Hawar Tornêcengi
Muzikê Dêrsim/Zazay de şinatkar u hunerberzi roz ve roz jedinê. Gurê Mikail u Ahmet Aslani ra dıme, Cd’ya Zerifa Zerrin u yê Cemil Koçgüni vejiye. Na rozu ki Cd’ya koma „Zazvaj“ kute’ra ma dest. Namê CD/Kasete „Qirina Evinê“ yanê „Qırayisê Eşqi“ yo. Namê CD’ye çıxa ke kırdaşkiyo, jederê deyiru/lawıku zazakiyo. 7 lawıki Zazakiyê, 5 hevi ki kırdaskiyê. Ez guman ken ke namê CD’ye vetoxê CD’ye; MİR-Muzik namekerdo. Deyirê Zazaki : Mı va bê / Hey Boynı / Ero Bıra / Tı mebermı /Ez Se keno / Þone (Þüane) / Emkeyna. Deyirê Kırdaski : Çavên Evinê / Dilara / Hêvi / Keçka Xerib / Meyrik.
Koma „Zazvaj“ hirê alvazu/embazon ra saniya pê. Rodi Karahan, Mahir Üzmez u Felat Kanhan. Ni hirêmena ki Almanya de Mektevo berz de wanenê. Yanê hona Talebeyê. Ni cêncu Muzikê xo eve usılê „Jazz u Blujazz“ vırasto. Muziko de moderno. Domani eve hewes gosdanê. Dı lawıki estê ke, zonê domanu ra nêgınenê waro. Lawıka jüye „Mı va bê“ a bine ki „ Boynı“. Lawıka „Þone“ (Þüane) ki jê serva domanu jê „Alibaba’nın Çifliði“ vajiya, hama verziyonê Hemılkao. Oncia ki domani cıra haskenê, tey vengê heru, kutık u diku esto. Çı veng ke wazena, tede esto. Na CD de emegê xeyle mordem u phoştdariya wayirê Firma u Dukanu tey esto. Koma Zazvaj ki cırê bexudariya xo vana. Kaleka/kişta Ahmet, Bülent, Cem u Civan u Pirsanat ra Cengizi de, Zaza Yaşar ki emeg do ve cı. Ma, Zaza Yaşari derheqa Zazaki de gurenayişê deyra naskeme/sınasneme. Nejdi de kıtavê xo; Qesebendê Zazaki-Almanki vejino.
Lawıka „Mı va bê“ niara: Mı va bê, Mı va bê, Mı va bê, Mı va bê Bê bê… bê bê, bê bê, bê bê
Keynek nomey to çinaw Mıra duri zaf mevındı Ez wazen tora vajo Ez tora zaf haskeno Mı va bê, Mı va bê, Mı va bê, Mı va bê Bê bê… bê bê, bê bê, bê bê
Waxtı k’ ez to vêyneno Ez nêzon ez sekeno Tı k’ çi nêvona, sona Serey mı zaf dejeno
Vate: Rodi Karahan Muzik: Rodi Karahan u Felat Kanhan
Hey Boynı Keyney Mehmet Aðaya Komayay hında mına Sowlon suro paykena Miyond’ dew’ ra gêyrena
Boynı boynı hey boynı İna kêynek çı rında
Xo têşenona şona Aw’ sıtıli ra rışnena Kêynek ona wa mekı Boynık dewqami şona
Vate u muzik: Rodi Karahan
Lawıka „Ero Bıra“ ki hetê Rodi ra ama nustene. A ki tenê hetê politika ser vata. Hesreta brayo ke ko de vindbiyawo, ey sero jê usılê şüare vajiya.
Ero bıra
Ero bıra tı kurayi (ko raê)
Ez nêzon tı estê, çini
Gege ma qalon to kenê
Sek tı eyr-meyşt’ vejên yeni
Toyn mar kowt kuçon şarı
Toyn mara kowt zındon korı
Toyn kişyayi koyon serdı
Toyn vindbiyê nêaseni
Dew’ ma veşnay, çewek nêmend
Leyir bêmay u bêpi mend
Veyşo teyşo rojı viyert
Howna teslay m’ tora nêkowt.
Na koma „Zazvaj“ derheqa CD’ya xode nia nusnena: “..waxtı k’ reyer kê (kês) ver kon, kê nêzoni ke kura ra vecêni.
Toyn rayer esti (-ê) koyon ra, toyn rayer esti zindono ra, toyni z’ esti pênaberi ra vecêni. Ma zi zera xo jiyana penaberê da helnay; kerd deyr u stran, hes u evin, derd u keder u şımarê erşawut (rusna).
Ma en helyayiş ra vêcyay, bi ro, milçık, va, vengê bêkeso, vengê vindbiyaişi u vengê zonê dayika…
En album maw yowını de ma waşt deyron xo pey qaydey muzikê rojava bıd’ şıma şınaskerdiş. Ma baver keni k’ en karê ma weş’ şıma şêro.“
Çıtur ke qesa xuye veri de vanê, muzikê xo raşt ki eve qeydê muzikê rozşiwar (rojava/batı) vato. Hama gosê mordemi rê zaf wes yeno, ison hên desınde cıra bêzar nêbeno. Mıra gore serva muzikê ma zazakiyê cêri , Cêncu zaf gama de rınde esta. Berxudar bê, vengê şêro hometa ma. İ na game jê newdariye vênenê. Jü reportajê xode (Verason de) vanê, „hetê made muzik jêde ravêr nêşiyo, çı ke muzik icra kerdiş, ma het de qız vinino. Vanê; no gure „Qereçi“ kenê. Hama ma ki wazeme ke zonê xode muzik vırajime, wazeme saz u def pırodime. Ma hirê embaju dest kerdo cı, inaw vanime.“
Vatena dine ra hên asêno ke, jêde bêwayiriye diya, perê xo çinêbiyê ke xorê jü kaste vezê, bado na kaseta/Cd’ya xo berda Mir-Muzik, eve phoştdariya Mir-Muziki vejiya werte.
İyê ke na CD’ye wazenê bıhêrnê, şikinê dukanê Muziki ra bıhêrnê, ya ki MİR-Muzik Produktiyon ra; www.mirmusik.com, mirmusik@t-online.de, Tel. 0211/99459390 ardene dê.