Wp/hoc/𑢾𑢢𑢪𑢷𑢩𑢪𑢫𑢡 𑢼𑢡𑢮𑢡

"𑢾𑢢𑢪𑢷𑢩𑢪𑢫𑢡 𑢼𑢡𑢮𑢡"

𑢾𑣂𑣊𑣗𑣉𑣊𑣋𑣁 𑣜𑣁𑣎𑣁 𑣁𑣖 𑣉𑣌𑣉𑣓 𑣜𑣈𑣖 𑣇𑣌𑣃 𑣔𑣁𑣓𑣁𑣊𑣈𑣁𑣓,

𑢡𑣔𑣂𑣗𑣁𑣞𑣂 𑣙𑣉𑣓𑣌𑣉 𑣁𑣚𑣈 𑣔𑣉 𑣞𑣁𑣈 𑣕𑣈𑣖 𑣓𑣈𑣚 𑣚𑣈 𑣕𑣁𑣓.

𑢴𑣂𑣝𑣃𑣖 𑣜𑣁𑣌𑣁 𑣏𑣁𑣁𑣌𑣁 𑣕𑣁𑣓𑣂𑣄 𑣖𑣈𑣓𑣕𑣈 𑣁𑢶 𑣚𑣈 𑣞𑣈𑣗𑣁 𑣕𑣁𑣓,

𑢴𑣂𑣌𑣃 𑣘𑣃𑣞𑣂 𑣌𑣉 𑣕𑣃𑣚 𑣔𑣉𑣓𑣔𑣉𑣜𑣈 𑣁𑢶 𑣔𑣉𑣖 𑣁𑣏𑣃𑣅𑣈𑣓.

𑢷𑣃𑣋𑣂𑣓𑣁𑣄 𑣓𑣈𑣚 𑣞𑣁𑣚𑣁 𑣌𑣈𑣈𑣕𑣈 𑣁𑣌𑣉𑣖 𑣈𑣖 𑣇𑣌𑣃𑣁 𑣌𑣉 𑣕𑣁𑣓,

𑢷𑣁𑣛𑣂𑣎 𑣏𑣂𑣔𑣃 𑣞𑣉𑣅𑣁 𑣕𑣁𑣓𑣄 𑣌𑣉𑣔𑣉 𑣁𑣚𑣈𑣖 𑣈𑣖 𑣏𑣁𑣚𑣁𑣚𑣈 𑣕𑣁𑣓.

𑢮𑣁 𑣏𑣂𑣖𑣂𑣓 𑣚𑣈 𑣉𑣚 𑣘𑣁𑣛𑣁𑣉 𑣜𑣈𑣉 𑣈𑣒𑣁𑣄 𑣙𑣉𑣜𑣁𑣖 𑣑𑣉𑣋𑣉𑣜 𑣕𑣁𑣓

𑢹𑣁𑣋𑣁 𑣗𑣁𑣚𑣁 𑣕𑣁𑣚𑣁 𑣘𑣁𑣋𑣁 𑣌𑣉𑣕𑣈𑣖 𑣕𑣉𑣘𑣉𑣚 𑣆𑣏𑣂𑣚𑣈 𑣕𑣁𑣓.

𑢾𑣂𑣔𑣁 𑣜𑣈𑣓 𑣇𑣘𑣁𑣓 𑣎𑣁𑣘𑣁𑣓 𑣙𑣉𑣛 𑣁𑣚𑣈 𑣓𑣂𑣖𑣂𑣓 𑣚𑣈 𑣕𑣁𑣉𑣖 𑣁𑣌𑣁𑣓

𑢹𑣉𑣚𑣁 𑣙𑣉𑣚𑣁𑣕𑣈𑣜 𑣙𑣃𑣎𑣃𑣄 𑣚𑣈𑣓𑣌𑣉 𑣓𑣁𑣆𑣌𑣂 𑣔𑣉𑣓𑣂𑣅𑣁 𑣌𑣁𑣓.

𑢸𑣁𑣞𑣁𑣁 𑣚𑣈𑣌𑣁𑣓 𑣙𑣉𑣛 𑣌𑣉𑣋𑣈 𑣘𑣃𑣜𑣁𑣄 𑣔𑣉𑣖 𑣔𑣈𑣊𑣋𑣁 𑣌𑣉 𑣕𑣁𑣓

𑢲𑣁𑣌𑣁 𑣞𑣉𑣓𑣁 𑣌𑣉 𑣓𑣈𑣚𑣕𑣈 𑣏𑣂𑣁𑣊 𑣁𑢶 𑣖𑣁𑣚𑣁𑣖𑣈𑣑 𑣏𑣁𑣗𑣁𑣅𑣁𑣓.

𑢡𑣔𑣂𑣗𑣁𑣞𑣂 𑣌𑣉 𑣁𑣚𑣈 𑣁𑣚𑣈 𑣜𑣈 𑣌𑣁 𑣎𑣁𑣕𑣂𑣚𑣈 𑣘𑣉𑣘𑣉𑣒𑣁𑣉 𑣕𑣁𑣓

𑢴𑣂𑣓 𑣔𑣂𑣓 𑣕𑣈 𑣁𑣚𑣈 𑣔𑣉𑣚𑣈 𑣗𑣁𑣜𑣁 𑣙𑣁𑣒𑣂𑣊 𑣏𑣁𑣗𑣁𑣉𑣄 𑣕𑣁𑣓.

𑢨𑣒𑣁𑣄 𑣌𑣉𑣔𑣉 𑣁𑣚𑣈 𑣗𑣂𑣜 𑣗𑣃𑣜𑣃 𑣌𑣁𑣛𑣁 𑣚𑣈𑣌𑣁𑣌𑣉 𑣓𑣈𑣚 𑣚𑣈 𑣕𑣁𑣓

𑢹𑣉𑣜𑣁 𑣌𑣃𑣒𑣂 𑣌𑣉𑣜𑣈 𑣔𑣃𑣗𑣁 𑣌𑣁𑣓𑣜𑣈 𑣞𑣈𑣕𑣁𑣌𑣉 𑣒𑣈𑣜𑣁𑣊 𑣚𑣈 𑣕𑣁𑣓.

𑢡𑣞𑣃𑣚 𑣎𑣂𑣇 𑣎𑣉𑣓𑣕𑣃 𑣚𑣈𑣌𑣁 𑣙𑣉𑣒𑣉𑣄 𑣜𑣈𑣌𑣉 𑣗𑣁𑣅𑣁𑣜 𑣚𑣈 𑣕𑣁𑣓

𑢡𑣌𑣉 𑣞𑣁𑣓𑣁𑣊 𑣖𑣃𑣚𑣂 𑣕𑣈 𑣁𑣚𑣈 𑣌𑣉 𑣉𑣉𑣜 𑣗𑣂𑣅𑣃𑣜 𑣗𑣁 𑣚𑣈 𑣕𑣁𑣓.

𑢡𑣚𑣈𑣁𑣄 𑣁𑣕𑣁𑣈𑣜 𑣔𑣃𑣁𑣓 𑣌𑣉𑣔𑣉 𑣁𑣁 𑣜𑣈 𑣒𑣁𑣌𑣁 𑣚𑣁𑣇𑣖𑣈 𑣕𑣁𑣓

𑢡𑣚𑣈𑣁𑣄 𑣈𑣌𑣕𑣂𑣁𑣜 𑣕𑣁𑣓𑣁𑣎 𑣓𑣁𑣊 𑣔𑣉 𑣌𑣁𑣎𑣂 𑣋𑣈 𑣌𑣁𑣌𑣉 𑣔𑣁𑣆 𑣕𑣁𑣓.

𑢾𑣂𑣊𑣗𑣉𑣊𑣋𑣁 𑣜𑣁𑣎𑣁 𑣁𑣚𑣈 𑣔𑣉 𑣉𑣌𑣉𑣓 𑣖𑣃𑣚𑣂𑣖 𑣆𑣔𑣂𑣚𑣈 𑣕𑣁𑣓

𑢡𑣚𑣈 𑣕𑣂𑣚 𑣕𑣉𑣘𑣁 𑣚𑣁𑣋𑣂𑣑 𑣕𑣉𑣜𑣁𑣊 𑣙𑣁𑣞𑣁 𑣙𑣃𑣁𑣊 𑣇𑣜 𑣞𑣈𑣌𑣁𑣁 𑣌𑣁𑣓.

𑢲𑣉𑣒𑣁 𑣗𑣁𑣊𑣋𑣃𑣟 𑣌𑣈𑣈𑣕𑣈 𑣁𑣚𑣈 𑣙𑣉𑣓 𑣖𑣂𑣝𑣂 𑣈𑣜𑣁 𑣁𑣞𑣈𑣓𑣉𑣄 𑣕𑣁𑣓

𑢽𑣂𑣜𑣎𑣉𑣓 𑣞𑣂𑣊𑣗𑣉𑣊𑣋𑣁 𑣁𑢶 𑣏𑣂𑣌𑣁𑣖 𑣓𑣈𑣚 𑣞𑣁𑣁𑣕𑣂𑣊 𑣔𑣁𑣆 𑣕𑣁𑣓 ?

𑢳𑣈𑣓 𑢵 𑣔𑣂𑣝𑣃𑣖 𑣎𑣃𑣔𑣂 𑣁𑢶 𑣓𑣁𑣖𑣁 𑣗𑣉𑣔𑣉𑣚 𑣞𑣃𑣌𑣃𑣖𑣈 𑣕𑣁𑣓

𑢲𑣉𑣄𑣈 𑣌𑣈𑣓𑣕𑣈𑣚𑣈 𑣋𑣉𑣈 𑣏𑣗𑣁𑣉𑣄 𑣏𑣁 𑣞𑣈𑣊𑣋𑣈𑣚 𑣋𑣁𑣖𑣁 𑣋𑣁𑣖𑣁𑣕𑣁𑣖.

𑢾𑣁𑣞𑣁𑣕𑣂 𑣞𑣁𑣁𑣕𑣂𑣊 𑣞𑣂𑣖𑣁𑣓 𑣜𑣈𑣁𑣄 𑣏𑣂𑣜𑣖𑣁𑣑 𑣜𑣈𑣚𑣈 𑣞𑣈𑣒𑣈𑣜𑣁 𑣌𑣁𑣓

𑢾𑣂𑣊𑣗𑣉𑣊𑣋𑣁 𑣜𑣁𑣎𑣁 𑣁𑢶 𑣗𑣁𑣓𑣏𑣁𑣉 𑣚𑣈𑣁 𑣁𑣁𑣀𑣝 𑣕𑣁𑣆𑣅𑣁 𑣌𑣁𑣓.

𑢡𑣖𑣁𑣄 𑣞𑣈𑣗𑣁 𑣝𑣁𑣛𑣁 𑣌𑣉𑣜𑣈 𑣕𑣉𑣜𑣞𑣊 𑣁𑣚𑣈 𑣘𑣁𑣈𑣕𑣈 𑣋𑣁𑣚𑣂𑣑 𑣙𑣉𑣗𑣁𑣁𑣌𑣁𑣓

𑢩𑣗𑣉𑣜 𑣕𑣗𑣈𑣜 𑣎𑣉𑣟𑣁𑣜 𑣌𑣈𑣈𑣕𑣈 𑣆𑣌𑣁 𑣁𑣚𑣈 𑣞𑣗𑣈𑣓 𑣁𑣁𑣞𑣂 𑣕𑣁𑣓.

𑢡𑣖𑣁𑣄 𑣝𑣂𑣜𑣎𑣉𑣓 𑣜𑣈 𑣁𑣚𑣈 𑣁𑣁𑣔𑣂𑣗𑣁𑣞𑣂𑣅𑣉 𑣁𑢶𑣁𑣄 𑣚𑣈 𑣙𑣉𑣓𑣌𑣉 𑣕𑣁𑣓

𑢳𑣈𑣓 𑣙𑣁𑣜𑣕𑣁𑣙𑣁𑣞𑣁 𑣜𑣈 𑣁𑣚𑣈𑣅𑣉 𑣕𑣁𑣆𑣓 𑣒𑣁𑣈𑣑 𑣔𑣉 𑣗𑣁𑣑 𑣈𑣖𑣁𑣚𑣈𑣖.