حضرت آدم علیہ السلام نوں بنی نوع انسان دا پہلا فرد قرار دتا جاندئے۔ دنیا تے آپ علیہ السلام دے ظہور دا زمانہ غیر متعین ہے۔ آپ نوں دنیا تے بھیجنڑ دے بعد حضرت حوا علیہ السلام دے بطن وچوں نسل انسانی دا آغاز ہویا۔ آپ دی بہوں اولاد ہوئی جنہاں وچوں حضرت ہابیل علیہ السلام تے قابیل ڈھیر مشہور ہن۔ قابیل آپ دا تے اللہ تعالیٰ دا نافرمان ہا جدانجو ہابیل مقبول بارگاہ ہا۔ جدوں آدم علیہ السلام دے بت دی تخلیق مٹی نال ہوئی تاں عزازیل جیہڑا مقرب بارگاہ ہا، نوں تجسس ہویا جو اے کونڑ ہوسی، مڑ اللہ تعالیٰ ولوں اعلان ہویا جو او عنقریب زمین تے اپنڑاں ہک نائب مقرر کرسی۔ عزازیل نوں توقع ہائی جو اے منصب اس نوں ملسی پر جداں اللہ تعالیٰ نے آدم دی نیابت دا اعلان کرکے سب نوں سجدے دا حکم دتا تاں او غرور اچ آ کے انکاری ہویا تے رب ولوں اپنڑی زریت سمیت مردود قرار دتا گیا تے مڑ ابلیس و شیطان دے ناں نال مشہور ہویا۔ آدم علیہ السلام نوں یارہاں ہزار اسمائے الہٰیہ دے علوم عطا کرکے رب نے انہاں نوں کائنات دی نیابت عطا فرمائی۔ انہاں نوں انہاں دی سنواڑیں دے نال جنت اچ رکھیا گیا جتھوں آپ کائنات دے نظام نوں چلاندے ہن۔ اودوں ابلیس انتقام دی اگ اچ سڑدا ودا ہا جو کہیں طریقے آدم نوں اس منصب توں معزول کرائیں تے جنت وچوں کڈھا دیواں۔ آخر اس آدم علیہ السلام کولوں انہاں دی سنواڑیں حضرت حوا دے ذریعے ہک نافرمانی کرائی تے اس درخت دا پھل کھوا دتا جس توں اللہ تعالیٰ نے منع کیتا ہا۔ نافرمانی ہوونڑ دی دیر ہائی کہ آپ علیہ السلام نوں بی بی حوا سمیت جنت اچ کڈھ کے اسفل السافلین یعنی زمین تے گھل دتا گیا تے حکم ہویا جو ہنڑ جنت دے نعمتاں تہانوں نہ ملسن بلکہ تسی اپنڑی محنت نال اپنڑی خوراک آپ پیدا کرسو۔ البتہ کائنات دی خلافت مشروط طور تے تہاڈے کول رہسی جے تسی سکھائے گئے اسمائے الہٰیہ دے علوم نوں رائج کرسو تے اپنڑیاں نسلاں اچ منتقل کرسو تے جنت دے دوبارہ حصول لئی تہانوں مرنا پوسی مڑ جنت ملسی۔ حضرت آدم علیہ السلام زمین تے نہ صرف پہلے انسان ہن بلکہ پہلے نبی تے رسول وی ہن۔