Wp/cnh/Chins for Christ in One Century

Chins for Christ in One Century [Lai: Kum zabu pakhat chung ah Laimi vialte Khrih caah kan si lai] timi thawngṭha chimnak rian nganpi a si. Hi Thawngṭha chimnak rian cu kum 16 chung ṭuan a si.

Thawhkehnak

Rev. Charles Hrang Tin Khum nih Chin (Zomi) Baptist Convention General Secretary a tuan lio ah, a lung chung ah langhnak a hmuh. Tinhmi cu kum 100 chung ah (1899-1999) Laimi dihlak Bawi Khrih zumtu siternak thawngṭha chim rian a si. A lung chung ah langhnak a hmuhmi cu 1980 kum December thla ah Thuklai khua ZBC EC khuakhan pumhnak ah a chuahpi. ZBC EC cu an hna a tla i 1981 May 13-17 ah Falam ah caihmainak an tuah. Cu caihmainak cu a min ah "Consultation for the Future of ZBC " an ti.

Caihmainak cu Falam ah an tuah i kum 100 chung ah Laimi vialte Khrihfa siternak thawngṭha chimnak rian nganpi cu "Chin for Christ in One Century (CCOC)" tiah min an bunh i an bia chirhchan tlangpi cu "Jesuh cu Bawi a si" ti a si. Cucu Filipi 2:11 in lakmi a si.

Tinhmi

• Laimi vialte Lairam Thawngṭha a phak kum 1899 in 1999 tiang kum 1000 a tlin tiang ah Khrihfa siter dih ding
• Khrihfa a umciami hna fehter chin le hrimhter ding
• Kum zabu puai tuah ding
• Kum 100 puai lawmh hnu ah Laimi a si lo mi miphun dang sin ah Thawngṭha chimnak rianṭuan ding

Rianṭuannak

CBC (ZBC) hruainak in E&M Department nih CCOC rian cu 1983 kum in an thawk. Khrih thawngṭha caah a pum le a caan aa pemi hna cu CCOC Lamkaltu (CCOC Ambassodor) an ti hna. 1983 kum ah a pum a pemi cu 87 an si. 1983 kum April le May thla ah Hakha ah an cawnpiak hna. Thantlang ah CBC kum thum dan pumnak a um. Cawnpiaknak a dih in CCOC Lamkaltu hna cu CBC pumhnak Thantlang ah an kal. CBC pumhnak ah cun Pathian sin ah pekchanhnak an tuah hna. 1983 in 1999 tiang kum 16 chung CCOC Lamkaltu hna cu Laitlang a khua kip le Laimi umnak kip ah an kal i inn kip ah "Jesuh cu Bawi a si" timi thawngṭha an chimh hna.

CCOC rian cu 1999 kum March thla ah a dih. 1999 kum April 1-4 ah kum za tlinnak puai cu Hakha ah an tuah. Cucu Chin Evangel Centenary tiah ti a si. Laimi Thawngṭha kum za tlinnak Jubilee, Carson kum 100 Jubilee ti zong in ti a si. 1983 in 1999 tiang kum 100 chung ah Laimi vialte Khrihfa siternak thawngṭha chimnak rian nganpi ah a pum a peemi CCOC lamkaltu cu an dihlak ah 906 an si. Khrihfa zumtu thar 20051 an hmuh hna. CCOC caah Khrihfa zumtu nih Pathian sin ah an pekmi cu Ks. 68523532.35 hman a si.

Nunnak Petu Hna

Kum 100 chung ah Laimi vialte Khrihfa siternak rianpi ah lamkaltu minung pasarih nih an nunnak a liam tiang an ṭuan.

1. Cin Khaw Thawn (No. C-349)
   Tonzang peng Tungthun khua mi a si. 1985 April 27 ah Paletwa ah ti in a pam.
2. Bual Cung (No. C-315)
   Thantlang peng Dawn khua mi a si. Pawfah in a zaw i 1985 November 30 ah Matupi sii inn ah a nunnak a dih.
3. Vung Khan Kham (No. C-233)
   Tedim khua mi a si. Chunglei zawtnak in 1985 August 20 ah Kanpelet sii inn ah a nunnak a dih.
4. Ngai Za Siam (No. C-528)
   Tonzang peng Cikkha khua mi a si. Hmongtlang in khan 3 ah pawfah zawtnak in 1988 April 24 ah a nunnak a dih. Thantlang Baptist Church biakinn pawng ah a ruak cu an vui.
5. Hoih Lan (No. C-1130)
   1994 June 24 ah Takachaung khua ah a nunnak a dih.
6. Ning Lawm Kim (No. C-1088)
   Falam in Kalemyo lei an kal ah mawṭaw khondennak in 1994 August 5 ah a nunnak a dih.
7. Kap Cin Khai (No. C-638)
   1996 October 4 ah a nunnak a dih.

CCOC rianṭuannak ah harnak an tonmi hna lak ah pakhat cu lam a har ngaingai hi a si. Cun cheukhat cu thlahlawh tangka an kuatmi hna nih tuan ah a phan kho tawn lo. Cu caah rawl ei lo dukdak in an um caan a um tawn. Harnak aphunphun an tong. 1983 kum December an tuahmi caihmainak ah thawngṭha chimnak rian nganpi sin ah Matupi ah Baibal sianginn dirhnak a chuak. Thlanglei Laimi Khrihfa hna kha anmahte in i zohkhenhnak an hauhnak kha an hngalh caah CBC EC nih Matupi ah Baibal cawnnak sianginn dirh ding in bia an chah. 1984 June 1 ah Union Bible School (Union Theological College) cu Matupi ah an dirh.