Wp/isv/Laibach

Laibach (kir. Лајбах) jest muzična grupa iz Slovenije, založena v 1980 g. v gradu Trbovlje v byvšej Jugoslaviji. Jejin stil obyčno kvalifikuje se kako "bojevo-industrialny". Od 1984 g. Laibach jest muzična větva umětničskogo kolektiva Neue Slowenische Kunst (NSK). Druge grupy, ktore naležet k tutomu kolektivu, sut medžu inymi grupa vizualnyh umětnostij IRWIN i teatralna grupa NOORDUNG. Nazva "Laibach" odnosi se k davnoj němečskoj nazvy glavnogo grada Slovenije, Ljubljana.

Prve lěta

Laibach v 1983 g.

Laibach byl založeny 1 junija 1980 g. v slovenečskom promyslnom gradu Trbovlje, kratko poslě smrti vodža Jugoslavije, maršala Josipa Broza Tito. Prvonačelni členi Laibach’a byli Dejan Knez, Srečko Bajda, Andrej Lupinc, Tomaž Hostnik i Bine Žerko. V tečenju prvyh lět poslě svojej založenja Laibach iměl seriozne problemy s jugoslavskymi vlastami. Doprva v 1982 g. udalo mu se organizovati koncerty v gradah Ljubljana, Zagreb i Bělgrad. V dekembru 1982 g. Tomaž Hostnik, glavny pěvec i ideolog Laibacha, sovršil samoubijvstvo. Pozdněje v grupu pristupili Milan Fras, novy pěvec, i Knezen netij Ivan (Jani) Novak.

Črny križ Kazimira Maleviča

Od početka Laibach byl sporny zato, že identifikuje se s raznymi elementami nacionalsocializma i socialnym realizma. Koncerty grupy sut istinne spektakly, često na vysokyh estradah pripominajučih děla Leni Riefenstahl. Jejni členi noset uniformy, na ktoryh črny križ Kazimira Maleviča zaměnjaje svastiku. Oni često koristajut němečsku simboliku i pěvajut na němečskom. Vslěd togo, Laibach poněkogda jest obvinjaje se za nacistične simpatije. Ale iz drugoj strany jihny stil, ktory nazyvajut totalitarny pop-art, jest natoliko groteskovy, provokatorsky i prěuveličeny, že nikto ne znaje, kake ideje oni prědstavjajut v istinnosti. Sam Laibach poddrživaje tutu dvuznačnost: «My jesmo fašisti nakoliko Hitler byl maljar.»

Vo vsakom slučaju Laibach byla grupa disidentov, ktori protivili se komunističnomu ustroju. V 1983 g., podčas multimedialnogo koncerta v Zagrebu, jednočasno pokazyvali se na ekranu dva filmy: jedin propagandistsky i drugy pornografičny. Kogda maršal Tito pojavil se pored velikogo penisa, vojsko i policija prěrvali koncert, za čim grupa iměla izjehati iz Hrvatije. Poslě razgovoru na jugoslavskoj televiziji v tomže samom godu, nazva Laibach byla zabranjena o členam grupy uže ne bylo pozvoljeno izstupati, čto prinudžalo grupě prodolžiti svoju dějateljnost v drugyh državah: ''The Occupied Europe Tour '83. Prvy gramofonny zvukozapis Laibach’a pojavila se v 1985 g., ale bez nazvy grupy na obložkě. V tomže samom godu pojavil se i vtory zvukozapis pod nazvoju Nova Akropola. V 1986 g. Laibach učestvoval v velikom teatralnom spektaklu Krst pod Triglavom.

Poslě 1987 g.

Svastika sostavjena iz četyreh sěkyr, dělo němečskogo antifašističnogo umětnika John Heartfield, na obložkě Opus Dei

Medžunarodny prělom nastupil za Laibach v godu 1987, poslě publikacije jihnogo tretjego albuma Opus Dei. Mnogo popularna byla prěd vsim jihna bojeva i krajno bombastična versija pop-pěsnje Life is Life avstrijskoj grupy Opus]], a takože němečska versija tojže samoj pěsnje, Leben heisst Leben, i versija pěsnje One Vision Queen’a pod nazvoju Geburt einer Nation ("Narodženje naroda").

Poslě uspěha tutogo projekta Laibach izdal ješče několiko albumov sodrživajučih prětvorjene děla drugyh: Let it be (1988; na osnově poslědnjego albuma The Beatles), Sympathy for the Devil (1989; na osnově pěsnje The Rolling Stones), NATO (1994; sodrživaje medžu drugymi děla Gustava Holsta, Europe i Status Quo), Jesus Christ Superstars (1996; sodrživaje medžu drugymi děla Andrew’a Lloyd’a Webber’a, Volk (2006; narodne himny raznyh držav), LAIBACHKUNSTDERFUGE (2008, cělkovito osnovany na dělu Johann’a Sebastiana Bach’a), VolksWagner (2009, osnovany na operah Richard’a Wagner’a i The Sound of Music (2018, na osnově jednoimennogo mjuzikla). Někoje pěsnje iz togo poslědnjego albuma Laibach izpolnil v 2015 g. v Sěvernoj Koreji, pri okaziji 70-ogo godišnice osvobodženja korejskogo poluostrova izpod japonskoj okupacije, na koncertu popolno ustrojenom suglasno konvencijam komunističnoj propagandy.

Jednočasno Laibach takože izdaval gramafonne zvukozapisy i kompakt-disky s originalnymi tvorami, na priklad Kapital (1992), WAT (2003) i Spectre (2014). V 2012 g. Laibach sdělal muziku za film Iron Sky Timo Vuorensoli’a. Kromě togo, Laibach stvoril i originalnu teatralnu muziku, napr. Macbeth (1990) i Also Sprach Zarathustra (2017), a takože muziku za simfoničnu orkestr (Alamut, 2022). Interesno jest to, že vsako dělo Laibach’a jest sovsim ino od poprědnjih, ale tym ne menje jihny unikalny stil vsegda jest směsta razpoznavajemo. Iz toj pričiny muzika Laibach’a, ktora uže od davna ne jest izključiteljno industrialna, jest težko klasifikovati.

V 2024 godu Laibach byl nagradženy prezidentom Slovenije, Natašeju Pirc Musar, medalju za zaslugy.

Sklad

Milan Fras i Mina Špiler v 2009 g.

Sklad grupy Laibach mnogokratno izměnil se od goda jejnogo založenja, a kromě togo, ona često surabotala s drugymi muzikami. V godu 2024 grupa sostoji se slědujučih stalyh členov:

Milan Fras – vokalist
Ivan "Jani" Novak – světlo, projekcija, elektronika, poněkogda vokalist
Marina Mårtensson - vokalistka, akustična gitara
Vitja Balžalorsky – gitara
Bojan Krhlanko – perkusija
Luka Jamnik – sintezator
Rok Lopatič – sintezator

Diskografija

Milan Fras, 2016

Laibach (ŠKUC/Ropot, 1985)
Rekapitulacija 1980–1984 (Walter Ulbricht Schallfolien, 1985)
Neu Konservatiw (Cold Spring Record, 1985)
Nova akropola (Cherry Red, 1985)
The Occupied Europe Tour (Side Effects Rec., 1986)
Opus Dei (Mute Records, 1987)
Slovenska Akropola (Ropot, 1987)
Krst pod Triglavom-Baptism (Walter Ulbricht Schallfolien, 1987)
Let It Be (Mute Records, 1988)
Sympathy for the Devil (Mute Records, 1988)
Macbeth (Mute Records, 1990)
Kapital (Mute Records, 1992)
Ljubljana-Zagreb-Beograd (The Grey Area/Mute Records, 1993)
NATO (Mute Records, 1994)
Occupied Europe Nato Tour 1994-95 (Mute Records, 1996)
Jesus Christ Superstars (The Grey Area/Mute Records, 1996)
MB December 1984 (Mute Records, 1997)
The John Peel Sessions (Strange Fruit Records, 2002)
WAT (Mute Records, 2003)
Anthems (Mute Records, 2004)
Volk (Mute Records, 2006)
Laibachkunstderfuge (Mute Records/Dallas, 2008)
Gesamtkunstwerk – Dokument 81-86 (Vinyl-on-demand, 2011)
Monumental Retro-Avant-Garde (Live At Tate Modern / 14 April 2012) (Abbey Road Live Here Now, 2012)
An Introduction to… Laibach / Reproduction Prohibited (Mute, 2012)
Iron Sky (The Original Film Soundtrack) (Mute, 2012)
Spectre (Mute Artists Limited, 2014)
Also Sprach Zarathustra (Mute Records, 2017)
The Sound Of Music (Mute Records, 2018)
Party Songs (Mute Records, 2019)
Laibach Revisited (DZR, 2020)
WIR SIND DAS VOLK - Ein Musical aus Deutschland (Muter Artists Ltd., 2022)
Alamut (2022)
Love is still alive (2023)
Sketches of the Red Districts (GOD records, 2023)

Galerija

Plakat iz 1983 g.
Plakat iz 1986 g.
Emblema NSK-državy

Koncert v 2007 g.
Koncert v 2022 g.