Wp/blk/ကျံႏယားတရေႏဗွေႏဘုရာꩻ

< Wp‎ | blkWp > blk > ကျံႏယားတရေႏဗွေႏဘုရာꩻ

"သရဘသုတ် (ကျံႏယားတရေႏ ဗွေႏဘုရာꩻတွမ်ႏသံဃာႏတဲ့ လꩻတဝ်း)"

နီဗွေႏဘုရာꩻအဝ်ႏအုံ ရာႏဇဂျိုဟ်ႏခမ်း၊ ဂိဇ္ဈကုဋ်ကောင်လောင်းတွင်ꩻ ပွိုင်းဝွို့တွမ်ႏ "စင်ꩻထွက်သရဘ"တဲင် နီဗွေႏဘုရာꩻ ဖြေႏသျင်ꩻဗာႏ ပျဿနာႏယို။ ထွာနုဲင်းမုဲင်ꩻနဲတဲင်- ဗွေႏဘုရာꩻ ကထွိုင်ႏပွင်ꩻလွဥ်နဝ်ꩻ တိတ္ထိတက္ကတွဥ်ꩻသီးဖုံႏ လာဘ်ခြော၊ အံႏအွꩻယပ်ꩻ ဒုက္ခအာတန်၊ ကွပ်နဝ်ꩻမꩻ ဝွေꩻသီးအုံကွံတေ့ꩻလို့ဝင်ꩻ၊ ပရိဗိုဇ်တြဖာꩻရိုꩻ- "ဂေါတမသီး လာဘ်ကအာ၊ ဝင်ꩻလူႏဝင်ꩻတန်ꩻသား ကအာနဝ်ꩻ အလင်မွေးတဝ်း၊ ဝွေꩻသီးသူꩻအဒါႏ 'အာဝဋ္ဋနီမာႏယာႏ' အံႏလိန်ႏအံႏလဲဥ် တကာႏဖုံႏဒါႏ၊ လာဗွေနီꩻ လာမားနီꩻဖုံႏနဝ်ꩻ ရဟန်ꩻခြေင်ခြေင် အုံသော့ꩻသိမ်ႏကို၊ သွဥ်ဖေႏလို့ဝင်ꩻ၊ ကသွဥ်ဖေႏလို့ဝင်ꩻခိန်ႏနဝ်ꩻ သျင်ႏပေႏနွို့လꩻတဝ်း၊ လိုꩻလမ်းနွို့လꩻတဝ်း၊ နီတဲ့မဥ်ႏဒါႏ မာႏယာႏပညာႏနဝ်ꩻနဝ်ꩻ အံႏလဲဥ်တကာႏဖုံႏဒါႏ၊ လာဘ်သပ္ပကာႏလွိုင်ႏအာသနယ်"ရိုꩻနုဲင်းနောဝ်ꩻ။ နဝ်ꩻထွူတွော့ꩻ ဝွေꩻသီးထွဥ်ႏခန်း 'သရဘ'လွေꩻသွဥ်၊ သရဘရိုꩻ'ခွေမဥ်ႏဒါႏနဝ်ꩻ ခွေထွာဗာႏအတန်မꩻ'၊ ပရိဗိုဇ်အလင်ဖုံႏရိုꩻ' တောငါ နာꩻဒါႏငါ၊ နာꩻထွာဗာႏဒျာႏအတန်'အာႏမခံႏခါꩻ ပငါပရာꩻနုဲင်းနဝ်ꩻသွူ။ သရဘပရိဗိုဇ်နဝ်ꩻ ခွဲရဟန်ꩻသံဃာႏ မုဲင်ꩻကိုကိုတဲ့ ဝုဲင်ႏရိုႏရိုႏသေႏသေႏ၊ ကွပ်နဝ်ꩻမꩻ ထင်ႏမာꩻလꩻစွဥ်ႏ သံဃာႏဝေယျာဝစ္စ၊ တွောင်ဖေႏထီ၊ ဖွစ်ꩻဖေႏထာꩻ၊ အွဥ်ႏအွီႏအငေါဝ်း အုံတဲ့ꩻခေါဝ်း ဗွေႏသံဃာႏသီးဖုံႏ၊ ရဟန်ꩻတပါꩻ အွဥ်ႏဗုဲင်ဖေႏစင်ꩻ၊ အွဥ်ႏဗုဲင်စင်ꩻထွူ လာဗွေနီꩻ လာမားနီꩻ ရဟန်ꩻသီးပျုဥပုသ် ရွစ်ပါတိမောက်နဝ်ꩻတဲ့ ဝွေꩻပါ၊ ဝွေꩻကွီသွဥ် ပါတိမောက် (ရဟန်ꩻသီးစီꩻကန်ꩻ)၊ ဝင်ꩻသွဥ်ဖေႏ စဒါႏတကြွꩻတကြိꩻလွုမ်ꩻ ထွက်သဲင်ꩻ၊ သဲင်ꩻဒေါ့ꩻတိတ္ထိတက္ကတွဥ်ꩻသီးဖုံႏ၊ ဝွေꩻဒါႏလို့လဲဥ်း နီဗွေႏဘုရာꩻ တရာꩻအကျောင်ꩻနဝ်ꩻသွူ။ ကရီးခါနဝ်ꩻ တိတ္ထိတက္ကတွဥ်ꩻသီးဖုံႏတဲ့ အီႏကဲ့ꩻရဲ့ꩻသဲ့ꩻသွမ်ꩻ နီဗွေႏဘုရာꩻတွမ်ႏ သံဃာႏနဝ်ꩻ တဖုဲင်ႏတဝ်း၊ ဗွေႏဘုရာꩻ ဗွေႏသံဃာႏအပဲ့စ်အဲဥ်ထဝ်းတဲင် သီႏလသိက္ခာႏ ဖေႏကလင်ꩻ ဝင်ꩻဖေႏကထင်းဖွီနဝ်ꩻ မာꩻတလꩻတဝ်း၊ တွိုႏယိုတလဲင်ႏတွော့ꩻ သရဘဒေါ့ꩻ- "ခွေထင်ႏဗုဲင်စင်ꩻ၊ ထင်ႏသွဥ်ဘုရာꩻတရာꩻ၊ ခွေဒါႏလို့လဲဥ်း၊ ခွေသေလို့လဲဥ်း (ဘုရာꩻတရာꩻနောဝ်ꩻ အယံထွꩻတဝ်း တိတ္ထိတက္ကတွဥ်ꩻသီးတရာꩻ) ဘုရာꩻကဟော်ꩻတရာꩻနဝ်ꩻ ယံတဝ်းနဝ်ꩻမꩻ ခွေထွက်ချာယို" လယ်ႏဒေါ့ꩻ တထွောင်းထွူတထွောင်းနုဲင်းနောဝ်ꩻ။ ရဟန်ꩻသီးဖုံႏ လောဝ်းနီဗွေႏဘုရာꩻ၊ ထွဥ်ႏနီဗွေႏဘုရာꩻ လွေꩻဆွုံꩻမꩻတဲင် နီဗွေႏဘုရာꩻကျွꩻလွေꩻ တိတ္ထိတက္ကတွဥ်ꩻသီးကျောင်ꩻ၊ နီဗွေႏဘုရာꩻရီ သရဘနုဲင်းယို- "ယိုသရဘ- နာꩻသေ ခွေတရာꩻနုဲင်းမုဲင်ꩻ ဒေါ့ꩻနယ်ဟုဲင်း၊ မဥ်ႏလိုႏနေတဲ့ ခွေဒေါ့ꩻသဲပ်ꩻဖေႏနာꩻ၊ မဥ်ႏမဲဥ်ႏလို့ဒျာႏတဲ့ ခွေအီႏသာႏဓု"၊ သရဘနဝ်ꩻ ဘုရာꩻထွဥ်ႏသွူ သွံလဲင်ႏတဲ့ အွဥ်ႏတကုဲင်အလွိုး အွဥ်ႏအကုတ်ꩻဒျာႏ အကတူႏ၊ အသွꩻဖုံႏရိုꩻ- "သရဘဟွေး- နာꩻနဝ်ꩻ ကျကွို့ꩻအူႏထာꩻနီထျꩻ နုဲင်းထွီႏဖြားလွုမ်ꩻ၊ ချင်ႏသေ့ꩻထွိုင်ႏလွဥ်တွော့ꩻ အုံတေ့ꩻဗာႏထာꩻ၊ နာꩻနဝ်ꩻ လိုꩻခွဥ်ႏဆေ့ꩻတန်"အသွꩻဖုံႏ ခွန်းရောင်နုဲင်းနောဝ်ꩻသွူ။[1][2]

အာႏကွိုꩻEdit

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၁၀၂)