Wp/isv/Nacionalsocialistična němečska rabotničska partija

Nacionalsocialistična němečska rabotničska partija

Nationalsozialistische Deutsche Arbeiterpartei (NSDAP)

Simbol NSDAP: orel s svastikoju
Politična partija v Němciji
Ideologija	nacionalsocializm
Vodž	Adolf Hitler
Založenje	24 fevruara 1920
Likvidacija	10 oktobra 1945
Prědhodnik	Němečska rabotničska partija (DAP)
Členstvo	8,5 milionov (1945)
Mladežna organizacija	Hitlerjugend, Bund Deutscher Mädel
Kolory partije	koričnevy
Glavno sědališče	München

Nacionalsocialistična němečska rabotničska partija (něm.: Nationalsozialistische Deutsche Arbeiterpartei, NSDAP) byla politična partija v Němciji v času Vejmarskoj Republiky i Tretjego Rajha.

Historija

Partija byla založena v 1919 g. pod nazvoju Němečska rabotničska partija (něm.: Deutsche Arbeiterpartei, DAP) i prěimenovana na Nacionalsocialistična němečska rabotničska partija v 1920. Program i ideologija NSDAP harakterizovali se krajnym nacionalizmom, radikalnym antisemitizmom i odkydanjem demokracije i komunizma, a partija byla strogo organizovana na osnově principa vodža (něm.: Führerprinzip). Prědsědateljem i vodžem partije stal v 1921 g. pozdnějši kancler Adolf Hitler. V periodu od 1933 do 1945 g. Němcija byla diktatura, v ktoroj NSDAP byla jedina dozvoljena politična partija. Obdobje vladanja NSDAP harakterizovalo se terorom, totalnoju kontroljeju nad narodom, prěslědovanjem i masovym ubijstvom Jevrejev, a takože dějanjami s naměrom pokorjenja drugyh krajev v Evropě.

V 1945 g., poslě Vtoroj vsesvětskoj vojny i podčas Nürnbergskyh procesov, sojuzniki iz antihitlerovskoj koalicije kvalifikovali NSDAP kako prěstupnu organizaciju. NSDAP byla razpuščena i zabranjena. Od založenja Federalnoj republiky Němcije v 1949 g. vsekako verbovanje ili promovanje nacističnyh idej posrědstvom tekstov, slov, znakov i drugyh simbolov jest tam zabranjeno.

Važne osoby

Srěd najvažnějših osob v NSDAP byli, kromě samogo Hitlera: Rudolf Hess (zastupnik prědsědatelja partije), Joseph Goebbels (minister propagandy), Hermann Göring (premier-ministr Prusije i glavnokomandujuči vojennoj aviacije), Alfred Rosenberg (glavny filozof partije i minister okupovanyh vozhodnyh teritorij), Heinrich Himmler (glavnokomandujuči policije i SS, pozdněje minister vnutrišnjih děl), Ernst Röhm (glavnokomandujuči SA, Martin Bormann (šef kancelarije NSDAP) i Joachim von Ribbentrop (ministr vněšnjih děl).

Rezultaty v izborah

Izborne rezultaty NSDAP v 1933 g.

Rezultaty NSDAP v parlamentarnyh izborah v lětah 1924–1933 (v procentah)

Galerija

• 
  Izborny plakat NSDAP
• 
  Koričnevy dom – Centralno sědališče NSDAP v gradu München
• 
  Shodka členov NSDAP v 1922 g.
• 
  Sjezd NSDAP v 1937 g. v Berlinu