Wp/cak/Kina’oj vasco tinamït

Runa'oj ri tinamït vasco

K’ïy mul ri yach’o’n pa ka’i’ ch’ab’äl yalan k’ayew nok chupam ri kaxlan. Ri tijob’äl, ri taluwäch, ri talutzij, ri k’amayal, ri samaj pa kematz’ib’ jantape’ e k’o pa kaxlan tzij, xaxe’ nkajo’ chin ok el pa qach’ab’äl, ri kaxlan tzij. Ri nikisamajij ri na’oj pa ka’i’ ch’ab’äl jantape’ nikinimirsaj ruq’ij ri kaxlan ch’ab’äl. Man nikisamajij ta chi junam kiq’ij. Jantape’ ri ojer tzij ke ri’ rub’anön. Ri na’oj richin euskera chuqa’ nuk’ut jun rub’eyal richin jun b’ey chik niqak’än ri qach’ab’äl.

Xaxe’ k’o jun b’ey richin ri qach’ab’äl nik’ase’, chi k’atzinel niqaya’ ruq’ij. Ri taq tijob’äl pa ka’i’ na’oj pa ka’i’ ch’ab’äl, ri taluwäch, ri talutzij, ri kematz’ib’ pa ka’i’ ch’ab’äl, yojkito’ richin ke ri’ niqasäch ta ri qaxe’el. ¿achike ruma? Ruma wakami ri kaxlan tzij, nïm chi ruwäch ri qach’ab’äl, ruma ri tijonïk pa ka’i’ ch’ab’äl man qitzij ta k’o. ri tijonïk pa ka’i’ ch’ab’äl majun k’o ta. Chi jujun tijob’äl, pa taluwäch, pa sik’iwuj majun majun k’o ta jun ütz na’oj chi rij ri ch’ab’äl, chuqa’ juläy chïk taq ch’ab’äl. Ri jun k’utunïk nub’ij chiqe

¿Achike ch’ab’äl nqajo’ wakami?

E k’o b’ey chi ri qach’ab’äl majun nikowin ta nunojsaj ronojel. Xaxe’ jub’a’, po k’atzinel chi niqatikirsaj rik’in jub’a’. ri k’atzinel chi k’o akuchi’ niqakusaj ri qach’ab’äl, richin nik’iy pe, chwa’q kab’ij. Ri na’oj re’ nukanoj chi niqasamajij k’ïy na’oj chuqa’ k’ïy ch’ab’äl. Po, wi man ke ri’ ta ri taq na’oj chuqa’ ri ch’ab’äl xa xe’ jun jeb’ël b’anikil richin niqewaj chi nich’akon ri kaxlan tzij. Po chi re ri euskera xa xe yek’atzin chi re niqachop rub’eyal ti taq tijobäl nikisamajij ri qach’ab’äl.

Jaru’il chuqa’ ri utziläj

Chupam ri na’oj richin nik’ase’ jun b’ey chik ri Euskera, yeq’a’x yan k’ïy tzij e ütz chuqa’ ri man e ütz ta. Jun tz’eteb’äl ri janila’ k’atzinel nikiya’ ri rejqalem chi ke ri winaqi’ yech’o’n pa kich’ab’äl, chi ri’ nikitz’ët xu qitzij yetikir yech’o’n. re tz’eteb’äl re’ ruk’amon k’ïy k’ayewal. Jun chïk tz’eteb’äl, k’ïy ak’wala’chuqa’ nimma’q taq winaqi’ richin niketamaj kich’ab’äl majun yetikir ta aninäq niketamaj ronojel ri k’atzinel richin nikikusaj chupam ri kizijob’al.

Pa kisib’äl taq juna’ re’, ri winaqi’ nikich’ob’ k’ïy chi k’atzinel yech’o’n pa kich’ab’äl. Ri nab’ey ch’ab’äl ja ri’ rusutub’äl chi re ri b’anikil b’anob’äl, po chuqa’ jun b’ey richin tzijonïk. Janila’ k’atzinel ruchajixik ri tzijonïk chi re ri qach’ab’äl, rukaj’il ajuchan, rukaj’il na’ojilal, jun nïm ch’ab’äl ri yojruto’ richin yojkikot, richin niqatzijoj, richin niqetamaj.

Janila’ k’atzinel jantape’ nqatz’ët rub’eyal qach’ab’äl, richin nqaq’asaj apo rub’eyomal. Chi ri’ toq ri ch’ab’äl k’o ruq’ajarik runa’ojilal richin qonojel. Ronojel rub’eyomal ri tzijob’äl chuqa’ ri niqak’ut nqab’ij chi re chi nqawak’axaj, niqasol, chuqa’ nujalwachij ri’.

Ri taq nimaläj samajib’äl richin niqak’äm ri na’oj

E k’o kaji’ nimaläj taq samajib’äl richin niqak’äm jun b’ey chïk ri qach’ab’äl. E k’o chuqa’ k’ïy b’ey chi ri taq samaj yalan e k’atzinel, po re kaji’ re’ janila’ e okel richin man xkisäch ta ri Euskera. Chuqa’ ütz rukusaxik richin ri nab’ey ch’ab’äl nqajo’ yek’ase’ wakami.

Ri ch’akul

Ri junumaxik chuqa’ ri k’iyinisanem richin ruch’akul ri ch’ab’äl, ri junumanïk richin ri tz’ib’anïk, ri k’iyinisanem ri k’ak’a’ taq tzij, ronojel re’ nub’än utzil ri ch’ab’äl richin wakami chuqa’ k’ïy juna’ apo. Re jun b’inib’äl janila’ k’atzinel. Janila’ okel richin yojtikir niqab’än jun tijonïk rik’in ri nab’ey ch’ab’äl, chuqa’ richin ronojel ri juläy chïk ch’ab’äl, janila’ ruq’ij ri b’ey re’.

Ri tjonïk

Rub’anikil ri runuk’ulem ri tijonïk richin ri nab’ey ch’ab’äl. Jun tijonïk rik’in ri rayib’äl richin rub’anikil ri winaqi’ yech’o’n ütz pa kich’ab’äl. Jun tijonïk richin ri nab’ey ch’ab’äl, nitikir chupam ri nab’ey tijonïk, chuqa’ ke ri’ chupam ronojel rupalb’äl tijonïk, chuqa’ ke ri’ nib’e’ pa taq nimatijob’äl. Re b’ey re’ janila’ k’atzinel chuqa’ k’ïy ruq’ajarik, richin ri qach’ab’äl majun nisach ta chuqa’ ri qab’anob’al.

Rutz'etik ri vasco tinamït

Tzijob’äl ri’ïl

Rub’anikil ri runuk’ulem ri taluwäch, talutzij, sik’iwuj chuqa’ ri aluk’an tzij rik’in ri nab’ey tzij. Chuqa’ wawe’ majun nik’atzin ta ri tzij qach’ab’äl chupam ri cholsamajib’äl ri oj k’o wakami. Janila’ k’atzinel chi re ri ch’ab’äl chi nutunub’a’ rusamaj ri tzijob’äl ri’il richin rutaluxik chuqa’ rukolik.

Ri b’anikil ri b’anob’äl

Rub’anikil ri q’ojom, ri lemïk, ri jalajöj na’oj chuqa’ ronojel rub’eyal ri b’anob’äl, rik’in ri ch’ab’äl chuqa’ ri nab’ey b’anob’äl. Rik’in rub’anikil, ri ch’ab’äl chuqa’ ri b’anob’äl xkek’iyir pe rik’in ri b’anikil ri’, ri tinamït, qach’ab’äl, nuk’iyirsaj pe ri’, ri rayib’äl ri ojer kan richin ri juna’ e petenäq apo. Ri rub’anikil ri b’anob’äl xtunimirsaj ta ruchuq’a’ jun tinamït chuqa’ ruch’ab’äl. Chi ri tinamït, xtitz’ib’an, xtib’ixan, xtuq’ajuj, xtinimaq’ijun rik’in rutinamit, richin ke ri’ man xke’achikan ta chik. Ri Euskera, rulemik rub’ix janila’ k’atzinel richin nuto’ ri b’anob’äl.

Rutzijol richin ri na’oj Euskera

Ruch’obik ri b’anon wakami richin ri nab’ey ch’ab’äl pa rusetlen ri qate’ ruwach’ulew, xqab’än oxi’ tzijol richin ri jalajöj taq moloj richin qawinaq pa rusetelen qate’ ruwach’ulew, richin ruto’ik runimirsaxik, rukolik ri kich’ab’äl chuqa’ ke ri’ kib’anob’äl. Ruma rije’ kik’owisan yan k’ïy k’ayewal, chuqa’ k’ïy na’oj pa ruwi’.

Jun rutzijol richin k’asonïk

Ri nab’ey taq ch’ab’äl tajin yeqasäch eqal. Ri sachoj re’ maj xkojtikir ta xtiqapab’a’. ri na’oj richin k’ïy ch’ab’äl xekäm yan ojer kan. Ruma ri’ janila’ k’ayew. Ri taq ch’ab’äl ri’ xesach ruma ri winaqi’ majun nikiya’ ta rejqalem. Wi ri winaqi’ xtikiya’ ta rejqalem ri qach’ab’äl, xtikotz’ijan ta. Ja re’ chuqa’ jun utziläj b’ey richin rukolik ri qach’ab’äl. Ri ch’ab’äl ja ri’ ruk’u’x richin ri b’anob’äl, ja rutemeb’äl. Wi nisach ri ch’ab’äl nisach chuqa’ rusetelen kib’anikil ri taq tinamït.

Jun rutzijol richin kuqub’ab’äl k’aslem

K’o jun yojtikir niqab’än wi niqakanoj rub’ey rusolik, rukolik ri qach’ab’äl. Ri tzijol Euskera, chuqa’ juläy chïk ch’ab’äl nikik’ut chi e k’o juläy chïk b’ey richin niqakol ri qach’ab’äl chuqa’ niqaya’ ruk’aslem. Jun nimaläj samaj chuqa’ k’ayew, po, wi niqaya’ ronojel ri qak’u’x xkojtikir chi rij.

Jun rutzijol richin pab’al

Ri taq tinamït k’atzinel chi nikipab’a’ ki’ richin nikito’ kich’ab’äl chuqa’ kib’anob’al. Ri pab’al richin ri tinamït chuqa’ richin ri rumoloj. Man ruk’amon ta wi xa xe’ ojxh’o’n chi rij ri b’anob’äl k’o chi yojsamäj. Xa xe’ ri tinamït ri nikipab’a’ ki’ richin nikikanöj rub’eyal ri rukusaxik ri kich’ab’äl yetikir nikiya’ ruk’aslem kib’anob’al wakami.

Richin niqakol ri taq na’oj re’, k’atzinel chi niqetamaj, chi ri ch’ab’äl ruk’u’x richin ri taq b’anob’äl. Wi nisach ri ch’ab’äl, nisach ri b’anob’äl richin ri tinamït. Wi yek’oje’ na kan na’ojil, pir, tz’etkajulew, ch’etem, wuj, chuqa’ molojri’il po rib’anob’äl xsach yn, k’atzinel nqana’ chuqa’ nqaya’ ruk’aslem ri achike mestan yan. Ri ch’ab’äl ja ri’ ri nub’än chi man oj junam ta. K’atzinel chi yojtijomal pa ruwi’ ri qach’ab’äl chi qajujunal, yojtijomal richin nik’ase’ qab’anob’al. Yojk’oje’ rik’in ruk’aslem qach’ab’äl ja ri’ ri ajowab’äl nqak’ut chike ri epetenäq chi qij. Yojsamäj ta pa ruwi’ chi oj junam qonojel, chi qonojel k’o qaq’ijob’al, richin niqakanoj ruq’ijinem. Ja ri’ ri k’aslem, yojtikir chi qajujunal, k’atzinel chi niqachajij ri qach’ab’äl.