ھردی ݯوکیک سخت اشناری
editاوا اویلو دفعہ تان ای رشتہ دار دورا بی (ہتو )پوشیتم۔ ہے وختہ مہ عمر البت جوش تروئے سال بوئی متے ہانیا پت معلوم نو اوشوئی کی ہردی چوکیک کیچہ بوئے؟وا ہردی کی چوکیتائی کیچہ بین بوئے رے ۔۔۔۔۔۔۔۔۔۔۔۔ ہے انوس اوا ہتو کیہ پوشیتام گویا کی تان سورو تونجے نیشیتم۔۔۔۔۔۔۔۔۔۔۔۔۔ اوا تان ہے رشتہ دار حولیہ نیشی اسیتم میزبان دی مہ نسہ نیشی استائے ہے موژی مہ ہے رشتہ دارو گرامبیشو استانہ ہیس مہ غیچی ہائے۔۔۔۔۔۔۔۔۔۔۔۔۔۔۔ اویلو دفعہ مہ غیچ ہو سورا توریکو سوم اوا تان ژانا ھیا فیصلو اریتم کی ہورو حاصل کوریکا غیر مہ کیہ زندگی نیکی۔۔۔۔۔۔۔۔۔۔۔۔۔۔۔ متے ھیہ لو معلوم نو اوشوئی کی ہیس کیہ دورو استانہ کی روپھی اسور ہے دورارا؟ یا کہ ہیس خور کورار گیتی اسور۔۔۔۔۔۔۔۔۔۔ مہ ہے لوؤ ووشکی کیہ توجہ دی نو اوشوئی اوا قم پھک بیتی ہورو کوسیکو روپھیکو وا تمام حراکاتن بو غورو سورا لوڑاؤ اوشتم۔۔۔۔۔۔۔۔۔۔۔۔۔۔۔۔۔۔۔ متے ہیہ لو دی معلوم نو اوشوئی کی مہ نسہ نشیرو مہ رشتہ دار دی مہ لوڑی حیران بیتی اسور کی ہیہ کیانی بویان رے۔۔۔۔۔۔۔۔۔ کافی مدا اچہ مہ ہے رشتہ دار مہ سار بشار گانیتائی ؟؟؟؟؟؟؟؟؟؟؟؟ اے برار تو ہو کیا پوشیتاؤ تان ہوشو دی الیتاؤ وا۔ ہیس تہ بو خوش ہویا کیاغ؟ اوا سخت شرمندہ بیتی ہو ووشکی متوجہ ہوتم۔۔۔۔۔۔۔۔۔۔۔ وا تان صفائیو دیکو کھوشش اریتم مگر ہیس مہ لوؤ ہموش رے رد اریر" اے مہ برار اوا ای گھنٹہ ہوئے تہ لاڑیمان کیہ " مہ سوم وا کیہ جواب نو اوشوئی۔۔۔۔ وا مہ ہے رشتہ داردی مہ سار عمرا کیہ بو لوٹ نو اوشوئی کی اوا ہورو نسہ کھوشیکو ضروری جاشوم۔۔۔۔۔۔۔۔۔ اوا ریتام کی یار کیچہ کوم ہیس متے ہانی شیلی سریتائے کہ اوا غیچان وا ہی ہائی الیک نو مشکیتام۔۔۔۔۔۔۔۔۔۔۔۔۔ ہو سورا توریرو غیچ وا خور کوئی لوڑیک تان نو مشکاؤ اوشونی۔۔۔۔۔۔۔ یقین کورو کی ہسے ہانی شئیلی اوشوئی کہ اوا پساتے بیان کوریکو نو بوم ای خور دی ملگیری ہتو سوم اسیتانی مگر ہیس ہتیتان موژی بو نویوکو اوشوئی۔۔۔۔۔۔۔۔۔۔۔۔۔۔ مختصر ہیہ کی مہ غیچھار اورارو بغائے انوسو دی سکون ختم ہوئی۔۔۔۔۔۔۔۔۔۔ سکولار دورا توریکو سوم شاپک کیاوت ژیبوم کیاوت نو کیہ علاجہ تان ہے رشتہ دار دورا حاضر بوم۔۔۔۔۔۔۔۔۔۔۔۔۔۔۔۔۔ مہ دورا روئے دی حیران کی ہیہ انوسی کوئی بیران مہ ہے رشتہ دار دوریو روئے دی حیران ہیہ انوسی کھیوئے گویان ہیہ موژی۔۔۔۔۔۔۔۔۔۔۔۔۔ سف مہ سورا قسمہ قسمہ شک کوریکا پرانی مگر اوا کوستے لو نو دومان۔۔۔۔۔۔۔۔۔۔۔۔۔۔ اوا سکولار گیتی شامہ پت تان ہے رشتہ دار حولیہ نیشی ہو ہے گرامبیشو دورو نگرانی کوررم۔۔۔۔۔۔۔۔۔۔۔۔ کا کی ہے دورو بیر متے ہش سریر کی ہیس البت ہو مشکی گیتی اسور اوا سخت پریشان بوم ہتے موش اچی بیکا پت ہسے کی بائے اوا تان رشتہ دار پھوک ژورو اف ویشیم پتہ کوری گئے ہو موش کھیوتے گیرو بیرائے رے۔۔۔۔۔۔۔۔۔۔۔۔۔۔ ہسے بوغاو اچی گیتی متے مشقری دوئے ہش کیہ لو نیکی ہسے خور کیہ کورمہ گیرو بیرائے رے۔۔۔۔۔۔۔۔۔۔۔۔۔۔۔۔۔۔۔ شام بیکو اوا تان دوروتے بیم سکونہ۔۔۔۔۔۔۔ کوریکو مہ تسلی بوئے کی شامہ پت اوا ہتیرا اسیتام ۔۔۔۔۔۔۔۔۔۔۔۔۔ ہسے ہنون اسور رے۔۔ اخیری کیہ صبرو کیہ حد نو ہوئے مہ تان معمولات دی بو ابتھا ہونی ہے وجھین۔۔۔۔۔۔۔۔ ای انوس تان ہے رشتہ دارو دوسیتام کہ تو کیاغ کی کوسان ہو متے دئیکو بش کورے تہ ہے موشو سوم مشقولگی شیر اچی تہ گرامبیشو تہ لوؤ کار کوروئے۔۔۔۔۔۔۔۔۔۔۔ ہسے اویلا نو زوئیتائی مگر اوا دی کیہ ہتو پیچھیکو لو نو ہوئے مجبور بیتی ہسے مہ بچین کوروم کوریکو تے تیار ہوئے۔۔۔۔۔۔۔۔۔۔۔۔۔ اوا اف بیم جام ہیس کی مہ لوا تتے دیرو بیرائے بو جام ۔۔۔۔۔۔۔۔۔ اوا بو خوشان بیتی ہے انوس تان دوروتے بغاتم پورا چھوئے مہ اورارو نو ہائے۔۔۔۔۔۔۔ کیاوت روشتی خامیر وا کیاوت اوا سکولار اچی گیتی پھار بی بشار گانی گوم۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ بو سختی ہیہ وخت پھار شوخسیتائے۔۔۔۔۔۔۔ چھوئے روشتی خومیتائے،،،سکولو وخت ہوئے،،، سکولوتے بغاتم ، اچی ہاتم وا شاپکو کا خبارا ہائے بستو ای گوچی پراچھی اچی تان رشتہ دارو دورا حاضر ہوتم۔۔۔۔۔۔۔۔۔۔ مہ رشتہ دار بو افسوس کوری" یار ہنون اف بیکو نو بیتم" ہوئے تو پریشان مو بوس اوا کیاوت کی اف بوغدو بیراتم تتے لو دوم۔۔۔۔۔۔۔۔ مہ دماغ بالکل الٹا ہوئے متے سریتائے کہ ہمو کی ماریم رے مگر وا دی معاملہ ہتو ہوستہ اوشوئی پھک بیتی تو شوت دیکار غیر کیہ چارا نو اوشوئی،،،،، ک کم از کم ای ہفتہ ہسے مہ سوم ہموش اشٹوک اریر کیاوت اف بیکو روخسیتام ریر، کیاوت اف بی استام دورا کا نو استانی رے مہ ٹیر دوئے، کیاوت بو ژون استانی ہش نو رے اچی ہاتم ریر، وا کیاوت مینو استانی ہتیتان نسہ ہش ریکو مزہ نو کوئے رے اچی ہاتم ریر،،،،،،،،،،،، مہ پھوک شیرو لئے دی ہے انتظار چھوچھو ہوئے۔۔۔۔۔۔۔۔۔۔ اخیری مہ کیہ وسار بی اوا ریتام کی یار تو مہ کورمو نو ارو اوا تان کیاغ کوم تو وا ویزی مو کورے۔۔۔۔۔۔۔۔۔۔۔ ہسے لوڑیتائے کی اوا خفا بیکو چق۔۔۔۔۔۔۔۔۔۔۔۔۔۔ ہنیسے مہ سار ای انوسو وخت مشکیتائے۔۔۔۔۔۔۔۔۔ تو چھوچی کی ہاؤ اوا کیہ مشقری تتے دوم رے مہ ویشیتائے۔۔۔۔۔۔۔۔۔۔۔۔۔۔۔۔۔۔ چھوچی اوا کیا خاص امیدا نو انگار تان معمولو مطابقہ ہتیرا بغاتم ۔۔۔۔۔۔۔۔۔۔۔ ہتے انوس واقعی ہسے اف بوغدو بیرائے وا ہتے موشو سوم لو دیتی گیرو بیرائے۔۔۔۔۔۔۔۔۔۔۔۔ ہے انوس پتہ ہوئے ہے موش دی اسپہ ژاناوا موش بیرائے۔۔۔۔۔۔۔۔۔۔ بہرحال درنگار نو کوروم ۔۔۔۔۔۔۔۔۔۔۔۔ جام ہوئے یا شوم ہوئے ہردیو معاملہ کیہ طریقہ اوا ہورو گانی اویتم ۔۔ ۔۔۔۔۔۔ مہ وا کیہ کورام نیکی بش سکولار کی ہاتم ہو گوچی اوتی اسوم کی شام بوئے۔۔۔۔۔۔۔۔۔۔۔۔۔ ھانی مہ خوش اوشوئی کی دوری نان کائےگینی سف مہ سوم جنجال کورونی مگر مہ کیہ ای میلیٹ دی ہو سار دودریری بیکو گنجائش نو اوشوئی ۔۔۔۔ دودیری دی کیچہ بیتی بوم ھانی سختی خیشی ہو انگیتی اسوم۔۔۔۔۔۔۔۔۔ دوری کا کی ہانی مہ قہر گوئےکوریکو کی مہ پھوک درپت ہتو نسہ بی نیشیلیک بویان۔۔۔۔۔۔۔ مینو کی ہائے متے دش دوئے۔۔۔۔۔۔۔۔۔۔۔۔۔ بس مہ وا خور کوروم نیکی اوا ہورور سم تان مصروف،،،،،،،،،،،،،،،،،، ای انوس اسپہ سکولار اشٹوکو مقابلو بچین خور سکولوتے ویشیتانی ہتیرا بی اسپہ تروئے بس بیلیک ہوئے،،،،،،، ہے تروئے بس متے تروئے سالو سار دی زیاد سریتانی ہیس مہ زندگیہ اویلو دفعہ دورار نیشی تروئے بس تیریک اوشوئی۔۔۔۔۔۔۔۔۔۔۔ نانو بچین دی ہردی پھت ہوئے کائیگینی دی بو یادی ہانی ملگیریان دی بو یاد اریتم ہے تروئے بسو موژی ۔۔۔۔۔۔ زیاد مہ خیال ہتو سوری تان کی ہسے کیچہ اسور مہ ہردی برق لین بیتی شیر کیاوت تو پاشیم۔۔۔۔۔۔۔۔۔۔۔ تروئے بسہ ہے اشٹوک نسی نسیکو قیدی رہا بیروؤ غون اوا دی بو خوشان بیتی دوری ووشکی راہی ہوتم ملگیریان دی نو ویسی بی تان دورا توریتام سفان سوم ملاقات ہوئی مگر ہتو کیہ پتہ نیکی دوری چائے مائے پیتم کیہ پتہ نو ہوئے۔۔۔۔۔۔۔۔ اف نیسی تو مشکی دورو نسار نس کوسیتم کیہ دارک نو۔۔۔۔۔۔ مہ ژان لین غیری اچی گیتی نانو سار بشار گانیکو ہسے ای ہش لو متے پرائے کی مہ تمام امید ختم ہونی وا دنیائی حل بیکو بے مقصد جوشیکا پھریتام۔۔۔۔۔۔۔۔۔۔۔۔ اوا تروئے بسوتے دورار بیری بیکو موژی مہ مامو مینو گیرو بیرائے،،،،،، وا مہ دورو روئے مہ غیر حاضریار فائدہ گانی مہ ہے شہ شئیلی ہردی چوکونو وا مہ بو خوش "نارکوکو "مہ ماموتے کوشیرو بیرانی(نیویشک: محمد طاہر شادان)