Wp/blk/လိတ်မူခရာႏ

< Wp‎ | blkWp > blk > လိတ်မူခရာႏ

"လိတ်မူခရာႏအရေꩻတန်ငါႏလဲဥ်း" နီသွဥ်းမူႏသီး ပအိုဝ်ႏလိုꩻမျိုꩻယို အရေꩻတန်ငါႏ ကိစ္စတစွိုးနဝ်ꩻ အဝ်ႏလိုႏဖြေႏသျင်ꩻဖေႏလဲဥ်းသွူ၊ တမုဲင်ꩻနဲးနဝ်ꩻ နီသွဥ်းမူႏသီး လိတ်လုဲင်ꩻခရာႏဒျာႏသွူ၊ လိုꩻမျိုꩻတမျိုꩻယို တဥ်ႏခွေါင်အီဒျာႏ တွမ်ႏလိတ်လုဲင်ꩻကရိုꩻနဝ်ꩻ အွဥ်ငါတွမ်ႏဗွေႏသင်္ဃာႏသီးဖုံႏတဲ့ အဝ်ႏသေလဲဥ်းဒျာႏသွူ။ နီသွဥ်းမူႏသီး ပအိုဝ်ႏလိုꩻမျိုꩻယို ပတ်သဲစ်တွမ်ႏ လိတ်ခရာႏလုဲင်ꩻခရာႏနဝ်ꩻ လိုꩻလမ်းပုဂ္ဂိုလ်ႏ မာꩻပဲင်ႏခွင်ꩻ၊ ဒေါ့ꩻပဲင်ႏခွင်ꩻ တအဝ်ႏတဝ်းတဲင် နေင်ႏပေါင်ꩻအာ လာပေါင်ꩻတဲ့ ညလဲဥ်း မဥ်ꩻနဝ်ꩻ ပအိုဝ်ႏလိတ်လုဲင်ꩻတွမ်ႏယေန်ႏငဲးရေꩻအစွိုꩻ ဗဟိုႏတဲ့ မာꩻပဲင်ႏတအဝ်ႏတဝ်းနေနေ၊ ဗွေႏသင်္ဃာႏခွုမ်မာꩻ ဆောင်ႏရွက်လွေꩻဒျာႏသွူ။ ကွပ်စွဥ်ႏဒျာႏ ဗွေႏသင်္ဃာႏအွဥ်ငါ မာꩻလွေꩻတဲင် အောင်ႏမျင်ႏမွေး၊ စွစ်ꩻလီမွေးစွဥ်ႏသွူ၊ ကွဲးတွော့ꩻ ခေတ်အပြောင်ꩻအလုဲင်ႏအလꩻ နီသွဥ်းသီး လိတ်ယိုတဲ့ ထွာလွဥ်လဲဥ်းသွူ ပျဿနာႏဖုံႏသွူ၊ ထွာနုဲင်းမုဲင်ꩻနဲးနဝ်ꩻ နီသွဥ်းမူႏသီး ကထေဒါႏလိတ်အုပ်၊ လိတ်စောင်ႏသားနဝ်ꩻ အသေသွတ်ꩻသွူ။ နုဲင်းယိုခါ နီသွဥ်းမူႏသီး ကထေလွေꩻဒါႏ ဂျာနယ်လိတ်လွီးလယ်ႏယိုလဲ့ ပျဿနာႏပေါင်ꩻစွုမ်ႏ အဝ်ႏအာမွေးစွဥ်ႏသွူ၊ အမုဲင်ဖုံႏတစွို့ꩻတဝ်း၊ အမုဲင်ဖုံႏ အဝ်ႏကုဲင်ထိုꩻနုဲင်းယိုနဝ်ꩻ နီသွဥ်ႏမူႏသီး လိတ်အုပ်လိတ်စောင်ႏသား အမာႏဒျာႏရိုꩻလဲ့ အဝ်ႏကုဲင်လိတ် အသွုံꩻယိုနဝ်ꩻ သရမဲဥ်ႏနုဲင်းမုဲင်ꩻ အသွတ်ꩻမဲဥ်ႏနုဲင်းမုဲင်ꩻနဝ်ꩻ နီသွဥ်းမူႏသီး ဆွုံꩻဖျတ်ခွင်ꩻ အဝ်ႏတဝ်းသွူ။ သွုံꩻဗာႏအမျာꩻကသွုံꩻနဲ့၊ သွုံꩻဗာႏသရမဲဥ်ႏနဲ့ ကရိုꩻနဝ်ꩻ နီသွဥ်းမူႏသီး ဆွုံꩻဖျတ်ခွင်ꩻ မာꩻပဲင်ႏခွင်ꩻလဲ့ အဝ်ႏတဝ်းသွူ။ နီသွဥ်းမူႏသီးထျꩻယိုနဝ်ꩻ တဆင်ႏဆင်ႏ လိတ်ယောင်းထေ့ အဝ်ႏဖျောလွဥ်၊ တဆင်ႏဆင်ႏ ဝွေႏဖန်ႏမု အဝ်ႏဖျောလွဥ်၊ ကွဲးတွော့ꩻ နီသွဥ်းမူႏသီး မာꩻခွင်ꩻဆွုံꩻဖျတ်ခွင်ꩻ တအဝ်ႏတဝ်းကရိုꩻနဝ်ꩻ မဥ်ဒေါ့ꩻလဝ်းနယ်ငါႏ လိတ်ထွားသားဖုံႏသွူ။ ဆရာႏတဲမ်းလိတ် ခွန်ကုဝေ-မုဲင်းကောင်လဲ့ အဝ်ႏဒေါ့ꩻနယ်၊ အဝ်ႏဖြေႏသျင်ꩻနယ်လဲဥ်း အလဲင်ႏပေါင်ꩻအာလဲဥ်း ခွေသွဥ်းမူႏ သေထွꩻနုဲင်းနဝ်ꩻ၊ ကွဲးတွော့ꩻ နီသွဥ်းမူႏသီး လိတ်ပအိုဝ်ႏယိုခါနဝ်ꩻ လိုꩻမျိုꩻအခါႏ ထွာလွဥ်အီမွေးငါႏ ပျဿနာႏ (စိန်ခေါ်မှု)တဗာႏကရိုꩻနဝ်ꩻ တာႏဝွန်ႏအာဝ်ႏသားတွမ်ႏ ဗွေႏသင်္ဃာႏသီးဖုံႏလဲ့ ရသေထွꩻဒျာႏသွူ။ ခမ်းကောင်ခမ်းဒွမ်လဲ့ ထွာအီပျဿနာႏ၊ ခမ်းကောင်ချင်ꩻချင်ꩻလဲ့ ထွာအီပျဿနာႏယိုနဝ်ꩻ အဝ်ႏလိုႏစဲစ်ဆေꩻထွားချာလဲဥ်းသွူ၊ မဥ်ႏဒေါ့ꩻချာယင်းနဝ်ꩻ နီသွဥ်းမူႏသီး လိတ်မူပအိုဝ်ႏခမ်းကောင် ယိုခါနဝ်ꩻ ထီသိမ်ႏမူရိုꩻနဝ်ꩻလဲ့ အစဲစ်မဲဥ်ႏနဝ်ꩻ တနေင်ႏတစိꩻစိꩻ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသင်္ဃာႏ အဝ်ႏမွဥ်းဖျင်လွေꩻလဲဥ်းနဝ်ꩻ ခွိုꩻသွုပ်ဆုဲင်ꩻကရိုꩻဒါႏ နီသွဥ်းမူႏသီးယို တသေထွꩻရောင်တဝ်းဒျာႏသွူ။ မဥ်ႏဒေါ့ꩻဗာႏ ဥပမာႏနဝ်ꩻ "ပအိုဝ်ႏ"လိတ်ဖြုံႏယိုနဝ်ꩻ ထီသိမ်ႏမူကို အဝ်ႏဒျာႏ"ပအိုႏ"နုဲင်းနဝ်ꩻသွူ။ ယိုနဝ်ꩻ အမဲဥ်ႏဒျာႏ၊ မဥ်ႏသွုံꩻချာ ထီသိမ်ႏမူ "ပအိုႏ"ယိုနဝ်ꩻ လိုꩻဖုံႏအီႏရိုꩻ တဲမ်းသွုံꩻတဝ်း လိတ်ထီသိမ်ႏမူနုဲင်းနဝ်ꩻ၊ သွုံꩻတဝ်းအမျာꩻ ကအွဥ်ႏထွော့ ရိုꩻနုဲင်းနဝ်ꩻဖုံႏသွူ။ ယူႏခရာႏတန်ဒျာႏ၊ နီသွဥ်းမူႏသီး ဗွေႏသုနန္ဒ ထီသိမ်ႏကထေခါꩻဒါႏ လိတ်မူယိုနဝ်ꩻ မွဥ်းဖျင်လꩻတဝ်း၊ သွုံꩻလွေꩻဗာႏနုဲင်းယိုအတွိုင်ꩻ ကရိုꩻနဝ်ꩻလဲ့ မိန်းခါꩻဗာႏတဝ်း သေထွꩻနုဲင်းနဝ်ꩻသွူ၊ နောင်ယာသုဲင်ꩻ ပွယ်ꩻမော့ꩻခွဲးကိုလဲ့ ကအွဥ်ႏထွော့ခါꩻနဝ်ꩻလဲ့ တပါတဝ်းနေနေ သေထွꩻနုဲင်းနဝ်ꩻသွူ။ နုဲင်းနဝ်ꩻက နီသွဥ်းမူႏသီး ပအိုဝ်ႏလိတ်မူခရာႏယို အဝ်ႏလိုႏအုံတဲင် တွိုင်ႏပင်ႏဆွေꩻနွေꩻမွေးလဲဥ်းတွော့ꩻ အွဥ်ႏထွော့လွေꩻယင်း (Update)ယင်းတလဲင်ႏနဝ်ꩻမꩻ အီႏဆင်ႏပြေႏ၊ နီသွဥ်းမူႏသီး လိတ်အုပ်လိတ်စောင်ႏ ကထေသားဖုံႏတဲ့ အီႏဆင်ႏပြေႏ နီသွဥ်းမူႏထီႏနုဲင်းနဝ်ꩻသွူ။ ကွပ်စွဥ်ႏ လိတ်မူခရာႏယိုတဲင် မာꩻထွာအီဒါႏ နီသွဥ်းမူႏသီး လိုꩻမျိုꩻလွောင်ႏဗူႏရေꩻကုဲင်၊ သွီႏကွဲꩻ၊ ထာꩻထီႏသျင်ꩻတဝ်းဝင်ꩻတဲင် ဗွေႏသင်္ဃာႏတဲ့နဝ်ꩻ၊ ပုဂ္ဂိုလ်ႏလိုꩻလမ်းတဲ့နဝ်ꩻ တာႏဝွန်ႏအဝ်ႏငါႏ အခိန်ႏတဲ့တွိုႏလဲဥ်း ထီႏနုဲင်းနဝ်ꩻသွူ။ ကခြီခြောဝ်လွေꩻဒါႏ "ငဝ်းတငွါ လိတ်ဖြုံႏ"ယိုလဲ့ အီႏထွာလွဥ်ဗာႏ၊ မန်းကရိုꩻဒါႏ (ဖတ်ရင်အသံ၊ ရေးရင်အမှန်)ကရိုꩻယို နီသွဥ်းမူႏသီး ထွားနုဲင်းခရာႏတလိုႏတဝ်း၊ နီသွဥ်းမူႏသီး နမ်းပဲင်ႏထာꩻခြိုꩻအဝ်ႏဒျာႏကရိုꩻနဝ်ꩻလဲ့ လိုႏယူႏလꩻငါႏသွူ။ မဥ်ႏတွိုင်ႏပင်ႏ ဆွေꩻနွေꩻယင်း၊ အွဥ်ႏထွော့လွေꩻယင်းနဝ်ꩻ လိုꩻကဝွေႏဖန်ႏသားနဝ်ꩻ အီႏဆေ့ꩻထိုꩻမား၊ လိုꩻကယားသားတဲ့ အီႏထိုꩻဆေ့ꩻတဲင် ပါꩻမုဲင်ꩻမာႏ ပါꩻမုဲင်ꩻမဲဥ်ႏလဲ့ အဖြေႏထန်ႏလွဥ်ဒျာႏ ခွေသွဥ်းမူႏ ထီႏနုဲင်းနဝ်ꩻသွူ။ အတည်းတဗာႏ တွမ်ႏပအိုဝ်ႏအဘိဓာန်ႏ၊ ပအိုဝ်ႏသဒ္ဒါႏ (စကားလုံးပေါင်းသတ်ပုံ)ဖုံႏယို မဥ်ႏအဝ်ႏလွဥ်နဝ်ꩻ နီသွဥ်းမူႏသီး လိတ်မူခရာႏယို ထေင်ဗာႏဒွုမ်ဝင်ꩻ၊ ထီႏတရေင်ဗာႏဒွုမ်ဝင်ꩻသွူ၊ မဥ်ႏတမွေးတဝ်းနဝ်ꩻ အဝ်ႏသျုတ်စွူစွူ၊ အဝ်ႏတရေင်စွူစွူဗော့ꩻနုဲင်းယိုတဲင် ကအီႏထွာဒါႏ နီခွိုꩻသွုပ်သီးအတာႏလဲ့ သꩻထွူႏခရာႏထွာအီငါႏသွူ။ လိတ်မူခရာႏယို တာႏဝွန်ႏအဝ်ႏ ပါꩻမုဲင်ꩻအလောင်းနဲး မဥ်ႏထွားချာနဝ်ꩻ သေတဝ်းသွူ။ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏဗွေႏသင်္ဃာႏသီး တာႏဝွန်ႏဟောင်း? နီသွဥ်းမူႏသီး ခွိုꩻပအိုဝ်ႏအွဥ်ငါ ခေါင်းဆောင်သီး တာႏဝွန်ႏဖုံႏဒျာႏဟောင်း သေတဝ်းသွူ။ မဥ်ႏနုဲင်းနီသွဥ်းမူႏသီး ထကွားနဝ်ꩻလဲ့ ဗဟိုႏသင်္ဃာႏလဲ့ မာꩻပဲင်ႏခွင်ꩻအဝ်ႏတဝ်း၊ အွဥ်ငါခေါင်းဆောင်သီးတဲ့ မာꩻပဲင်ႏခွင်ꩻအဝ်ႏတဝ်းသွူ။ ပွိုးနုဲင်းမုဲင်ꩻတဲ့ လိတ်ခရာႏ ကအဝ်ႏသျုတ်တရေင်ယိုနဝ်ꩻ ဖြေႏသျင်ꩻသား၊ ထူႏတာႏဝွန်ႏ မာꩻဖေႏသား မဥ်ႏထွားဒျာႏ ပအိုဝ်ႏလိတ်လုဲင်ꩻတွမ်ႏ ယေန်ႏငဲးရေꩻ ဥက္ကဋ္ဌလဲ့ မာꩻခွင်ꩻတအဝ်ႏတဝ်း၊ ဗဟိုႏသင်္ဃာႏစွိုꩻဥက္ကဋ္ဌလဲ့ မာꩻခွင်ꩻတအဝ်ႏတဝ်းတဲင် ထူႏတာႏဝွန်ႏ မာꩻပဲင်ႏခွင်ꩻ အဝ်ႏသားနဝ်ꩻ ပါꩻမုဲင်ꩻလဲ့ နီသွဥ်းမူႏသီး တသေထွꩻတဝ်းဒွုမ်သွူ။ ကွပ်နဝ်ꩻမꩻ ဝါႏသနာႏလိတ်ထွားသားသီး ကဖေႏလွဥ်ဒါႏ ယောင်းလွဥ်ဒါႏ လိတ်ခရာႏနဝ်ꩻ နီသွဥ်းမူႏသီး ခြွူႏမွဥ်းသားလဲ့ မာꩻပဲင်ႏခွင်ꩻ ဆွုံꩻဖျတ်ခွင်ꩻ တအဝ်ႏတဝ်း မဥ်ဒေါ့ꩻဟွိုန်ပါသမ်း ဟောꩻထွားလိတ်ပရိသတ်သီးဖုံႏသွူ။ လိတ်မုဲင်ဖုံႏ၊ လိတ်ဖြုံႏဖုံႏ ကမာႏနဝ်ꩻ နီသွဥ်းမူႏသီး သတိချို့ꩻယွင်ꩻတဲင် ထွာဗာႏ၊ နီသွဥ်းမူႏသီး အွဥ်ႏသတိꩻတိꩻအီႏကျိုꩻစာꩻ ဖျင်လွေꩻမဲဥ်ႏမဲဥ်ႏယင်းဒျာႏသွူ၊ ကွပ်စွဥ်ႏအကျောင်ꩻတစွိုးစွိုးတဲင် အမာႏကပါနဝ်ꩻလဲ့ ယံအွဥ်ႏစွꩻခွင်ꩻဖေႏပါသွော့ နီသွဥ်းမူႏသီး ခြွူႏမွဥ်းသားစွိုꩻအလောင်းကရိုꩻနဝ်ꩻ ခွေသွဥ်းမူႏ တောင်ꩻပြန်ႏလွေꩻဗာႏနုဲင်းနဝ်ꩻသွူ။ မွူးလာရောင်ႏကိုတဲ့ အဝ်ႏဖွင်ꩻနယ်အဝ်ႏလဲဥ်းတဲင် လိတ်မူပျဿနာႏနဝ်ꩻ ထွားငါနဝ်ꩻကိုငါလဲ့ အဖြေႏထန်ႏလွဥ်လဲဥ်းရင်ꩻနဝ်ꩻမꩻ လိုႏမာꩻထွိုက်သင်ꩻလဲဥ်းရင်ꩻသွူ။ လိတ်မူခရာႏယို ထွာမွေးပျဿနာႏတန်တန်တဗာႏတဲင် ခွေသွဥ်းမူႏသီး ခြွူႏမွဥ်းသားလဲ့ နေႏသာႏတဝ်းတွော့ꩻ ဒေါ့ꩻခြုဲင်းနယ်လွေꩻဗာႏ လိတ်ကတူႏစဲဥ်ႏ မဲဥ်ခြုဲင်းတဝ်းတဲ့ ခြုဲင်းဗာႏဗာႏကို နုဲင်းယိုသွူ။ နဝ်ꩻမꩻ တာႏဝွန်ႏကအဝ်ႏဒါႏ ပုဂ္ဂိုလ်ႏသီးလဲ့ အဝ်ႏလိုႏမာꩻသျင်ꩻသျင်ꩻ အခိန်ႏတွိုႏလဲဥ်း ခွေသွဥ်းမူႏထီႏနုဲင်းနဝ်ꩻတဲင် ဖေႏသတိလွေꩻပါဗာႏနုဲင်းယိုသွူ။ ရေႏရောႏလွေꩻဒျာႏ နီသွဥ်းမူႏသီး ပအိုဝ်ႏလိုꩻမျိုꩻ အနာႏဂတ်ဆꩻငါတာႏဒျာႏတဲင် အမာႏမဥ်ႏပါလဲ့ ခွင်ꩻလွစ်ဖေႏပါသွော့အကျောင်ꩻ-[1][2]

အာႏကွိုꩻEdit

  1. နင်ꩻချောꩻလွိုးလေ
  2. ခမ်းသားငဝ်း၊ အမုဲင်-၂၊ အစဲဥ်ႏ-၉၊ မဲ့ငါ-၁၃