Wp/blk/ပအိုႏလိုꩻမျိုꩻတွမ်ႏ

< Wp‎ | blkWp > blk > ပအိုႏလိုꩻမျိုꩻတွမ်ႏ

"ပအိုႏလိုꩻမျိုꩻတွမ်ႏ ပွယ်ꩻလုတ်ဖုဲင်ꩻ" လုတ်ဖုဲင်ꩻ-ကရိုꩻနဝ်ꩻ ပအိုႏငဝ်းမွေးတဝ်း၊ ဖြဝ်ꩻငဝ်းဒျာႏသွူ။ မီႏထွာပအိုႏဘာႏသာႏနဝ်ꩻ "လုတ်"နဝ်ꩻ "ထွိုင်ႏ"၊ "ဖုဲင်ꩻ"နဝ်ꩻ "မေႏ"တဲင် "လုတ်ဖုဲင်ꩻ""မေႏထွိုင်ႏ"ပြန်ႏဗာႏနုဲင်းနဝ်ꩻသွူ။ ယိုခါနဝ်ꩻ လိုꩻတွိုင်ꩻစွုမ်ႏဖြာꩻ သေနာႏလွလဲဥ်း "လုတ်ဖုဲင်ꩻ"နုဲင်းနဝ်ꩻတဲင် အီႏသုံꩻအီႏဒေါ့ꩻ ပအိုႏယင်း "မေႏထွိုင်ႏ"နုဲင်းနဝ်ꩻ တယိုꩻတဝ်းသွူ။ ကမ္ဘာႏလောင်း ကအဝ်ႏဒါႏလိုꩻမျိုꩻတွိုင်ꩻ၊ ဘာႏသာႏတွိုင်ꩻ၊ ခမ်းထီတွိုင်ꩻနဝ်ꩻ နမ်းပဲင်ႏထုံꩻစံႏ၊ နမ်းပဲင်ႏယေန်ႏကေႏမုယို အဝ်ႏလွဒျာႏ ပငါပရာꩻသွူ။ လိုꩻမျိုꩻနမ်းပဲင်ႏ ယေန်ႏကေႏမု-ကရိုꩻယိုနဝ်ꩻ အကျောင်ꩻမာꩻထွာတွမ်ႏ လိုꩻမျိုꩻသမဲင်ꩻ၊ ဘာႏသာႏသမဲင်ꩻတဲင် ပေါႏပေါက်ထွာလွဥ် ကဲဥ်းအာအာဒျာႏသွူ။ မဥ်ႏနုဲင်းနီပအိုႏ ကမာꩻဒါႏပွယ်ꩻမန်ႏသမျနဝ်ꩻ တကင်ꩻတဝ်းတွမ်ႏ ဘာႏသာႏရေꩻ မီႏရိုꩻနုဲင်းနဝ်ꩻလဲ့ အဝ်ႏလꩻဒျာႏသွူ။ ကမာꩻဒါႏနဲင်ႏငန်ႏရေꩻပွယ်ꩻ၊ နုဲင်းပွယ်ꩻတောႏလန်ႏ ပဒေႏသရာဇ်စနေစ်ဖုံႏ၊ ပွယ်ꩻမွူးနီꩻခွိုꩻပအိုႏ ဒဲဥ်သီႏဗွေဖုံႏနဝ်ꩻမတဲ့ ဖစ်ရဟန်ꩻပင်ꩻသံဃာႏ၊ မာꩻဒါႏန ဖကုသိုလ်ႏ အဝ်ႏပါနေဒွုန်းတဲင် တကင်ꩻတဝ်းတွမ်ႏဘာႏသာႏရေꩻနေနေသွူ။ နီပအိုႏကမာꩻဒါႏ ပွယ်ꩻလုတ်ဖုဲင်ꩻယိုနဝ်ꩻ မာꩻဒျာႏပွယ်ꩻနေင်ႏတသာတွော့ꩻ သော့ꩻပါလုတ်ဖုဲင်ꩻနုဲင်းနဝ်ꩻတဲ့ အဝ်ႏ၊ အကျောင်ꩻပျုတွမ်ႏဗုဒ္ဓပူဇနိယပွယ်ꩻ ပူႏဇောႏဘုရာꩻစေႏတီႏတဆူႏဆူႏတွော့ꩻ သော့ꩻပါလုတ်ဖုဲင်ꩻနုဲင်းနဝ်ꩻလဲ့ အဝ်ႏတဲင် အထျꩻမူလ အဝ်ႏယင်းဒျာႏ ဘာႏသာႏရေꩻနေနေသွူ။ တဲႏနေင်ႏတသာဆန်ꩻမာꩻငါ ဗꩻလွေꩻဝါႏဆိုႏ အခါႏလယ်ႏကို ကမာꩻဒါႏ ပွယ်ꩻလုတ်ဖုဲင်ꩻ အင်းရွယ်ႏချက်နဝ်ꩻ ကျိုႏဆွုမ်ႏခမ်း၊ ခမ်းဖေႏကလော့၊ ခမ်းဖေႏကဟွုန်ရိုꩻနုဲင်းနဝ်ꩻသွူ။ နဝ်ꩻတွော့ꩻ ကွပ်မာꩻပွဲꩻလုတ်ဖုဲင်ꩻတဲင် ခမ်းလော့မွေး၊ ခမ်းကွုန်ꩻမွေးနေဟောင်း မီႏရီနဝ်ꩻ- မာꩻပွယ်ꩻလုတ်ဖုဲင်ꩻတွော့ꩻ ခမ်းလော့လဲနဝ်ꩻ၊ လော့တဝ်းလဲ့နဝ်ꩻ အင်းရွယ်ႏချက်ယိုနဝ်ꩻ အဝ်ႏဗာႏဒျာႏရင်ꩻသွူ။ အင်းရွယ်ႏချက်အတွိုင်ꩻ ထွာတထွာတဝ်းနဝ်ꩻ တကဏ္ဍခေါဒျာႏသွူ။ နဲင်ႏငန်ႏတောႏအစိုႏရ ကမာꩻဒါႏ ပွယ်ꩻလွတ်လပ်ရေꩻနီꩻ၊ ပွယ်ꩻခမ်းပေါင်ꩻစုနီꩻ၊ ပွယ်ꩻတောႏလန်ႏရေꩻနီꩻ-စတဲင်ပွယ်ꩻဖုံႏနဝ်ꩻလဲ့ အဝ်ႏအွဥ်ႏတွမ်ႏ ရေႏမိုးချက်ဖုံႏနေနေသွူ။ ကွယ်ႏတွော့ꩻ ရေႏမိုးချက်အတွိုင်ꩻ ထွာတထွာတဝ်း၊ မာꩻလွဥ်ꩻ တမာꩻလွဥ်ꩻတဝ်းနဝ်ꩻ တကဏ္ဍခေါဒျာႏသွူ။ ပအိုႏကမာꩻဒါႏ ပွယ်ꩻလုတ်ဖုဲင်ꩻယိုနဝ်ꩻ အကျောင်ꩻမာꩻထွာတွမ်ႏ ဘာႏသာႏရေꩻရိုꩻနဝ်ꩻလဲ့ ကွဲညညနဝ်ꩻ ဘာႏသာႏရေꩻ (ဗုဒ္ဓပူဇနိယ)နဝ်ꩻ ဆေ့ꩻဆေ့ꩻ၊ မွန်းပျောႏမုနဝ်ꩻ ကဲဥ်းအာအာတဲင် မီႏတွက်ထွားအကျိုꩻဟဝ် တွမ်ႏအကျိုꩻကုဲင်နဝ်ꩻ အကျိုꩻကုဲင်အာ ရိုꩻဗာႏနုဲင်းနဝ်ꩻသွူ။ အကျိုꩻကုဲင်ကရိုꩻနဝ်ꩻ လုတ်ဖုဲင်ꩻတန်ႏဖိုꩻ၊ ဗုတ်ꩻငိုꩻ၊ ယံꩻငိုꩻဖုံႏလဲ့လို့ရွဥ်၊ ကေားတောက်ꩻကေားစွယ်ꩻသားလဲ့ လွတ်လွဥ်ꩻ၊ မီႏတွိုႏပွယ်ꩻနီꩻလဲ့ လွေꩻဗာႏတဲင် လွတ်ဖျင်၊ ကေားလွေꩻကေားထွားသားလဲ့ လွတ်နုဲင်း၊ ကေားလောင်ꩻသားလဲ့ သုမ်ꩻလွဥ်ꩻ၊ လွေꩻအံႏလွေꩻအွꩻတဲင် ရွဥ်လို့-စတဲင်နုဲင်းနဝ်ꩻဖုံႏသွူ။ ကွပ်အကျိုꩻကုဲင်အာတဲင်တွော့ꩻ ကထွာဒါႏ ပအိုႏခွန်ကွဥ် လိုꩻတန်ယဟန်ႏနဝ်ꩻ တကျွိုက်တဝ်း၊ တမဲဥ်ဖေႏအာႏတဝ်း၊ ဖေႏအာႏတဝ်းသွူတကာႏတဝ်း ရဲးပေ့ꩻခါꩻနေးထဲင်းသွူ။ ရဲးပေ့ꩻစွဥ်ႏလဲ့ ပွယ်ꩻလုတ်ဖုဲင်ꩻယိုနဝ်ꩻ တောက်ꩻသားလဲ့စွယ်ꩻ၊ လောင်ꩻသားလဲ့စွယ်ꩻ၊ ထွားသားလဲ့စွယ်ꩻတဲင် ယထွောင်းထွောင်း၊ ယရပ်ရပ်နဝ်ꩻ အဝ်ႏအွဥ်ႏဒျာႏနွိုင်ႏနွိုင်ႏသွူ။ ယဟန်ႏနဝ်ꩻ ကလꩻဒါႏလုတ်ဖုဲင်ꩻ ကောမရှင်ရွဥ်ယို အွဥ်ႏအမျာꩻရွဥ်ရံႏပွုံႏရိုꩻနဝ်ꩻတဲင် မာꩻလွေꩻလဲ့ အဝ်ႏသွူ။ ခေတ်ယိုခါနဝ်ꩻ ဖုန်းခေတ်တဲင်တွော့ꩻ ပေါႏပွယ်ꩻလုတ်ဖုဲင်ꩻ အဝ်ႏတထွောင်းထွောင်းလဲ့ တွို့ꩻကွဥ်ႏနဝ်ထင်ꩻ၊ ဗော့ꩻဗော့ꩻညာꩻညာꩻ ဟွုန်လို့သေလို့တဲင် လုတ်ဖုဲင်ꩻဆရာႏဖုံႏ၊ လုတ်ဖုဲင်ꩻဝါႏသနာႏသားဖုံႏနဝ်ꩻ တွမ်ႏကာꩻတွမ်ႏသင်ကယ် ဖျောလွဥ်လွဝင်ꩻတွော့ꩻ ပွယ်ꩻလုတ်ဖုဲင်ꩻနဝ်ꩻ အကွုန်ꩻတဝ်းအဲဥ်ထဝ်း၊ ကွုန်ꩻဒျာႏလွဥ်ႏလွဥ်း ထာꩻစာသားဖုံႏလဲ့ စာဟဝ်မွေးစွဥ်ႏထာꩻသွူ။ ပွယ်ꩻထွိုင်ႏဝုဲင်ꩻနဝ်ꩻ ဘီယာဗုတ်ꩻတွမ်သား လꩻလွဥ်ꩻနေးစွဥ်ႏရွဥ်ႏအသောင်ႏတန်ꩻ အဝ်ႏဟွုန်ဗာႏဖိုနုဲင်းနဝ်ꩻသွူ။ ပွယ်ꩻလုတ်ဖုဲင်ꩻယိုနဝ်ꩻ ကွပ်အကျိုꩻကုဲင်နဝ်ꩻ အာလဲဥ်းအကျိုꩻဟဝ်တဲင်တွော့ꩻ ခွန်ကွဥ်ပအိုႏယဟန်ႏသီး တကျွိုက်တဝ်း၊ အဝ်ႏရဲးပေ့ꩻခါꩻလဲ့ တလꩻတဝ်း၊ ရဲးပေ့ꩻနွောင်ꩻတဝ်းသွူ။ ကွပ်အခေႏအနေႏ အဝ်ႏနုဲင်းယိုတဲင် ပွယ်ꩻလုတ်ဖုဲင်ꩻယိုနဝ်ꩻ ပအိုႏယိုꩻယာႏပွယ်ꩻတမျိုꩻအနေႏ "အွဥ်ႏထွော့ထွိုက်နဲ့၊ အွဥ်ႏထွော့ထွိုက်တဝ်းနဲ့"ရီခရာႏအဝ်ႏထိုꩻသွူ။ မီႏရိုꩻအွဥ်ႏထွော့ထွိုက်တဝ်းလဲ့ ကတဲမ်းနယ်ဒါႏ နုဲင်းကီယိုအတွိုင်ꩻ အကျိုꩻကုဲင်(အပဲစ်)သံးအာတဲင် နုဲင်းစွဥ်ႏတမွေးတဝ်း၊ နုဲင်းစွဥ်ႏတသေန်ႏတဝ်းသွူ။ မီႏရိုꩻတမွေးတဝ်း၊ တသေန်ႏတဝ်းလဲ့ ဗုဒ္ဓဘာႏသာႏ နီမန်းခမ်း ထုံꩻစံႏယေန်ႏငဲးမုꩻ ပွယ်ꩻအလင်ဖုံႏနဝ်ꩻကား "အနယ်ꩻလွစ်၊ အပဲစ်လွစ်နေဟောင်း"ရီခရာႏအဝ်ႏဖျင်သွူ။ ပွယ်ꩻအလင်ဖုံႏနဝ်ꩻလဲ့ အနယ်ꩻတလွစ်တဝ်းနေနေသွူ။ ဥပမာႏ- ပွယ်ꩻသင်ႏကဲန်ႏဟုဲင်း၊ သင်ႏကဲန်ႏတွင်ꩻ ကဆူလွဝင်ꩻထီယို မီႏတွက်ထွား တခမ်းလုမ်းအနေႏနဝ်ꩻ ရွဥ်လို့ကုတ်တေႏပေါင်ꩻခွိုင်းမုဲင်ꩻ၊ ကဆူထီပျောႏထာꩻနဝ်ꩻ ထာꩻမာꩻလွတ်အခိန်ႏလို့ တကားမုဲင်ꩻ၊ ဝင်ꩻကလွေꩻထာꩻတွမ်ႏကိစ္စအရေꩻဖုံႏ၊ ထင်ႏကျောင်ꩻထင်ႏကန်ႏဖုံႏယို ဆူဆွုမ်ႏဝင်ꩻတွော့ꩻ ဝင်ꩻသꩻဒုက္ခဆင်ꩻရယ်ꩻလွဥ်ꩻ၊ ကမော့ꩻလွဥ်ꩻထာꩻဆော့ဆာဖုံႏနဝ်ꩻ ဆေ့ꩻအာတကာႏမုဲင်ꩻ၊ ပျောႏထာꩻတဲင် သင်ကယ်မောက်၊ ကာꩻမောက်တွော့ꩻ ကဆာကကဲင်၊ ကထို့ကလွတ်ꩻ၊ ကဆော့ကဆာ၊ ကသီကမားနဝ်ꩻ တနေင်ႏနေင်ႏယို တကားမုဲင်ꩻ၊ သင်ႏကဲန်ႏတွင်ꩻ ဆူထီပျောႏထာꩻတဲင် လꩻအကျိုꩻဟဝ်နုဲင်းမုဲင်ꩻ၊ မီႏစဲစ်ဆေꩻစဥ်ꩻစာꩻထွားနုဲင်းယိုနဝ်ꩻ ဟုဲင်းထဲင်းက ပွယ်ꩻလုတ်ဖုဲင်ꩻသွူ။ ဥပမာႏထဲင်း ပွယ်ꩻတမျိုꩻ နဲင်ႏငန်ႏခမ်းထီအကို မိဥ်ꩻကတန်ဒါႏ ပွယ်ꩻတန်ကထိန်ႏ (တန်ဆောင်တိုင်)တောင်ႏကီꩻယို ကအွဥ်ႏဒါႏ ထာꩻတောႏထာꩻလောင်ꩻ၊ ထာꩻခွုမ်ပဆိုး၊ ထာꩻမွန်းထာꩻပျောႏ အမျိုꩻမျိုꩻဖုံႏနဝ်ꩻ လိုꩻခမ်းလိုꩻထီ ရွဥ်လို့လွဥ်ꩻ၊ သုမ်ꩻလွဥ်ꩻတခွိုင်းမုဲင်ꩻ။ မေႏကျောင်ႏတဖြုံႏတာႏ ခမ်ႏလို့ရွဥ် အသိန်ꩻပဥ်ဆီဆီတဲင် အွဥ်ႏစွꩻပြဲင်ႏလွဝင်ꩻ ကဖေႏတွမ်ႏဆုနဝ်ꩻ အကျိုꩻတရာꩻအဝ်ႏနုဲင်းမုဲင်ꩻ၊ မေႏကျောင်ႏကထဲ့လူးသီဒါႏလိုꩻ နုဲင်းဟန်ႏနေင်ႏနဝ်ꩻ အီႏရိုꩻနုဲင်းမုဲင်ꩻ- မီႏစဥ်ꩻစာꩻစဲင်းစဲင်းနဝ်ꩻ ဟုဲင်းထဲင်း ပွယ်ꩻလုတ်ဖုဲင်ꩻနေနေသွူ။ ပွယ်ꩻသင်ႏကဲန်ႏဖုံႏ၊ ပွယ်ꩻကထိန်ႏ တောင်ႏကီꩻဖုံႏယို မီႏရိုꩻဘာႏသာႏ လိုꩻမျိုꩻထုံꩻစံႏ ယေန်ႏကေႏမုꩻအနေႏ အဝ်ႏထွိုက်အဝ်ႏသင်ꩻဒျာႏလဲ့ နီပအိုဝ်ႏပွယ်ꩻလုတ်ဖုဲင်ꩻယိုလဲ့ အဝ်ႏထွိုက်အဝ်ႏသင်ꩻဒျာႏသွူ။ ကွဲးတွော့ꩻ မီႏရိုꩻရွဥ်လို့အာငါႏ၊ ထာꩻမာꩻလွတ်ငါႏလဲ့ ကထွာဒါႏ ခွန်ကွဥ်လိုꩻတန်၊ လိတ်လုဲင်ꩻတွမ်ႏယေန်ႏငဲးမုအစွိုꩻ (ဗဟိုႏ)နဝ်ꩻ အဝ်ႏလိုႏအွဥ်ႏထွော့ဖေႏ စီꩻကန်ꩻနုဲင်းနဝ်ꩻလွုမ်ꩻသွူ။ (က) အွိုင်ႏတဖြုံႏအကို တနေင်ႏနေင်ႏယို အွဥ်ႏဗာႏပွယ်ꩻလုတ်ဖုဲင်ꩻ ခွိုင်းမုဲင်ꩻဖြုံႏ။ (ခ) ပွယ်ꩻတဖြုံႏယို လုတ်ဖုဲင်ꩻဆေ့ꩻအာ အွဥ်ႏဖေႏနေး အခန်ꩻတွိုင်ꩻ။ (ဂ) လုတ်ဖုဲင်ꩻတဖြုံႏယို အဒွေါင်ႏအဆွာꩻ အဝ်ႏဗာႏခွိုင်းမုဲင်ꩻပေ။ (ဃ) လုတ်ဖုဲင်ꩻယို လဲ့ꩻလို့လို့ဗာႏ တနီꩻချင်ꩻ-စတဲင်နုဲင်းနဝ်ꩻဖုံႏသွူ။ ယိုခါခါနဝ်ꩻ ဖေႏခွင်ꩻလဲ့နဝ်ꩻ၊ ဖေႏခွင်ꩻတဝ်းလဲ့နဝ်ꩻ ပွယ်ꩻလုတ်ဖုဲင်ꩻယို အခန်ꩻတွိုင်ꩻ တအဲဥ်ထဝ်း၊ စီꩻကန်ꩻတအဲဥ်ထဝ်း၊ ကအဝ်ႏအွဥ်ႏလွေꩻ ဒုံရပ်ဖုံႏလဲ့ အဝ်ႏအွဥ်ႏလွေꩻဒျာႏရင်ꩻရင်ꩻတဲင် ပွယ်ꩻလုတ်ဖုဲင်ꩻယို ပအိုႏယိုꩻယာႏ ပွယ်ꩻတမျိုꩻအနေႏ အွဥ်ႏထွော့လွေꩻဖေႏထွူတွော့ꩻ မီႏအွဥ်ႏလွေꩻဖေႏနေး စီꩻကန်ꩻနဝ်ꩻ ဟဝ်ဟောင်း-ယူႏစဥ်ꩻစာꩻနုဲင်းနဝ်ꩻတဲင် တဲမ်းလွေꩻဗာႏ ရောမ်ဖြုဲင်ꩻယိုသွူ။ ပွိုင်းဝွို့တွမ်ႏ ခွေသွဥ်းရောမ်ဖြုဲင်ꩻကို ဝွေႏဖန်ႏဖေႏကျံႏဉာဏ်ႏဖုံႏယို ကထွာဒါႏ ပအိုႏခွန်ကွဥ် လိုꩻတန်သီး၊ လိတ်လုဲင်ꩻတွမ်ႏ ယေန်ႏကေႏမုအစွိုꩻ (ဗဟိုႏ)သီးနဝ်ꩻ မွေးတမွေးတဝ်း-စဥ်ꩻစာꩻဝွေႏဖန်ႏထွူတဲင် လိုႏမာꩻနုဲင်းမုဲင်ꩻလဲ့ လိုႏမာꩻလိုႏဆုံꩻဖျတ်အွဥ်ႏထွော့လွေꩻလဲဥ်းသွူ-သွူ။ [1]

အာႏကွိုꩻ

  1. ခွန်ကုဝေ-ခမ်းသားငဝ်း အမုဲင်-၃၊ အစဲဥ်ႏ-၁၄