Wp/blk/ဆရာႏငတ်ꩻမျိုꩻ

< Wp‎ | blkWp > blk > ဆရာႏငတ်ꩻမျိုꩻ

"ကကုဓထေရသုတ် (ဆရာႏငတ်ꩻမျိုꩻ)" အွိုးခꩻတလဲင်ႏ- ကဝွတ်ပတ်ဖေႏဒါႏ ဗွေႏမဟာႏမောဂ္ဂလာန်ႏ 'ကကုဓ'နဝ်ꩻ သီထိုꩻတဲင် ထင်ႏထွာဗျဟ္မာႏ၊ ကကုဓဗျဟ္မာႏနဝ်ꩻ လောဝ်းဗွေႏမောဂ္ဂလာန်ႏနုဲင်းယို- "ဩဗွေႏ- ဒေဝဒတ်နဝ်ꩻ အသꩻကိုယူႏ 'ခွေအီႏထူႏကသံဃာႏ၊ ခွေအီႏအော်ကုဲင်ကသံဃာႏ'သဲ့စ်အသꩻကထွာနုဲင်းနဝ်ꩻတဲ့ ကအလꩻခါꩻဒါႏ 'တံꩻခိုꩻ'နဝ်ꩻ ဆွုတ်ယွုတ်ထိုꩻစွဥ်ႏ တလဲင်ႏချင်ꩻ ဗွေႏဩ" ကကုဓဗျဟ္မာႏ ကလောဝ်းဒါႏငေါဝ်းယိုနဝ်ꩻ ဝွေꩻဗွေႏလွေꩻလောဝ်းနယ်တော ဗွေႏဘုရာꩻ၊ ဗွေႏဘုရာꩻရိုꩻ- "မောဂ္ဂလာန်ႏ- ကကုဓဗျဟ္မာႏ ကလောဝ်းငေါဝ်းနဝ်ꩻ နုဲင်းနာꩻယူႏနုဲင်းမုဲင်ꩻ အမွေးမဲဥ်ႏဒျာႏနဲ့၊ အမွေးမဲဥ်ႏတဝ်းနဲ့" "အမွေးမဲဥ်ႏဒျာႏ ဗွေႏဩ" "မောဂ္ဂလာန်ႏ- ငေါဝ်းနဝ်ꩻနဝ်ꩻ ယွယွဒေါ့ꩻထန်ႏနယ်ဝင်ꩻနော၊ အုံတေ့ꩻတေ့ꩻကထာꩻဟုဲင်း၊ ပါꩻခွဥ်ႏဆေ့ꩻ (ဒေဝဒတ်)နဝ်ꩻ အထာꩻမာꩻတွမ်ႏ အထာꩻမာꩻ မဲ့ꩻအထင်ႏသျာꩻလွဥ်ဒျာႏ (မဲ့ꩻဝင်ꩻသေလွဥ်ဒျာႏ)" "မောဂ္ဂလာန်ႏဟွေး- လောကကိုယို ဆရာႏအဝ်ႏငတ်ꩻမျိုꩻ၊ ငတ်ꩻမျိုꩻကရိုနꩻောတ်ꩻ- ၁။ လောကကိုယို ဆရာႏယင်ဟန်ႏနောဝ်ꩻ- သီႏလ တစင်ဗွာတဝ်းတဲ့ 'ခွေသီႏလစင်ဗွာဒျာႏ၊ တဗော့ꩻလဲ့ꩻတဝ်း'ဝွန်ႏခံႏနုဲင်းနဝ်ꩻ၊ အတပဲ့ꩻဖုံႏတဲ့ အဝ်ႏသေဒျာႏ၊ ဒို့ꩻခါꩻဖေႏအဆရာႏ၊ ဒေါ့ꩻနယ်တဝ်းဝင်ꩻ၊ ကဒို့ꩻခါꩻဖေႏနုဲင်းနဝ်ꩻနဝ်ꩻ အဆရာႏကျွိုက်ဒျာႏ။ ၂။ လောကကိုယို ဆရာႏယင်ဟန်ႏနောဝ်ꩻ- အလွူးနမ်း တစင်ဗွာတဝ်းတဲ့ 'ခွေလွူးနမ်းစင်ဗွာဒျာႏ၊ တဗော့ꩻလဲ့ꩻတဝ်း'ဝွန်ႏခံႏနုဲင်းနဝ်ꩻ၊ အတပဲ့ꩻဖုံႏတဲ့ အဝ်ႏသေဒျာႏ၊ ဒို့ꩻခါꩻဖေႏအဆရာႏ၊ အဆရာႏတဲ့ကျွိုက်ဒျာႏ။ ၃။ လောကကိုယို ဆရာႏယင်ဟန်ႏနောဝ်ꩻ- ဟော်ꩻတရာꩻ တစင်ဗွာတဝ်းတဲ့ 'ခွေဟော်ꩻတရာꩻ စင်ဗွာဒျာႏ၊ တဗော့ꩻလဲ့ꩻတဝ်း'ဝွန်ႏခံႏနုဲင်းနောဝ်ꩻ၊ အတပဲ့ꩻဖုံႏတဲ့ အဝ်ႏသေဒျာႏ၊ ဒို့ꩻခါꩻဖေႏအဆရာႏ၊ အဆရာႏတဲ့ꩻ ကျွိုက်ဒျာႏ။ ၄။ လောကကိုယို ဆရာႏယင်ဟန်ႏနောဝ်ꩻ- 'ဝင်ꩻရီတဲင် ဝွေꩻဖြေႏချာ၊ ဝွေꩻစေနယ်ဖေႏ'နဝ်ꩻ တစင်ဗွာတဝ်း၊ (တမွေးတဝ်းတဲ့) ခွေဖြေႏ-စေနယ်ဖေႏ စင်ဗွာဒျာႏ၊ (မွေးဒျာႏ) တဗော့ꩻလဲ့ꩻတဝ်း (မာႏတဝ်း)၊ ဝွန်ႏခံႏနုဲင်းနဝ်ꩻ၊ အတပဲ့ꩻဖုံႏ အဝ်ႏသေဒျာႏ၊ ဒို့ꩻခါꩻဖေႏ အဆရာႏ၊ အဆရာႏတဲ့ ကျွိုက်ဒျာႏ။ ၅။ လောကကိုယို ဆရာႏယင်ဟန်ႏနောဝ်ꩻ- 'ဉာဏ်ႏထာꩻထီႏ တစင်ဗွာ'တဲ့ 'ခွေဉာဏ်ႏထာꩻထီႏ စင်ဗွာဒျာႏ၊ တဗော့ꩻလဲ့ꩻတဝ်း'ဝွန်ႏခံႏနုဲင်းနဝ်ꩻ၊ အတပဲ့ꩻဖုံႏ အဝ်ႏသေဒျာႏ၊ ဒို့ꩻခါꩻဖေႏအဆရာႏ၊ အဆရာႏတဲ့ကျွိုက်ဒျာႏ။ လောကကိုယို ဆရာႏ(လဲဥ်) အဝ်ႏငတ်ꩻမျိုꩻ နုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ပဥ္စကနိပါတ်၊ ကကုဓထေရသုတ်)[1][2]

အာႏကွိုꩻEdit

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၁၉၅)