လ်ုအ်ုခေါဟ်ၰုဲးလ်ုကုဂ်ၮှ်၊ အှ်ဍေအ်ုမေခၠီ့ အ်ုနိုဝ်ဍေအ်ုမၠံင် ၮီ့ၜံင်ၮှ် ဆေဝ်ႋလှ်။ လ်ုအ်ုသာကိင်ထါ်ကုဂ်ၮှ်ဍဝ် အှ်ဝေ့အ်ုဍာ်ၮီ့ခဝ့် ဍေအ်ုခင်းၰူ့ခဝ့် ၮှ်လှ်။ လ်ုအ်ုၯုဂ်ဖုင့် လ်ုကုဂ်ၮှ်သီး၊ အ်ုဆံင်းလ်ု အှ်ၮံင်ၮံင်လေံလ်ုဖး အှ်ဝေ့ဍးဆေဝ်ႋလှ်။ ဍူလာ့သီးယိုဝ် ဖါထင်း ကဲထင်းဝေ့၊ လ်ုဆ်ုၜီးသိုဝ်ကၠါ၊ လ်ုဟ်ုအှ်ေ ဟ်ုဆီးကၠါ၊ လ်ုဆ်ုၰီးကၠါ၊ ဍေလ်ုဆ်ုစီ့စးကၠါသီးအိုဝ်လ်ှ။
ဍူလာ့ယိုဝ် မွာဲဟ်ုၜးသာမဲထုက် "အေန်ဆက်" ဆ်ုဖေါဟ်ၰာႋလ်ုမိင်ၮှ်လှ်။ ဍူလာ့အ်ုမေါဝ်ႋယှာႋ ထိုင့်ဍူယါ့ၮှ်၊ အ်ုခေါဟ်ၰုဲးလ်ုကုဂ်၊ အ်ုသာကိင်လ်ုကုဂ်၊ ဍေအ်ုၯုဂ်ဖုင့် လ်ုကုဂ်၊ ၜေ့ၮှ်သိုဝ် အှ်ဝေ့ဍးသိုင့်ကုဂ်ၮှ်လှ်။
ဍူလာ့မေါဝ်ႋၮှ် အေဍီးလင်လ်ုၜၠင်ၜၠင်၊ အ်ုဖၠုံးၮှ်အှ်ဝေ့ လ်ုထံင်ၜၠဲ ဆေဝ်ႋလှ်။ အ်ုဍီးသီးလ်ုဖးၮှ်၊ လ်ုအ်ုဆိုင့်အ်ုထဝ်ႋ အှ်ဝေ့ဆီ့သင့် အ်ုထင်ႋဖိုင်ၮှ်၊ ကဲထင်းဝေ့ဍး ဍူလာ့ဖါဍောဟ်လှ်။ ဆ်ုလ်ုဍူလာ့သီးယိုဝ်၊ အ်ုဝေ့သီး စါင်းအင်းၰူ့အင်းအ်ုဆး လ်ုဆ်ုနိုင့်ၰီးနိုင့်ၰံင့်ကၠါၮှ် ထၟာႋလှ်။ က်ုယာဲၮှ်သီး ကါဍာ်အေး၊ အ်ုသီးၯယ့်အင်းၰူ့အင်းထါင်ဝေ့အ်ုဆး လ်ုဟ်ုမၞီႋသီး ဆ်ုအင်းဆ်ုအဝ်ဖိုင်အိုဝ်ဍာ် ဆေဝ်ႋလှ်။
လ်ုဍူလာ့ခင်းလံင် အ်ုဆံင်းကၠါၮှ်၊ ဆ်ုအူးဆ်ုအံင်လ်ုဖး၊ ၜုဂ်ထဝေ့ဍးတာႋ အ်ုဝေ့သီးၯယ့်ဆံင်ႋလင်ထါင် လ်ုဟ်ုမၞီႋ ဆ်ုအင်း ဆ်ုအဝ်ဖိုင်ၮှ်ၯံင်၊ လ်ုအ်ုၮါ့ ခေါဟ်ထိုဝ်ၮှ်၊ ဍုဂ်လင်ဆင်ဝေ့ဍး ဍေအ်ုသီးၮါ့ထီ့ၮှ်တာႋ ဆ်ုအင်းဆ်ုအဝ်ၮှ် အ်ုဝေ့သီး ဍုဂ်ဖၠီႋထင်း ကဲထင်းဝေ့ အ်ုထီ့ၮှ်ၯံင် အင်းထါင် ဝေ့ဍးဆေဝ်ႋလှ်။
အ်ုဝေ့ဍုဂ်လင်ဆင် အ်ုသီးၮါ့ထီ့ၮှ်၊ ပါလင်ပျဍေ ဆ်ုဆာႋၰာႋသီးလ်ုဖး၊ အှ်ထဝ်ႋထါင် လ်ုဆ်ုအင်းဆ်ုအဝ် ၜေ့ၮှ်သိုဝ်တာႋ ဆ်ုဆာ့အ်ုၰာႋသီးလ်ုဖး နုက်လင် လ်ုဟ်ုအံင်ဖိုင်ၯံင် မ်ုကဲထင်းဝေ့သှ်ေ ဍေဆ်ုဆာ့ၯုဂ်ဝိက် ဆ်ုဆာႋအှ်လေင်လး ဆ်ုဆာႋ ၯုဂ်လေဝ်သီးၮှ်ဆေဝ်ႋလှ်။
လ်ုဆ်ုဆာႋအှ်လေင်လးသီး ၜးၯးဟ်ုသှ်ၮှ်ေ မွာဲဆ်ုဆာႋ ၯယ့်ကဲထင်းဝေ့ဍးအ်ုထါ် လ်ုဍူလာ့ၮှ်လှ်။
ဍူလာ့ၯယ့်ကဲထင်းသှ်ေ ဆ်ုအ်ုလင်ႋအ်ုကၠယ် ဆ်ုၜီးသိုဝ် ဍေဆ်ုစီ့စးသီးလ်ုဖး ၜေ့လ်ုအှ်လိုင်ၜးသိုဝ်၊ ဟ်ုၜးမာပြင် ဆိင်ဲဖၠေဝ့်ခွိက် ဝေ့ဍးၮှ်လှ်။ ဆာႋမွာဲဆ်ုၜီးသိုဝ်အှ်ၮှ် ၜးဝေံပြင်ခွိက်၊ ဆာႋမွာဲ ဆ်ုအင်း ဆ်ုအဝ်အှ်ၮှ် ၜးကါၜါ်ထဍေ အ်ုခေါဟ်ခၠုက်သီးၮှ်လှ်။
လ်ုဍူလာ့ ဆံင်ႋလင်ၯံင် ဆ်ုအင်းဆ်ုအဝ်သီးၮှ်၊ ကြိုဒ်အင်းၜးလာႋ ၮင်ႋၯာလ်ုၰေဝ်၊ အေမွာဲပ်ုအှ်အေဖၠေဝ့်လိက် အေဆိင့်ၰီ့ ဝေ့ဍးဆေဝ်ႋတာႋ ဆ်ုစုဂ်ဆ်ုဆာႋသီး ဖံင်ဖၠေဝ်ခွိက်မ်ုကဲဝေ့ ကိုဝ်ႋၯာဍေၮှ်လှ်။