၂။ အုံထွူသန္ဓေႏ မွိုးနမ်းကီ
အလာတဆီ ကထင်ႏလꩻ
မွိုးဗွေႏအသꩻ သေနန်းချာ
မွိုးယိုတွမ်ႏဖါ ဖူး၀ေးချင်ꩻ
လ၀်းနယ်၀ါꩻရင်ꩻ ခွန်ရာႏဇာႏ
လယ်ႏခွင်ꩻဖေႏဒျာႏ အီႏထမ်ႏပြွတ်
ကပိလ၀တ် ခွန်ဌာႏန
ဒေ၀ဒဟ မာနင်ꩻခမ်း
နီဖဲ့ꩻခင်ႏလမ်း အခါႏလယ်ႏ
မာꩻယံတင်ႏတယ်ႏ ဖျင်တဖူꩻ
ခွန်လိုꩻရံႏစူꩻ သဲင်ꩻလယ်ႏချာ
တွိုႏလွေꩻဗꩻငါ လုမ္ဗိနီႏ
နင်ꩻမျတ်ထင်ႏထီႏ အင်းချင်းတုဲင်
ခွꩻသꩻစွုမ်းပြုဲင် အုံပဆား
အင်းချင်းပင်ယွား အုံထွိုင်ႏဖွို့ꩻ
တလီꩻလောႏထွို့ꩻ အီႏလွူးသွူ
သွꩻမူႏသေထွူ ဆေင်ႏဖုဲင်ကင်း
မွိုးဟို့ꩻကိုနင်း ပလ္လင်ႏကီ
လောင်ꩻမျတ်ပေႏအီ ကျွꩻထန်ႏလင်ꩻ
ကျွꩻငါလွေꩻထင်ꩻ ခင်ႏနွုတ်ꩻကာ
ဒေါ့ꩻင၀်းငတ်ꩻငွါ ထူꩻဆန်ꩻငါႏ
လူꩻလိုꩻဗျဟ္မာႏ ယိုဖုံႏရင်ꩻ
ခွေမျတ်လွို၀င်ꩻ ထွာအတန်
အံႏဖြာႏထွိုက်သန် သန္ဓေႏယ၀်း
ကွုတ်ထဲင်းဒွုမ်တ၀်း ဆုဲင်ꩻတလဲင်ႏ
ရုဲင်းဟန်ဒေါ့ꩻပဲင်ႏ ငမ်းတ၀်း၀င်ꩻ
သူသွစ်ꩻနေင်ႏတွင်ꩻ ဒဲဥ်ရုတ်ꩻလာ
ဗွေနီꩻန၀်ꩻခါ ထွာသောကျာႏ
ကလွူးဖွာꩻဒါႏ ခွန်ပေႏဆား
ဖုတ်ဖဲ့ဗွာလွား သꩻကိုယူႏ
ခွꩻသꩻရောင်းရျူႏ စူတဆီ
ကတောင်လောင်းကီ ယွော့အွဥ်ႏဒင်ႏ
ရိုႏသေႏ၀ုဲင်ႏထင်ႏ ခွန်ပေႏနီဗွေႏသြ ။ ။
လွူးဖွာꩻခန်ꩻနေား က၀ုဲင်ႏဗာႏ
နိဗ္ဗာန်ႏချမ်ꩻသာႏ ယံလꩻမွေး
မဥ်ႏလꩻဒွိုန်းဟွေး အယံတွင်ꩻ
စွုမ်ႏဘ၀ရင်ꩻ မဥ်ႏလွူးခွေ
သောင်ထျꩻစေႏထွေ ဆရာႏမူႏ
အ၀်ႏခူအ၀်ႏဗူႏ မနန်းခီ
နုဲင်းစွဥ်ႏစဲစ်ထီ လွူးယိုꩻမာꩻ
မွိုးဖါနီဖြာꩻ အ၀်ႏစွုမ်ႏဒျာႏ
ဟ၀်လက္ခဏာႏ ယောင်ꩻကရေꩻ
ထွာဒျာႏသဌေꩻ မွိုးဖါခြွေ
သဲစ်လွူးဖွါꩻခွေ ကလိုႏရာꩻ
အ၀်ႏတထွူထာꩻ စုံႏစုံႏလင်ႏ
ဘုံꩻကံႏထိုထင်ႏ တငါငါ
ကေားရက်သားအာ ရိမ်ယွော့ဖင်ꩻ
ယံလွိုလဲဥ်း၀င်ꩻ စစရာႏ
စွုမ်ႏဖာတ်ချမ်ꩻသာႏ ဆုတောင်ꩻနုဲင်းန၀်ꩻသြ ။ ။
( ဘာႏသာႏရေꩻဗဟုသုတ အမုဲင်-၃ )