“Toelisen Jeesuksen kirkko” on ittenhäinen kiinalainen kirkko, joka on saanu alunsa helluntaiherräyksestä. Kirkko perustethiin Beijingissä, Kiinassa, vuona 1917. Nykyaikana kirkko toimii kolmessakymmenessäyheksässä maassa ja viiessä maanosassa ja sillä on arvattavasti 1,5 miljoonaa uskovaista. Kirkon kymmenen keskeisintä oppia ja uskon kappaletta on:
- Pyhän Hengen: "Pyhän Hengen vasthaanottaminen, mikä kielilä puhuminen toistaa, on takuu meän perinöstä taivhaitten valtakunnassa."
- Kaste: "Kaste on sakramäntti, jonka tarkotus on synnitten antheeksianto ja uuen hengelisen elämän alottaminen. Kaste annethaan luononveessä niinkun väylässä, meressä tai kaltiossa. Kastaja, joka on saanu kastheen veelä ja Pyhälä Hengelä, suorittaa kastheen Herran Jeesuksen Kristuksen nimessä. Kastheen vasthaanottajan tulisi olla kokohnaan veen alla pää kumarussa ja kasuvet alaspäin."
- Jaloitten peso: "Jaloitten peso sakramäntti antaa vasthaanottajalle maholisuuen olla osa Herra Jeesusta. Se muistuttaa kans aina ja jatkuvasti rakkauen, pyhhyyen, nöyryyen, antheeksiannon ja palvelemisen tärkeyestä. Jokhainen, joka on saanu vesikastheen, saapi jalkansa pestyksi Herran Jeesuksen nimessä. Jalat pesthään aina vastavuorosesti, koska se on soveliasta."
- Pyhä ehtoolinen: "Pyhä ehtoolinen vietethään Herran Jeesuksen Kristuksen muistoksi. Sen kautta saatama osalistua Herran ruuhmiisheen ja verheen ja olla yhteyessä hänheen, niin että saama ikuisen elämän ja nousema ylös viimisenä päivänä. Tämä sakramäntti on oltava tarjola maholisiman usein. Siinä käytethään vain yhtä nousematonta leipää ja rypälesaftia."
- Sapattipäivä: "Sapattipäivä, viikon seittemäs päivä (lauantai), on pyhäpäivä, Jumalan siunaama ja pyhittämä. Sitä tarkkailaan Herran armon alla, Jumalan luomisen ja vapahtuksen muistojuhlana toivoen ikuista lepoa tulevassa elämässä."
- Jeesus Kristus: "Jeesus Kristus, sana joka tuli lihaksi, kuoli ristilä synnitten pelastamiseksi, heräsi henkhiin kolmantena päivänä ja nousi taihvaasheen. Hän on ihmiskunnan ainua Pelastaja, taihvaitten ja maan luoja, ja ainua oikea Jumala."
- Pyhä Raamattu: "Pyhä Raamattu, joka koostuu uuesta ja vanhaasta testamäntista, on Jumalan sanan innoittama, ainua kirjalinen tottuus, ja kristilisen elämän pohja."
- Pelastus: "Jumala antaa pelastuksen uskon kautta. Uskovitten pittää luottaa Pyhhään Henkheen tavoitellessaan pyhhyyttä, kunnioittaa Jumalaa, ja rakastaa ihmiskuntaa."
- Kirkko: "Toelisen Jeesuksen kirkko, jonka perusti herramme Jeesus Kristus, Pyhän Hengen kautta 'myöhäissateen' aikana, on apostolisen ajan todellinen elvytetty kirkko.
- Herran toinen tuleminen: "Herran toinen tuleminen tapahtuu viimisenä päivänä, kun hän laskeutuu taihvaasta tuomittemhaan mailmaa: oikeamieliset saavat ikusen elämän, kun syntiset tuomithaan ikuseksi aijoiksi."
