Wp/hz/Omimbonde Vitano

< Wp‎ | hzWp > hz > Omimbonde Vitano

Omimbonde Vitano vi ri mOmaozonjanda mOkarukondwa kaPukiro komatoororero morukondwa orunene rwa Maheke. Ombara Munjuku Nguvauva Outjavari wa zikirwa mOmaozonjanda ndji ri Opos 3 pOtjikatumba omayuva tji ya ri 10 Seninani 1960. Tjandje moruveze ndo Ovaherero nOvambanderu ve tjeverwa i ombara Hosea Kutako ngwa turire mOmongua oruveze ndo. Ovambanderu va turire mEpukiro na Mongua. Omapahero wombara yOvambanderu tjinene ya etisirwe i omuano mbu va zirwa i Ovaherero indu Ovaherero tjiva u rikire Kapuuo Mutuurunge otjo mutjangerepo wombara Kutako. Orondu tji mave pura kutja mwe twesa pi momaurikiro nga otjaa ve zirwa kutja, imbi ovyetu vyoherero kavina tjina na ene. Ombara Munjuku Nguvauva II wa tu rire kOtjawana nu tjandje Ovambanderu va Tjawana ve mu urika rukuru otjombara yawo kona ngo.Eye movikando ovingi ee ya kOnamibia kombara Hosea Kutako okuyeta otjimariva tjiva woronganisa ngo, tji matji ye ku vatera nomarwisiro wongutukiro ya Namibia. Ombara Munjuku otja kaningirwa i ovahenendu mba kotjiwana tja tjawana kutja mee kunana Ovambanderu mOnamibia, Elifas Katemone Tjingaete, Zebulon Kaurivi, Jeremia Tjiroze novakwawo. Ave kapewa, aveeta. Ave ziki.Tjaza nokuzikwa aurikirwa oruveze pu ma sokutunga ponganda ye. A zikamisa onganda ye a tungu po ondjuwo onene yokuruwo a ziki ovyunda vye. Ovambanderu ave tono ozongombe ndu maze rire ouini wombara, tjiva ave yandja oukambe. Ombara tji yaza nokutunga ondjuwo yombazu, Ovambanderu va tanauka ave mutungire ondjuwo yomawe. Ve mu tungira ondjuwo onene tjinene. Ovambanderu va uta okuworonganena pomaturiro inga. Aave haamene pozombongarero nokupangurira po oviposa pekepeke. Aave haama kehi yomimbonde mbya ri komurungu wonganda. Moruveze ndwi wina pa ri nozondjamba zOvambanderu mba ri kOtjawana okuvanga okukotoka kehi rooihe indi Onamibia. Kehi yozondjamba nda pa sekama Ovambanderu okuza kOtjawana mbe ya kombara yOvambanderu okuyekuzuva kutja ouyenda mbwi mau pitire kehi yombara poo indee. Moruhindo ndwi mwa ri nomurumendu waHenguva Kovitjana eye ngwa ruka oruveze ndwi kutja Omimbonde Vitano.