Füüsik of natürküen is däi natürwäitenskup, däi däi grundslóógen fan d' natüer unnersöyken daajt. Säi biisgrift däi mäin liiktäikens fan mateerje un stróólen, as kracht, eevenwiğt un biiweegen, däi taustâan fan mateerje, wâarmt, lücht, luuden, mağneetisem un eelektrik, soo lâang 't d'r bii kiin skäikünnerğ ferannerns gift. Dit biidüd't, dat sük däi struktüer fan däi stoffen, däi unnersöcht wordent, näit annert.
Net as däi mäiest anner natürwäitenskuppen word't in d' füüsik äin wesselwaarken mank teejoorii un eksperimenten (däi wäitenskupelk menäär) anwend't. D'r bii läident teejoiriiden nóó eksperimenten, eksperimenten däinent as insperóósje of biiwiis föör teejooriiden, un teejooriiden köönent echter weer döör eksperimenten test worden.
Ferklorens in 't fiiloosoofsk biidüüden, woosoo däi natüer sük soo ferhollen daajt, kan däi füüsik näit geeven. Säi proobäärt eer d'r achter tau koomen, woo däi natüer sük ferhollen daajt. Bii föörbild kan säi näit ferkloren, woosoo massen nanner anluukent, man säi kan mallen finnen, däi biiskriivent, woo dit geböört.