Wp/blk/ဒဲဥ်သီးဗွေ နောင်ယာသုဲင်ꩻ(၁၃၃၉)

< Wp‎ | blk
Wp > blk > ဒဲဥ်သီးဗွေ နောင်ယာသုဲင်ꩻ(၁၃၃၉)

၁၃၃၉-ဗာႏ၊ ဒဲဥ်သီႏဆန်ꩻ ၁၄-ဟာ ပွယ်ꩻတန်မွူးနီꩻစွိုးခွိုꩻပအိုဝ်ႏ နောင်ယာသုဲင်ꩻကို နီတကာႏတောႏသီး လိုꩻအစွိုꩻဖုံႏ၊ ကောႏမတီႏစွိုꩻဖုံႏ၊ ကကွီလွဥ်ဒါႏ နီသံႏဃာႏအလောင်း၊ မော်သီးအလောင်း အကျံႏအဉာဏ်ႏ (၃)ချက်အကိုနဝ်ꩻ ဗွေႏစင်ꩻသီး တိန်ႏလꩻသွူ နီတကာႏသီး အကျံႏအဉာဏ်ႏ၊ တကာႏသီး ကလျောက်လဝ်းဒါႏ စေးလာႏနဝ်ꩻတဲင်တွော့ꩻ ဗွေႏစင်ꩻသီး ကတိန်ႏထွား၊ ကတိန်ႏစဲစ်ဆေꩻ(လေ့လာ)နဝ်ꩻလဲင်ႏခါ တကာႏသီး ကလဝ်းအတွိုင်ꩻ အချက်အဝ်ႏ(၃)ချက်- ပထမတချက်နဝ်ꩻ - ဘာႏသာႏရေꩻ သာႏသနာႏရေꩻ ဒုတိယအချက်နဝ်ꩻ - အမျိုꩻသာꩻရေꩻ ယေန်ႏကေႏမုꩻ တတိယအချက်နဝ်ꩻ - လိတ်လုဲင်ꩻယေန်ႏကေႏမုꩻ ရိုꩻနုဲင်းနဝ်ꩻ ။ စိန်ႏတွိုႏနဝ်ꩻတဲင်တွော့ꩻ နီတကာႏလိုꩻတန်သီး သမ်းဖေႏအာႏငါႏ၊ အကျံႏအဉာဏ်ႏ ဖေႏကဖေႏနဝ်ꩻ လိုꩻကျောင်ꩻအဝ်ႏတဖဲ့ꩻ၊ တကာႏလိုꩻလမ်း မော်ပညာႏသျိ ပညာႏသျင်ႏသီး အဝ်ႏတဖဲ့ꩻ၊ အဝ်ႏနီဖဲ့ꩻနုဲင်းနဝ်ꩻ၊ စိန်ႏတွိုႏနဝ်ꩻတွော့ꩻ နီတကာႏသီး စိန်ႏခဥ်ꩻဖေႏအခိန်ႏနဝ်ꩻ (၅) ငတ်ꩻနားရီႏ တိန်ႏရိုꩻနုဲင်းနဝ်ꩻတဲင်တွော့ꩻ ဗွေႏစင်ꩻသီး ဟဲ့ꩻစုတွမ်ႏ တကာႏပညာႏသျိ ပညာႏသျင်ႏ မော်လိုꩻစွိုꩻဖုံႏ တွမ်ႏဗွေႏစင်ꩻသီး သံႏဃာႏဖုံႏတဲင်တွော့ꩻ မဲ့ငါခွဲႏတောႏ ဖြွမ်းဗူႏ တိန်ႏဒေါ့ꩻရီဝင်ꩻလဲင်ႏခါ ဗွေႏစင်ꩻကရိုꩻ အချက်သွံချက်နဝ်ꩻကိုနဝ်ꩻ ကဆဲင်ႏငါႏ နီလိုꩻကျောင်ꩻနဝ်ꩻ ဘာႏသာႏရေꩻ သာႏသနာႏရေꩻနဝ်ꩻနဝ်ꩻ နီလိုꩻကျောင်ꩻ ထွာအထျꩻ ။ နဝ်ꩻမꩻ လိတ်လုဲင်ꩻရေꩻကရိုꩻဒါႏ တတိယချက်နဝ်ꩻ နီလိုꩻကျောင်ꩻတဲ့ဆဲင်ႏ၊ လိုꩻလမ်းတဲ့ဆဲင်ႏ၊ စိန်ႏတွိုႏ အမျိုꩻသာꩻရေꩻ ကရိုꩻနဝ်ꩻ လိုꩻကျောင်ꩻတွမ်ႏလိုꩻလမ်းနဝ်ꩻ ဟမ်းပေါင်းဆဲင်ႏအာလိုꩻလမ်း၊ စိန်ႏထွာနုဲင်းနဝ်ꩻတဲင်တွော့ꩻ နီသံႏဃာႏလိုꩻကျောင်ꩻနဝ်ꩻ အီႏထူႏရေꩻဖေႏ၊ အီႏဖေႏအကျံႏအဉာဏ်ႏ ဘာႏသာႏရေꩻတွမ်ႏ သာႏသနာႏရေꩻကိစ္စနဝ်ꩻတချက်၊ တွမ်ႏလိတ်လုဲင်ꩻရေꩻနဝ်ꩻ တချက်၊ နဝ်ꩻမꩻ နီတကာႏလိုꩻလမ်းသီး၊ မော်ပညာႏသျိ ပညာႏသျင်ႏသီး အစွိုꩻဖုံႏနဝ်ꩻ ဖေႏကျံႏဉာဏ်ႏသွော့ အမျိုꩻသာꩻရေꩻ-နဝ်ꩻဟုဲင်း ဗွေႏစင်ꩻနဝ်ꩻ ခြုဲင်းနယ်ဖေႏနုဲင်းနဝ်ꩻ ။ စိန်ႏတွိုႏနဝ်ꩻမꩻ တကာႏသီးတဲ့ သဘော်ꩻတူႏလွ ပငါပရာꩻတဲင်တွော့ꩻ ဟန်ႏဟာယိုနဝ်ꩻ နီသံႏဃာႏကိုႏစလယ်ႏအနေႏ နီဗွေႏဗွန်ဖြား ဗွေႏဗွန်နောင်ကာꩻတန် တွမ်ႏနီဗွေႏဗွန်ဖြား ဗွေႏဗွန်ကျောင်ꩻမြို့ဦး ဖေႏတာႏဝွန်ႏဗွေႏစင်ꩻ၊ ထွဥ်ႏဗွေႏစင်ꩻသျင်ꩻနယ်ဖေႏ၊ ခြုဲင်းနယ်ဖေႏ ရိုꩻနုဲင်းနဝ်ꩻတဲင်တွော့ꩻ ယိုနဝ်ꩻ ဗွေႏစင်ꩻအီႏခြုဲင်းနယ်ဖေႏ နီတကာႏသီး ကွဲႏတွော့ꩻ ဗွေႏစင်ꩻကအီႏခြုဲင်းနယ်ယိုနဝ်ꩻ ဗွေႏစင်ꩻပုဂ္ဂလိကအနေႏ အွဥ်ႏဒေါ့ꩻဗာႏထာꩻ တမွေးတဝ်း၊ သံႏဃာႏကိုႏစလယ်ႏအနေႏ အွဥ်ႏဒေါ့ꩻဗာႏထာꩻတဲင်တွော့ꩻ ငဝ်းတဲ့ဖေႏနေး ကမာႏမွုန်း၊ ငဝ်းဖေႏနေး ကတွမ်ႏလွဥ်ꩻမွုန်းနဝ်ꩻ ဗွေႏစင်ꩻအဝ်ႏချင်းဖေႏဒျာႏ၊ နီဗွေႏသံႏဃာႏသီးဂုဏ်ႏတရေႏ ဖေႏနေးကတွမ်ႏလင်ꩻမွုန်းနဝ်ꩻတဲ့ ခွေသွဥ်းအီႏချင်းအွဥ်ႏဒေါ့ꩻဒျာႏ ဗွေႏသြ ။ ကွဲႏတွော့ꩻ ခွေသွဥ်းကအီႏလျောက်၊ ခွေသွဥ်းကအီႏသျင်ꩻနယ်၊ ခွေသွဥ်းကအီႏလဝ်းကိုယိုနဝ်ꩻ အမဥ်ႏထိခွိုက်စိန်ႏစွော့ꩻ နီဗွေႏသီး သံႏဃာႏလိုꩻကျောင်ꩻတရိုꩻတဝ်း၊ နီတကာႏ မော်သီးတရိုꩻတဝ်း၊ နီတကာႏလိုꩻတန်သီး ကားကအဝ်ႏဖုံႏ တရိုꩻတဝ်း၊ ငဝ်းဆွော့ꩻပေႏတရိုꩻတဝ်း၊ ငဝ်းခတ်ꩻနားပေႏ တရိုꩻတဝ်း၊ မဥ်ႏပါစိန်ႏစွော့ꩻတဲ့ ယံဖေႏနေး ကအွဥ်ႏစွꩻခွင်ꩻဗဲင်း ဗွေႏစင်ꩻအကျောင်ꩻ ရီးသွတ်ꩻအစ ပထမအနေႏ ဗွေႏစင်ꩻရိုႏရိုႏသေႏသေႏ တောင်ꩻပြန်ႏဒျာႏ နီဗွေႏသံႏဃာႏသီးတွမ်ႏ တကာႏသီးဖုံႏ နုဲင်းနဝ်ꩻသနဲ့ ။ နဝ်ꩻတွော့ꩻ ဘာႏသာႏရေꩻ သာႏသနာႏရေꩻယိုနဝ်ꩻ နီတကာႏသီး ကလဝ်းန၀်ꩻ ဘုရာꩻကရိုꩻနဝ်ꩻ နုဲင်းမုဲင်ꩻ၊ တရာꩻကရိုꩻနဝ်ꩻ နေးမုဲင်ꩻ၊ သံႏဃာႏကရိုꩻနဝ်ꩻ နေးမုဲင်ꩻ-စတဲင်စားနဝ်ꩻဖုံႏတဲ့နဝ်ꩻ၊ မဥ်ႏခံႏထူႏသီႏလနဝ်ꩻ အနယ်ꩻဖေႏနေးကစဲစ်၊ အနယ်ꩻဖေႏနေးကမဲဥ်ႏနဝ်ꩻ နေးမုဲင်ꩻ၊ ခံႏသျင်ႏခံႏစင်ꩻ-စတဲင်နုဲင်းနဝ်ꩻစားဖုံႏနဝ်ꩻ နေးမုဲင်ꩻ သမ်းရီလွဥ်ပဥ်ချက်ပဥ်ချက်၊ သမ်းအဝ်ႏခြုဲင်း ပဥ်ချက်ပဥ်ချက်၊ ကွပ်ပွိုးနဝ်ꩻမꩻ ဘုရာꩻအကျောင်ꩻ၊ တရာꩻအကျောင်ꩻ၊ သံႏဃာႏအကျောင်ꩻ၊ သီႏလဘာႏဝနာႏ-စတဲင်အကျောင်ꩻစားနဝ်ꩻဖုံႏနဝ်ꩻ မဥ်ႏခြုဲင်းလို့လို့တဲ့ အာငါႏ၊ ဆွာꩻငါႏတဲင်တွော့ꩻ တွမ်ႏအခိန်ႏပေႏယိုနဝ်ꩻ အီႏတလိုမ်းလꩻတဝ်း၊ အီႏတပြဲ့ꩻစုံႏလꩻတဝ်း၊ နဝ်ꩻသွူတကာႏတဝ်း မဥ်ႏခြုဲင်းဗော့ꩻ နီတကာႏအမျာꩻသီးခငါယိုတဲ့ အီႏတတောင်ꩻလို့တဝ်း၊ ခွေတဲ့တောင်ꩻဒျာႏတစား၊ နာꩻတဲ့ တောင်ꩻဒျာႏတစား၊ စိန်ႏတွိုႏသဲင်ꩻချာ ရပ်ဖွော်ရပ်မွဥ်ꩻ ပငါပရာꩻသူꩻတဲင်တွော့ꩻ မဲ့ꩻခွေတဲ့ သဲင်ꩻဒေါ့ꩻဒျာႏတမျိုꩻ၊ နာꩻတဲ့ သဲင်ꩻဒေါ့ꩻဒျာႏတမျိုꩻ၊ ခွေတဲ့ သဲင်ꩻခြုဲင်းဒျာႏတမျိုꩻ၊ နာꩻတဲ့ သဲင်ꩻခြုဲင်းဒျာႏတမျိုꩻ ။ ကွပ်ပွိုးထွာနုဲင်းနဝ်ꩻမꩻတဲင် မဲ့ꩻခမ်းတွို့ꩻသား ခြုဲင်းတမျိုꩻ၊ ခမ်းကွဥ်ႏသား ခြုဲင်းတမျိုꩻ၊ ခမ်းနဝ်သား ခြုဲင်းတမျိုꩻ၊ ခမ်းထင်ꩻသား ခြုဲင်းတမျိုꩻ မဥ်ႏထွာစားနဝ်ꩻစားနဝ်ꩻ အတငီႏလꩻတဝ်းလို့ဝင်ꩻ၊ ကွပ်ပွိုးနဝ်ꩻမꩻ ဖေႏနေးကငီႏလꩻလို့ဝင်ꩻနဝ်ꩻ ဘာႏသာႏရေꩻ၊ သာႏသနာႏရေꩻကိစ္စယိုနဝ်ꩻ အဝ်ႏပွယ်ꩻယို မဥ်ႏထွူတဲင်တွော့ꩻ အွိုး၀ွေꩻသီးကထွာဒါႏ ပုဂ္ဂိုလ်ႏ ပုဂ္ဂိုလ်ႏထေရ်ႏကီꩻ ဝါႏတန်ဖုံႏနဝ်ꩻ မဲ့ꩻအွို ထွားလွိုက်ခန်း ပုဂ္ဂိုလ်ႏတပါꩻပါꩻ၊ ဘုရာꩻအကျောင်ꩻ၊ တရာꩻအကျောင်ꩻ၊ သံႏဃာႏအကျောင်ꩻ ပတ်သဲစ်တွမ်ႏ ဘာႏသာႏ သာႏသနာႏကိစ္စ လိတ်အုပ်တအုပ် ဖေႏနေးကထွာလꩻ၊ ဖေႏနေးကထန်ႏလꩻန၀်ꩻ မဲ့ꩻဝွေꩻဗွေႏသီး ဖေႏတာႏဝွန်ႏဒျာႏ ။ ပေါႏဝွေꩻဗွေႏသီး ဖေႏတာႏဝွန်ႏသွူနုဲင်းနဝ်ꩻတဲင်တွော့ꩻ မဲ့ꩻပုဂ္ဂိုလ်ႏအပါꩻနဝ်ꩻ အီႏတဲမ်းဖေႏဒျာႏ၊ ပေါႏတဲမ်းသွူနုဲင်းနဝ်ꩻ၊ လိတ်အုပ်မဥ်ႏထန်ႏသွူတွော့ꩻ လိတ်အုပ်နဝ်ꩻနဝ်ꩻ စွုမ်ႏကျောင်ꩻကျောင်ꩻ၊ စွုမ်ႏရပ်ရပ်၊ စွုမ်ႏရာႏရာႏ လိုꩻဖုံႏတဲ့ စွုမ်ႏဖြာꩻဖြာꩻ ခွုမ်ထွူလိတ်အုပ်နဝ်ꩻ၊ ထွားထွူလိတ်အုပ်နဝ်ꩻတဲင်တွော့ꩻ လိုꩻကျောင်ꩻဓမ္မကထိတရိုꩻတဝ်း၊ တကာႏမော်သီး လိုꩻလမ်းဓမ္မကထိကတရိုꩻတဝ်း ထွားထွူလိတ်အုပ်နဝ်ꩻ မဥ်ႏဟော်ꩻ၊ မဥ်ႏခြုဲင်း၊ မဥ်ႏလွောက်ꩻနာႏလွဥ်ꩻနေးနဝ်ꩻနဝ်ꩻ နီဖူးဝေးခမ်းတွို့ꩻ၊ ခမ်းနဝ်၊ ခမ်းထင်ꩻ၊ ခမ်းကွဥ်ႏ ပီလို့စွဥ်ႏလို့ဝင်ꩻ၊ ညီႏညွတ်စွဥ်ႏလို့ဝင်ꩻ၊ ဗွန်စွဥ်ႏလို့ဝင်ꩻ၊ ဖေႏနေးတကာႏတောႏသီး ကလိုႏဒါႏ သဘော်ꩻဆန္ဒအတွိုင်ꩻနဝ်ꩻ ပီလွဝင်ꩻ၊ ဗွေႏစင်ꩻသီး ယူႏလꩻနေးနဝ်ꩻတဲင်တွော့ꩻ ပတ်သဲစ်တွမ်ႏ ဘာႏသာႏရေꩻ၊ သာႏသနာႏရေꩻကိစ္စနဝ်ꩻတဲးတဲ့ ဟန်ႏဟာဗွေႏစင်ꩻသီး အုံနုဲင်း ထူႏကွို့ꩻ ပဋိညာဥ်ႏ အာႏမခံႏချက် တကားနဝ်ꩻလွုမ်ꩻသနဲ့ ။ အဝ်ႏနဝ်ꩻတွော့ꩻ မွေးသွူ၊ အဝ်ႏကုဲင်လိတ်လုဲင်ꩻကိစ္စ၊ စိန်ႏတွိုႏလိတ်လုဲင်ꩻကိစ္စယိုနဝ်ꩻ နုဲင်းဗွေႏစင်ꩻသီး ကယူႏလꩻ၊ နီသံႏဃာႏသီး ကယူႏလꩻ ယိုလဲင်ႏခါန၀်ꩻ အကဏ္ဍအဝ်ႏ နီကဏ္ဍ ။ ပထမကဏ္ဍနဝ်ꩻ မာꩻဗာႏထမုဲင်ꩻ? မာꩻထာꩻသီးအမျိုꩻနဝ်ꩻ အဝ်ႏလိုႏအရေꩻကီꩻလိုꩻတန်၊ လိုꩻကေားစီႏဆင်ႏသား၊ ကေားအွဥ်သားနဝ်ꩻ၊ နဝ်ꩻတွော့ꩻ မဥ်ႏမာꩻထွာနဝ်ꩻ ဖေႏနေးကယိုꩻနဝ်ꩻ အီႏမာꩻနုဲင်းမုဲင်ꩻနဲးတဲင် လဲင်ႏခါ နီသံႏဃာႏသီး အုပ်ချုပ်ရေꩻကိုယိုနဝ်ꩻ ဂွိုင်ꩻချုပ်ဖုံႏအဝ်ႏ၊ ဂွိုင်ꩻအုပ်ဖုံႏအဝ်ႏ၊ ဂွိုင်ꩻထောက်ဖုံႏအဝ်ႏ၊ ကျောင်ꩻနင်းပုဂ္ဂိုလ်ႏဖုံႏအဝ်ႏ၊ ကွပ်ပွိုးနဝ်ꩻမꩻတဲင် အယိုꩻသွတ်ꩻအနေႏနဝ်ꩻနဝ်ꩻ ဂွိုင်ꩻချုပ်မန်ႏသမျန၀်ꩻ ဖေႏနေးကထွာဗာႏ နာယက-ရိုꩻပေႏနဝ်ꩻ၊ နဝ်ꩻမꩻ ဂွိုင်ꩻအုပ်မန်ႏသမျနဝ်ꩻ ပထမဥက္ကဋ္ဌ၊ ဂွိုင်ꩻထောက်မန်ႏသမျနဝ်ꩻ ဒုတိယဥက္ကဋ္ဌ၊ ကျောင်ꩻနင်းပုဂ္ဂိုလ်ႏဖုံႏတွမ်ႏ လိုꩻကဝါႏသနာႏဒါႏလိတ် လိုꩻလမ်းတရိုꩻတဝ်း၊ လိုꩻကျောင်ꩻတရိုꩻတဝ်း ကားကအဝ်ႏဖုံႏနဝ်ꩻ ဖေႏနေးကထွာဗာႏ အစွိုꩻနွို့သား ။ နာယက၊ ပထမဥက္ကဋ္ဌ၊ ဒုတိယဥက္ကဋ္ဌ၊ တွမ်ႏအစွိုꩻနွို့သား ကားကအဝ်ႏဖုံႏနဝ်ꩻ နုဲင်းနဝ်ꩻလဲင်ႏခါ ထွာသွူတလွောင်ႏချင်ႏ၊ တဗူႏချင်ႏ၊ တစွိုꩻချင်ႏထွူတဲင် တွမ်ႏအစွိုꩻနဝ်ꩻလဲင်ႏခါနဝ်ꩻ ကအီႏဖန်ဆင်ꩻလင်ꩻဖေႏ နီလိတ်လုဲင်ꩻ ဖေႏနေးကတိုꩻတက်ရေꩻ တရိုꩻတဝ်း၊ နီလိတ်လုဲင်ꩻ ဖေႏနေးကစွစ်ꩻတိုးရေꩻ တရိုꩻတဝ်း၊ နီလိတ်လုဲင်ꩻဖေႏနေးကတိုꩻတက်ရေꩻတရိုꩻတဝ်း အဝ်ႏနဝ်ꩻကိုတွော့ꩻ ပုဂ္ဂိုလ်ႏ ကအီႏဆောင်ႏရွက်နွောင်ꩻစားနဝ်ꩻစားနဝ်ꩻ လွိုက်ဖျင်တလဲင်ႏ၊ ကတိန်ႏလွိုက်ဖျင်တလဲင်ႏ နုဲင်းနဝ်ꩻလဲင်ႏခါနဝ်ꩻ အွဥ်ႏခန်းစမ်ꩻယင်း အစွိုꩻပငါပရာꩻ ။ အဝ်ႏနဝ်ꩻထွူတွော့ꩻ ပထမကဏ္ဍ၊ နာယက၊ ပထမဥက္ကဋ္ဌ၊ ဒုတိယဥက္ကဋ္ဌ၊ တွမ်ႏအစွိုꩻနွို့သား ကားကအဝ်ႏ ကိစ္စမဥ်ႏထွူသွူ၊ မဥ်ႏအောင်ႏမျင်ႏ၊ ထာꩻမာꩻနဝ်ꩻတရန်း မဥ်ႏထွူသွူ နဝ်ꩻလဲင်ႏခါနဝ်ꩻ အဝ်ႏကုဲင်က ဒုတိယကဏ္ဍ၊ ဒုတိယရန်းနဝ်ꩻ ဗွေႏစင်ꩻသီး ရေႏရွယ်ႏနုဲင်းမုဲင်ꩻနဲးတဲင် နီသံႏဃာႏသီးဖုံႏ ရေႏရွယ်ႏနုဲင်းမုဲင်ꩻနဲးတဲင် - နံပါတ် (၁) ဗာႏ အချက်နဝ်ꩻ အဝ်ႏလိုႏ တဲမ်းလိတ်သား ၊ နံပါတ် (၂) အချက်နဝ်ꩻ အဝ်ႏလိုႏ တွဲႏနျꩻထန်ႏသား ၊ နံပါတ် (၃) အချက်နဝ်ꩻ အဝ်ႏလိုႏ ဘဏ္ဍာႏရေꩻသား ၊ နံပါတ် (၄) အချက်နဝ်ꩻ အဝ်ႏလိုႏ တုတ်ꩻလီဖြေ့ꩻစွစ်ꩻသား ၊ ဗွေႏစင်ꩻသီး ထီႏလွဥ်အချက်စားနဝ်ꩻ၊ နီသံႏဃာႏသီး ထီႏလွဥ်အချက် စားနဝ်ꩻစား ။[1][2]


အာႏကွိုꩻ

  1. ပွယ်ꩻနောင်ယာသုဲင်ꩻ စင်ꩻတန်သီႏသဲင်ႏ
  2. သံႏဃာႏနမ်းခြောင်ꩻတင်