Wp/ctg/সিটাইঙগা হ়ানাফিনা

Template:Wp/ctg/Multiple image সিটাইঙগা হ়ানাফিনা হইতে বুজা৴দে বাঙলাদেশর সিটাঙ অন্সলর নামগরা এদ্দে অইতিজ্যঅ৴লা হ়ানা অ়৴লরে। মেজ্জানি গোস্ত, হালাৱুনা, উ়নি, মদ়ুৱাত, বেলা বিস্কুট, দুরুস, ব৴রহ়ানি, লক্‌ক়িশাক, গরুর গোস্ত ৱুনা, ফেলনর ডেইল, হলইর ডেইল, বিরানি, আফলাতুন অ়ালুয়া, তাল ফিডা, নুইন্যা ইলিশ ই৴ন অইলদে সিটাঙর অইতিজ্যঅ৴লা হ়ানা। ফিরিঙগি অ়৴ল ১৫২৮ শালর ই়ক্কা সিটাঙত আইয়েরে আবাদ গরে। জুদিঅ মুগল বিজয়র বাদে ১৬৬৬ শালত গেইয়্যিল গুই। মগ়র মুগল এদ্দে ফ়িরিঙগি অ়৴লর হ়ানা রুডি, ফ৴রুটি, বিস্কুটউদ্দ বেহারি জিনিস সিটাঙ এরিয়াত স়িডি গেইয়ে। ডিমানর লাই বুলি বেহারি পণ্য বেলা বিস্কুট রফতানি অ়র দুনিয়ার বউত মিক্কা ত়ইন্যা ফ্রবাশি সিটাইঙগা অ়৴লর হাস়ে। সিটাঙ অন্সলত বউত হদু৴ন ফা৴রি উফজাতি ত়াহেদে এতল্লাই সিটাইঙগা হ়ানাফিনা মুর়ইল্লা এলাহার হ়ানার ডইল্লা দেহ়া যায়, এইল্লা বাঙলাদেশর দইজ্জার ডাহদ্দির এলাহা অ়ইবার হারনে দইজ্জার হ়ানাঅ বউত নামগরা। সিটাঙর উতরমিক্কার অ়াটঅ়াজারিত জেঁডে লাল মরিস এদ্দে জ়াল হম হ়৴নর টেন্ডেন্সি বেশি, এন্ডে দইনমিক্কা ফ়ুৰানা মরিসর ও়ঁয়ারে ও়ঁয়ারে কেঁসা মরিস বাডিয়েনে জ়াল বেশি হ়৴নর টেন্ডেন্সি দেহ়া যায়। এ৴নকি ই়ন্দু-মুসলমান অ়৴লর রাঁদিবার তরিকা বউত জাগাত আলগ আলগ। তয় মগ, আরকানি, আরব, ফিরিঙগি, মুগল এদ্দে ব্রিটিশ অ়লর আইয়্যনর ও়ঁয়ারে তারার হ়ানারুসি এদ্দে রসম এন্ডিয়ার মেঁইশর মিজি মিয়াই গিয়্যই। মুসলিম অ়৴লর ফা৴ক মাশ রমজানর ইস্তারিত সনা, উ়রুম, ফিঁয়াজু, বায়ুনি ত়াহে। ও়ঁয়ারে মেজ্জানি গোস্তঅ ইস্তারির মেন্যুত জাগা গরি লইয়ে।