Ri qab'anob'al röj maya' taq winaqi' yalan etamab'äl e ruk'amom pe, ruma man xa xe' ta ri qach'ab'äl chuqa' ri qatzyab'al, ri taq qab'anob'al ri ye'aläx chupam ri taq qochoch. Ruma ruxe'el ri qak'aslem ja ri' ri ruki'il ri qetamab'äl. Ruma ri' man xa b'i achike ta netaman ruma re jalajöj taq etamab'äl junam naläx pe rik'in ri qak'aslem.
Chupam ri qab'anob'al e k'o jalajöj taq peraj ri nutemej richin majun nikäm ta, achi'le ri ch'ab'äl, ri tzyaqb'äl chuqa' jalajöj taq b'anoj yeb'anatäj pa jujun tinamït.
Pa iximulew yech'ab'ex juk'al wo'o' taq ch'ab'äl, e k'o juk'al ka'i' ri maya' taq ch'ab'äl, chuqa' e k'o oxi' taq ch'ab'ál man e maya' taq ch'ab'äl, achi'el ri xinka, ri garifuna chuqa' ri kaxlan ch'ab'äl.
ri juk'al ka'i' taq ch'ab'äl maya' taq kixe'el e k'o ri; Akateko ,Awakateko, Chuj, Itza´, Ch'orti', Kaqchikel, Ixil, Mam, Popti', Poqomchi', Poqomam, Mopán, Sakapulteko, Sipakapense, Q'anjob'al, Tektiteko, Q'echi', K'iche', Uspanteko, Chalchiteko, chuqa' Tz'utujil.
Jujun taq ch'ab'äl re' yech'ab'ex pa jalajöj rulewal ri Iximulew, chuqa' qetaman chi jujun ch'ab'äl ruk'olon k'ïy taq na'oj, pixa', ri majun tikirel ta natzalq'omij pa kaxlan, chuqa' ri kib'i' ri juyu', taq'aj, ruma ri' toq jun ch'ab'äl nikäm ¿, chuqa' xtikäm jun b'anob'äl, jun rutzub'al k'aslemal, ruma ri' niqab'ij chi ri ch'ab'äl jun rutemeb'al ri b'anob'äl.
k'atzinel k'a chi pa jujun tinamït nub'än jun samaj richin man nikäm ta ri jujun na'oj k'o chupam.
Re re' jun chik peraj richin ri rutemeb'al ri b'anob'äl, ruma nuk'ut pe ri aj akuchi' röj, achike qatinamit, akuchi' öj petenäq wi, chuqa' chupam jujun taq tzyaqb'äl, nutzijoj pe ri peraj k'aslemal kik'asleman ri qati't qamama' jarupe' kan taq juna'.
Ruma ri', niqab'ij chi ri qapo't, ri qatzyaq, ja ri' ri sik'iwuj ri Kaxlani' man xetikïr ya xkiporoj, ruma chuqa' kiya'on kan retal ri qati't qamama' pa ojer taq tz'ib'anïk.
Wakami ri winaqi' eqal eqal tajin nikimestaj ri rejqalem ri qatzyaqb'äl, ruma ri' ri achi'a' man nikikusaj ta chik ri kitzyaqb'äl richin kitinamit.
Pa taq tinamït e k'o jalajöj taq b'anoj nib'an richin runimaq'ixujik jujun taq peraj k'aslemal, ruma juna' chi juna' nikiya' ruq'ij, achi'el ri runimaq'ijuxik ri ya', ri taq juyu', ri xukulem nib'an toq nitikïr ri juna', toq nipe ri jäb', toq nib'an ri tiko'n, chuqa' juley chik. Ronojel re' nub'än chi man nikäm ta jun b'anob'äl, ruma ri' niqab'ij chi aj ri' rutemeb'al, k'o chi k'o richin nik'ase'.