Chalen chaq q’e kutank jwal wank xloq’al li k’anjel, jo’kan naq tento li k’anjelak sa’ qab’een. Teneb'anb’il sa’ qab’een xtawb’al junaq li k’anjel b’ar wi’ too’elajinq. Wank aj wi’ naq li k’anjel yal q’axtesinb’il aj wi’ chi ru junaq. Sa' li tz’iib’ a’in, naqaj xtawb’al ru chank ru naq nak’ulmank.
Eb' li qamama’ qixa’an nake’xye naq ak xpohol xchahimal li junjunq. Naq a’an jun nak’amok xb’e junaq li poyanam chi ru li xyu’am. Nake'xye chaq qe naq wi junaq poyanam, xxaqab’anb’il sa’ xb’een naq hulaj kab’ej li k’a’ ru tnumsi wi’ li xkutank, a’an chi rix li b’anok, naab’al sut, naq naxk’e rib’. Nake'xye aj wi’ naq wankeb’ li komon, jwal seeb’eb’ chi aatinak, a’an ak reheb’, ak xmaataneb’. Wankeb’ aj wi’ li komon, jwal nake’xk’e li k’a’uxlak. Ink'a’ yook aawab’inkil naq taaye, yal b’an li k’a’ ru yook a’an li xtz’ilb’al rix li k’a’ ru yooqat xyeeb’al ut wi taapatz’ k’a’ ru naxk’a’uxla chi rix li toja’ taaye. Hoon aj wi’ tch’olob’ chaawu. Moko yal ink’a’ ta wank xch’ool chaawab’inkil, yal ha’ reek’ naq jo’ka’an li xyaalal li xyu’am.
Wankeb' aj wi’ li komon, jwal seeb’eb’ ruq’m chi b’onok, malaj chi pak’ok, chi tz’uluk, chi kemok, chi tenok ch’iich’, chi jachok che’, chi tz’iib’ak, chi jalam’uuchink. Jo' nanawmank, moko yal jun ta li k’anjel uxk naraj.
Ink'a’ chik naruuk naqamuq aj wi’ naq li wank yook chi jalaak. Junxil chi us wankeb’ laj iiqanel, anaqwank wankeb’ li kok’ taksi li naruuk tatxk’am chi tiktook. Moko toj najt ta tatxik xb’oqb’aleb’ laalo’y chi rix xpayb’al junaq aameex, anaqwank ka’aj wi’ taachaapuku junaq aab’oqleb’, yal hoon aj wi’ tnaw k’a’ ru li nakaawaj. Ka'aj b’an wi’ naq li xb’aanunkil a’in, wanq aj wi’ xtz’aq laab’oqleb’. Wi ink’a’, aran wank jun li ramok.
Ink'a’ aj wi’ naruuk naqakanab’eb’ chi ixb’ej, eb’ laj yakoneleb’ ut eb’ laj k’ay tzakahemq. Li yook chi chalk chi qu, naxtz’aama aj wi’ naq li k’anjel wank yookeb’ chi chalk, ma yooko ta wi’ xk’eeb’al reetal. Ma kawresinb’ilo chi xb’aanunkil, ma yal te’qileb’ li jun raqal.
Naruuk naqaye naq jwal yo’oon li uxk traj. Ka'aj b’an wi’ naq li k’a’ ru tqab’aanu, chi qab’aan ta chi anchal qach’ool. Li k’anjel li yook chi chalk naxtz’aama aj wi’ naq kawresinb’ilaqo chi us ut chi chaab’il.