Bileezyan jeeyalaji moasli mek op wid difrant kaina laimstoan, eksep fi di Maiya Mongtinz, wich da wahn laaj pees a granit ahn sediment weh push op fahn di Paleyozoayik Peeryad. Ih ron naatees tu sowtees kraas di sowt-senchral paat a di konchri. Sevral mayja faalt lain deh eena dehnya hailan, bot moas a Bileez deh owtsaid ertkwayk zoan weh ron chroo moas a Senchral Amerika. Joorin di Krotayshos Peeryad, wat da now di westan paat a di Maiya Mongtin mi deh abov see levil. Dis mi faam di oaldis lan ayrya eena Senchral Amerika, di Mongtin Pain Rij platoa. Di lata hil deh rong di Maiya Mongtinz mek fahn Krotayshos laimstoan. Yu ku noa dehnya ayrya sayka dehn kaast schrokcha wid ih lata tipikal sinkhoal, kayv, ahn andagrong krik. Kompyaa tu di Mongtin Pain Rij, sohn a di grong eena dehnya reejan gud fi groa plaant ahn lata koltivayshan hapm joorin di paas 4,000 yaaz at lees. Moch a di naadan haaf a Bileez deh pahn di Yookatan Platfaam, weh ertkwayk noh hapm. Dis paat a di konchri moasli flat, bot sohn ayrya wid hilz deh, wid di kaast schrokcha, laik di Yalbak Hilz langsaid di westan boada wid Gwatemaala ahn di Malanti Hilz between Bileez Siti ahn Dangriga. Diposit a san ahn mod, sohn gud moa dan adaz fi groa plaant, kova di moa er les flat graaslan rong di koas.