Wp/blk/လိတ်မွူးပအိုဝ်ႏ

< Wp‎ | blkWp > blk > လိတ်မွူးပအိုဝ်ႏ

"လိတ်မွူးပအိုဝ်ႏအကျောင်ꩻခရာႏ" ပအိုဝ်ႏလိုꩻမျိုꩻယိုခါနဝ်ꩻ အလိတ်အဝ်ႏနေဟောင်း? မဥ်ႏရီနဝ်ꩻ "အဝ်ႏဒျာႏ"ရိုꩻဗာႏနုဲင်းနဝ်ꩻသွူ။ ပအိုဝ်ႏလိတ်ယိုခါနဝ်ꩻ ဗွေႏဗွန်ကျောင်ꩻမုဲင်ꩻ တဲမ်းထွင်ႏဖေႏ? အတဲမ်းထွင်ႏ အနေင်ႏမုဲင်ꩻဟောင်း?မဥ်ႏရီနဝ်ꩻ "ဗွေႏဗွန်သုနန္ဒ၊ ကျောင်ꩻထီသိမ်ႏ တဲမ်းထွင်ႏထန်ႏဖေႏ၊ တဲမ်းထွင်ႏနေင်ႏ ၁၃၀၉-ဗာႏ"စေဗာႏနုဲင်းနဝ်ꩻသွူ။ ခါးလားလိတ်မွူးထီသိမ်ႏ ကပေါႏနဝ်ꩻ ပအိုဝ်ႏလိတ်အဝ်ႏနဲ့?အဲဥ်ထဝ်းနဲ့ မဥ်ႏရီနဝ်ꩻ "မဥ်ႏရိုꩻအဝ်ႏလဲ့ လꩻဒျာႏ၊ မဥ်ႏရိုꩻအဲဥ်ထဝ်းလဲ့ လꩻဒျာႏ"ရိုꩻဗာႏနုဲင်းနဝ်ꩻသွူ။ "အဝ်ႏ"ကရိုꩻနဝ်ꩻ ခါးလားလိတ်မွူးထီသိမ်ႏကပေါႏနဝ်ꩻ ပအိုဝ်ႏလိတ်မွူးအနေႏ တအဝ်ႏတဝ်းခေါ်ခေါ်လဲ့ ထူႏမန်းသရ၊ မန်းဗီး၊ မန်းလိတ်မွူး၊ မန်းလိတ်ဖြုံႏတဲင် တဲမ်းအီပအိုဝ်ႏငဝ်းနုဲင်းနဝ်ꩻတွော့ꩻ ပအိုဝ်ႏတာႏ ဟော်ꩻထွားခရာႏလိတ်ဟိုထမ်ꩻ၊ သုတ္တနိဗ္ဗာန်ႏ၊ ဝတ္ထုငဝ်းခြုဲင်းဖုံႏ၊ ပိဋကတ်ပြန်ႏပအိုတ်ႏဖုံႏအဝ်ႏတဲင် "ပအိုဝ်ႏလိတ်မွူးအဝ်ႏဒျာႏ"ရိုꩻဗာႏနုဲင်းနဝ်ꩻသွူ။ "အဲဥ်ထဝ်း"ကရိုꩻနဝ်ꩻ ပအိုဝ်ႏသရ၊ ပအိုဝ်ႏဗီးဖုံႏ၊ ပအိုဝ်ႏလိတ်မွူးတွဲꩻ၊ အမုဲင်၊ အဟဲ့ꩻအေဟာင်၊ အမဥ်ꩻဖုံႏနဝ်ꩻ တအဝ်ႏခေါ်ခေါ်တဝ်း၊ စူꩻငီꩻဗာႏဒျာႏ မန်းလိတ်အတွိုင်ꩻတဲင် ခါးလားလိတ်မွူးထီသိမ်ႏကပေါႏနဝ်ꩻ "ပအိုဝ်ႏလိတ်အဲဥ်ထဝ်း"ရိုꩻဗာႏနုဲင်းနဝ်ꩻသွူ။ လိတ်မွူးထီသိမ်ႏနဝ်ꩻ တွမ်ႏမန်းလိတ် ပွိုင်းကွာႏလို့ဝင်ꩻနုဲင်းမုဲင်ꩻအီ? မဥ်ႏရီနဝ်ꩻ "လိတ်မွူးထီသိမ်ႏနဝ်ꩻ ပအိုဝ်ႏအတာႏ သရအဝ်ႏခေါ်ခေါ်ဒျာႏ၊ ဗီႏအဆေ့ꩻအအာနဝ်ꩻ ဗွန်ပါဠိ၊ ဗွန်မန်း၊ ကမာꩻထူꩻချာꩻအီဒါႏ ပအိုဝ်ႏငဝ်းရန်းအမုဲင်ဖုံႏ၊ ဗီးခြွိုင်းခြိုꩻ အဟဲ့ꩻအဟောင်ဖုံႏ အဝ်ႏခေါ်ခေါ်ဒျာႏတဲင် တွမ်ႏမန်းလိတ် တဗွန်တဝ်း၊ ထူꩻလွိုထဲင်းက မန်းလိတ်၊ စွုမ်ႏထဲင်းက မန်းလိတ်ရိုꩻဗာႏနုဲင်းနဝ်ꩻသွူ။ ပအိုဝ်ႏသရ (၁၆)ဖြုံႏယိုခါ၊ ဗီး(၃၃)ဖြုံႏယိုခါ၊ အမုဲင်ဖုံႏယိုခါ၊ ဗီးခြွိုင်းခြိုꩻ အဟဲ့ꩻအဟောင် ယိုခါဖုံႏနဝ်ꩻ ဗွေႏဗွန်ထီသိမ်ႏ ကတဲမ်းခါꩻအတွိုင်ꩻ မွေးနဲ့? မွေးတဝ်းနဲ့?မဥ်ႏရီနဝ်ꩻ "မွေးတဝ်း"ဖြေႏဗာႏနုဲင်းနဝ်ꩻသွူ၊ ဗွေႏဗွန်ထီသိမ်ႏလိတ်မွူးစဲစ်စဲစ် "ပအိုဝ်ႏအက္ခရာႏ လိတ်မွူးတသာႏစောင်ႏ"ကိုနဝ်ꩻ ပအိုဝ်ႏသရ အဝ်ႏ(၁၂)ဖြုံႏ၊ ဗီးအဝ်ႏ(၃၆)ဖြုံႏ၊ အမုဲင်မဥ်ꩻခေါ်ခေါ်ဖုံႏ၊ ဗီးခြွိုင်းခြိုꩻ အဟဲ့ꩻအဟောင်ခေါ်ခေါ်ဖုံႏ အဲဥ်ထဝ်းသွူ။ ယိုခါ ကဟဲ့ꩻဒါႏ(-့)မုဲင်လ၊ မုဲင်နီဖြုံႏ(-း)ဖုံႏနဝ်ꩻ ဗွေႏဗွန်ထီသိမ်ႏ အွဥ်ႏပါသော့ꩻဒျာႏ ဗီး(၃၆)ဖြုံႏအကိုနဝ်ꩻသွူ၊ ကမာꩻထူꩻချာꩻဒါႏ ပအိုဝ်ႏငဝ်းအရန်းနဝ်ꩻ ဗွေႏဗွန်ထီသိမ်ႏ သုံꩻဒျာႏ"ပ"လာတခဝ်နုဲင်းယိုသွူ၊ သွင်ꩻငီꩻသော့ꩻဒျာႏ ဗီး(၃၆)ဖြုံႏစာႏရင်ꩻကိုသွူ။ လိတ်ပအိုဝ်ႏယိုခါ ကအဝ်ႏသုံꩻဒျာႏ(-ံ)မုဲင်ကီ၊ (-့)မုဲင်လ၊ (-း)မုဲင်နီဖြုံႏ၊ (-ꩻ)ပက်ငါ၊ (-ႏ)မုဲင်ပက်ငါစားယိုဖုံႏနဝ်ꩻ ပါꩻမုဲင်ꩻဖန်ဖေႏဟောင်း? မဥ်ႏရီနဝ်ꩻ "ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏစွိုꩻ"နမ်းတင်အနေႏ ဗွေႏဗွန်ကောဝိဒ၊ ကျောင်ꩻဇဝနာရာမ၊ ဝေင်ꩻသီႏသဲင်ႏ ဖန်ဖေႏသွူ။ ယိုလွုမ်ꩻမကာႏ ဗွေႏဗွန်ထီသိမ်ႏ သရ(၁၂)ဖြုံႏ၊ ကထွာလွေꩻဗာႏ သရ(၁၆)ဖြုံႏလဲ့နဝ်ꩻ၊ ဗီး(၃၃)ဖြုံႏအမဥ်ႏပအိုဝ်ႏဖုံႏတဲ့နဝ်ꩻ (-ွ)တဟွဲး၊ (-ိ)ဒင်ႏဝွိုန်ꩻ၊ (-ု)ထွို့ꩻခင်ႏတလီး၊ (-ူ)ထွို့ꩻခင်ႏနီလီး(-ါ၊ -ာ)ငေါ်ꩻလ၊ (-ာ်)ထွို့ꩻစွဲႏ-စတဲင် ဗီးခြွိုင်းခြိုꩻအမဥ်ꩻဖုံႏယိုလဲ့နဝ်ꩻ၊ သွဥ်ပုံႏသွဥ်နယ်ꩻလဲ့နဝ်ꩻ၊ ကစဲဥ်ႏကခြပ်ဒါႏ လိတ်မွူးတွဲꩻဖုံႏ၊ ဖတ်လွူꩻခန်ꩻဖုံႏလဲ့နဝ်ꩻ ဗွေႏဗွန်သီႏသဲင်ႏ ဖန်ဖေႏ၊ စဲဥ်ႏဖေႏဒျာႏလွဥ်းလွဥ်းသွူ။ ယိုလွုမ်ꩻမကာႏ စွုမ်ႏဒုံ၊ စွုမ်ႏနယ်ႏ တနေင်ႏတလဲင်ႏ ကအဝ်ႏသွဥ်၊ ကအဝ်ႏစေဒါႏ ဟော်ꩻထွားခရာႏ၊ သွဥ်ခရာႏလိတ်စောင်ႏဖုံႏယိုတဲ့ ဗွေႏဗွန်သီႏသဲင်ႏ တဲမ်းဒျာႏကဲဥ်းအာအာသွူ။ ဗွေႏဗွန်သီႏသဲင်ႏ တတဲမ်းဗာႏတဝ်း လိတ်စောင်ႏဖုံႏနဝ်ꩻ လိတ်စောင်ႏတမုဲင်ꩻခိꩻဟောင်း? မဥ်ႏရီနဝ်ꩻ "ထွားဗာႏတဲင်သေ"လိတ်စောင်ႏယိုနဝ်ꩻ ဗွေႏဗွန်ဉာဏောဘာသ၊ ကျောင်ꩻသက်စေ့ရန်အောင်၊ ဝေင်ꩻတောင်ႏကီꩻတဲမ်း၊ "မင်္ဂလာႏဗိုတုဲင်၊ လောကတွမ်ႏဗုဒ္ဓ၊ ပါႏရမီႏဆီပါꩻ"ယိုသွံစောင်ႏနဝ်ꩻ ဗွေႏဗွန်အာလောက၊ ကျောင်ꩻတုံခမ်ꩻ၊ ဝေင်ꩻဟိုပုံꩻတဲမ်း၊ ဓမ္မပဒ အမုဲင်(၁-၂)နဝ်ꩻ ဗွေႏဗွန်လက္ခဏသာမိ၊ ကျောင်ꩻအေးစေတီ၊ ဝေင်ꩻတောင်ႏကီꩻတဲမ်းဖေႏ၊ "ဓမ္မပဒ အမုဲင်(၃)"နဝ်ꩻ ဗွေႏဗွန်ကုဝေရ၊ ကျောင်ꩻလဲင်းခါႏ၊ ဝေင်ꩻဟိုပုံꩻတဲမ်းဖေႏ၊ လွိုနဝ်ꩻနဝ်ꩻ ဗွေႏဗွန်ကောဝိဒ၊ ကျောင်ꩻဇဝနာရာမ၊ ဝေင်ꩻသီႏသဲင်ႏ တဲမ်းဒျာႏလွဥ်းလွဥ်းနဝ်ꩻသွူ။ ပွိုးတမုဲင်ꩻ ဗွေႏဗွန်ကောဝိဒနဝ်ꩻ မွော့ဖျင်ဗာႏတွိုး ဗွေႏဗွန်ထီသိမ်ႏလိတ်မွူးစောင်ႏဟောင်း? မဥ်ႏရီနဝ်ꩻ ဗွေႏဗွန်ထီသိမ်ႏလိတ်မွူးစောင်ႏ လိတ်မူစဲစ်စဲစ်နဝ်ꩻ ပအိုဝ်ႏအတာႏ သရတစုံႏလင်ႏတဝ်း၊ အမုဲင်ဖုံႏ တစုံႏလင်ႏတဝ်း၊ ဗီးမဥ်ꩻ၊ ဗီးခြွိုင်းခြိုꩻမဥ်ꩻအဲဥ်ထဝ်း၊ လိတ်မွူးစဲဥ်ႏသျင်ꩻတဝ်း၊ ဖတ်လွူꩻခန်ꩻသျင်ꩻတဝ်း၊ သွဥ်ပုံႏသွဥ်နယ်ꩻလဲ့ပါတဝ်း၊ ကအီႏသွဥ်ဗာႏ၊ ကအီႏဒါႏဗာႏနဝ်ꩻ တယိုꩻတဝ်းတဲင် ဗွေႏဗွန်ကောဝိဒ ထဲမ်ဖျင်ဖေႏဗာႏဒျာႏသွူ။ ဗွေႏဗွန်ကောဝိဒ ကထဲမ်ဖျင်ဒါႏ လိတ်မွူးစောင်ႏနဝ်ꩻ ပအိုဝ်ႏသံႏဃာႏဖုံႏ ကျွိုက်လို့နေဟောင်း? မဥ်ႏရီနဝ်ꩻ "ကျွိုက်လို့တဝ်း"ရိုꩻဗာႏနုဲင်းနဝ်ꩻသွူ။ အတကျွိုက်တဝ်းသားဖုံႏနဝ်ꩻ ဒါႏလဲပ်တဝ်းလိတ်ပအိုဝ်ႏ၊ သေနာႏတဝ်းလိတ်ပအိုဝ်ႏ၊ ကအဝ်ႏလိုႏနေဒွိုန်းယိုဖုံႏလဲ့ပါပါ၊ နာႏလိုႏတဝ်း၊ ဟွုန်ဟဝ်တဝ်း ဗွေႏဗွန်သီႏသဲင်ႏလဲ့ပါပါ၊ စွယ်ꩻပုဂ္ဂိုလ်ႏ၊ စွယ်ꩻဆရာႏဖုံႏလဲ့ပါပါတွော့ꩻ ကျွိုက်တဝ်းဒျာႏ သေနာႏသဘော်ꩻဗွောင်နုဲင်းနဝ်ꩻသွူ။ ဗွေႏဗွန်သီႏသဲင်ႏ ကဖျင်၊ ကထဲမ်ဗာႏ လိတ်ပအိုဝ်ႏယိုနဝ်ꩻ သေတဝ်းဆရာႏကေꩻဇူꩻ၊ မဲဥ်ယားထိုꩻ လိတ်ပအိုဝ်ႏနုဲင်းနဝ်ꩻလဲ့ အလွိုးတမွေးတဝ်း၊ မဲဥ်လꩻဂုဏ်ႏ၊ မဲဥ်လꩻမဥ်ꩻနုဲင်းနဝ်ꩻလဲ့ အလွိုးတမွေးတဝ်း၊ လိတ်မွူးသီႏသဲင်ႏနုဲင်းနဝ်ꩻလဲ့ ဝွေꩻဗွေႏတရိုꩻဖိုတဝ်း၊ ဟဲ့ꩻဒျာႏ လိတ်မွူးထီသိမ်ႏတွိုင်ꩻတွိုင်ꩻ၊ ထူႏဂုဏ်ႏဒျာႏ ဗွေႏဗွန်ထီသိမ်ႏတွိုင်ꩻတွိုင်ꩻသွူ။ သွူတကာႏတဝ်း အမျိုꩻယို၊ အမျိုꩻနဝ်ꩻ၊ အရဲဥ်ႏယို၊ အရဲဥ်ႏနဝ်ꩻ ဗွေႏဗွန်သီႏသဲင်ႏဖျင်၊ ဗွေႏဗွန်သီႏသဲင်ႏထဲမ်နုဲင်းနဝ်ꩻတဲ့ တရာႏဝင်ႏဝင်ႏ၊ ထင်ႏထင်ႏသျာꩻသျာꩻ တကျောႏညာႏတဝ်း၊ လိတ်မွူးစောင်ႏလောင်းနဝ်ꩻလဲ့ ဗွေႏဗွန်သီႏသဲင်ႏ တဲမ်းစီႏစဲဥ်ႏထန်ႏဖေႏနုဲင်းနဝ်ꩻလဲ့ တရိုꩻတဝ်း၊ "ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏစွိုꩻ တဲမ်းစီႏစဲဥ်ႏထန်ႏဖေႏ"ရိုꩻဒျာႏနုဲင်းနဝ်ꩻသွူ။ ဗွေႏဗွန်သီႏသဲင်ႏနဝ်ꩻ ကေားတဲမ်းထွင်ႏလိတ်မွူးသားမွေးတဝ်း၊ ဗွေႏဗွန်ထီသိမ်ႏလိတ်မွူးယို အထီအသွီႏ ဖေႏကဗွေထဲင်းထဲင်းတွော့ꩻ မွဥ်ႏဖျင်ဖေႏယင်းနုဲင်းနဝ်ꩻဒျာႏတဲင် ဝွေꩻဗွေႏနဝ်ꩻ ထွာဒျာႏမွဥ်းဖျင်သားဒျာႏသွူ။ မဥ်ႏဒေါ့ꩻဗာႏနေး တွမ်ႏဥပမာႏနဝ်ꩻ ဗွေႏဗွန်ထီသိမ်ႏ ကဒွိုႏဒါႏ ဟန်ႏအိုထီထွူႏ၊ ဟန်ႏအိုထော့ꩻယာႏယို အမီႏတပေါႏစွုမ်ႏငါႏတဝ်းဒွိုန်း၊ အရသာႏ တပေါႏခွူငါႏတဝ်းဒွိုန်းတွော့ꩻ ဝွေꩻဗွေႏသော့ꩻစွုမ်ႏဖေႏအမီႏ နုဲင်းနဝ်ꩻလွုမ်ꩻသွူ။ လိတ်ပအိုဝ်ႏယိုခါနဝ်ꩻ မွဥ်းဖျင်ထဲမ်လဲဥ်း အလဲင်ႏလဲင်ႏအခြွိုက်ခြွိုက်တဲင် လိတ်မွူးအထီထွူႏ၊ လိတ်မွူးအထီဗွေ၊ လိတ်မွူးအနယ်ꩻလွစ်အနေႏ အွဥ်ႏထွော့ဖေႏနွောင်ꩻလဲဥ်းသွူဟောင်း? မဥ်ႏရီနဝ်ꩻ "အွဥ်ႏထွော့နွောင်ꩻတဝ်းဒွိုန်း"ရိုꩻဗာႏနုဲင်းနဝ်ꩻသွူ။ ပွိုးနုဲင်းမုဲင်ꩻနဲးတဲင် လိတ်မွူးပအိုဝ်ႏယိုခါ မဥ်ႏခဥ်ႏတဲက်တွမ်ႏ မန်းလိတ်နဝ်ꩻ သရလဲ့လွိုပိုႏ၊ ငဝ်းရန်းအမုဲင်ဖုံႏလဲ့အာ၊ သရငဝ်း၊ အသွတ်ꩻငဝ်းဖုံႏလဲ့ မဲဥ်ႏအာတဲင် စွုမ်ႏလဲဥ်းမန်းလိတ်၊ မဲဥ်ႏအာထဲင်းလဲဥ်းမန်းလိတ်၊ သွဥ်ယိုꩻလဲဥ်းမန်းလိတ်လဲ့ ပအိုဝ်ႏငဝ်းအနေႏနဝ်ꩻ အဝ်ႏလိုႏနေဒွိုန်းက တစူးတစိꩻသွူ။ သရငဝ်း၊ အသွတ်ꩻငဝ်းဖုံႏလဲ့ တမဲဥ်ႏလို့ငါႏတဝ်းဒွိုန်း၊ အဝ်ႏလိုႏဖျင်၊ အဝ်ႏလိုႏစဲဥ်ႏစွို့ꩻလဲ့ အဝ်ႏနေကဒွိုန်း ယဟူးယဟန်ႏတဲင် လိတ်မွူးအနယ်ꩻလွစ်အနေႏနဝ်ꩻ အွဥ်ႏထွော့တခုဲင်ႏလꩻတဝ်းဒွိုန်းသွူ။ ကအဝ်ႏလိုႏနေဖုံႏနဝ်ꩻ ကထီႏ၊ ကမော့ꩻ၊ ကသေ၊ ကဒါႏသား သꩻရက်ခွိုꩻအဝ်ႏ ပအိုဝ်ႏပေႏသီးဖုံႏ အဝ်ႏယီးနယ်၊ အဝ်ႏဒင်ႏပျꩻနယ်ဒျာႏ ဥက္ကဋ္ဌဗွေႏဆရာႏတောႏတဲင် ဗွေႏဆရာႏတောႏ အဝ်ႏသလို့ဒျာႏသွူ။ အဝ်ႏသေလို့ဒျာႏလဲ့ ကွပ်ယူႏ၊ ကွပ်တွက်လိုꩻတသေတဝ်း၊ လိုꩻတဒါႏတဝ်း လိတ်ပအိုဝ်ႏသားတာႏ၊ ကွပ်ငမ်းငါႏ လွောင်ႏဗူႏရေꩻကုဲင်တဲင် ဝင်ꩻကဒင်ႏပျꩻ၊ ဝင်ꩻကခြုဲင်းနယ်ဒါႏ လိတ်မွူးခရာႏဖုံႏယို မာꩻနုဲင်းတဟွုန်တဝ်း၊ မာꩻနုဲင်းတသေတဝ်းပုံႏတွော့ꩻ ယွုန်းယောသယ်ꩻခံႏ အုံတေ့ꩻအုံယေန်လွေꩻဒျာႏထာꩻနဝ်ꩻ နေင်ႏပေါင်ꩻမနဲးအာငါႏလဲဥ်းဒျာႏသွူ။ နဝ်ꩻတွော့ꩻ ဟန်ႏသနီꩻ ဟံႏတဗီႏလိုမ်းလိုမ်းယိုနဝ်ꩻ အဝ်ႏထင်ႏထိုလွဥ်လဲဥ်း စူစွိုးစွိုးလဲ့ နီပအိုဝ်ႏလိတ်နဝ်ꩻ အတထောင်လွဥ်ꩻတဝ်း ခေတ်ထီထွတ်ꩻတွော့ꩻ ကအဝ်ႏအုံခမ်၊ ကအဝ်ႏအုံစွူ၊ ကအဝ်ႏအုံယွုတ်ꩻဗာႏထာꩻနဝ်ꩻ ခွေသွဥ်းအနေႏ ထွာပအိုဝ်ႏတဖြာꩻနဝ်ꩻ သꩻပေႏငါႏထာꩻနဝ်ꩻမꩻ ဝင်ꩻရိုꩻ"တသေတဝ်းနဝ်ꩻ ယပ်ꩻလဲက်းတအဲဥ်ထဝ်း"ငတ်းနဝ်ꩻ မွေးမဲဥ်ႏငါႏထာꩻသွူ။ နီပအိုဝ်ႏလိတ်မွူးယို စွုမ်ႏလဲ့ဖေႏကစွုမ်ႏ၊ မဲဥ်ႏလဲ့ဖေႏကမဲဥ်ႏ၊ သွဥ်လဲ့ဖေႏကယိုꩻ၊ ဖေႏကထွာ"စွုမ်ႏ၊ မဲဥ်ႏ၊ ယိုꩻ"လိတ်မူနဝ်ꩻ အာႏဏာႏကအဝ်ႏဒါႏ ဗွေႏဆရာႏတောႏတန်သီး အဝ်ႏလိုႏအွဥ်ႏစွꩻဖေႏလဲဥ်းအခွင်ꩻ၊ လိုꩻသေလိုꩻဒါႏ၊ လိုꩻသေနာႏလိတ်သဘော်ꩻတရာꩻသားသီး အချင်ꩻချင်ꩻ ဒေါ့ꩻရိတွိုင်ႏပင်ႏခွင်ꩻ၊ ဖေႏကျံႏဉာဏ်ႏလို့ဝင်ꩻ ဖေႏကလꩻနဝ်ꩻ ချꩻဖွိုႏလွခန်း မာႏနပငါပရာꩻတဲင် အဝ်ႏလိုႏဖေႏငါႏလဲဥ်းဝင်ꩻ အခွင်ꩻအရေꩻသွူ။ နီဖေႏနေး ကတသွုန်ထွꩻလꩻဝင်ꩻနဝ်ꩻ ဝင်ꩻကာတကာ နီမဥ်ႏကာ အကာတဆီမꩻ အီႏထွꩻတသွုန်လꩻဝင်ꩻကရိုꩻနဝ်ꩻ အဝ်ႏလိုႏသေနာႏဖေႏငါႏလဲဥ်းဝင်ꩻ ပငါပရာꩻသွူ။ နီပအိုဝ်ႏလိုꩻမျိုꩻ ဂျိုဟ်ႏဇာႏတာႏ၊ နီလိတ်ပအိုဝ်ႏ ဂျိုဟ်ႏဇတာႏယို ဖေႏကအဝ်ႏသော့ꩻ၊ အုံသော့ꩻစွူစွူဗာႏပုဲင်ႏဒွုမ် ပါပဂျိုဟ်ႏ၊ ဖေႏကလဲဥ်းတနꩻသော့ꩻခန်း သောမဂျိုဟ်ႏကိုနဝ်ꩻ ခွေသွဥ်းအဝ်ႏဆုတောင်ꩻ အဝ်ႏမောင်ꩻကော့ꩻတသေႏသေႏဒျာႏသွူ။[1][2]

အာႏကွိုꩻEdit

  1. ခွန်ကုဝေ-မုဲင်းကောင်
  2. မွူးလာရောင်ႏလိတ်စောင်ႏ အမုဲင်-၃