Wp/blk/လိတ်မွူးခရာႏ

< Wp‎ | blkWp > blk > လိတ်မွူးခရာႏ

"လိတ်မွူးခရာႏ ခြုဲင်းနယ်ဗာႏ" လိတ်ပအိုဝ်ႏသမဲင်ꩻယို မီႏဒေါ့ꩻဗာႏအအဲဉ်ႏနဝ်ꩻ အဝ်ႏ(၂)ကွို့ꩻလွုမ်ꩻသွူ၊ (၂)ကွို့ꩻကရိုꩻနဝ်ꩻ- (က) ခါးလားလိတ်မွူးထီသိမ်ႏကပေါႏ တရေင်သိုမ်ရျာꩻကွတ်ꩻဗာႏမာꩻချာ ထူႏတွမ်ႏမန်းလိတ်ဖြုံႏတွော့ꩻ ကတဲမ်းအီဒါႏ ပအိုဝ်ႏငဝ်းနဝ်ꩻ တကွို့ꩻ။ (ခ) လိတ်မွူးထီသိမ်ႏပေါႏထွူမာꩻငါ ဗꩻတွိုႏဟန်ႏသနီꩻနဝ်ꩻတကွို့ꩻ၊ အဝ်ႏယို(၂)ကွို့ꩻသွူ။ ခါးလားလိတ်မွူးထီသိမ်ႏကပေါႏ ထူႏတွမ်ႏမန်းလိတ်ဖြုံႏတွော့ꩻ ကတဲမ်းအီဒါႏ ပအိုဝ်ႏငဝ်းနဝ်ꩻ ငဝ်းတငွါ လိတ်တဖြုံႏထွာတဝ်း၊ တနယ်ꩻ- ပအိုဝ်ႏငဝ်းယို ထူႏတွမ်ႏမန်းလိတ်ဖြုံႏတဲမ်းအီနဝ်ꩻ ပအိုဝ်ႏငဝ်းစွုမ်ႏငွါ တဲမ်းအီတလꩻတဝ်း၊ ရံꩻဟော်ꩻဖံꩻဟော်ꩻဗာႏနေး ယဟန်ႏတဲင် ငဝ်းတငွါလိတ်တဖြုံႏ ဖေႏကထွာတွော့ꩻ တဲႏထွင်ႏတသာဗာႏလိတ်ပအိုဝ်ႏ ဗွေႏဗွန်ထီသိမ်ႏရိုꩻနုဲင်းနဝ်ꩻသွူ။ ပွိုင်းဝွို့တွမ်ႏဗွေႏဗွန်ထီသိမ်ႏ ကတဲႏထွင်ႏဒါႏ လိတ်ပအိုဝ်ႏအကျောင်ꩻခရာႏယို ဗွေႏဗွန်ထီသိမ်ႏကတဲမ်းဒါႏ "ပအိုဝ်ႏအက္ခရာႏလိတ်မွူးတသာ"ငဝ်းနိဒါန်း မန်းဘာႏသာႏအတွိုင်ꩻ မီႏတွမ်ထန်ႏ ပြန်ႏနယ်ဖေႏ ပအိုဝ္ႏဘာႏသာႏနဝ်ꩻ နုဲင်းဆꩻငါယိုအတွိုင်ꩻသွူ။ (က)ဗွေႏဗွန်ထီသိမ်ႏ ကတဲႏထွင်ႏတဲမ်းထွူဒါႏ လိတ်မွူးတသာပအိုဝ်ႏနဝ်ꩻ ၁၃၀၉-ဗာႏ၊ ဒဲဉ်ရုတ်ꩻလာဆန်ꩻ(၁၅)နီꩻထွူ-ရိုꩻနဝ်ꩻလဲ့ ကတွယ်ႏနျꩻဒါႏ "ပအိုဝ်ႏအက္ခရာႏလိတ်မွူးတသာ"နဝ်ꩻ ၁၃၁၉-ဗာႏ ရိုꩻနဝ်ꩻတဲင် တဲမ်းထွူလꩻနေင်ႏဆီမꩻ တွယ်ႏနျꩻထန်ႏသွူ။ (ခ) ပအိုဝ်ႏအက္ခရာႏလိတ်မွူးတသာစောင်ႏ မဲ့ငါဒို့ꩻလောင်းနဝ်ꩻ "ကောဖျင်သား ဗွေႏဗွန်ဉာဏ၊ ကျောင်ꩻထမ်းဘုရာꩻ"အဝ်ႏပါနုဲင်းနဝ်ꩻတဲင် ကတွယ်ႏနျꩻဒါႏ ပအိုဝ်ႏအက္ခရာႏလိတ်မွူးတသာယိုနဝ်ꩻ ဗွေႏဗွန်ထီသိမ်ႏ ကတဲမ်းအတွိုင်ꩻ တမွေးတဝ်း၊ ဖျင်ဗာႏယဟန်ႏ သေနာႏဗာႏနုဲင်းနဝ်ꩻသွူ။ (ဂ) ပအိုဝ်ႏအက္ခရာႏလိတ်မွူးတသာ နိဒါန်းမန်းဘာႏသာႏ လိတ်မဲ့ငါ(ဃ) ဒုတိယလိတ်ပွိုက်အထျꩻနဝ်ꩻ "စင်စစ်မှာ မိရိုးဖလာ ဆရာသမားတို့၏ အပြုအမူ အယူဝါဒ ထုံးစံသည် ဘုရားရဟန္တာမဟုတ်သည်ဖြစ်၍ အကျိုးမရှိ၊ ဟုတ်လေသလော၊ မဟုတ်မမှန်လေသလော အတွေးအတော အကြံဉာဏ်ရှိစေရမည်၊ အကျိုးရှိသည် ဟုတ်မှန်ခဲ့လျှင် တိုးပြီးကြိုးစားရမည်၊ အကျိုးမရှိ မဟုတ်မမှန်ခဲ့လျှင် ပယ်ပစ်ရမည်၊ ဝါ-ခေတ်ပြောင်းပေးရမည်ဖြစ်၏။" အဝ်ႏပါနုဲင်းယိုတဲင် ပွိုင်းဝွို့တွမ်ႏ ဝွေꩻဗွေႏလိတ်မူယိုနဝ်ꩻ မဲဉ်ႏလဲ့နဝ်ꩻ၊ မာႏလဲ့နဝ်ꩻ ဖျင်လꩻတဝ်းတစိꩻစိꩻ၊ စွုမ်ႏလဲ့နဝ်ꩻ၊ စွုမ်ႏတဝ်းလဲ့နဝ်ꩻ ထဲမ်လꩻတဝ်းတစွိုးစွိုး ထာꩻယူႏနုဲင်းနဝ်ꩻ အလွိုးတအဲဉ်ထဝ်းသွူ၊ လိတ်စောင်ႏယို ဗွေႏဗွန်ဉာဏ၊ ထမ်းဘုရာꩻ အဝ်ႏဖျင်လဲဉ်းဒျာႏရင်ꩻသွူ။ (ဃ) ဗွေႏဗွန်ဖြားကျောင်ꩻတန် ဦးနရိန္ဒ၊ ဗွေႏဗွန်ဖြားကံဦး ဦးမေဓိယ ဝွေꩻဗွေႏသီး ၂-ပါꩻ တဲက်တွန်ꩻချက်အလꩻ တဲႏထွင်ႏတဲမ်းထန်ႏဖေႏဗာႏ ရိုꩻနုဲင်းနဝ်ꩻသွူ။ (င) ပအိုဝ်ႏလိုꩻမျိုꩻနဝ်ꩻ ဗုဒ္ဓဘာႏသာႏလိုꩻမျိုꩻတဲင် ပါဠိအက္ခရာႏ၊ မန်းအက္ခရာႏ၊ ပအိုဝ်ႏအက္ခရာႏ မီႏလိန်ႏမာႏ ကျင်ႏလယ်ႏနဝ်ꩻ သွဉ်ဒါႏယိုꩻ-ရိုꩻနုဲင်းနဝ်ꩻသွူ။ (စ) ဗွေႏဗွန်ထီသိမ်ႏလိတ်မွူးနဝ်ꩻ ဗီးအဝ်ႏ(၃၃)ဖြုံႏ နုဲင်းကအဝ်ႏသွဉ်ယိုခါနဝ်ꩻ မွေးတဝ်း၊ မီႏအဝ်ႏ(၃၆)ဖြုံႏဒျာႏသွူ၊ (၃၆)ဖြုံႏအကို "အံ"နဝ်ꩻ တဲမ်းတဝ်း"အံ"၊ ထွားနုဲင်းမန်းတဲင် တဲမ်းဒျာႏ"အ"သွူ၊ သွံဆီလစ်ꩻဖြုံႏမျောက်နဝ်ꩻ မုဲင်လ"-့"အဝ်ႏနုဲင်းနဝ်ꩻ၊ (၃၅)ဖြုံႏမျောက်နဝ်ꩻ လာတခဝ်"-"အဝ်ႏနုဲင်းနဝ်ꩻသွူ။ မုဲင်လ"-့"၊ မုဲင်နီဖြုံႏ"-း"၊ လာတခဝ်"-"ယို(၃)ဖြုံႏနဝ်ꩻ သွင်ꩻသော့ꩻဗီးစာႏရင်ꩻကိုသွူ။ (ဆ) ဗွေႏဗွန်ထီသိမ်ႏလိတ်မွူးနဝ်ꩻ ပအိုဝ်ႏအက္ခရာႏလိတ်မွူးတသာစောင်ႏ လိတ်မဲ့ငါ(၁) သင်္ကေတသရနှင့်ဗျည်းရောစပ်ပုံ-ဇယားအလꩻ ပအိုဝ်ႏငဝ်း(၈)ရန်းအတွိုင်ꩻ မွေးတဝ်း၊ အဝ်ႏ(၆)ရန်းလွုမ်ꩻသွူ။ (ဇ) လိတ်မဲ့ငါ(၂)ကိုနဝ်ꩻ အွဉ်ႏနယ်ပါ သရတဲင် ဗွေႏဗွန်ထီသိမ်ႏလိတ်မွူးနဝ်ꩻ သရ(၁၆)ဖြုံႏနုဲင်းကအဝ်ႏသွဉ်ယိုခါမွေးတဝ်း၊ အဝ်ႏ(၁၂)ဖြုံႏလွုမ်ꩻသွူ။ ၁၂-ဖြုံႏကရိုꩻနဝ်ꩻ အအာ ဣဤ ဥဦ ဧ အဲ အုဲင် ဩ ဩာ် အို-အဝ်ႏနုဲင်းယိုသွူ။ (ဈ) လိတ်မဲ့ငါ(၃)ကိုနဝ်ꩻ ပွိုင်းဝွို့တွမ်ႏ "-"လာတခဝ်သင်္ကေတနဝ်ꩻ ဗွောင်သေꩻခါꩻ အဓိပ္ပါယ်ႏနုဲင်းယိုသွူ။ "-"လာဆန်ꩻစသွံဟာဥပမာႏ အက္ခရာႏသင်္ကေတ၊ ပုဗ္ဗနိမိတ်၊ အဟိတ်ထွာလွဉ်၊ အွဉ်ႏသေꩻသင်္ကေတသွူ၊ "-"သင်္ကေတယို မဉ်ႏလွေꩻသေန်ႏလွဉ်ꩻအက္ခရာႏလင် တမျိုꩻမျိုꩻနဝ်ꩻ ပအိုဝ်ႏငဝ်းထန်ႏလွဉ်အထူꩻ ဝိသေသန သင်္ကေတအက္ခရာႏ မဉ်ꩻဗာႏနုဲင်းနဝ်ꩻနော"။ (ည) ပအိုဝ်ႏအက္ခရာႏလိတ်မွူးတသာစောင်ႏကို ကတဲမ်းနယ်ဒါႏ ဥဒါႏဟရုဏ်ႏဖတ်ခဏ်ꩻ(ယိုခါအဟဲ့ꩻ)ဖတ်လွူꩻခန်ꩻနဝ်ꩻ ပအိုဝ်းငဝ်းခြေင်ခြေင်မွေးတဝ်း၊ ပအိုဝ်ႏမန်းတွယ်ꩻနေးတဝင်ꩻသွူ။ မီႏတဲမ်းနယ်ဗာႏ ဥပမာႏယဟန်ႏနဝ်ꩻ- "ဥဒါဟရုဏ်-ဖတ်ခဏ်ꩻ" ပအိုဝ်ႏငေါဝ်း မန်းငေါဝ်း -ကꩻလတဆင်ႏ ခဏဝတ်သည် -ကာꩻပေႏ ကားငယ် -အရေꩻကီꩻ အရေးကြီးသည် -ကလူꩻတကေꩻ ဆံပင်ကောက် -အေႏကေ့ꩻ ကနုတံ -ကဲ့ꩻထဲ့လုဲင်း ဖြတ်လိုက်ပါ -ဖြေꩻကာꩻ ကားဝယ်သည် -လိုꩻကုဲင် လူဆိုး (ဋ) ပအိုဝ်ႏအက္ခရာႏ၊ လိုႏမွိုင်ငါႏ၊ မာꩻဗာႏအအဲဉ်ႏစား။ ရွဉ်သမ်းလို့အာ၊ တွိုႏဆုဲင်ꩻချာ၊ မာꩻဖျင်ယင်းတစား။ သံးလိုႏထွူမွိုင်၊ မာꩻဖေႏပြွိုင်၊ အမွိုင်ယိုတစား။ ပအိုဝ်ႏအက္ခရာႏ၊ လိုꩻစွုမ်ႏဖြာꩻ၊ ယံကဒါႏဗာႏ။ မဉ်ႏဒါႏယိုမꩻ၊ တဲမ်းတွိုင်ꩻလꩻ၊ သွဉ်လွသွော့စွုမ်ႏဖြာꩻ။ စွုမ်ႏဖြာꩻမဉ်ႏဒါႏ၊ သုံꩻကမ္ဘာႏ၊ ယံကဒါႏလွဝင်ꩻ။ ပအိုဝ်ႏအက္ခရာႏ၊ နိဋ္ဌိတာႏ၊ အနာသွတ်ꩻထွူနော။ (ဌ) လိတ်စောင်ႏယို ငင်းဒို့ꩻလောင်း "လိတ်ကျောႏညာႏ"ကိုနဝ်ꩻ ကွပ်ပွိုးစွဉ်ႏရွဉ်ကား အခရာႏတွော့ꩻ အွဉ်ႏကုဲင်သေꩻဗာႏ လိတ်ယဟန်ႏ-ရိုꩻနုဲင်းနဝ်ꩻသွူ။ ထွားထွူအချက်နုဲင်းဆချာယိုဖုံႏတဲင် ပွိုင်းဝွို့တွမ်ႏလိတ်ပအိုဝ်ႏယိုခါ မီႏစံႏဖြွꩻ(သုံးသပ်)ဗာႏနဝ်ꩻ- ဗွေႏဗွန်သုနန္ဒ ကျောင်ꩻထီသိမ်ႏ ကတဲမ်းတဲႏထွင်ႏဒါႏ လိတ်မွူးပအိုဝ်ႏယိုနဝ်ꩻ တွိုႏဆုဲင်ꩻချာ ဖျင်လꩻတဝ်း၊ ထဲမ်လꩻတဝ်းလဲ့ ဝွေꩻဗွေႏတရိုꩻတဝ်း။ တရိုꩻတဝ်းတဲင် ဗွေႏဗွန်ဉာဏ၊ ကျောင်ꩻထမ်းဘုရာꩻ ကတွယ်ႏနျꩻဒါႏ "ပအိုဝ်ႏအက္ခရာႏလိတ်မွူးတသာ"ယိုနဝ်ꩻ အဝ်ႏဖျင်လဲဉ်းဒျာႏသွူ၊ "မီႏတွိုႏဆုဲင်ꩻချာနဝ်ꩻ အီႏမာꩻဖျင်ယင်းတစား"အဝ်ႏရိုꩻပါဒွိုန်းနုဲင်းနဝ်ꩻသွူတကာႏတဝ်း၊ အွဉ်ႏကုဲင်ခါꩻဗာႏလိတ်ယဟန်ႏ-နုဲင်းနဝ်ꩻလဲ့ အဝ်ႏရိုꩻသွူ။ ဗွေႏဗွန်ဉာဏ ထမ်းဘုရာꩻဖျင်၊ အွဉ်ႏကုဲင်သွူတကာႏတဝ်း ဗွေႏဗွန်ဉာဏ ကတွယ်ႏနျꩻဒါႏ ပအိုဝ်ႏအက္ခရာႏလိတ်မွူးတသာတွမ်ႏ ယိုခါကအဝ်ႏသွဉ် ကအဝ်ႏသွုံꩻယိုနဝ်ꩻ တဗွိုန်ဖျင်တဝ်းတဝင်ꩻသွူ။ ဗွိုန်တဝ်းနုဲင်းမုဲင်ꩻနဲးတဲင် နဝ်ꩻခါ ဗီး(၃၆)ဖြုံႏနဝ်ꩻ ယိုခါ အ၀်ႏကုဲင်(၃၃)ဖြုံႏလွုမ်ꩻ၊ လာတခဝ်"-"သင်္ကေတနဝ်ꩻလဲ့ ထွာလုဲင်ႏလဲဉ်း ပက်ငါ"-ꩻ"၊ ထွာလုဲင်ႏလဲဉ်း မုဲင်ပက်ငါ"-ႏ"ဖုံႏသွူ။ သေးသေးတင်(နိဂ္ဂဟိတ်)နဝ်ꩻ ထွာလုဲင်ႏလဲဉ်း မုဲင်ကီ"-ံ"၊ အောက်ကမြစ်နဝ်ꩻ ထွာလုဲင်ႏလဲဉ်း မုဲင်လ"-့"သွူ။ သရလဲ့ နဝ်ꩻခါအတွိုင်ꩻ (၁၂)ဖြုံႏတမွေးတဝ်းဒွုမ် ထွာလုဲင်ႏလဲဉ်း (၈)ခွမ်ꩻ၊ (၁၆)ဖြုံႏသွူ၊ ကွယ်ႏတွော့ꩻ အရေꩻကတန်ဒါႏ သရငဝ်းနဝ်ꩻ အဝ်ႏတွိုင်ꩻတွိုင်ꩻဒျာႏ၊ ပြောင်ꩻလုဲင်ႏဒျာႏ အလွိုးငုဲင်ꩻ လိတ်ဖြုံႏယဟန်ႏလွုမ်ꩻသွူ။ ဥပမာႏ- မော့ꩻနဝ်ꩻခါ ယိုခါ

              ဣ ဤ             အိ၊ အီ
              ဥ ဦ               အု၊ အူ
              ဧ                 အေ
              ဩ၊ ဩာ်           အော့၊ အော်

အ၊ အာ၊ အဲ၊ အုဲင်၊ အို-နဝ်ꩻ အဝ်ႏတွိုင်ꩻတွိုင်ꩻဒျာႏသွူ။ အမဲဉ်ႏတဗာႏလဲ့ ပအိုဝ်ႏသရနဝ်ꩻ အဝ်ႏငါ-အ၊ အာ၊ အိ၊ အီ၊ အု၊ အူ၊ အေ၊ အဲ၊ အုဲင်၊ အော၊ အို-ယို(၁၁)ဖြုံႏငါလဲ့ လꩻလဲဉ်းဒျာႏသွူ၊ ဆꩻငါ(၅)ဖြုံႏယို မဉ်ႏသော့ꩻဖေႏ မုဲင်လနဝ်ꩻ ထွာစွဉ်ႏရဿသရ အငဝ်းဒွေါင်ႏစားနုဲင်းယိုခါအတွိုင်ꩻနဝ်ꩻသွူ။ အအာ အအီ အုအူ-ယို(၆)ဖြုံႏနဝ်ꩻ ပါဠိကိုလဲ့ ရဿ၊ ဒီဃ-တွယ်ꩻထွူလဲဉ်းတဝင်ꩻတဲင် အွဉ်ႏကုဲင်ထိုꩻ တဖြုံႏဖြုံႏနဝ်ꩻ တလꩻတဝ်းသွူ၊ အိအီ၊ အုအူ-ယို(၄)ဖြုံႏနဝ်ꩻ အငဝ်းဗွိုန်ပါဠိသရလဲ့ လိတ်ဖြုံႏနဝ်ꩻ တဗွိုန်တဝ်း၊ ပါဠိသရနဝ်ꩻ တဲမ်းဒျာႏ ဣ၊ ဤ၊ ဥ၊ ဦ-နုဲင်းနဝ်ꩻသွူ။ ဗွေႏဗွန်ထီသိမ်ႏ ကတတဲမ်းပါတဝ်း ဗီးမဉ်ꩻဖုံႏ၊ ဗီးခြွိုင်းခြိုꩻမဉ်ꩻဖုံႏယိုလဲ့ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏစွိုꩻ ဖန်ဖေႏဖျင်ဒျာႏသွူ။ ကလိုႏအပ်ထဲင်းဒါႏ လိတ်ရဲဉ်ႏယဟန်ႏဖုံႏလဲ့နဝ်ꩻ၊ အငဝ်းတထန်ႏမဲဉ်ႏတဝ်း လိတ်ရဲဉ်ႏယဟန်ႏလဲ့နဝ်ꩻ ဗဟိုႏသံႏဃာႏ ထဲမ်ဖေႏ၊ ဖျင်ဖေႏလဲဉ်းဒျာႏသွူ။ ကွယ်ႏတွော့ꩻ ကလိုႏအပ်နေဒါႏ လိတ်ရဲဉ်ႏယဟန်ႏဖုံႏ၊ အငဝ်းတထန်ႏမဲဉ်ႏတဝ်း လိတ်ရဲဉ်ႏဖုံႏနဝ်ꩻ အဝ်ႏနေဒွိုန်းသွူ။ လိတ်တရဲဉ်ႏ အငဝ်းကထန်ႏဒါႏ ၂-မျိုꩻ နုဲင်း ကွတ် ကွတ်ꩻ ကွန် ကွန်ꩻ ကွန်း ကွန်ႏ-လိတ်ရဲဉ်ႏယိုလဲ့ အဝ်ႏနေဒွိုန်းသွူ။ ငဝ်းတငွါ လိတ်ကအဝ်ႏနီမျိုꩻ နီရဲဉ်ႏ နုဲင်း ကုံ့ ကုံ့ꩻ ကုံ ကုံꩻ ကုံး ကုံႏ၊ ကုတ် ကုတ်ꩻ ကုန် ကုန်ꩻ ကုန်း ကုန်ႏ-ဖုံႏယိုလဲ့ အဝ်ႏနေဒွိုန်းသွူ။ လိတ်ပအိုဝ်ႏယိုခါနဝ်ꩻ "နာꩻငဝ်းခွေထူႏ၊ ခွေငဝ်းနာꩻထူႏ တဗူႏတဗန်ႏ"၊ "လုမ်းတဝ်း အဝ်ႏလွို"ရိုꩻဗာႏနုဲင်းနဝ်ꩻသွူ။ နဝ်ꩻတွော့ꩻ နီပအိုဝ်ႏအခေႏနေႏယိုခါနဝ်ꩻ ဆွတ်ချာတွော့ꩻ စူꩻစွူစွူဗော့ꩻ ဗွေႏဗွန်ဉာဏ လိတ်မွူးတသာ"စောင်ႏအတွိုင်ꩻနဲ့။ အွဉ်ႏတွိုင်ꩻတွိုင်ꩻ အွဉ်ႏစွူစွူဗော့ꩻ နုဲင်းယိုခါအတွိုင်ꩻနဲ့။ စွုမ်ႏလဲ့ဖေႏကစွုမ်ႏ၊ မဲဉ်ႏလဲ့ဖေႏကမဲဉ်ႏ၊ သွဉ်လဲ့ဖေႏကယိုꩻနဝ်ꩻ လိုႏဖျင်ထဲမ်နုဲင်းမုဲင်ꩻလဲ့ ဖျင်ထဲမ်ခန်းနဲ့။ တဖူꩻယို(၃)လီးနဝ်ꩻ အီႏထောင်ဗာႏ အလီးမုဲင်ꩻကရိုꩻယို ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏနာယကစွိုꩻ ဗွေႏဗွန်ဖြား ဗွေႏဗွန်တန်ဖုံႏနဝ်ꩻ စဉ်ꩻစာꩻဟဝ်ဟဝ်၊ ယူႏရော့ꩻရော့ꩻထွူတဲင် အဝ်ႏလိုႏလွိုက်ရွေꩻလဲဉ်းဒျာႏသွူ၊ မီႏနုဲင်းခွေသွဉ်းနဝ်ꩻ လွိုက်အငွါဆုဲင်ꩻနဝ်ꩻသွူ။ အငွါဆုဲင်ꩻယိုနဝ်ꩻ နီဗွေႏဆရာႏသီးတလွိုက်တဝ်း၊ တမာꩻတဝ်းယိုခါလဲ့ တွိုႏဆုဲင်ꩻဆုဲင်ꩻနဝ်ꩻ နီသွဉ်းသီးပိုလီꩻတပဲ့ꩻ အီႏလွိုက်အီႏမာꩻဒျာႏရင်ꩻတဲင် နီဗွေႏသီး ဖေႏကထွာပုဲင်ႏ သမဲင်ꩻတရာꩻခံႏနဝ်ꩻ စဉ်ꩻစာꩻခန်းသွော့ယိုခါခါလုဲင်းဩ။ ခွေသွဉ်းငဝ်းယို မဉ်ႏရိုꩻတမွေးတမဲဉ်ႏတဝ်း၊ မဉ်ႏရိုꩻခွေသွဉ်း တဲမ်းကြွို့ꩻရိုꩻကြွို့ꩻထာꩻလဲ့ ဒင်ႏပဲစ်ခွေသွဉ်း အဝ်ႏလꩻဒျာႏ၊ ခွေသွဉ်းခံႏဒျာႏ ပယွုမ်းယွုမ်းသွူဩ။ ခွေသွဉ်းနဝ်ꩻ သꩻရက်စွိုးခွိုꩻအဝ်ႏ ပအိုဝ်ႏတဖြာꩻအနေႏ ကသေကဒါႏ ကထီႏကမော့ꩻအတွိုင်ꩻ တဲမ်းနယ်ဒင်ႏပျꩻဗာႏလဲဉ်း နုဲင်းယိုတဲင် "တာႏဝွန်ႏကေႏငါႏလဲဉ်း"ခံႏထူႏနုဲင်းနဝ်ꩻသွူဩ။ စွုမ်ႏ၊ မဲဉ်ႏ၊ ယိုꩻ-လိတ်မွူးပအိုဝ်ႏ ဖေႏကထွာ၊ ဖေႏကပေါႏမွိုင်မွိုင်နဝ်ꩻ အဝ်ႏဆုတောင်ꩻ မောင်ꩻကော့ꩻဒျာႏသနဲ့ဩ။[1][2]

အာႏကွိုꩻEdit

  1. ခွန်ကုဝေ-မုဲင်းကောင်
  2. ခမ်းရောင်ႏစိုႏ အမုဲင်-၂၊ မဲ့ငါ-၂၅/၂၈