محاورہ|متل یا متال
محاورہ کھیوتے ریر متال کیہ اشناری؟کا بشار گانیکو اوا ریم کہ۔ چیقیہ سکولار کھؤشت بیتی اوشٹوراوا لوٹھؤروان پوشی کا غیچھان چھور کوری لاڑینی کا مہ نورغیچی دونی۔ مگم متے تھؤن کا نوبونی۔ کرا توریرو دادو نسہ کرانو شیرو بونی۔ غیچھین پوشیران لگینی گڑؤچو بوے۔ مہ چیقی ای وشکی ہوش بوتین کہاکو غون پروشٹہ شیروو ڑش کوری چھؤچو کیہ فہمہ نو۔ ای ویشکی نان تتان کرا چھؤمیک ای ویشکی نان تت کہ نو چھیچھیتانی داربوخت چھینی مگم اوا کیہ بوختہ شیخی دیک دی نو ژانیم۔ مہ پوشَک لوٹھوروان غیچ پوشیہ غیچھان اسمانی دیتی کاسینی۔ نہ کا تا۔تا کوریکوت تیار ہونی نہ کا سورو مژیتانی۔ مہ غمو کا ژیبویان مہ حالت ہوالوتے چَت مگم تان ژانہ باچھا۔ نَشک ریچؤ روم اسمانتو۔ سُستوتے سنجت۔سنجت پؤشی کَروگؤچھین پؤنگ نییم۔ نانو دمدار دوکانار سودا انگیاوا خڑاو کٹی کوری جیپو دیتی ملگیریان میلسہ چُھؤچھؤ اسقال۔موٹو کوتیر گانی نیروغی کوشیم تین پانچ کوریکو کوس کیہ مجال کھاکان نیزیم۔ بونیغ بیچیو توغنو ایوکنان التی قیمت شاہ استاذو شونو مہچی استاذو دی دمدار ۔ سکولہ حاضری چاکیکوسوم کارو گؤچھن پونگ نییم۔ دیہہ ملگیریان موژی کونڈؤڑ موشور۔وخت توریکو سفوت ژؤڑی سرناے نیزیم۔ لُو چؤپیک۔ رویان ٹیر نیزیک روے اونگؤشیک مہ عادت۔کا کہ غیچی بی نو کراچھینیان ہتیتان سینہ التی اُوغ نو دوم۔ کوس کہ کوماڑین تیل لاچھوران ہاتو نسین غیردوم۔شونین دوم۔مگم کھکو اہی نیزیکو نو لاکوم موقع لوڑی تو ٹونگتو اوسیم۔ وے ژیلاؤو بیتی آسمان کِیشیک عادت مگم پروشٹہ دونیم ماشیلیکہ یور ویسیک نو کوم۔ چمچلاق نو کیشاکانتے ویز سینہ التی اوغ نو دوم۔ سنجتوت کپالین شران ماژیم۔ سست مہ پوشی اوغہ دونی۔ رویہ دیروو گروچ کوریک شوم عادت۔ بوسک موخی موخو پلیسک ژینگیے متے غیرغیر مہ نسین وے دولو پھانینی ہیتان کارو بی شیر مہ باریکی طبیعت ژانہ کہ تورتاے ہیتان ویرمہ اوغ دریم۔ ہیغین دیتی ہیت مہ موخ دیشیو بارو دی تان کریمہ گانی سین کروٹ انگؤے بوغوزو استانیر۔ ای پھت ملگیری مہ دمدار ای پھت نہ توشو سوری نہ رشو سوری۔ دمدار ملگیری پھونک نو بیتی دی شومو بہنا ہیتان ٹیکہ لاکھونی۔ ہیت ہونار نیسی ریشٹو موڑتو بیکوت تیار نو ہغین دیتی ضرورتو وختہ گوردوغوت تت ریلی رے پھیک بونی یا آئی دیرو ڑائی شمینیو پوشی بوحتویرو غون ہیتان پوشی دی اوغہ دونی۔۔ پھت ملگیری شوم اڑوکو بی بو شوم رویو لؤو چقہ لو گارے بیکن کیا وت کیات کروے لگینی شا کپالتو بان بوے۔پھتی ہش خود کہ پالوم شغور لمبور باتیر۔ نوغ ملگیریانتے پیش پیش تہ تت کیچہ پھانیر تو دی ہروش پھونے رینی۔ پھاتی ہش بونی کہ ذوخ اژیکہ توکھونو۔ نوغان بچے پرانو ملگیری دی زہچ رینی شاپیرو یار۔ اوہ ای لو دوم ژور تتے ریم روژایو کار کورے رے ذقو بندیکو چیق تان مہمیز کوے۔ پچھانہ اوا ذوندرے تو ذوندرے استارو کا ہون دوے۔ سف شاپیرو شرمندہ کونی۔ اوا ہش جاشوم کہ ژؤڑ مہ خوش پھشماک مہ دِش۔ ہیت مہ پھؤک کورموتے ڑؤوتے شیرما سامون کوری تیار بونی۔ کیاغکہ متے نو ہوے متے نو باک چیدینو گوغ لوچھار (اصل لفظو معذرتو سورا بدل اریتام) رے نہ متے کپھینی نہ تتے ڈؤری کوم۔ ہے قسمہ سکولو امتحانو وخت بیکو دورو روے شوم ژوروتے کیہ گہنا شوم ژاؤوتے کیہ یراغ نو رے نگرانانتے بوینت دیکو جوش اچی جوش جو پاس کوری ہیغار توری اوپنہ سبق راسوم محاورہ اوچے متال مہ کرا چھومیک ۔ کیہ دراکہ نو دوم۔ انگار آسمان کشیمان کیہ قون پھیرو مہ ہوستار نو گوے۔۔ ملگیریانیے اوا بو ویرمہ دیرو دوکہ دیتی مدوکہ اہی نیے کوئے لؤو کوئے دیتی پسہ دی کھاکو اہی نیتام کوس پونگی کہ گیرو براے جام کہ نو گیرو براے متے نیوییشیمی نو۔ پسہ موژی کوستے پتہ کہ شیر محاوروچے متالو بارہ متے لو دیور پسہ موژی مہ غیچھو شائی کا دی نیکی۔ سف مہ غیچھان روشتی۔ مہ سوم غیچہ ٹیپ اوا پسہ تے غیچ کوم ۔ مہ لوان نو خوشیے مہ بڑیکھین نو نیزور پسہ ژنہ غیرووم۔۔۔اقرار الدین خسرو