رچناوی لوک کہانی
کنڈ ۔ بینر بشکریہ الیاس گوندل۔۔۔
ہک بندہ دی اولاد کوئی ناہی۔ اوس دی بیوی وڈی نیک پاک تے سیانی بی بی ہا۔ اوس مائی نے اپنے گھر آلے دی دوجھی شادی خود کرائی تے دلہن پرنا تے لاے آئی۔
سال دو سال بعد اوس وچوں اللہ اوہنوں پتر دی دولت نال نواز دتا۔ اوس بندے دی پہلی نیک بی بی اوس بچے نوں اپنا پتر بنا لیا ۔۔
بدقسمتی نال دوجھی بیوی دا تعلق اپنے ہک پرانے عاشق نال ہائی پیا۔ اوہ اپنے عاشق نوں اپنے گھر بلا لیندی ہا۔
ہک رات دا واقعہ ایس طراح ہویا کہ او رن اپنے عاشق کول ونج بیٹھی پر بچے دے روون دی آواز دوناں نوں مسلسل آون لگی۔ عورت خود اٹھی تے بچے نوں سما آئی، پر دوجی وار فیر اینج ای ہویا ۔ اک وار فیر بال نوں پچکارنا تے سماونا پاے گیا۔ پر جد تریجی وار رن اٹھی کے گئی تے اپنے سگے پتر دی گچی مروڑ تے سٹ آئی۔ ۔
جسم دی گرمی تے سنگ دلی تے شرم غالب نہ آ سگی۔ بلکہ اوس دے جسم دی گرمی تے بے شرمی کجھ ہور ودھ گئی۔ اکھاں تے چڑھی چربی ناں پگھلی۔
عاشق نے پچھیا ' ہن تے سب کجھ ٹھیک اے؟
رن آکھیا:
"نہ سوہنا۔ مار کے سٹ آئی آں۔"
عاشق اے سن تے حیران رہ گیا تے اوس آکھیا ”بے شک اے بچہ میرا ہائی، پر ایہہ تو کے کر آئی ایں؟“
کاوڑ نال چھمک چا تے اوس چار چھمکاں رن نوں کنڈ تے دے ماریاں ۔ رن درد تے ڈر دے مارے گھر بھج گئی۔
اوس نوں ہوش آیا کہ میں اے کے کر بیٹھی آں؟
پر اوس دے شیطانی ذہن اچ ہک منصوبہ آ گیا۔ اوس قتل اپنی سوکن دے گل پادتا کہ اس نے میرے پتر نوں مار دتا اے۔
پلس آگئی تے اوس دی سوکن گرفتار ہوگئی۔ او روون لگ پئی تے جدوں رن دے عاشق ویکھیا کہ بے گناہ مائی قتل جئے گندے کیس اچ بے گناہ پھس رہی اے تے اوس نے تھانے دار نوں آکھیا کہ بال دی اصل ماء دی کنڈ توں کپڑا لاہ کے ویکھو۔ اگر چھمکاں دے نشان ہوون تاں وت اوہا ای قاتل ہے۔
تے نال ای بندے نے چلتر دی کنڈ تے ساری کہانی تھانے دار دے سامنے کھول کے رکھ چھوڑی۔ اقبال مٹ