經濟學屬社會科學，是研究人類待“稀缺”底下，何什配置資源個一隻新興科學。待經濟學上頭，“稀缺”是只相對性個概念：跟到人類冇限度個欲望比，資源是有限個。所以，吾俚講經濟學個研究重心就是“資源配置”，或講是“最優化選擇”。
簡介
edit經濟學個研究範圍劃作：“微觀經濟學”跟“宏觀經濟學”兩隻層面（後頭，下都簡稱“微觀”跟“宏觀”！）。 “微觀”是研究單只經濟體個作為，其俚包括：消費者、工人、投資者、土地所有者，跟噠企業。其跟吾俚解釋，啯些單只經濟體是何什做出經濟決策，何解啯做。其個另個重要研究領域是，經濟體之間何什相互作用，去形成更大個經濟體——市場跟行業。 “宏觀”跟“微觀”比，冇得“微觀”個體系成熟。到而今，還不是只確定個科學領域，夥多問題到而今都多爭議。但是，其個研究物件是確定個——一隻國家個全面個或總共上個經濟運行情況。 “宏觀”實際上是夥多“微觀”個加總，有少數個經濟學家認為啯種分類法冇得麼俚學術價值，但而今，夥多大學教材下是用啯種分類法。
“經濟人”假定（或講，完全理性假定）是大部分個經濟學分支（新制度經濟學等非主流經濟學門派則是換成“有限理性”）個經典假設。其講，每個人都會待限定條件底下，會選對自家最有利個選擇。
起源跟發展
edit最先講到像而今“經濟學”個概念個，是色洛芬，其個《經濟論》最先涉及“經濟學”。待亞里斯多德時代個點子是：政治學、倫理學、政治經濟學三位一體，諾獎獲得者阿馬蒂亞•森待《倫理學與經濟學》兜裡講道：“夥長段個時間，經濟學一路來都講是倫理學個一隻分支。” 經濟學成真正個科學，是從亞當•斯密架勢。後背，經“三次革命，三次綜合”，就成噠而今個現代經濟學。
亞當•斯密
英國人亞當•斯密（Adam Smith）是公認個“經濟學之父”，其待1776年出版噠《國富論》啯本書（國語全名《國民財富的性質和原因的研究》）。《國富論》是近代經濟學個奠基之作，亦是資本主義自由經濟個理論基礎。爾個時候，亞當•斯密提出噠“一隻看不見個手”個概念，等於是，市場自動調節資源個分配。同時其主張政府莫做事，莫干涉經濟發展。
待《國富論》個指導思想底下，早期個資產階級國家政府為噠本國資本主義個發展提供噠蠻大個自由空間。近代資本主義因新興工業革命個技術，跟噠航海術個進步，得到噠夥大個發展。
卡爾•馬克思
待《國富論》出版個後100年，自由主義經濟繁榮個後頭，週期性個經濟危機跟社會財富分佈個不均等弊端下都露出噠。德國人卡爾•馬克思認為一個國家經濟個代表是勞動力，但資本主義個資本家為噠追求其自家個利潤最大化，放肆個壓低工資，壓低生產成本。待其1867年出版個《資本論》中提出噠“資本主義原始積累”跟“剩餘價值”等理論，其認為資本主義發展中個階級矛盾是不得調和歸一個。其還預言資產階級，後背下會被無產階級取代，“國家”個概念下會消失，社會各層面革新跟資源從頭架勢分配，最後，臻至理想個共產主義社會。
約翰•凱恩斯
到噠廿世紀，亞當•斯密推崇個自由資本主義早就暴漏出夥多病態跟危機。高度發展個生產力弄得商品個生產過剩，破壞噠經濟個供求平衡。壟斷資本主義企業為噠保持自家個利潤，放肆個削減工資，跟噠裁員。啯直接導致工人（亦是消費者）個收入下降，對商品個需求愈加緊縮，後背導致供求關係個崩潰。廿世紀初個美國大蕭條就是典型。
1936年英國經濟學家約翰•梅納德•凱恩斯發表噠其個《就業、利息和貨幣通論》書。其主張國家應待宏觀高頭，用擴張性個經濟政策，譬如調節利率，稅率跟增加政府開支等方法平衡供求關係。凱恩斯主義打破噠“看不見個手”啯只教條，後背成二戰後西方經濟學個主流。其自家亦被譽為“戰後繁榮之父”。