Wp/isv/Trebor
Trebor byl francuzsky kompozitor, ktory byl aktivny pod koncem 14. stolětja. Jegove tvorby sut tipičny priklad tako nazyvajemogo ars subtilior («subtilnějša umětnost»), složenogo polifoničnogo muzičnogo stilja tamtoj ery.
Žitje
editNičto ne jest izvěstno s uvěrjenostju o žitju i identitetu Trebora. Dva jegove šansony možno jest povezati s dvorom Gastona Febusa (1331–1391), grafa Fua (fr.: Foix), vikonta Bearna (fr.: Béarn) i su-kneza Andory, tretji jegov šanson s svatboju hercoga Žana Berrijskogo s Žannoju II Overnijskoju v 1389 g.[1] Ime «Trebor» pravdopodobno jest anagram, možno od imena Robert. Jest hipoteza, že Trebor byl taže sama osoba kako Trebol (strěčaje se takože variant Triboll), ktory v lětah 1408–1409 rabotal pěvcem pri dvoru Martina I, kralja Aragona, i/ili Žan Robert, ktory několiko lět prědže služil pri dvoru Karla III, kralja Navary.[2] Kromě togo, Trebor može byti tojže sam kompozitor kako Borlet, ktoromu pripisyvaje se jednu tvorbu, i ktorogo ime može byti drugy anagram Trebora/Trebola.
Tvorby
editPrědane sut šest šansonov Trebora, same balady (poemy s osnovnoju formoju AAB). Vse nahodet se v Kodeksu Šantiji (fr.: Codex Chantilly), srědnjevěčnom rukopisu sodrživajučem 112 tvorb iz vtoroj poloviny 14. stolětja. Ako Trebor byl taže sama osoba kako Borlet, togda možno jest začisliti k jegovym tvorbam jedno virele (poema s osnovnoju formu ABB’A).
- balada Passerose de beaute
- balada En seumeillant
- balada ⓘ
- balada Quant joyne cuer en may
- balada Helas! pitie envers moy dort si fort
- balada Se July Cesar, Rolant et Roy Artus
- virele He, tres doulz roussignol joly (Borlet)