Wp/cak/Ri kot

< Wp‎ | cak
Wp > cak > Ri kot

Ri kot rija’ ri chajinel chuqa ruk’u’x ri nik’aj aq’a’, rija' ri chajinel chuqa ruk’u’x ri nik’aj q’ij. Ri kot ruk’u’an jun na’oj ri ka’i ruwäch. Ri nab’ey nub’ij chi ri kot ja ri’ ri ximonel richin ri q’ijul kan, ri q’ijul ojer, ri q’ijul xik’o yan kan rik’in ri q’ijul wakami; jak’a ri ruka’n nub’ij chi ri kot ja ri’ ri niximön ri qijul wakami rik’in ri q’ijul apon, ri q’ijul petenëq, ri q’ijul jani qak’ulunta.

Ri kot rija' ri chajinel.

Ri kot ja ri’ ri niximon ronojel ri retal qatinamit, ri kib’anob’äl, ri ketamab’äl kimolon, kisamajin, kipab’an ri qate’ qatata’ ri qati’t qamama’ pa kik’aslemal rik’in ri q’ijul wakami, rik’in ri qak’ulwachin wakami pa qak’aslemal. Po chuqa ri kot ja ri’ ri niximon ronojel ri nqasamajij pa tinamital, pa qana’oj, paqach’ob’oj, pa qach’ab’äl ri q’ijul wakami, rik’in ri q’ijul jani tiqak’ul ta, rik’in ri q’ijul peteneq chiqawäch o ja ri xti kik’ul ri qalk’ual, ri qiy qaman.


Ronojel re’ nusipaj chuqa kai’ na’oj chiqe. Pa nab’ey, ntel chi tzij chi janila k’atzinel nqaya’ ruq’ij chuqa nqakanuj ri retal qatinamit, ri kina’oj, ri kich’ob’oj chuqa ri kib’anob’äl ri qate’ qatata’ ri qati’t qamama’, ronojel ri xkimöl, ri xkipab’a’, ri xkisamajij pa ri q’ijul kan, richin runuk’ik ri qak’aslemal chupam ri q’ijul wakami; richin yojruto’ paqak’aslemal, richin nqil ri saqb’e, ri qayayb’äl richin ri ütziläj k’aslemal. Pa ruka’n, ntel chi tzij chi, wi nqaya’ ruq’ij, wi nqakanuj, wi nqil, wi nqasamajij chupan ri q’ijul wakami ri ojer rub’eyomel qatinamit, ri xik’o yan, ja ri’ xkojruto’ richin nqapab’a’, richin nqasamajij, richin nqab’än jun k’aslemal jeb’el richin ri q’ijul apon, ri q’ijul jani tiqak’ul, ri q’ijul peteneq chqawäch.

Chuwäch ri iglesia richin ri tinamit Chi Xot k'o ri kot chuqa ri b'alam ruma' rije' e ruchajinel ri tinamit ri'.


Ruma k’a ri’ janila nim ruk’ojlemal ri kot chupam runa’ojil ri qatinamit, chupam ri kina’oj ri qate’ qatata’ ri qati’t qamama’. Ruma chu qa ri’ janila nik’atzin chi nqetamaj ruk’u’x re jun na’oj re’ richin nqapoqonaj, richin nqakusaj, richin nqayäk, chuqa richin nqak’ut chike ri epeteneq chqij.