Kiviarkku on rakenettu kulutuksen aikana kun tarvithiin suistoja jokka vievät pölkyt ja porrit ulomaks päävirthaan väylässä eli joessa. Useasti oli joku saari, suuri kallio, koste eli suuri lahti syynä miksi kiviarkku rakenethiin. Suanoissa veethiin pummia joka suurheen kostheesheen eli lahtheen joka vei pölkyt ja puut päävirrasta. Koskissa oli pakko rakentaa kiviarkkuja koska pummit ei kestänheet jos jokku pölkyt tartuit pumhiin kiini ja net aloit patoaamhaan. Sillon pummi meni poikki. Pummit panthiin kiini tiktaalhiin jokka olit kiviripala siottu väylän eli joen pohjaan. Jos ei ollu pummia eli kiviarkkua rakenettu meni tilapäisesti rakentaa pieniä klippiä jokka toimit niinku suistona huilaaville puile.
Jälkhiin kun kulutus lopetethiin 1970-luvula niin hyvin monta kiviarkkua on hajotettu. Kuvassa Kaihnuunväylän Mestoslinkan kiviarkku joka pommitethiin ette saithiin virtaa Linkanlahtheen joka oli kasvamassa kiini. Sen takia arkku on kahessa osassa ja voimakas virta kulkee välissä.