Fi adminischrayshan perpos, Bileez divaid op intu 6 dischrik, wichin dehnself divaid op intu 2 siti kongsl, 7 tong kongsl, ahn 192 vilij ahn kamyooniti kongsl. Sohn a di konchrisaid kamyooniti dehn aalso ga alkalde. Dis da wahn loakal majischreet hoo da di vilij baas, eevn fi leegal ting. Eech a dehnya kain a loakal atoriti ga ih govament kongsl bays pahn Taitl VII a di Bileez Laa. Di bigis loakal kongsl bai papulayshan saiz eena Bileez da Bileez Siti, wid 57,169 (eena 2010) Di smaalis da di vilij dehn a Eschraya ahn Honi Kyamp, eech wid 37 peepl.