رچناوی لوک مائکرو فکشن۔
کوبرا تے چاندنی ۔۔
بینر بشکریہ الیاس گوندل ۔۔۔
چور کوبرے نوں بھجا کے کافی دور نکل آیا۔ کوبرا دی چوری کرن لئی چور نوں کئی سال تے وڈی محنت کرنی پاے گئی ۔ کوبرا ہک وڈا تیز طراز تے بدماشڑا گھوڑا مشہور ہائی۔ مہر نورے دی چور چور دی کوک سن تے لوک اپنی گھوڑیاں تے گھوڑے تے سوار ہوکے اسے طرف نکل پئے۔۔
چاچے گامے دی گھوڑی چاندنی ، اتھری ، خرناس تے بھجاک اے۔
اوس دے واسطے اے دوری سہی مگر مجبوری نہ رہی ۔اودھے منہ چوں جھگ تے کوبرے نوں پکڑن دی چس نال ہنکاں وی نکل رہیاں ہن ۔
او دوروں کوبرے دے بو سنگھ کے ، ہوا نال گلاں کرن لگ پئی ۔ دوجھے سوار وی پچھوں مگر کجھ دور رہ گئے ۔ کجھ دیر بعد ای چاندنی کوبرے دے چور نوں پکڑن دی ہک چنگی کوشش کیتی ۔
پر دوروں ویکھ کے کوبرے دے مالک مہر نورے اچی
آواز اچ چور نوں آکھیا۔۔
اوے لگام سنبھال۔۔ لگام سنبھال۔۔
چور نے جدوں اے ہکل سنی تے اوس نے لگام تے چنگی طراں قابو پا لیا ۔ کوبرا تے اوہدا چور نظراں تو دور ہو گئے۔۔
واپس آندے سارے مایوس سوار چاچے نورے نوں گالیاں کڈھیاں تے لعنت ملامت کرن لگ پئے۔
چاچا ۔۔ پر اے وی تے ویکھو۔۔ کوبرے نوں چاندنی پکڑ لیندی تے میرے کوبرے دے پلے کے رہ ونجے ہا؟
سارے چپ ہو گئے۔۔
دوجھے دیہنہ چور چاچے دے گھر آگیا۔اوس نے کوبرے توں لہہ کے چاچے دی غیرت نوں سلام کیتا تے کوبرے نوں واپس کلے تے بنھ کے اپنی راہ ٹر پیا۔۔