تتا پانی ۔۔۔ رچناوی فکشن ۔
اقنال مٹ
چاچے غلام (مہر گاما ) دی رَنڈن تے اَوتر رَن پٹھانی نال دُوجھی شادی کل دی گل اے ۔ پٹھانی مائی نال آلی وَستی دے وڈے خان دی دھی اے۔ چاچے دی پہلی سوانی مہرانی بختاں، دے وِچوں ،جمے دوہیں پتر نورا تے بشیرا وی کل پرسوں دے میرے سامنے ای جوان ہوئے ہن۔
وڈیاں وڈیاں مُچھاں، لمے قد، ریشمی لاچے جھنگ دے ، تلے گچ ملتانی کھُسے پا کے جداں رائفلاں چا کے، علاقے اچ نکلدن تے ہر پاسے تھرتھلی مچ ویندی اے۔
اَج ہک عجیب واقعہ ہو گیا ہے۔ وَستی دے چوک اچ جمعہ بازار لگا ہویا اے ۔ ککڑ لڑیندے بشیرے دی سیون ایم ایم دا گھوڑا خدا جانے کیویں منڈیج گیا جو گولی سِدھی نمازجمعہ دی امامت کریندے، بلال خاں نوں وَنج لگی۔ بلال خاں نال آلی وستی دے وڈے خان دا بھتیجا تے پٹھانی مائی دا پتریر (کزن) اے ۔ شودا امام عشاء دی نماز کدے کدے تےجمعہ دی امامت باقاعدگی نال اس مسجد دے وچ آ کریندا ہے ،چنگا صاف ستھرا تے مولبی بندہ مشہور اے ۔۔
۔۔۔۔
چاچے دے ڈیرے تے پیو پتراں دا اجلاس جاری ہے تے مینوں وی چاچے فون کر تے بلا لیا۔
چاچے نے بشیرے نوں مخاطب کر تے آکھیا،
" اوے بشیرے، ہکو حل اے۔ پٹھانی نوں۔۔۔۔"
میں آکھیا، " چاچا خدا دا خوف کر، چار کندھاں کیویں گل لائسیں؟ شودی مسکین، نمانی اوتر رن تیرا کے وگاڑیا اے؟۔ ۔ خدا نوں قیامت آلے دیہاڑے کے جواب دیسیں؟"میں کجھ جذباتی ہو گیا۔۔
’’اوئے کملیا۔۔شریکے دی کندھ ڈھاے پووے بھانویں پتر ای تلھے آ ونجے۔ ہور رناں توں کوئ جمعہ پڑھواونا ہوندا اے"
سیانے کے آکھ گئے ہن۔۔؟ گھر زنانیاں دے تے موت بلانیاں دے، رناں دا کوئی کال تے نئیں پائے گیا۔"؟ توں جلدی جلدی شاہر ونج تےکَوڑے وٹے دا چنگا جیہا انتظام کر آ ، تے بشیرے نوں اپنا کم کرن دے۔ عزت نال عزت دا پرچہ ہوسی تے قتل دے بدلے قتل دی ایف آئ آر کٹویسوں۔
چاچے وڈے ٹھہرے ہوے انداز اچ آکھیا۔
نئیں تاں۔؟
۔ نئیں تاں کے ہوسی؟ میں حیران ہو تے پچھیا۔۔۔ نئیں تاں، تھانے دار مولبی دے قتل دے بدلے پورا مربع زمین دا منگ لیسی۔ باقی تتا پانی تاں مرداں لئی کوئی وڈا مسلہ نئیں۔ ہک تاں تساں شاہری لوک بہوں ٹھڈے ٹھار ہوندے او"۔
چاچے مکدی مکا چھوڑی۔
میں اے سب سن تے ہکا بکا ہویا بیٹھا آں۔ تساں اپنی سناو۔ میں اج کل اپنے پیو دادے دی زمین سنبھالن دیہات اچ آیا ہویا آں۔