Wp/blk/ခြွေဗာႏကေန်ꩻဗာႏအခရာႏ

< Wp‎ | blkWp > blk > ခြွေဗာႏကေန်ꩻဗာႏအခရာႏ

"ဒီဃဇာဏသုတ် (ကခြွေခြာႏ+ကကေန်ꩻခြောဗာႏအကျောင်ꩻ)" အွိုးခꩻတလဲင်ႏ- 'ဒီဃဇာဏု'ကရိုꩻဒါႏ ခွန်ပိုကောလိယနဝ်ꩻ လောဝ်းဗုဒ္ဓဗွေႏဘုရာꩻနုဲင်းယို- "ဩဗွေႏ- တောႏလမ်းတောႏပါႏ တကာႏနီသွဥ်းသီး လိုꩻလမ်းဘဝနဝ်ꩻ အုံတချလမ်းကို နေးပိုထူႏမာ၊ စွုမ်ႏဟာစွုမ်ႏနီꩻ ပျောႏညီꩻခြွိုင်းနမ်း၊ သမ်းမဥ်လꩻအာအာ၊ ရွဥ်ဗွာခံꩻတူႏ၊ ယူႏတဲ့ တပေါက်တဝ်း၊ = ဒိဋ္ဌဓမ္မဟိတာယ ဒိဋ္ဌဓမ္မသုခါယ - ဘဝယိုတဲ့ စီꩻပွါꩻချမ်ꩻသာႏ = သမ္ပရာယဟိတာယ သမ္ပရာယသုခါယ - ဘဝငါသူꩻတဲ့ စီꩻပွါꩻချမ်ꩻသာႏ 'တရာꩻယာႏယံယံ-အနယ်ꩻကျကျ၊ လိုꩻဘဝခြွေနယ်ꩻ'နဝ်ꩻ ဟော်ꩻနယ်ဖေႏမွိုင် ခွေသွဥ်းယို ဗွေႏဩ" "မွေးသွူ တကာႏ၊ နာႏစဲင်းစဲင်းသွော့နော- ၁။ ဥဋ္ဌာနသမ္ပဒါ - သောင်ႏသာထွိုင်ႏမာꩻ၊ ကျိုꩻစာꩻမွေးမွေးဗာႏ ၂။ အာရက္ခသမ္ပဒါ - တွမ်မာꩻ၊ လွမ်ခါꩻ၊ ရွမ်ခါꩻဟောဝ်ဟောဝ်ဗာႏ ၃။ ကလျာဏမိတ္တတာ - ဟောဝ်ရာꩻဒေါ့ꩻဖေႏ-သွꩻပေႏဟောဝ်အောဝ်ႏဗာႏ ၄။ သမဇီဝိတာ - ရွဥ်နွို့ရွဥ်ထန်ႏ ဖေႏကငမ်ႏဗာႏ တရာꩻယိုလစ်ꩻပါꩻ (စီꩻကန်ꩻယိုလစ်ꩻချက်)နဝ်ꩻ 'ဒိဋ္ဌဓမ္မဟိတာယ-ဘဝယိုစီꩻပွါꩻတာႏ၊ ဒိဋ္ဌဓမ္မသုခါယ-ဘဝယိုချမ်ꩻသာႏတာႏ၊ တရာꩻယာႏယံယံ-အနယ်ꩻကျကျ လိုꩻဘဝခြွေနယ်ꩻ'နောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၁။ 'ဥဋ္ဌာနသမ္ပဒါ - သောင်ႏသာထွိုင်ႏမာꩻ၊ ကျိုꩻစာꩻမွေးမွေးဗာႏ'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻခိုလွူးနမ်းနဝ်ꩻ 'လုပ်ꩻသွို့ꩻ-မာꩻလုဲင်းတဲ့ယဝ်း၊ ဖြေꩻစာꩻကူꩻကားတဲ့ယဝ်း၊ တီအံႏဖိုးပနားတဲ့ယဝ်း၊ ခꩻဒါႏခြီႏသားတဲ့ယဝ်း၊ ထွာခွန်လိုꩻတရိုꩻတဝ်း၊ နေးတွမ်ႏပညာႏ ကဒါႏရာꩻ အလောင်ႏအလင် အမျိုꩻမုဲင်ꩻတရိုꩻတဝ်း၊ 'လွူးနမ်းတွမ်ႏ အမျိုꩻမုဲင်ꩻတဲ့ယဝ်း'ထာꩻမာꩻကလွူးအီနမ်းနဝ်ꩻနဝ်ꩻ ဒါႏလျင်ႏဗာႏ၊ နေးတွမ်ႏပညာႏ ဝွေႏဖန်ႏခွုမ်မာꩻဒါႏဗာႏ၊ လွꩻတဲ့လွꩻတဝ်း၊ မာꩻတဲ့မာꩻနွောင်ꩻ၊ ဖန်းဖြယ်တဲ့ဒါႏ-စတဲင်နုဲင်းယိုနဝ်ꩻ ဟဲ့ꩻဗာႏ 'ဥဋ္ဌာနသမ္ပဒါ - သောင်ႏသာထွိုင်ႏမာꩻ၊ ကျိုꩻစာꩻမွေးမွေး'နောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၂။ 'အာရက္ခသမ္ပဒါ - တွမ်မာꩻ၊ လွမ်ခါꩻ၊ ရွမ်ခါꩻဟောဝ်ဟောဝ်ဗာႏ'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻခိုလွူးနမ်းနဝ်ꩻ 'သောင်ႏသာထွိုင်ႏမာꩻ၊ ကျိုꩻစာꩻမွေးမွေး'တဲင် နေးတွမ်ႏဉာဏ်ႏအာႏ၊ နမ်းအာႏ-ကလꩻလွဥ်ဒါႏတခြိုꩻ၊ ကွိုꩻစူဗောင်အာႏ သိုꩻလီးသိုꩻလူး စူပွစ်ꩻရွိုးဗာႏ-ကလꩻလွဥ်ဒါႏတခြိုꩻ နေးတွမ်ႏထာꩻတရာꩻရာꩻ အပဲ့စ်ကင်ꩻသာႏ-ကလꩻလွဥ်ဒါႏတခြိုꩻဖုံႏနဝ်ꩻ- (က) နေဝ ရာဇာနော ဟရေယျုံ - ခွန်သီး ဖေႏနေးကထူႏသိမ်ꩻနွောင်ꩻမွုန်း (ခ) န စောရာ ဟရေယျုံ - စွန်(စိုန်)တခွန်ꩻ ဖေႏနေးကထူႏလꩻမွုန်း (ဂ) န အဂ္ဂိ ဍဟေယျ - မေႏ ဖေႏနေးကခိုးနွောင်ꩻမွုန်း (ဃ) န ဥဒကံ ဝဟေယျ - ထီ ဖေႏနေးကအီခြွဥ်ႏနွောင်ꩻမွုန်း (င) န အပ္ပိယာ ဒါယာဒါ ဟရေယျုံ - တရက်တဝ်းနီ၊ ပိုရန်ႏသူႏ ဖေႏကထူႏနွောင်ꩻမွုန်း၊ ဖေႏကယားလꩻမွုန်းတဲင် ကျံႏတွမ်၊ ကျံႏလွမ်၊ ကျံႏရွမ်ခါꩻဟောဝ်ဟောဝ်နဝ်ꩻ ဟဲ့ꩻဗာႏ'အာရက္ခသမ္ပဒါ'နဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၃။ 'ကလျာဏမိတ္တတာ - ဟောဝ်ရာꩻဒေါ့ꩻဖေႏ-သွꩻပေႏဟောဝ်အဝ်ႏဗာႏ'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻခိုလွူးနမ်းနဝ်ꩻ လိုႏငါႏသွꩻပေႏဟဝ်၊ လိုꩻပေႏပေႏတဲ့ယဝ်း နမ်းကျင်ꩻဟဝ်၊ သဒ္ဓါႏတရာꩻအဝ်ႏ၊ သီႏလအဝ်ႏ၊ လူႏကုဲင်းထာꩻ၊ ပညာႏအဝ်ႏ ဝွေꩻနဝ်ꩻ လိုꩻဟောဝ်၊ အဝ်ႏလိုႏမာꩻသွꩻ အဝ်ႏလိုႏကွိုက်ꩻ၊ လိုꩻသက်တန်တဲ့ယဝ်း (သက်ကားမုဲင်ꩻမုဲင်ꩻတဲ့ယဝ်း) နမ်းကျင်ꩻဟောဝ်၊ သဒ္ဓါႏတရာꩻအဝ်ႏ၊ သီႏလအဝ်ႏ၊ လူကုဲင်းထာꩻ၊ ပညာႏအဝ်ႏ ဝွေꩻနဝ်ꩻလိုꩻဟောဝ် အဝ်ႏလိုႏမာꩻသွꩻ၊ အဝ်ႏလိုႏကွိုက်ꩻ။ လိုꩻခြွေနမ်းတဲ့နဝ်ꩻ၊ လိုꩻခြွေပိုတဲ့နဝ်ꩻ (လိုꩻမာꩻစီꩻပွါꩻရေꩻ အင်းတန်တဲ့နဝ်ꩻ)၊ နမ်းကျင်ꩻဟောဝ်၊ သဒ္ဓါႏတရာꩻအဝ်ႏ၊ သီႏလအဝ်ႏ၊ လူႏကုဲင်းထာꩻ၊ ပညာႏအဝ်ႏ၊ သꩻရင်ꩻဟောဝ်၊ မꩻဖေႏဒါႏ အနီꩻအရင်ꩻ ဝွေꩻနောဝ်ꩻ လိုꩻဟောဝ် အဝ်ႏလိုႏမာꩻသွꩻ၊ အဝ်ႏလိုႏကွိုက်ꩻ၊ ပေါႏမာꩻသွꩻလိုꩻဟောဝ်၊ ပေါႏကွိုက်ꩻလꩻဝွေꩻသီးနဝ်ꩻ၊ ထွားနုဲင်းဝွေꩻသီး၊ အုံနုဲင်းဝွေꩻသီး၊ ခွုမ်မာꩻနုဲင်းဝွေꩻသီး၊ ကျိုꩻစာꩻနုဲင်းဝွေꩻသီးတဲင် ကထွားနုဲင်းသားနဝ်ꩻ နမ်းကျင်ꩻဟောဝ်နုဲင်းနုဲင်း၊ သဒ္ဓါႏတရာꩻအဝ်ႏနုဲင်းနုဲင်း၊ သီႏလအဝ်ႏနုဲင်းနုဲင်း၊ လူႏနုဲင်းနုဲင်းထာꩻ၊ ထာꩻသေထာꩻဒါႏ ဉာဏ်ႏပညာႏဗွေလွဥ်၊ ကျံႏဒါႏ၊ ဝွေႏဖန်ႏဒါႏနုဲင်းနုဲင်း၊ လွူးနုဲင်းနုဲင်းသꩻဟောဝ်တဲင် အစစအရာႏရာႏ အဆင်ႏပြေႏလွဥ်၊ အောင်ႏမျင်ႏလွဥ်၊ ခြွေခြာႏလွဥ်နုဲင်းနုဲင်းတွော့ꩻ ကထွာလွဥ်နုဲင်းယိုနဝ်ꩻ ကွပ်သွꩻပေႏဟောဝ်အဝ်ႏ၊ ရိုꩻဗာႏ 'ကလျာဏမိတ္တတာ'နောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၄။ 'သမဇီဝိတာ - ရွဥ်နွို့ရွဥ်ထန်ႏ ဖေႏကငမ်ႏဗာႏ'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို လိုꩻခိုလွူးနမ်းနဝ်ꩻ ခွေတဖြာꩻယို တလာကို ရွဥ်နွို့(လꩻရွဥ်)တကားမုဲင်ꩻ၊ ရွဥ်ထန်ႏ (စုဲင်ႏထိုꩻ)တကားမုဲင်ꩻ၊ နီတလမ်းတလုမ်းယို တလာကို ရွဥ်နွို့(လꩻရွဥ်)တကားမုဲင်ꩻ၊ ရွဥ်ထန်ႏ(စုဲင်ႏထိုꩻ/လို့ထိုꩻ)တကာားမုဲင်ꩻ၊(တလာတာႏ မာꩻဗာႏစာႏရင်ꩻ-သျင်ꩻတန်ꩻ) ရွဥ်နွို့ကားမုဲင်ꩻ၊ ရွဥ်ထန်ႏကားမုဲင်ꩻ သေဗာႏ။ တွိုႏရွဥ်နွို့ (ကလꩻ)နဝ်ꩻဆေ့ꩻ၊ တွိုႏရွဥ်ထန်ႏ (ကလို့)နဝ်ꩻအာ၊ မဥ်ႏထွာနုဲင်းနဝ်ꩻနဝ်ꩻ အီႏခြွေသဲင်ꩻမွေးတဝ်း၊ အီႏကေန်ꩻခြောတဲင် နီလမ်းကိုယို ဖြေꩻတဝ်းတဲ့ အဝ်ႏလꩻဒျာႏ (အဝ်ႏလိုႏချော့ꩻ)အမျိုꩻမုဲင်ꩻ၊ တထွာသွီႏ တထွာယာႏခြာတဝ်း (ဥပမာႏ-ဒေါဝ်၊ ပြူး၊ ယာ၊ လွိုဒဲဥ်ဟန်ႏ) ထာꩻအံႏပျင်ႏ၊ ထာꩻလို့ပျင်ႏ-စတဲင်စားနဝ်ꩻဖုံႏနဝ်ꩻ ချော့ꩻထိုꩻဗာႏ၊ ယွုန်းထိုꩻဗာႏ၊ (ကချော့ꩻထိုꩻဗာႏအကျောင်ꩻနဝ်ꩻ တလမ်းတလိုမ်း ဖေႏကသေနာႏ ခြုဲင်းနယ်ဗာႏလို့ဝင်ꩻ) ရွဥ်နွို့(ကလꩻ)နဝ်ꩻအာ၊ ရွဥ်ထန်ႏ(ကလို့)နဝ်ꩻဆေ့ꩻ၊ ရွက်လွိုအဝ်ႏ၊ ရွမ်ခါꩻဗာႏ တလာတစိꩻစိꩻ၊ တနေင်ႏတစိꩻစိꩻနဝ်ꩻ အီႏခြွေသဲင်ꩻ၊ ဖေႏနေးကရွမ်ဗာႏ၊ ဖေႏနေးကခြွေခြာႏနဝ်ꩻ တလမ်းတလုမ်းမာꩻဗာႏ၊ တလမ်းတလိုမ်းကျိုꩻစာꩻဗာႏ၊ တလမ်းတလိုမ်း ချင်းစုဲင်ႏဗာႏ၊ 'ရွဥ်နွို့ ရွဥ်ထန်ႏ ဖေႏကငမ်ႏ'ကရိုꩻနဝ်ꩻ- ရွဥ်လꩻတွမ်ႏရွဥ်လို့ ဖေႏကငမ်ႏလို့ဝင်ꩻ၊ ကွဲႏတွော့ꩻ 'လꩻတရေင်-စုဲင်ႏတရေင်'နဝ်ꩻ ရွဥ်နွို့ရွဥ်ထန်ႏ ငမ်ႏဒျာႏကရိုꩻကီလဲ့ အလွိုအဲဥ်ထဝ်း၊ ရွမ်ဗာႏတဝ်း၊ ရွမ်ဗာႏနဝ်ꩻမꩻ အီႏခြွေတဲင် 'ရေႏပါခြွေတာႏ-ချင်းစုဲင်ႏဗာႏ'နဝ်ꩻ 'သမဇီဝိတာ'နောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၅။ နေးတွမ်ႏ သမ္ပဒါလစ်ꩻပါꩻ ကျိုꩻစာꩻမွေးတဲင် ခြွေခြာႏထွူတွော့ꩻ ကကေန်ꩻစွော့ꩻချာနဝ်ꩻ အကျောင်ꩻတရာꩻ အဝ်ႏလစ်ꩻပါꩻ၊ လစ်ꩻပါꩻကရိုꩻနောဝ်ꩻ- ၁။ ဣတ္ထိဓုတ္တော - ထုမ်ႏလွူꩻလိုꩻမူႏ ၂။ သုရာဓုတ္တော - စွယ်ꩻဒေါဝ် (စွယ်ꩻယာ) ၃။ အက္ခဓုတ္တာ - စွယ်ꩻထာꩻတောႏ ထာꩻလောင်ꩻ ၄။ ပါပမိတ္တော - ပေါင်ꩻကွိုꩻလိုꩻကုဲင်၊ ယိုလစ်ꩻပါꩻဖုံႏသွူ။ တကာႏ'ဗျဂ္ဃပဇ္ဇ'ဟွေး- ၁။ 'ဣတ္ထိဓုတ္တော - ထုမ်ႏလွူꩻလိုꩻမူႏ'ကရိုꩻနဝ်ꩻ နုဲင်းမုဲင်ꩻနဲတဲင်- မာအဝ်ႏဒျာႏသွူတဲ့ နေးတွမ်ႏသꩻကျွား၊ ရွဥ်အွဥ်ႏတံꩻ ခံꩻအွဥ်ႏနယ်၊ ယားဝင်ꩻပို ယားဝင်ꩻမာ တဖြာꩻထွူတဖြာꩻ-စတဲင်နုဲင်းနောဝ်ꩻသွူ။ ၂။ 'သုရာဓုတ္တော - စွယ်ꩻဒေါဝ် (စွယ်ꩻယာ)'ကရိုꩻနဝ်ꩻ နုဲင်းမုဲင်ꩻနဲတဲင်- အွꩻဒေါဝ်ဆွဥ်းယာ စွုမ်ႏဟာစွုမ်ႏနီꩻ၊ အောဝ်ႏသို့အောဝ်ႏပြာႏ၊ သွို့ꩻခြံဖြေꩻစာ၊ သေသာဒွုမ်-စတဲင်နုဲင်းနောဝ်ꩻသွူ။ ၃။ 'အက္ခဓုတ္တာ - စွယ်ꩻထာꩻတောႏ ထာꩻလောင်ꩻ'ကရိုꩻနဝ်ꩻ နုဲင်းမုဲင်ꩻနဲတဲင်- တောႏလောင်ꩻမွိုင်းထာꩻ၊ ထာꩻမာꩻသေဒွုမ်၊ စာလို့-တောႏလောင်ꩻ၊ ပေါင်ꩻလိုꩻတောႏလောင်ꩻ၊ ကွီငါးတောႏလောင်ꩻ-နဝ်ꩻသွူ။ ၄။ 'ပါပမိတ္တော - ပေါင်ꩻကွိုꩻလိုꩻမွိုက်'ကရိုꩻနဝ်ꩻ နုဲင်းမုဲင်ꩻနဲတဲင်- ပေါင်ꩻလိုꩻမွိုက်-ကွိုက်ꩻလိုꩻကုဲင်တွော့ꩻ တခွန်ꩻထာꩻ၊ စွန်(စိုန်)ပါꩻ၊ မာꩻတဝ်းထာꩻမာꩻ-စတဲင်နုဲင်းနဝ်ꩻသွူ။ ဥပမာႏ-ထီထွိုက်တန်တဖြုံႏနဝ်ꩻ ထူႏသော့ꩻထီတာႏ ပြောင်ႏအဝ်ႏလစ်ꩻလီး၊ ဥဋ္ဌာန-စတဲင်နဝ်ꩻနဝ်ꩻ တွမ်ႏပြောင်ႏထူႏသော့ꩻထီနဝ်ꩻ ဗွန်ပီဝင်ꩻ၊ အွဥ်ႏထန်ႏထီတာႏနဝ်ꩻ ပြောင်ႏလစ်ꩻလီး၊ ဣတ္ထဓုတ္တ-စတဲင် 'အပါယမုခတရာꩻလစ်ꩻပါꩻ'နဝ်ꩻ တွမ်ႏပြောင်ႏအွက်ႏထန်ႏထီနဝ်ꩻ ဗွန်ပီလို့ဝင်ꩻ၊ သွင်ꩻသော့ꩻတဝ်းထီ၊ အဝ်ႏဒျာႏ အဗွောင်ထန်ႏလွုမ်ꩻတဲင် ကွဲညည ထီလို့လစွဥ်ႏ၊ ယိုတဲ့ တထုမ်ႏထဲင်းတဝ်း၊ အဝ်ႏဒျာႏ အယားတိတ်ꩻတိတ်ꩻ၊ အဝ်ႏဒျာႏ အလို့တိတ်ꩻတိတ်ꩻလူမ်ꩻတွော့ꩻ ကွဲညည ကွဲမွမွ၊ လို့လ ဒုက္ခကေန်ꩻခြောထိုꩻစွဥ်ႏနောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၁။ န ဣတ္ထိဓုတ္တော - ထိုမ်ႏလွူꩻတဝ်းလိုꩻမူႏ ၂။ န သုရာဓုတ္တော - စွယ်ꩻတဝ်းဒေါဝ် (စွယ်ꩻတောဝ်းယာ) ၃။ န အက္ခဓုတ္တာ - စွယ်ꩻတဝ်း ထာꩻတောႏ ထာꩻလောင်ꩻ ၄။ ကလျာဏမိတ္တော - ပေါင်ꩻကွိုꩻလိုꩻဟောဝ်၊ ကုဲင်။ 'အာယမုခ'တရာꩻယိုလစ်ꩻပါꩻနဝ်ꩻ တခြိုꩻဥစ္စာႏ တိုꩻပွါꩻအီ အကျောင်ꩻတရာꩻဖုံႏသွူ။ ဥပမာႏ-ထီထွိုက်တန်ကိုနဝ်ꩻ ထီပြောင်ႏလစ်ꩻလီးနဝ်ꩻ ဗွောင်သော့ꩻ၊ ထီထန်ႏတာႏ ပြောင်ႏလစ်ꩻဗာႏနဝ်ꩻ ပေ့ꩻခါꩻ၊ ဗွောင်ပျင်ႏထိုꩻတဝ်းထီမွိုင် ထီအဝ်ႏဗွေကီဗွေကီနဝ်ꩻလူမ်ꩻ၊ 'အာယမုခ'တရာꩻလစ်ꩻပါꩻယိုနဝ်ꩻ တွမ်ႏဗွောင်ပျင်ႏထိုꩻတဝ်းထီနဝ်ꩻ ဗွန်ပီလို့ဝင်ꩻနောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ကမာꩻစီꩻပွါꩻ ကမာꩻချမ်ꩻသာႏဖေႏဒါႏ ဘဝငါတာႏနဝ်ꩻ တရာꩻအဝ်ႏလစ်ꩻပါꩻ၊ လစ်ꩻပါꩻကရိုꩻနောဝ်ꩻ- ၁။ သဒ္ဓါသမ္ပဒါ - ဗွေဗာႏတွမ်ႏသဒ္ဓါႏ ၂။ သီလသမ္ပဒါ - ဗွေဗာႏတွမ်ႏသီႏလ ၃။ စာဂသမ္ပဒါ - ဗွေဗာႏတွမ်ႏစာႏဂ ၄။ ပညာသမ္ပဒါ - ဗွေဗာႏတွမ်ႏပညာႏ၊ တရာꩻယို လစ်ꩻပါꩻဖုံႏသွူ။ တကာႏ'ဗျဂ္ဃပဇ္ဇ'ဟွေး- ၁။ 'ဗွေဗာႏတွမ်ႏသဒ္ဓါႏ'ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို ပါꩻခိုတဖြာꩻနောဝ်ꩻ သဒ္ဓါႏတရာꩻအဝ်ႏ၊ ယွုမ်းအံႏနီဗွေႏဘုရာꩻ အရဟတ္တမဂ်ဉာဏ်ႏ၊ သဗ္ဗညုတဉာဏ်ႏ၊ နီဗွေႏဘုရာꩻသူꩻနဝ်ꩻ- ကျောႏအရဟံ၊ ကျောႏသမ္မာသမ္ဗုဒ္ဓေါ၊ ကျောႏဝိဇ္ဇာစရဏသမ္ပန္နော၊ ကျောႏသုဂတော၊ ကျောႏလောကဝိဒူ၊ ကျောႏအနုတ္တရော ပုရိသဒမ္မသာရထိ၊ ကျောႏသတ္ထာဒေဝ မနုဿာနံ၊ ကျောႏဗုဒ္ဓေါ၊ ကျောႏဘဂဝါ-ဗွေႏကျောႏတွမ်ႏ ဂွုဏ်ႏတောႏကွတ်ꩻပါꩻ၊ ယွုမ်းအံႏမွေးမုဲင်း ဗွေႏဘုရာꩻနုဲင်းနဝ်ꩻ (ယွုမ်းတရာꩻ၊ ယွုမ်းသံဃာႏ၊ ယွုမ်းကံႏ၊ ယွုမ်းကံႏအကျိုꩻ၊ ယွုမ်းယိုငတ်ꩻမျိုꩻ)နဝ်ꩻ ဟဲ့ꩻဗာႏ 'ဗွေတွမ်ႏ-သဒ္ဓါႏတရာꩻ'နောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၂။ 'ဗွေဗာႏတွမ်ႏသီႏလ'ကရိုꩻနဝ်ꩻ နုဲင်းမုဲင်ꩻနဲတဲင်- သာႏသနာႏကိုယို ပါꩻခိုတဖြာꩻနဝ်ꩻ မာꩻသီတဝ်းဝင်ꩻသက်၊ ထူႏတခွန်ꩻတဝ်း ဝင်ꩻတခြိုꩻ၊ ပဲ့စ်မာႏဝဝ်း ဝင်ꩻပိုမာ(ပဲ့စ်မာႏတဝ်း ဝင်ꩻပိုဝါꩻ၊ ဒေါ့ꩻလဲဥ်တဝ်းထာꩻ၊ အွꩻတဝ်းဒေါဝ် (ဆွဥ်းတဝ်းယာဖြေင်း၊ ယာဗွာ)နောဝ်ꩻ ဟဲ့ꩻဗာႏ'ဗွေတွမ်ႏ-သီႏလ'နောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၃။ 'ဗွေဗာႏတွမ်ႏစာႏဂ'ကရိုꩻနဝ်ꩻ နုဲင်းမုဲင်ꩻနဲတဲင်- သာႏသနာႏကိုယို ပါꩻခိုတဖြာꩻနဝ်ꩻ လူႏလဲဥ်းလဲဥ်းဒျာႏ၊ အွဥ်ႏခါꩻဒျာႏ အီႏလူႏတာႏ၊ ပျောႏလွက်ꩻဒျာႏတွမ်ႏထာꩻလူႏ၊ ကွီထွိုက်-လူႏခံႏထွိုက်ဒျာႏ၊ အုံထာꩻ အဝ်ႏမဥ်လူႏစွဥ်ႏထာꩻ၊ တကေးဒါႏတဝ်းဝင်ꩻ၊ လူႏရိုꩻရိုꩻသာꩻသာꩻဒျာႏနောဝ်ꩻ ဟဲ့ꩻဗာႏ'ဗွေတွမ်ႏ-စာဂ'နောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- ၄။ 'ဗွေဗာႏတွမ်ႏပညာႏ'ကရိုꩻနဝ်ꩻ နုဲင်းမုဲင်ꩻနဲတဲင်- သာႏသနာႏကိုယို ပါꩻခိုတဖြာꩻနဝ်ꩻ ပညာႏအဝ်ႏ (ထာꩻသူႏသေအဝ်ႏ)၊ သေဖြွဥ်ရုပ်နာမ်ႏ၊ သေခန္ဓာႏ အထွာအကုဲင်၊ ယိုနောဝ်ꩻ ဟဲ့ꩻဗာႏ'ဗွေတွမ်ႏ-ပညာႏ'နောဝ်ꩻသွူ။ တကာႏ'ဗျဂ္ဃပဇ္ဇ'ဟွေး- 'ဥဋ္ဌာနသမ္ပဒါ၊ အာရက္ခသမ္ပဒါ၊ ကလျာဏမိတ္တတာ၊ သမဇီဝိတာ၊ သဒ္ဓါသမ္ပဒါ၊ သီလသမ္ပဒါ၊ စာဂသမ္ပဒါ၊ ပညာသမ္ပဒါ'တရာꩻဖုံႏယို သွစ်ꩻပါꩻနဝ်ꩻ 'ဘဝယိုတဲ့ မာꩻစီꩻပွါꩻ မာꩻချမ်ꩻသာႏလိုꩻ၊ ဘဝငါတာႏတဲ့ မာꩻစီꩻပွါꩻ မာꩻချမ်ꩻသာႏလိုꩻ'အကျောင်ꩻတရာꩻဟောဝ် သွစ်ꩻမျိုꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ ဒီဃဇာဏုသုတ်)[1][2]

အာႏကွိုꩻEdit

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၂၉၉/၃၀၂)