Wp/blk/ဆို့ꩻလူႏကျောင်ꩻဇေႏတဝွန်ႏ

< Wp‎ | blkWp > blk > ဆို့ꩻလူႏကျောင်ꩻဇေႏတဝွန်ႏ

"အနာႏထပိဏ်ႏသဌေꩻ ဆို့ꩻလူႏ ကျောင်ꩻဇေႏတဝွန်ႏအကျောင်ꩻ"

အနာႏထပိဏ်ႏသဌေꩻ သꩻရောင်းသꩻရေꩻ သဲစ်ကဖျော်သဲင်ꩻချာ ဝေင်ꩻသာဝတ္ထိတဲင် သꩻကိုယူႏစဥ်ꩻစာꩻ ဗွေႏဘုရာꩻကျောင်ꩻအတွက်တာႏ ဝွေꩻလွေꩻထီႏရော့ꩻခန်း ဇေတမင်ꩻသာꩻဥယျာဥ်ႏခြံ။ "ဥယျာဥ်ႏခြံသူꩻနဝ်ꩻ တွမ်ႏဒုံတဲ့ တဗော့ꩻငါႏတဝ်း၊ တညာꩻငါႏတဝ်း၊ တဖူꩻလွေꩻသဲင်ꩻတဲ့ ရော့ꩻဒျာႏ၊ လိုꩻကမဥ်လွေꩻဝုဲင်ႏ ဘုရာꩻသားတာႏတဲ့ လွေꩻသဲင်ꩻယိုꩻဒျာႏ၊ မွူးယာခိုႏတဲ့ တွမ်ႏလိုꩻလမ်း တရော်ꩻရယ်ꩻတဝ်း၊ မွူးဟာခိုႏတဲ့ လိုꩻငေါဝ်းယေန်ဒျာႏ၊ ဟွုန်တဝ်း လိုꩻဝေင်ꩻလိုꩻဒုံရောင်ထာꩻ၊ နွုမ်ꩻတဝ်းလိုꩻသီးဖုံႏအလွီး၊ အုံဗဥ်ႏဗဥ်ႏဗꩻဗꩻထာꩻ (အားထွုတ်တေ့ꩻတရာꩻ)ဟောဝ်ငါႏ၊ ဗွေႏဘုရာꩻ ဗွေႏသံဃာႏသီး အုံသတင်ꩻသွုံꩻသော့ꩻ ရော့ꩻဟောဝ်မွေးစွဥ်ႏထာꩻ၊ ခွန်ပိုဇေတဥယျဥ်ႏသူꩻ ခွေဖြေꩻထွူခါ ခွေအီႏဆို့ꩻသော့ꩻကျောင်ꩻ၊ ကျောင်ꩻနဝ်ꩻ ခွေမဥ်ႏလူႏဗာႏ ဗွေႏဘုရာꩻအွဥ်ငါ ပါတွမ်ႏသံဃာႏနဝ်ꩻ ယံဟောဝ်ငါႏမွော့ဟွေး" ယူႏစွေးကျငါႏ၊ စေႏတနာႏမွန်ဗန် တရွူꩻသန်မွေးစွဥ်ႏ ဝွေꩻသꩻတဲင် အုံလꩻဒွုမ် လွေꩻကွီဖြေꩻမွေးစွဥ်ႏ၊ ဇေတမင်ꩻသာꩻနဝ်ꩻ ပေါႏမဥ်စာတဝ်း၊ ဒေါ့ꩻငေါဝ်းကွီလွစ်နုဲင်းယို- "ယိုသဌေꩻ- မီႏမဥ်ဖြေꩻ ခွေဥယျာဥ်ႏခြံသူꩻနဝ်ꩻ နာꩻရွဥ်တင်ႏဂါꩻယာႏ တဗီႏတွမ်ႏတဗီႏအွဥ်ႏစပ် အွဥ်ႏခြပ်ဗွေဗာႏ ခွေခြံသူꩻမꩻ (လꩻကားနဝ်ꩻမꩻ)ခွေစာ" ဒေါ့ꩻကျွားခန်းထာꩻနုဲင်းနောဝ်ꩻ။ အနာႏထပိဏ်ႏသဌေꩻရိုꩻချာ- "တောငါ နာꩻစာဒါႏငါမွိုင်၊ တင်ႏဂါꩻဗီႏအွဥ်ႏစပ်-အွဥ်ႏခြပ်ဗွေ နာꩻဥယျာဥ်ႏသူꩻတဲ့ ထွာကဲထမုဲင်ꩻ၊ အွဥ်ႏခြပ်ဗွေစွဥ်ႏနဝ်ꩻသနယ်ဟွေး" အနာႏထပိဏ်ႏ ထွိုင်ႏအီႏဖြေꩻမွေးတဲင် ဇေတမင်ꩻသာꩻ ငေါဝ်းလွဥ်ꩻလဲဥ်းပါꩻ မာꩻရာꩻဒါႏဒွုမ်၊ အနာႏထပိဏ်ႏသဌေꩻတဲ့ ဖြေꩻမွေးစွဥ်ႏ၊ ဥယျာဥ်ႏဗွေခြပ်-တိန်ႏတွက်ချာရွဥ်နဝ်ꩻ အဝ်ႏ"၅၄-ကုဋေႏ"စွဥ်ႏနောဝ်ꩻသွူ။ ဥယျာဥ်ႏခြံကိုနဝ်ꩻနဝ်ꩻ ဆို့ꩻသော့ꩻကျောင်ꩻတန်၊ တန်ꩻတွိုင်ꩻစရွပ်၊ ကျောင်ꩻဒွိုႏသော့ꩻ၊ ကုဋီႏ၊ ထီလူးခန်ꩻ၊ အွဥ်ႏချင်သင်္ကန်ꩻခင်ႏလမ်း၊ ထောင်တဖူꩻတာႏ၊ ထီအုံႏ-စတဲင် ကားကလိုႏအပ်နဝ်ꩻ မာꩻထွူစွဥ်ႏတလဲင်ႏချင်ꩻ။ လွေꩻပင်ꩻ ဗွေႏဘုရာꩻ၊ ဗွေႏဘုရာꩻတွမ်ႏ တပဲ့ꩻသံဃာႏ ဖျော်လွဥ်ခန်းဒျာႏ သာဝတ္ထိခမ်း၊ အုံသတင်ꩻသွုံꩻသော့ꩻ ကျောင်ꩻဇေႏတဝွန်ႏကို နုဲင်းမွူးရောဝ်ꩻတွော့ꩻ ကပ်သွမ်ꩻ၊ ကပ်သွမ်ꩻထွူ အီႏနာႏသွူတရာꩻ၊ အနာႏထပိဏ်ႏသဌေꩻ လောဝ်းနီဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ခွေသွဥ်းကဆို့ꩻထွူကျောင်ꩻ- စတဲင်ယိုဖုံႏနဝ်ꩻ အီႏလူႏဗာႏ အပွုံႏအနယ်ꩻမုဲင်ꩻ ဗွေႏဩ" "လူႏသံဃာႏ လစ်ꩻဖဲ့ꩻသွစ်ꩻနား ကားကအဝ်ႏနဝ်ꩻဟုဲင်းတကာႏ" ဆရာႏဗွေႏဘုရာꩻ ကမိန်းအတွိုင်ꩻ လူႏသံဃာႏ၊ နာႏတရာꩻ၊ ဆျာꩻထီ၊ သာႏဓုငေါဝ်းလီစွဥ်ႏဒျာႏ ဝိဟာႏကျောင်ꩻတန်ကိုနောဝ်ꩻသွူ။ (ဝိနယ်ꩻပိဋကတ်၊ စူဠဝဂ္ဂပါဠိတောႏ၊ သေနာသနက္ခန္ဓက)[1][2]

=အာႏကွိုꩻEdit

  1. လိတ်ဗွောင်မဲ့နား(၂၄)
  2. ဗွေႏဗွန်-ကောဝိဒ(သီႏသဲင်ႏ)