استاد طالب حسین درد لکھت :- بھائ ظفر ریڈیو تاں اٙدھی صٙدی تُوں ساڈےکول وٙگ رہے ہائن ۔ستر دےدہاکے وچ جدن بھٹو صاحب نیں مڈل ایسٹ دےمُلکاں نال مٙذدُوراں تے کاریگراں نوں گھلن دے معاہدے کیتے تاں ساڈے وسبیاں چوں اُتھے گئے فوجی، حاجی'مذدور تے کاریگر اُنہاں مُلکاں چوں ہٙٹ کے جاپانی ریڈیو تے ٹیپاں لے آئے۔پنڈاں تھاواں اچ ٹیپاں تےکیسٹاں دا ہڑ آگیا جاہ جاہ تے میوزک سنٹر کُھل گئے۔ مُڈھ اچ احمد خان ملنگ دےگاوناں تےہیمڑیاں دئیاں بھریاں کیسٹاں وگنیاں شروع ہوئیاں۔اوہدوں پچھے ہکےویریں دوہڑےماہیئےلکھن آلے شاعراں تےانہاندئیاں کویتاواں نوں گائون آلیاں دا پُور لہہ پیا۔انہاں گلوگاراں وچ بشیرا چوکی آلا گاموں ٹاہلی آلا،منصورملنگی، اللہ دتہ لونےوالا تےطالب حسین درداوراں دےناں سِرکڈھویں ہن۔ اُنہاں سبھناں وچوں طالب حسین درد اوراں اجہے گائیک ہائن جنہاں بڑا چِراپنےگاوناں نال شوقیناں دا دل موہیا اے۔اوہ ضلع جھنگ دےہک نِکے جِہے ٹھٹی واڑے خانوآنہ وچ جمیں۔ نِکیاں لاں توں میلیاں کھاڑیاں دے شونقی آہن ۔جتھے لوکائ دا دل پرچان کان وڈے نکے فنکار اپنےاپنے فن دی جٙوت جگیندے ۔انہاں نوں سُن ویکھ کےطالب حسین درد دےاندر وی گون دی سدھر جاگ پئ تے انہاندا اُلار گاون دھرہوگیا۔گلےاچ سُر ہانیں ۔ سُندےسُندے آپ وی گون لگ پئے۔آہدھے ہن انہاں پہلے ویریں نور پورتھل دے میلے تےگانویاں ہاہ۔خوش قسمتی نال مُڈھ توں ای انہاندی مِلنی ہک وڈے لوک فنکاراستادنزرحسین خان ڈھوکڑی آلےنال ہوئ تاں انہاندےاگےشکر رکھ کے موسیقی دی مڈھلی تعلیم اُنہاں کولوں لئ ۔استادنذرحسین خان اوریں بڑے گُنی فن کار ہائن انہاں دے گون وچ لوک رس رچیا مِچیا ہویا ہائ۔ ایہہ کویں ہووےجےاُستاد دارنگ شاگرد اچ ناہ آوے ۔ ڈھوکڑی آلے دی گائیکی دا پٙکھ طالب حسین دی گلوکاری وچ سداجھلک ماردارہیا اے۔ جدن وی اوہ پہاڑی اچ مُہاڑی شاعرراء منور اوراں دے دوہڑے یا ماہیئے گاندے پرانےسُنوئیاں نوں اُناں دے استاد اوراں دے گون دی ادا یاد آندی ۔طالب حسین درد دےمن وچ ہک سچے فنکارآکوں موسیقی دے فن دی تریہہ مڈھ لا توں ہائ۔اوہنوں بُجھاون واہتےہرکھُوہ نوں گیڑن کان اُباہلے ہوندے اِیہہ پیاس اُنن موسیقی دے دریا استاد سلامت علی خان اوراں کول وی لے گئ۔انہاندےدوارےتوں وی اوہ اپنی بھانگےدی قسمت بٙرات جٙھولِی پٙا لےآئے۔ ہُن اُستاداں دی خیرنال انہاندے گون اچ سُراں اُتےقابو ودھ گیا تے گائیکی ہور وی نِکھرگئ۔ایہہ گل کوئ چالی سال پہلاں دی اے۔اُدن طالب حسین نکیاں نکیاں محفلاں وچ گاون دا مڈھ بٙدھا ای ہائ۔ہک سٙچے فنکار آکوں اُنہاں درد بھرے جذبے اچ سٙیے کےجیہڑے گیت گانویں۔ انہاں دے اندرلےاحساساں نوں اپنی گائیکی وچ مٙدھ کےانج دا درد پیدا کیتا جے سُنن آلیاں دےدل اندر وی تراٹاں وگن لگ پون۔ پیاردی مِٹھیاں پیڑاں نوں اپنی گائیکی دےسُراں نال جگاون توں" درد "دا لفظ طالب حسین دےناں نال لگ گیا تے ایہہ فنکار سدا کان درد بن کے جیندا رہیا۔ مرحوم دے چلاناکرن ونجن توں بعد وی ایہہ لفظ انہاندےناں تے گائیکی دی سنجانپ بنیاں ہویا اے ۔طالب حسین درد اوراں ساری حیاتی فن دے کسی قاعدے کُلیےنال بٙجھ کےسنگیت کاری کیتی اوہ بندیاں نوں راجی کرن کان چُھڑےگاون دےبرخلاف رہے۔نالےرب نیں اوہناں نوں شاعری دی باریک رمزاں سنجانن دا لطیف ذوق تے سُوجھ بُوجھ وی دتی ہائ۔اوہ گائیکی وچ ودھیاتےماڑی شاعری دی گل دا وی بڑا دھیان رکھدے۔اُس زمانےوچ چنگےلکھاریاں دی وی کُٹ ہائ ۔ گاون آلے نوں ودھیا توں ودھیا کلام لبھدا پراوہدے وچوں وی اوہ چونڑ چُن کےستھرےشعر گاوندے۔ چونڑویں ودھیا شاعری تےانہاندی اٙنمُل گائیکی، دوآں رل کے دل وچ دھاءونجن آلے گاوناں دا انج روپ دھاریا جے سُنوئیاں دے دل کڈھ لئے۔ایہہ گل سچ اے جےانہاندےگاوناں دی ڈھیر شونقی خلقت ٹھٹھی واڑے دے جٹالےوسبے دی اے جیہڑی طالب حسین دے مٹھے گیتاں تے کملی ہے۔اوہ گوئیےوی تے نالےبندےوی چنگےآہن انہاندا ہک ذاتی وصف ہائ جےاوہ ماڑے سنگیاں دے ہک صد تےپروگرام کان لگے ویندے کدیں لالچ ناہنیں کیتا۔اوہ جتھےگائیکی دا پنڈال سجیندے دور دور توں آئے لوکاں دے ٹھٹ دےٹھٹ لگ ویندے۔اوہ پتھلامارکے پیٹی اگےرکھ کے گون گاندے پچھے بیٹھے سازندے جوڑی بانسری نال ساتھ دیندے۔ انہاں مُڈھ توں میلےٹھیلے تے شادی ویہواواں وچ گاون گانویں۔انہاں موقعیاں دی پرانی رسم لوک گیتاں نال بدھی اوئ اے۔طالب حسین درد اوراں اس منجھی اوئ ریت نوں اگاں ودھایا تے اس وچ نویاں گیتاں'گاوناں'نویاں طرزاں تے سُراں دا وادھا کیتا۔ اوہ اتھوں دے پرانےوسنیک ہائن 'کجھ انہاں دی بھاری سُریلی آواز' لوک گاوناں دےڈھنگ نال میل کھاندی ہائ جس توں لوکاں نوں انہاندے گائے گاون دیوانہ کر دیندے۔ اُنج وی لوک گاوناں اچ وڑی چِھک ہوندی اے۔ سُنوئیے انن ڈاہڈھا کٙن دھر کے سُندے ۔ نری پُری ایہہ گل نہیں' گاون آلےدےپلےکجھ نہ ہووے تاں لوکی تاڑی مار کے سٹیجوں لاہ وی دیندن۔استاد طالب حسین درد دے گیتاں انہاندا ناں اُچاکیتا انہاندے مِٹھے بٙولاں تےسُریلی طرزاں توں ایہہ گاون محفلاں دی جان بن گئے۔طالب حسین نیں اپنی لوک گائیکی دارنگ اپنے استاد دےڈھنگ اچ بھگو کے بنایا۔ انہاندے رنگ اچ وادھے کرکےانج دا گوہڑا کیتا جےمُڑ دوجھا کوئ انہاں آر گا نہیں سگیا۔انہاں لوک گیتاں دے مصرعیاں وچ دوہڑے دی سٙتھری لاء کے گاون دا انداز اپنایا۔ جس نال ہنجابی دوہڑے دی صنف نوں فروغ ہویا۔اوہ دوہڑا پھبا کےانج گاوندے جےاوہدا سارارٙس نُچڑ کےسُنوئیاں دےکٙناں چوں دِلاں اچ لہہ ویندا ۔اِس تُوں دٙوہڑا اُنہاندی گائیکی دا رسیلا ایٹم مٙنیاں ویندااے۔اُنج تاں استاد اوراں ہر راگ دے تار چھیڑ کے گیت گانویں۔ پر مٙانڈ دی مقامی شکل جوگ وچ اُنہاں اپنےنویکلی طرز نال رٙجویں گاون گیت رچائے۔ اُنہاندا اپنا تےاُنہاندےشٙوقِیناں دا وی ہرمن پیارا راگ جوگ اےجس توں انہاندے چاہوان اُنن جوگ دابادشاہ آدھن ہک ویریں انہاں جھنگ اچ مہدی حسن خان دے اگےجوگ گنویں آپ دسدن کہ انہاں میری وڑی سراہناکیتی ہائ ۔استادطالب حسین خان اوراں لگ بھگ اٙدھی صدی تائیں اِتنی سِہج تے مِٹھاس نال لٙوک گیت گانویں کہ ساڈی لاہم دی بٙولی بٙولن آلیاں پٙٹِیاں اچ اُنہاندی دُھم پئ رہی۔اوہ پٙرار سال 17 مارچ2019ء نوں ایس جہان توں چلاناں کرگئے۔اج وی انہاندے گائے گیت لوکاں دے دِلاں تےراج پئے کردے ہن ایہہ گاون گیت کدیں نہیں مرسگدے کیوں جے انہاندی لوء حالاں وی پِھکی نہیں پئ ایہہ اجے وی سٙجرے لگدِن تے سُنن آلیاں دے غم دے سٙواد نُوں دُوناں کر دیندن ۔