ခါ့ဏှ် ကဲထင်းထာင်နာဲ ထံင်မျပေဘာႋဖာဍောဟ်အိုဝ်ဏှ်လှ်။
ကဲထင်းနာဲၯံင် အ်ုဝှ်(ဝဝ်)အှ်ထင်း (၁၀) ဝှ်ၜၠဲခါ့ လေဝ်က်ုညာ အင်းဌာန့်ထာင်ဘာႋ လ်ုအိင်ထာဲ ဘာႋလေသာဏှ် ဆူ့ကေဝ်ဝေ့လိက် ထံင်အ်ုသာယှာႋမိင်ဏှ်လှ်။ ဖူ့ကျာ်စာသိုင့် (စိန္တာကွိက်) ဏှ် ဆူ့ကေဝ်လိက် ပ္တံင်သာသၞာ့အ်ုယုက်ထင်းၜါ (၇၀)၊ အ်ုဝှ်အှ် (၅၀)၊ ဏိင်းသာထာ် ၁၂၇၀ ဏိင်း ပါင်ထင်းၜါခါ့အိုဝ်ဏှ် အ်ုယုက်အုဂ်ပဝ်ဝေ့ ထံင်အိင်ထာဲဘာႋလေသာ ဏှ်ဆေဝ်ႋလှ်။
ဖၠုံအ္စာလ်ုဝါ် ဖူ့ကျာ်စိန္တာကဝိ ဆူ့ကေဝ်လ်ုဝါ် ပၞံင်အ်ုဍံင်ဏှ် ဍးၜးကဲၜေအ်ုဖင့်လယိုဝ်လှ်။
ထီ့နိုဲ့ကါင်းထောဟ်လယ်ဂပဝ် (ထ်ုပှ်)၊ လ်ုကါင်းကါင်း နိုဲ့ၜိင်း ဏယ့်ဖဝ့်၊ ထောဟ်လယ်ဃွှိက်ဖိုင် ကာကၠယ် (ကၠေဝ်) အှ်၊ ကာကၠယ် (ကၠေဝ်) ဃွှိက်ဖိုင် လုံႋအှ်ဍဝ်။
ဖူ့ကျာ်ဆူ့ကေဝ်လဴဝယ် လိက်ဓဝ်ႋထူ့လ်ုဖးဏှ်ဍဝ် ၜဏေဲဖၠဟ်လင် အ်ုဖင့်လ အ်ုတိုင်ယိုဝ်ဏှ်လှ်။
၁။ လိက်ပ္တံင်ပါရမီ - ၁၂၃၅ ဏိင်း။
၂။ လိက်ကာဠုဒါယီ - ၁၂၃၉ ဏိင်း။
၃။ လိက်က်ုဆင့်အွာ(မာတုပေါသက) - ၁၂၄၀ ဏိင်း။
၄။ လိက်ရဴဟုလာ - ၁၂၄၁ ဏိင်း။
၅။ လိက်သန္ဓိက်ုရေင့် - ၁၂၄၂ ဏိင်း။
၆။ လိက်မူ့လာမူ့လီ - ၁၂၄၃ ဏိင်း။
၇။ လိက်သင်္ဂဟ - ၁၂၄၃ ဏိင်း။
၈။ လိက်သၟိင့်နာဲမိက် - ၁၂၄၄ ဏိင်း။
၉။ လိက်ၯာဖၠိုဝ်လီႋမိင် - ၁၂၄၄ ဏိင်း။
၁၀။ လိက်သၟိင့်ရာမ်ႋ - ၁၂၄၅ ဏိင်း။
၁၁။ လိက်မဒ္ဒီပဝ် - ၁၂၄၈ ဏိင်း။
သီးဏှ်လှ်။