Nivişt ná biná o rodum.
Andun ki bolí bandaģ ná ilm o pám ton avár avár asi asi laoz’ laoz átá mána o ráband ná amal án gidreńgisa sad á sál átá jod o xuárí án pad rudom alisa asi bákáida o şikl as alk. Andun nivişt ná am biná o rudom ná am asi anduno táríx ase.
Bolí ánbár nivişt ná am avlíko joŕ karoká ná bárav aŧ kas tippak, vali oná biná ná bárav aŧ bolí ná máir o zántkár ák mutkun á damb o berişt átá paŧ o pol o mutkun á bandaģ átá amo nişán átián andáza zarúr xalera.
Pámdár átá rid aŧ “nivişt” am insane ná rájí zind aná asi gurj as ass. Andun ki bandaģ átá avár raeńg, avár kárem ná o avár kárem ít o gap ná xuást gár ass. Andun ít o gap “nivişt” ná xuást e moní es. Antae ki dá rid aŧ paŧ o pol karok átá andá xiál e ki nivişt ná joŕ mannińg ná savab am asal aŧ “bolí” ná aval sar aŧi istimál maroká amo işára ģáko aráfte bandaģ tená xiál átá darşání kin kárem aŧí es.
O dun ki asi bandaģ as arátam elo e tená ít e darşán kannińg xuáis to ará giŕák amo bandaģ ná xan tá mon á sáŕí assur oftá kunð á to o dú murífe o işára kare o tená masxat e darşán kare, vali ará giŕák amo jága ŧí sáŕí allavas yá xan tián avdem assur. Oftá bárav aŧ po kannińg kin bandaģ naşx o cişx átá sebo e alk. Asi bandaģ xan tián cap giŕa sená barav aŧ elo bandaģ e pánińg xuáis to o asi naşx as kaşşisa o lík áteŧ amo giŕá ná foŧú as joŕ karisa tená ít e elo iskán sar kannińg ná koşist kare. Dá vaŕ aŧ naşx, cişx o foŧú tá zaríat aŧ ít o gap asi elo iskan ná xiál átá farávání kin pen ziát ásirátí vadí kare.
Dáŕán bandaģ ák asi elo ná ít e juán vaŕ aŧ poh mannińg şurú massur. Dun dá tasvír tá bolí am oftá bhallo zarúrat as joŕ mass. Padá vaxt aton avár avár ar giŕá o işára kin bákáida vaŕ aŧ asi xás o nişán as mukarrar kannińgá, dun dá işára o nişán ák candí vaŕ aná “tavár” átá kuálxuáí e karisa arf aná şikl o pin aŧ mustí bassur. Dá vaŕ bákáida nivişt ná biná mass. Aval sar aná bandaģ ki dáxadar aklí o zaení vaŕ aŧ puxta allav oná avlíko nivişt am oná bolí ánbár siddá sáda o nivişt as ass. Bináí daor aŧ bandaģ mana coŧ rásto lík kaşşá o foŧú joŕ kannińg ná koşist kare. Andá koşist nivişt ná bundáv ná savab mass.
Dá bundáví á nivişt ki coŧ rást ingá lík átián biná alk, dáde máir lisáníát ák tasvírí likvaŕ (Pictorial) ná pin etira. Dá likvaŕ duniá ŧí insan ná avlíko nivişt am pánińgik. Misr aná bátík dá xat e musi azár sál iskán istimál karer. Vali dá xat aná kull án bhallá vael dá ass ki bandaģ e tená ít e darşán kannińg kin báz ziát foŧú kaşşoí tammáka, dáŕán bedis báz á giŕá tá foŧúk joŕ mannińg am kattavasa. Andun dá xat bandaģ ná de pa de án tez raftár á zind aton avár tammińg aŧí am allav.
Dá xátir án dá xat áŧi bandaģ tená gurj átá rid aŧ badalí karisa iná. Madán madán á foŧúk sáda Marisa inár. O asi vaxt as anduno am bass, ki foŧú tá púrav á naşx ák ģaeb Marisa inár o dáftá jága ģá alámat ák salísur. Antae ki vaxt o xuárí ná bacat kin bandaģ e kam vaxt aŧí báz likkińg ná gurj mass. O dá tez likkińg ná vajja ģán foŧúk guanð Marisa bíra lík átá majmúa as joŕ massur. Dun dá tasvírí likvaŕ líki nivişt (Characters) átí badal mass. Matlab dá ki dása nivişt bíra alámat átiá bass salís. O ar foŧú kin asi jitá o alámat as mukarrar mass. Dása de aná foŧú bíra de e darşán kattavaka dáŕan roşnáí o básuní ná am matlab allińgáka. Dávaŕ aná xat e pámdár ák xiál navísí yá fikr nigárí (Ideography) ná pin etira. Dása bandaģ dá xat aŧí tená amo aesás o xiál áte am nivişt aŧí es ará dáŕán must mumkin allavas.
Andun nivişt ná elo súrat ará padá arf átá şikl aŧí badal mass ode Tavár (saot) navísí (Hierography) ná pin tinnińgik dáŧí ar sádár o giŕá e oná tavár ná rid aŧ likkińg ná biná mass. Aeno án báz vaxt must arátam iskán Sumerí likvaŕ ná namúna (kutba) ģák dú tammitavesur, amo vaxt iskan máir ák Misrí Íroģalfí e duniá ná avlíko nivişt sarpand massura. Vali táríxí rid aŧ Sumerí kaom aná urúj ná daor (2000 án 3500 kabal massí) Misrí bod o berişt án must aná daor as guandińgik dá xátir án dá pánińg ki Sumerí kaom Misrí teán must nivişt ná biná e karesur ģalat mafaro, antae ki dá daor aná giŕás nivişt (kutba) ásár kadímá ná máir áte dú tammáno. Dá panc azár sál mutkun e. Sumerík miş aná taxtí (Clay Tables) átiá nivişta karera. Dá kaom aná muc károbár mandar áteŧi massaka, ará proat átá dúŧí ass. dá proat ák ar vaŕ aná isáb kitáb e sogav kannińg kin miş aná taxtí teá nivişta karera aráfte padá de á bárifińgáka. o aga zarúrat tammáka to dá taxtí te xáxar á am bisifińgáka. Vali misr aná bátík Pepras (asi vaŕ aná káģaz as) ná ejád e karesur o oná zí á likkára. Bar ál misrí íroģalfí xat (tasvírí xat) ana íra xuánnińgáka balkin pámdár ák dá rid át dá am xiál kera ki urúf tahajjí yá abjad aná bundáví á soc am andá xat án allińgáne. Íroģalfí xat máŕí teá nakş o nigár kin istimál massaka o bíra mazabí kaŕda ná xat ass. Andun dá nivişt ná asi pen şikl as íratek ná pin aŧ piní e, am moní barek. Dá xat pepras ná ejád án guð kam vaxt aŧí ziát likkińg ná savab án joŕ mass. Aráŧí foŧúk guanð marisa alámatí şikl aŧ moní bassur. Dá nivişt am bíra álim átekin ass, aráfk dáŧí díní o kitáb nivişta karera .lass maxlúk kin dá xat aŧí nivişt mana ass. Dá xátir án ám bandaģ tená gurj aŧá púraví kin “Devtekí” piní á xat e joŕ kare dá nivişt e jamúrí yá avámí (Demon) ná pin am tinnińgik.
Misrí íroģalefí likvaŕ elo maxlúk o duniá kin Abjad, urúf tahajjí ná savab to joŕ mass, vali tenaŧ Misr aná bátík kadámat pasandí ná vaja ģán dáná istimál án mon e aŕsár. Fonekí amo kaom ass ará duniá e avlíko vár Abjad ná ŧekí tiss. Dá vápár karoká kaom Kin-án (Falastín) ná iláka Baíra Rom ná samandarí kirr á ábád ass. Dá kaom misr aton vápárí tálukdárí o Inińg bannińg ná vaja ģán aval sar aŧ to, Misrí íro ģalefí likvaŕ aŧí nivişta kareka, vali pad án andá likvaŕ ná bundáv átekin urúf tahajjí joŕ karisa asi jitá o likvaŕ ase ná bundáv e tixá o bhallo vaxt asiskán dáná istimál e am kare.
Andun asi vaxt as anduno am bass ki Fonikí kaom tená zavál e raseńgá o dáná jága ģá şám aná “Árámí” kaom buŕzá bass. Dá kaom aná ŧikk “Damişk” ass. Fonekí o Árámí tá likvaŕk asiŧ elo án báz xuŕk assur. Dá xátir án dása dá likvaŕ “Árámí” ná pin aŧ mustí bass. O dá kaom dá likvaŕ e misr án es Industán iskán tálán kare.
Duniá ná kaí bolík dunki Ibráni’ Saráni’ nibtí’Saniáí’ Paelví’ o Arabí andá likvaŕ ná şáx ák pánińgira. dáŕán bedis am duniá ŧí likvaŕ ná candí kism ák arer. Vali Misrí teánbár Cín aná maxlúk am báz ziát kadámat pasand o maxlúk ase, antae ki ofk aeno am musi azár sál must aná bináí á nivişt yání tasvírí likvaŕ e barjá tixáno.
Dun to bandaģ avlíko vár Xal aná zí á likká, yání mutkuná damb o berişt átián dú tammoká amo Xalk, arátiá naşx, cişx o ofte insane ná avlíko nivişt karár tinnińgik. Vali dáŕton avár avár máir áte candí nivişt ák anduno am dú tammáno ará Xal tá zí á affas balkin Puc’ Sil’ Miş o Páŧ aná taxtí’ daraxt aná coðí’ pann o pepras ná zí áŧo. Matlab dá ki vaxt aton avár avár bandaģ na bíra nivişt aná vaŕ o ðaol e şon tiss balkin nivişt kin am candí vaŕ ná giŕá te kárem aŧí es aráná sarsob o áxrí á şikl aeno káģaz ná súrat aŧ naná mon áte.