Baloc asi xalkat asená pin e aráfk Balocistán ná iláka ŧí túlira. Dá iláka dekíalleng Eşíá ŧí soeldekíalleng Pákistán, soeldeŧik Írán o soeldekíalleng Aoģánistán aŧí barek. Dákán bedis Baloc ák bhallo kacc aseŧí Omán, Baeren, Turkmánistán, o Kíníá ŧí am rahengira. Baloc ák geştir Balocí o Bráhuí bolí teŧí ít kera vale okán bedis Ketrání, Siráikí o Lásí bolí teŧí am ít karoko bház e iŧí tá.
Baloc maxlúk ná đeh geştir rek, jabal o gayáván e, andá xátirán oftá rájí tab am saxt o beparvá joŕ massune, o dáfk táríx aŧí icbar darí tákat áte mannitano, o oftá julav átá xiláf jang kareno. Baloc ák geştir Musulmán o SunníIslám ná Hanafí akída e mannira. Elofk tá Zikrí Islám e mannira. Asi bhallo kacc ase aŧ Baloc ák Baxxál o Sikh am arer.
Soelí Eşíá asi iláka sená pin e ki Himálíá ná şefko kunđ aná mulk áteton avár oná deŧik o dekíalleng kunđ aná mulk ák avár o iŧí ta. Geştir mannok ák Bangládeş, Bhúŧán, Inđíá, Máldíp, Nepál, Pákistán o Sirí Lanká e dá iláka ná mulk lekira. Giŕás mannok ák Aoģánistán, Barmá, o Tibbat e am dáŕton avár ganđira. Duniá ná ábádí ná pancamíko başx Soelí Eşíá ŧí rahengik. Dá iláka bházá handí jheŕa ģátá ámác marisa bassune ki oŧí iláka ná irá aeŧmí tákat, Pákistán o Inđíá, ná niyám aŧí maroká jang o jadal ák am avár o. Iláka ná iktasádí tarakkí kin, iláka ná mulk átá tenpaten baddhí kin SAARC ná pin aŧ gall as am joŕ are. Dodrubedaí bistár aŧ Tibbat am anná iláka ná başx as lekingik, vale siyásí súrat aŧ dá iláka ģán jitá e. Dá iláka ná bház mutkuno táríx as e. Andá đaģár duniá ná mutkun á taezíb átián asiŧ Sind Benŧ Taezíb(Indus Valley Civilization) ná bundar massune.
Nádir Kambráńŕí (1924 - 15 Satumbar, 2006) Bráhuí bolí ná piní o şáir as gidrengáne. Oná aslí pin Abdul Ģafúr ass o 1924 aŧí vadí mass. Bráhuí bolí ŧí maroká púskuná şáirí ná amo sarxel şáir átián e, aráfk şáirí soc o fikr átekin púskuno kasar as malár. Şáirí ton avár, o tená vaxt aná siyásí va áşobí şefbuŕz áteŧí am sargaramo kárkun asená bistár aŧ piní e. Oná piní á kitáb Şanza Girok aŧí şáirí ná sarhál ák am ráj aná vael o áşobí siyásat massuno. Nádir Kambráńŕí o Bábú Abdul Rámán Kurd asi daor aná şáir assur o asi vaxt aŧí şáirí ná biná e karer. Dáfk şáirí o adabí tálukdárí án bedis, siyásat aŧí am sangat assur.
