Wp/brx/दख'ना

< Wp‎ | brx
Wp > brx > दख'ना

बेयो रोखोमसे गानग्रा खसाब(dress)। बर' हिन्जावफोरा गानो। बेयो मोनसे बर' हिन्जावफोरनि सोरजिलु आखाइनि नेरसोन। बेयाव रंगिना संगिना गाबनि आग'र एरफबनाय थायो। दोरोंआरि खान्थिजों आथिखालावबो बेखौ आखाइजों दानानै दिहुननाय जायो। आथिखालाव बाजाराव बायना मोननाय बिगियानारि राहाजों दिहुन जानाय खुन्दुजों दानाय जायो। गोदोनि समावब्ला बर' आइजोफोरा आखाइजों खुन एबा इन्दि एम्फौनिफ्राय मोननाय फिथोबजों खुन्दुं लुनानै/ दिहुननानै गावनि नांनाय, नखरनि मानसिफोरनो नांनाय खसाबफोरखौ नआवनो दानानै दिहुनोमोन। बेयो बर' कछारी समाजनि आजै आजौनिफ्राय मोनबोनाय सोलोंथाय।

सिनायथि edit

बेयाव एरनाय बायदिसिना रंगिना संगिना आगर आरो गाननायनि आदबआनो बे खसाबनि आलादा सिनायथि होखायो। बुहुमनि गेजेराव बेयो मोनसे आलादा रोखोमनि सिनायथि थानाय खसाब होननानै बुंजाथावो। बर' कछारि फोलेरनि हिन्जावफोरा गाननाय दख'नाखौ मोननै रोखोमनि मोननो हायो। लांगा दख'ना आरो मेखला दख'ना। लांगा दख'नाखौ बिसनायाव बनाय सादोरफोर बादि गोलावयै दानाय जायो आरो बेयाव बायदिसिना आगर एरफबनाय थायो। मेखला दख'नाखौ दानानै बस्थाफोर बादि सुथाबनानै, थिग बस्था बादि फारसेथिंजाय सुथेनाय जाया, हासुं बादि सुनानै गानो।।

बर' कछारिफोरा दख'नायाव बायदि गाबनि आगर एरनानै मेगनाव गोग्लैथाव जि गानो। दखनाफोरनि रोखोमखौ नायनानै गुबुन गुबुन मुंयै बुङो। जेरै- 1. दखना थावसि, 2. दावथु गद', 3. फारौ मेगन, 4. सालामाथा बायदि बायदि। हिन्जाव गोदानआ जुलिनि समाव गाननाय दख'नाखौ @दख'ना थावसि बुङो। आग'र गैयालासै दानाय दख'नाखौ सालामाथा होननावै बुङो।

दख'नानि जोनोम(सोरजिलु हारिमु) edit

दख'नाखौ बर'फोरा माब्लानिफ्राय दानो, गाननो सोलोंदोंमोन बेनि जारिमिन नागिरना मोननो थांआ। गोदोनि समनिफ्रायनो बर' हिन्जावफोरा बेजों गावनि हारिनि आलादा सिननायथि होबोदों। मिथिंगाजों नांजाबफा जिव खुंबोनाय। सोमखोर मिथिंगानि गेजेराव जिव खांबोनाय बर'फोरा गावनि जिवनि नांनायफोरखौ मिथिंगायारि बायदि बेसादफोरजों सुफुंबोदों। मिथिंगाजों गोरोबफ्लेना बायदि रोखोमनि सोरजिनिबो महर होदों। खुन लुयै लुयै बेयाव मिथिंगायारि बायदि गाबजों, बिलाइ, बिबार, फिथाइ, बिगुर, रोदाजों गाब गायै गायै हिसानसालियाव गावनि सानबोलावरिखौ बर' हिनजावफोरा जिआव आगर महरै बेरखां होदोंमोन। बर सिख्लाफोरा गावनि रजेनो गावनि मोजां मोननायनि अन्थोब महरै आर'नाय बावो/ अनथोब होयो। खुगा सल'नि बादिब्ला गोदोनि बर' सिख्लाफोरा दावहानि समाव हरसेनि गेजेरावनो लुसे लुनानै, दासे दाननानै दावहारु जोहोलावफोरनो दावहायाव देरहाबोनायनि बोर सारस्रि हरोमोन।

जि/सि दाग्रा जायगाखौ हिसानसालि बुङो।बर'फोरा जि/ दाननायाव बाहायनाय माखासे आगजुफोर जाबाय- थावख्रि, जेन्थोर, सोरखि, माखु, साल गान्दै, रासो, थाथिखाल बायदि बायदि।

माबोरै गाननाय जायो edit

लांगा दख'नाखौ जेरबायाव एथेबनानै जेरबानिफ्राय आथिं जोबख्लोबजासिम मेरायनानै, फाननानै, दख'ना रोबैखौ जान्जियाव एथेबनानै गाननाय जायो। मेखला दख'नाखौ हासुं बादिखाय गोजौनिफ्राय सोनानै जेरबायाव एथेबनानै, खायसेआ जान्जियावबो एथेबनानै एसे फाथं खालामनानै गानो।

दख'ना आरो बर' हारिमुनि सिनायथि edit

खायसेआ दख'नाया हारिनि सिनायथि होननानै बर' हिन्जावफोरखौ दख'ना गाननायखौ गोनांथि होनांगौ होननानै बुङो। थिग बेबादिनो हौवाफोराबो गामसा गाननांगौ। नाथाय हौवाफोरनि गाननाय जोमनायाव जेबो हेंथा गैया। बर' हौवाफोरा गोदान मुगानि हौवाफोरनि गासैबो रोखोमनि गान जोमखौनो गाननो हायो।

बुंस्लिबनाय edit