Yagan (1795 – 11 Jaoláí 1833) Ásŧrelíá ná handí kabíla Núngar ton táluk tixeka o Ásŧrelíá ģá Inglistán ná kaoza o oŕe darí maxlúk ná bhallo kacc ase aŧ ábádkárí ná xiláf Part aná iláka ŧí juhd aná sarok as ass. Vaxtas ki o tená juhd aná biná e kare o mulk aŧí cappav o píunsilí ábádkár áte bhallo kacc ase aŧ kasifing ná biná e kare to sarkár od zinda yá kahok dazgír kanning kin inám ná paŕav e xalk. Asi varná o ábádkár as od xalk kasife. Yagan e handí maxlúk ná xalkí şáirí ŧí názefingik o od kaozagír átá zulm o jaor o oná xiláf handí maxlúk ná juhd aná nişání as lekingik. Yagan dá vaxtá am tíva Ásŧrelíá ŧí maşur e o asi Núngar maxlúk oná juhd o kurbání á faxr kera. Ábádkár ák Yagan ná káŧum e oná badan án kişkár ki sarkár e nişán ittir ta o inám e kaŧŧir. Yágan e kasifing án pad oná mux án sil aná amo ŧukur e am daŕifesur arásiŧ á oftá kabíla ná nişán ass. Valdá asi amaldár as oná káŧum e Landan á dare o asi ajáibghar aseŧí maxlúk ná xaning kin tixá. Dá ajáibghar aŧí dá káŧum e sad sál án ziát vaxt akin numáiş kin tixingá o 1964 aŧí Livarpúl ná iláka ŧí dafan kanningá. Kaí sál án Núngar maxlúk Yagan ná káŧum e Inglistán án vápas ating o tená iláka ŧí izzat o şán aŧ dafan kanning kin juhd karisá bassune. 1993 aŧí dafan ná ta jága e paŧŧingá xaningá. Oná cár sál án rand káŧum e xutingá kaşşingá o Ásŧrelíá ģá vápas mon tiningá. 1997 án Part aná handí maxlúk tenpaten jheŕa ŧí assur ki Yagan ná káŧum e ará đaol izzat o şán aŧ dafan kanningi. Axír Jaoláí 2010 aŧí Yagan ná káŧum e oná kahing ná 177 sál án pad asi dodrubedaí mela seŧí Ásŧrelíá ŧí dafan kanningá.
