رچناوی لوک مائیکرو فکشن۔۔ سیانا
بینر بشکریہ الیاس گوندل۔۔۔
مدعی تے ملزم دی پنچائیت وڈے خان دے ڈیرے تے پہنچ گئی۔ او ستھی تے بوہت سیانا بندہ مشہور ہائی۔ اوس دے ڈیرے تے درختاں دا چنگا وڈا جھنڈ ، چھاں وی چنگی بھلی ،۔چارپایاں دی ترتیب وی سوہنی طراں لگی ہوئی تے اوہناں دا رخ شمال جنوب دی طرف رکھیا گیا ہا۔ حقے پانی دا وی سوہنا انتظام ویکھن اچ آیا۔
جیٹھ ہاڑھ دی لو گُھلی اوئی ہا۔ جس نوں ڈکھن آہدے ہن۔۔۔۔
وڈے خان صاب ہوراں اپنی مخصوص رنگلی کھٹ تےستے پئے ہن ۔
ملزم ہتھ بنھ تے ساری پرہیا نوں سوال کیتا:
"میرا فیصلہ کرن آلا کہڑا بندہ اے"؟
سارے لوکاں وڈے خان دی طرف اشارہ کیتا جو اے بندہ تیرا فیصلہ کریسی۔
اے سن تے ملزم صاف انکار کر دتا۔
ملزم توں پچھیا گیا جو کہڑی شئے دا تینوں اعتراض اے؟
ملزم آکھیا:
"خان دی چارپائی ویکھ لو۔ لتاں دا رخ ڈکھن آلی طرف اے ۔ ایس دی گندی مندی ہوا اس دے منہ تے آندی ہوسی۔
جہڑا بندہ ایڈا وڈا بے وقوف ہووے او میرا انصاف کیویں کریسی"؟
سارے لوکاں ملزم دے وقوف نوں داد دتی۔۔