حضرت ابراہیم علیہ السلام خطہ عرب اچ مبعوث فرمائے گئے ہک مشہور نبی تے رسول ہن۔ آپ نے توحید لئی وقت دے بادشاہ نمرود نال ٹکر لئی جیہڑا خدائی دا دعویٰ کردا ہا تے رعایا کولوں اپنڑی پوجا کرواندا ہا۔ آپ علیہ السلام نے نے اس دے اگے توحید دا نظریہ رکھیا تے اس دے باطل دعویٰ خدائی نوں علی الاعلان للکاریا جس دے نتیجے اچ آب علیہ السلام نوں انہاں دے پیؤ آذر (ہک روایت دے مطابق او آپ دا چاچا ہا) نال وی مخالفت مل لینڑی پئی کیونجے او بت بنڑاندا ہا۔ آذر تے باقی پجاریاں دی مشاورت نال آپ علیہ السلام نوں اگ دے ہک بہت وڈے بھانبھڑ اچ منجنیق اچ بٹھا کے سٹیا گیا۔ او اگ اللہ دے حکم نال آپ علیہ السلام لئی ٹھڈھی ہو گئی تے آپ محفوظ رہیے۔ آپ نے دوں شادیاں کیتیاں۔ ہک حضرت ہاجرہ علیہ السلام تے دوئی شادی حضرت سارہ علیہ السلام نال کیتی۔ حضرت ہاجرہ اچوں حضرت اسماعیل علیہ السلام ہوئے جنہاں دی قربانی دا حکم ہویا تے آپ نے اکھاں تے پٹی بنھ کے تعمیل کیتی تے جدوں پٹی کھولی تے ہک دنبے نوں ذبح ہویا ویکھیا۔ اس طرح حضرت اسماعیل علیہ السلام کولوں عرب تہذیب و تمدن دی بنیاد پئی تے آخری نبی و رسول حضرت محمد مصطفیٰ صلی اللہ علیہ و آلہٖ و سلم دا ظہور حضرت اسماعیل علیہ السلام دی نسل اچوں ہویا۔ حضرت سارہ علیہ السلام اچوں حضرت اسحاق علیہ السلام پیدا ہوئے جتھوں انبیائے بنی اسرائیل دا سلسلہ جاری ہویا جیہڑا حضرت عیسیٰ علیہ السلام دے ختم ہویا۔