Wp/blk/ကျင်ꩻနုဲင်းဖိုး-ကျင်ꩻနုဲင်းထွီႏ

< Wp‎ | blkWp > blk > ကျင်ꩻနုဲင်းဖိုး-ကျင်ꩻနုဲင်းထွီႏ

"ကုက္ကုရဝတိကသုတ် (ကျင်ꩻနုဲင်းဖိုး-ကျင်ꩻနုဲင်းထွီႏ)" အွိုးခꩻတလဲင်ႏ- ကကျင်ꩻနုဲင်းဖိုး ပါꩻကမဥ်ꩻ 'ပုဏ္ဏ'တဲ့နဝ်ꩻ၊ ကကျင်ꩻနုဲင်းထွီႏ ပါꩻကမဥ်ꩻ'သေနိယ'တဲ့နဝ်ꩻ (ဝွေꩻသီးနီဖြာꩻ) လွေꩻထေ့ဗွေႏဘုရာꩻ၊ ဝုဲင်ႏဘုရာꩻထွူခါ ပုဏ္ဏရီပါဗွေႏဘုရာꩻနုဲင်းယို- "ဩဗွေႏ- ကဗေင်ႏတခွေႏထာꩻ နုဲင်းထွီႏ သေနိယယိုနဝ်ꩻ ခွမ်ꩻလာꩻတဲ့ ကွဥ်ကꩻတဝ်း၊ အုံတလီꩻဒျာႏထာꩻ၊ ဝေါင်းဒင်ႏဟံႏ-အံႏဒျာႏထာꩻဟံႏလောင်း နုဲင်းထွီႏ၊ လွေꩻဒျာႏနုဲင်းထွီႏ၊ အုံဒျာႏနုဲင်းထွီႏ၊ ဗေင်ႏဒျာႏနုဲင်းထွီႏ၊ အူႏဒျာႏထာꩻနုဲင်းထွီႏ၊ လိုꩻတွိုင်ꩻစွုမ်ႏဖြာꩻ တမာꩻနွောင်ꩻတဝ်း-တကျင်ꩻနွောင်ꩻတဝ်း နုဲင်းဝွေꩻယို၊ ဝွေꩻထွားနုဲင်းထွီႏ ကျင်ꩻယပ်ꩻယပ်ꩻခုဲင်ႏခုဲင်ႏနုဲင်းယိုနဝ်ꩻ နေင်ႏပေါင်ꩻအာ-လာပေါင်ꩻညလဲဥ်း၊ ဝွေꩻကဆောက်တဲႏ ကံကျင်ꩻနဝ်ꩻ ဗွေစွုမ်ႏနာႏလဲဥ်း၊ တွိုႏတနီꩻခါ ခန္ဓာႏကုဲင်လီ ဝွေꩻမဥ်ႏသီနဝ်ꩻ ဘဝငါသူꩻ အီႏလွေꩻထွာထမုဲင်ꩻ ဗွေႏဩ" "ပုဏ္ဏ- ငေါဝ်းရီနုဲင်းယို ဟောဝ်ရီတဝ်းခွေ၊ ခွေတဲ့ ဟောဝ်ဖြေႏတဝ်း (ဟောဝ်ဒေါ့ꩻနယ်တဝ်း)" "မွေးတဝ်းဗွေႏ- တွိုႏဘဝငါ အီႏလွေꩻထွာထမုဲင်ꩻနဝ်ꩻ သနွောင်ꩻဒျာႏ နီဗွေႏလူမ်ꩻဟ၊ ပေါႏရီတဝ်း နီဗွေႏယိုနောဝ်ꩻ အီႏရီကဲဒူမ်ပါꩻမုဲင်ꩻဟောင်းဗွေႏ" "ပုဏ္ဏ- ခွေသတဲ့ယဝ်း ငေါဝ်းနုဲင်းယိုနဝ်ꩻ နာꩻဟောဝ်ရီတဝ်းခွေ၊ ခွေတဲ့ အဝ်ႏသေသေသွူတဲ့ ဟောဝ်ဒေါ့ꩻနယ်တဝ်း" "ယိုဗွေႏ- နီသွဥ်းသီးမဥ်သေမꩻ နီသွဥ်းသီး စွော်စွော်လွဥ်ထေ့သွူ နီဗွေႏဟ (ဟောဝ်တဲ့ယဝ်း-ကုဲင်တဲ့ယောဝ်း) လွေꩻထွာထမုဲင်ꩻမုဲင်ꩻတဲ့ယဝ်း နီဗွေႏဒါ့ꩻနယ်သွော့ ဗွေႏဩ" နီဗွေႏဘုရာꩻရဲခါ (ရီမွုန်း-ရီမွုန်း) သွံလဲင်ႏသွူတဲ့ အဝ်ႏရီဒျာႏနွိုင်ႏနွိုင်ႏတွော့ꩻ ပွိုင်ႏပွိုင်ႏနီဗွေႏဘုရာꩻ ဒေါ့ꩻနယ်ဗာႏစွက်ႏနုဲင်းယို- "ပုဏ္ဏ- ခွေအဝ်ႏရိုꩻသွူ 'ရီမွုန်း-ရီမွုန်း'တဲ့ နာꩻသမ်းအဝ်ႏနွိုင်ႏမွိုင်ႏ၊ နာꩻသမ်းထွဥ်ႏဒေါ့ꩻနယ်နွိုင်ႏနွိုင်ႏ၊ ကွပ်နဝ်ꩻမꩻ ခွေအီႏဒေါ့ꩻနယ်သွူနာꩻ၊ လိုꩻယင်ဟန်ႏနဝ်ꩻ- နေင်ႏပေါင်ꩻအာ-လာပေါင်ꩻည၊ ဝွေꩻဘဝ ထွားနုဲင်းသေႏသေႏဒျာႏထွီႏ၊ သꩻတဲ့ အွဥ်ႏသေႏသေႏဒျာႏနုဲင်းထွီႏ၊ ကျင်ꩻလွဥ်ꩻသေႏသေႏဒျာႏ နုဲင်းထွီႏတဲင် ထွာထာꩻယူႏမာႏ 'မိစ္ဆာႏဒိဋ္ဌိ'၊ ကွပ်သꩻထွီႏ၊ ကျင်ꩻနုဲင်းထွီႏတွော့ꩻ တွေꩻမဥ်ႏသီ ဘဝငါသူꩻနဝ်ꩻ လွေꩻမာꩻသွꩻဗာႏထွီႏ၊ လွေꩻထွာဗာႏထွီႏ(လွေꩻထွာဗာႏတိရစ္ဆာန်ႏတမျိုꩻမျိုꩻ)၊ မဥ်ႏတထွာတဝ်းထွီႏ၊ မဥ်ႏတထွာတဝ်း တိရစ္ဆာန်ႏတဲ့ ပွိုးထာꩻယူႏမာႏ မိစ္ဆာႏဒိဋ္ဌိတွော့ꩻ 'လင်ꩻထဲ့ဗာႏငါးရုဲင်ꩻ'၊ လိုꩻကျင်ꩻနုဲင်းထွီႏနဝ်ꩻ ဘဝငါသူꩻ 'လွေꩻထွာတိရစ္ဆာန်ႏတွမ်ႏ လင်ꩻထဲ့ငါးရုဲင်ꩻ'အဝ်ႏနဝ်ꩻနီမျိုꩻလူမ်ꩻ"။ နီဗွေႏဘုရာꩻ ထွိုင်ႏဒေါ့ꩻနယ်နုဲင်းနဝ်ꩻတဲင်တွော့ꩻ ကအုံလီꩻထာꩻ၊ ကကျင်ꩻနုဲင်းထွီႏ 'သေနိယနောဝ်ꩻ ငွိုးအွီႏမွေးစွဥ်ႏ'ထာꩻနောဝ်ꩻသွူ။ ဗွေႏဘုရာꩻရိုꩻ- "ပုဏ္ဏ-'ရီမွုန်း-ရီမွုန်း'ခွေအဝ်ႏရိုꩻသွူတဲ့ နာꩻအဝ်ႏရီနွိုင်ႏနွိုင်ႏ၊ ပွိုင်ႏပွိုင်ႏခွေဒေါ့ꩻနယ်ဗာႏ၊ ထွိုင်ႏသေ အကျင်ꩻထွီႏခရာႏနဝ်ꩻ 'သေနိယ ငွိုးအွီႏဗာႏ'တောသွူထာꩻယို" "ဩဘုရာꩻဗွေႏ- ကွပ်ဘုရာꩻဒေါ့ꩻနယ်တဲင် ခွေသွဥ်းငွိုးထာꩻမွေးတဝ်း၊ ခွေသွဥ်းယူႏဒျာႏ-ခွေသွဥ်းကျင်ꩻမာႏ အကျင်ꩻထွီႏတွော့ꩻ ခွေသွဥ်းငွိုးအွီႏဒျာႏ ဗွေႏဩ၊ ဩဗွေႏ- ဒေါ့ꩻနယ်ပါ 'ပုဏ္ဏ ကကျင်ꩻနုဲင်းဖိုး'နဝ်ꩻဟုဲင်းဗွေႏ၊ ဘဝငါသူꩻ ဝွေꩻအီႏလွေꩻထွာထမုဲင်ꩻဗွေႏဩ" "သေနိယ- ရီမွုန်း-ရီမွုန်း၊ ဟောဝ်ရီတဝ်း၊ ခွေတဲ့ မဥ်ဒေါ့ꩻတဝ်း ပုဏ္ဏဘဝငါတာႏ" "ယိုဗွေႏ- နီသွဥ်းသီးမဥ်သေမꩻ နီသွဥ်းသီး စွော်စွော်လွဥ်ထေ့သွူနီဗွေႏဟ (ဟောဝ်တဲ့ယဝ်း-ကုဲင်တဲ့ယဝ်း) လွေꩻထွာထမုဲင်ꩻမုဲင်ꩻတဲ့ယဝ်း နီဗွေႏဒေါ့ꩻနယ်သွော့ဗွေႏဩ" "ပေါႏနဝ်ꩻတဲ့ ဒေါ့ꩻနယ်သွူနာꩻယို သေနိယ- နေင်ႏပေါင်ꩻအာ-လာပေါင်ꩻည ဝွေꩻဘဝ ကျင်ꩻလွဥ်ꩻသေႏသေႏဒျာႏနုဲင်းဖိုး၊ ဝွေꩻသꩻတဲ့ အွဥ်ႏလွဥ်ꩻသေႏသေႏဒျာႏနုဲင်းဖိုး၊ ကျင်ꩻလွဥ်ꩻသေႏသေႏနုဲင်းဖိုးနဝ်ꩻတဲင် ထွာထာꩻယူႏမာႏ'မိစ္ဆာႏဒိဋ္ဌိ'၊ ကွပ်သꩻဖိုး၊ ကျင်ꩻနုဲင်းဖိုးတွော့ꩻ ဝွေꩻမဥ်ႏသီး ဘဝငါသူꩻနဝ်ꩻ လွေꩻမာꩻသွꩻဗာႏဖိုး၊ လွေꩻထွာဗာႏဖိုး(လွေꩻထွာဗာႏတိရစ္ဆာန်ႏတမျိုꩻမျိုꩻ)၊ မဥ်ႏတထွာတဝ်းဖိုး၊ မဥ်ႏတထွာတဝ်း တိရစ္ဆာန်ႏတဲ့ ပွိုးထာꩻယူႏမာႏ မိစ္ဆာႏဒိဋ္ဌိတွော့ꩻ 'လင်ꩻထဲ့ဗာႏငါးရုဲင်ꩻ'၊ လိုꩻကျင်ꩻနုဲင်းဖိုးနဝ်ꩻ ဘဝငါသူꩻ 'လွေꩻထွာတိရစ္ဆာန်ႏတွမ်ႏ လင်ꩻထဲ့ငါးရုဲင်ꩻ'အဝ်ႏနဝ်ꩻနီမျိုꩻလူမ်ꩻ"။ နီဗွေႏဘုရာꩻ ထွိုင်ႏဒေါ့ꩻနယ်နုဲင်းနဝ်ꩻတဲင်တွော့ꩻ ကကျင်ꩻနုဲင်းဖိုး 'ပုဏ္ဏ'နဝ်ꩻ ငွိုးအွီႏစွဥ်ႏဒျာႏထာꩻနဝ်ꩻသွူ။ ဗွေႏဘုရာꩻရိုꩻ- "သေနိယ-'ရီမွုန်း-ရီမွုန်း'ခွေအဝ်ႏရိုꩻသွူတဲ့ နာꩻအဝ်ႏရီနွိုင်ႏနွိုင်ႏ၊ ပွိုင်ႏပွိုင်ႏခွေဒေါ့ꩻနယ်ဗာႏ၊ ထွိုင်ႏသေ အကျင်ꩻဖိုးခရာႏနဝ်ꩻ 'ပုဏ္ဏ ငွိုးဗာႏ'တောသွူထာꩻယို" "ဘုရာꩻဗွေႏဩ- ကွပ်ဘုရာꩻဒေါ့ꩻနယ်တဲင် ခွေသွဥ်းငွိုးထာꩻမွေးတဝ်း၊ ခွေသွဥ်းယူႏဒျာႏ-ခွေသွဥ်းကျင်ꩻမာႏ အကျင်ꩻဖိုးတွော့ꩻ ခွေသွဥ်းငွိုးအွီႏဒျာႏ ဗွေႏဩ။ ဩဗွေႏ- ခွေသွဥ်းနဝ်ꩻ ယွုမ်းအံႏငါႏနီဗွေႏ၊ ကေႏညိုႏငါႏနီဗွေႏဘုရာꩻ၊ ခွေသွဥ်းတဲ့ ဖေႏကစွဥ်ꩻထိုꩻနွောင်ꩻ အကျင်ꩻမာႏ(အကျင်ꩻဖိုး)နဝ်ꩻ၊ သေနိယတဲ့ (ဖေႏကကွဥ်ကꩻယင်းခွမ်ꩻလာꩻ) ဖေႏကစွဥ်ꩻထိုꩻနွောင်ꩻ အကျင်ꩻမာႏ(အကျင်ꩻထွီႏ)နဝ်ꩻ ဟော်ꩻဖေႏနီသွဥ်းသီး တရာꩻမွေးတရာꩻမဲဥ်ႏ၊ အွဥ်ႏနယ်ဖေႏနီသွဥ်းသီး အကျင်ꩻမွေးအကျင်ꩻမဲဥ်ႏမွိုင် ဗွေႏဩ"ပုဏ္ဏလောဝ်း နီဗွေႏဘုရာꩻနုဲင်းနောဝ်ꩻသွူ။ "ပုဏ္ဏ (သေနိယ)ဟွေး- ပေါႏနဝ်ꩻတဲ့ နာႏလွသွော့တရာꩻနော၊ တရာꩻနဝ်ꩻ သွင်ꩻသော့ꩻဟောဝ်ဟောဝ်သွော့ သီသꩻကိုနော" "ဩဗွေႏ- ဘုရာꩻမျတ်ဗွေႏဩ- နီသွဥ်းသီး နာႏရိုႏရိုႏသေႏသေႏလွဒျာႏတရာꩻ၊ အွဥ်ႏသော့ꩻဟောဝ်ဟောဝ်ခါꩻဒျာႏ သꩻကိုဗွေႏဩ"ပုဏ္ဏသီးအာႏမခံႏငေါဝ်း လောဝ်းချာဗွေႏဘုရာꩻနုဲင်းနောဝ်ꩻသွူ။ ဗွေႏဘုရာꩻဟော်ꩻဖေႏ ပုဏ္ဏသီးတရာꩻနုဲင်းယို- ထာꩻမာꩻကရိုꩻဒါႏ'ကံႏ'နဝ်ꩻ အဝ်ႏလစ်ꩻမျိုꩻ၊ က့ႏလစ်ꩻမျိုꩻကရိုꩻနဝ်ꩻ- ၁။ ကမ္မံ ကဏှံ၊ ကဏှဝိပါကံ - ကံႏဖြေင်း၊ အကျိုꩻဖြေင်း၊ ၂။ ကမ္မံ သုက္ကံ၊ သုက္ကဝိပါကံ - ကံႏဗွာ၊ အကျိုꩻဗွာ၊ ၃။ ကမ္မံ ကဏှသုက္ကံ၊ ကဏှသုက္ကဝိပါကံ - ကံႏဖြေင်းဗွာ၊ အကျိုꩻဖြေင်းဗွာ၊ ၄။ ကမ္မံ အကဏှံ အသုက္ကံ၊ အကဏှအသုက္ကဝိပါကံ - ကံႏဖြေင်းဗွာမွေးတဝ်း၊ အကျိုꩻဖြေင်းဗွာမွေးတဝ်း၊ ကံႏအဝ်ႏလစ်ꩻမျိုꩻနုဲင်းနဝ်ꩻသွူ။ ၁။ "ကံႏဖြေင်း၊ အကျိုꩻဖြေင်း"ကရိုꩻနဝ်ꩻ နုဲင်းမုဲင်ꩻနဲတဲင်- လိုꩻယင်ဟန်ႏနဝ်ꩻ မာꩻထာꩻမာꩻကုဲင်၊ ဒေါ့ꩻထာꩻဒေါ့ꩻကုဲင်၊ ယူႏထာꩻယူႏကုဲင် (ထွာအကုသိုလ်ႏ) ကွပ်ထာꩻမာꩻကုဲင်၊ ထာꩻဒေါ့ꩻကုဲင်၊ ယူႏထာꩻကုဲင်(ကွပ်အကုသိုလ်ႏနဝ်ꩻ)တဲင် တွိုႏလွေꩻဗာႏ လောကဒုက္ခ၊ ပွိုင်းဝွို့တွမ်ႏ အအုံအအဝ်ႏ၊ အခွေါင်းအရွတဲ့ ဒုက္ခ၊ အံႏဗာႏဒုက္ခ-အွꩻဗာႏဒုက္ခ၊ ပွိုင်းဝွို့တွမ်ႏ အဒေါ့ꩻအဖြောဝ်ႏတဲ့ ဒေါ့ꩻဗာႏမွိုင်းဒျာႏ ငေါဝ်းခိုးငေါဝ်းလျား၊ ပွိုင်းဝွို့တွမ်ႏသꩻတဲ့ သꩻအဝ်ႏဒုက္ခသေႏသေႏဗာႏ 'နုဲင်းငါးရုဲင်ꩻ'ဖုံႏနဝ်ꩻသွူ။ 'ကမ္မဒါယာဒါ သတ္တ'တိ ဝဒါမိ- သတ္တဝါႏသီးတခြိုꩻ အမွေႏစဲ့စ်စဲ့စ်နဝ်ꩻ ကံႏဒျာႏ၊ ခွေဟော်ꩻခါꩻနဝ်ꩻအတွိုင်ꩻ 'မာꩻအကုဲင်-လွေꩻခံႏဗာႏအကုဲင်'နုဲင်းနဝ်ꩻ၊ 'ကံႏဖြေင်း-အကျိုꩻဖြေင်း'ကရိုꩻနဝ်ꩻနောဝ်ꩻသွူ။ ၂။ "ကံႏဗွာ၊ အကျိုꩻဗွာ"ကရိုꩻနဝ်ꩻ နုဲင်းမုဲင်ꩻနဲတဲင်- လိုꩻယင်ဟန်ႏနဝ်ꩻ မာꩻထာꩻမာꩻဟောဝ်၊ ဒေါ့ꩻထာꩻဒေါ့ꩻဟောဝ်၊ ယူႏထာꩻယူႏဟောဝ် (ထွာကုသိုလ်ႏ) တွိုႏလွေꩻဗာႏ လောကချမ်ꩻသာႏကို၊ ပွိုင်းဝွို့တွမ်ႏ အအုံအအဝ်ႏ၊ အခွေါင်းအရွတဲ့ ချမ်ꩻသာႏ၊ အံႏဗာႏဟဝ်ဟဝ်-အွꩻဗာႏဟောဝ်၊ ပွိုင်းဝွို့တွမ်ႏ အဒေါ့ꩻအဖြောဝ်ႏတဲ့ ဒေါ့ꩻဗာႏဒျာႏ ငေါဝ်းရျူႏငွါရောင်း၊ ပွိုင်းဝွို့တွမ်ႏသꩻတဲ့ သꩻအဝ်ႏချမ်ꩻသာႏသေႏသေႏ နုဲင်း'သုဘကိဏှဗျဟ္မာႏသီး'နောဝ်ꩻသွူ။ 'ကမ္မဒါယာဒါ သတ္တ'တိ ဝဒါမိ- သတ္တဝါႏသီးတခြိုꩻ အမွေႏစဲ့စ်စဲ့စ်နဝ်ꩻ ကံႏဒျာႏ၊ ခွေကဟော်ꩻခါꩻနဝ်ꩻအတွိုင်ꩻ 'မာꩻအဟောဝ်-လွေꩻအံႏဗာႏအဟောဝ်'နုဲင်းနဝ်ꩻ၊ 'ကံႏဗွာ-အကျိုꩻဗွာ'ကရိုꩻနဝ်ꩻနောဝ်ꩻသွူ။ ၃။ "ကံႏဖြေင်းဗွာ၊ အကျိုꩻဖြေင်းဗွာ"ကရိုꩻနဝ်ꩻ နုဲင်းမုဲင်ꩻနဲတဲင်- လိုꩻယင်ဟန်ႏနဝ်ꩻ ထာꩻမာꩻဟောဝ်တဲ့မာႏ-ထာမာꩻကုဲင်တဲ့မာႏ၊ ထာꩻဒေါ့ꩻဟောဝ်တဲ့ဒေါ့ꩻ-ထာꩻဒေါ့ꩻကုဲင်တဲ့ဒေါ့ꩻ၊ ထာꩻယူႏဟောဝ်တဲ့ယူႏ-ထာꩻယူႏကုဲင်တဲ့ယူႏ၊ (ထွာကုသိုလ်ႏယင်၊ ထွာအကုသိုလ်ႏယင် ရော်ꩻရယ်ꩻလို့ဝင်ꩻ)တဲင် တွိုႏလွေꩻဗာႏ လောကရော်ꩻရယ်ꩻကို၊ ပွိုင်းဝွို့တွမ်ႏ အအုံအအဝ်ႏ၊ အခွေါင်းအရွတဲ့ ယလဲင်ႏလဲင်ႏချမ်ꩻသာႏ၊ ယလဲင်ႏလဲင်ႏဒုက္ခ၊ ပွိုင်းဝွို့တွမ်ႏ အအံႏအအွꩻတဲ့ ယလဲင်ႏအံႏအွꩻဗာႏဟောဝ်၊ ယလဲင်ႏလဲင်ႏ အံႏအွꩻဗာႏဒုက္ခ၊ ပွိုင်းဝွို့တွမ်ႏ အဒေါ့ꩻအဖြောဝ်ႏတဲ့ ယလဲင်ႏလဲင်ႏဒေါ့ꩻဗာႏငေါဝ်းခွꩻ၊ ယလဲင်ႏလဲင်ႏ ဒေါ့ꩻဗာႏငေါဝ်းလျား၊ ပွိုင်းဝွို့တွမ်ႏသꩻတဲ့ ယလဲင်ႏလဲင်ႏ သꩻချမ်ꩻသာႏ၊ ယလဲင်ႏလဲင်ႏ သꩻဒုက္ခ၊ ဗွန်ပီနုဲင်း'လိုꩻယင်ဟန်ႏ၊ လူꩻယင်ဟန်ႏ၊ ဝိနိပါတကအသုရာႏယင်ဟန်ႏ'နောဝ်ꩻသွူ။ 'ကမ္မဒါယာဒါ သတ္တ'တိ ဝဒါမိ- သတ္တဝါႏသီးတခြိုꩻ အမွေႏစဲ့စ်စဲ့စ်နဝ်ꩻ ကံႏဒျာႏ၊ ခွေကဟော်ꩻခါꩻနဝ်ꩻအတွိုင်ꩻ 'မာꩻဟောဝ်ကုဲင်-လွေꩻအံႏဗာႏ၊ လွေꩻခံႏဗာႏ ဟောဝ်ကုဲင်'နုဲင်းနဝ်ꩻ၊ 'ကံႏဖြေင်းဗွာ-အကျိုꩻဖြေင်းဗွာ'ကရိုꩻနဝ်ꩻနောဝ်ꩻသွူ။ ၄။ "ကံႏဖြေင်းဗွာ-မွေးတဝ်း၊ အကျိုꩻဖြေင်းဗွာ-မွေးတဝ်း"ကရိုꩻနဝ်ꩻ နုဲင်းမုဲင်ꩻနဲတဲင်- မာꩻတဝ်းအကုသိုလ်ႏ၊ မာꩻတဝ်း(လောကီ)ကုသိုလ်ႏ၊ အားထွုတ်ကျပ်ဒျာႏ ဝိပဿနာႏ၊ ရေႏဒျာႏဖေႏကလꩻမဂ်ဖိုလ်ႏ၊ ရေႏဒျာႏဖေႏကတွိုႏနိဗ္ဗာန်ႏ၊ (ရေႏတဝ်းလိုꩻချမ်ꩻသာႏ၊ လူꩻချမ်ꩻသာႏ)နဝ်ꩻ 'ကံႏဖြေင်းဗွာ-မွေးတဝ်း၊ အကျိုꩻဖြေင်းဗွာ-မွေးတဝ်း'နောဝ်ꩻသွူ။ ကထင်ႏဟွူန်ဗာႏ ကံႏခရာႏနုဲင်းနဝ်ꩻတဲင် ကကျင်ꩻနုဲင်းဖိုး ပုဏ္ဏနဝ်ꩻ လောဝ်းဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- နီဗွေႏဘုရာꩻ တရာꩻတောႏနဝ်ꩻ ဗွောင်ဖေႏနီသွဥ်းသီးမဲ့နား၊ သꩻရေꩻနစ်သက်ငါႏဗွေႏ၊ ကားယိုမာꩻငါနဝ်ꩻ ဆယ်ꩻကပ်ဒျာႏ ဘုရာꩻ တရာꩻ သံဃာႏ ရတနာႏသွံပါꩻ၊ ခွေသွဥ်းယိုနောဝ်ꩻ မတ်ဒျာႏသွော့ ဗုဒ္ဓဘာႏသာႏ ဥပါသကာႏတဖြာꩻ ဗွေႏဩ'လောဝ်းနုဲင်းနောဝ်ꩻသွူ။ ကကျင်ꩻနုဲင်းထွီႏ သေနိယနောဝ်ꩻတဲ့ လောဝ်းဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- နီဗွေႏဘုရာꩻ တရာꩻတောႏနဝ်ꩻ နစ်သက်ခရာႏဟောဝ်ငါႏဗွေႏ၊ ဗွောင်ဖေႏနီသွဥ်းသီးမဲ့နားတဲင် သꩻရေꩻငါႏ မရေႏမရာႏ၊ ကားယိုမာꩻငါနဝ်ꩻ ဆယ်ꩻကပ်ဒျာႏ ဘုရာꩻ တရာꩻ သံဃာႏ ရတနာႏသိုမ်ပါꩻ၊ ခွေသွဥ်းယိုနောဝ်ꩻ မတ်ဒျာႏသွော့ ဗုဒ္ဓဘာႏသာႏ ဥပါႏသကာႏတဖြာꩻ ဗွေႏဩ၊ ဩဗွေႏ ဘုရာꩻမျတ်ဗွေႏဩ- လဘေယျာဟံ ဘန္တေ ဘဂဝတော သန္တိကံ ပဗ္ဗဇ္ဇံ၊ လဘေယံ ဥပသမ္ပဒံ-ဩဗွေႏ ခွေသွဥ်းမဥ်ဗုဲင်ငါႏသျင်ႏ-မဥ်ခံႏငါႏစင်ꩻ နီဗွေႏဘုရာꩻထျꩻ ဗွေႏဩ" နီဗွေႏဘုရာꩻရိုꩻ- "သေနိယဟွေး- လိုꩻပေါႏထွာဗာႏဖို တိတ္ထိတက္ကတွဥ်ꩻနဝ်ꩻ ကံကျင်ꩻစံꩻရီးဗာႏလစ်ꩻလာမꩻ ဗုဲင်သျင်ႏရဟန်ꩻလꩻ- ခွေချꩻခါꩻ အမိန်းနုဲင်းနဝ်ꩻ"။ "ဩဗွေႏ ဘုရာꩻမျတ်ဗွေႏဩ- တောငါခွေသွဥ်း ထွာဗာႏငါသျင်ႏ-ခံႏဗာႏငါစင်ꩻငါ'လစ်ꩻလာတွမ်ႏရိုꩻမွုန်း လစ်ꩻနေင်ႏတဲ့ယဝ်း ခံႏကံကျင်ꩻဒျာႏ ဗွေႏဩ" ကကျင်ꩻနုဲင်းထွီႏ သေနိယနဝ်ꩻ အာႏမခံႏခြေင်းခြဲ့ငေါဝ်း လောဝ်းဗွူန်ႏစွဥ်ႏနုဲင်းနဝ်ꩻသွူ။ ကကျင်ꩻနုဲင်းထွီႏ သေနိယနဝ်ꩻ ကံကျင်ꩻစံꩻလစ်ꩻလာ ကထင်ႏဗွေတဲင် ဗုဲင်ဗာႏစွဥ်ႏသျင်ႏ-ခံႏဗာႏစွဥ်ႏစင်ꩻ နီဗွေႏဘုရာꩻထျꩻနောဝ်ꩻသွူ။ - အစေလကော သေနိယော - ကအုံလီꩻထာꩻ သေနိယနဝ်ꩻ - ကုက္ကုရဝတိကော သေနိယော - ကကျင်ꩻနုဲင်းထွီႏ သေနိယနဝ်ꩻ - အလတ္ထ ပဗ္ဗဇ္ဇံ ဥပသမ္ပဒံ - ဗုဲင်သျင်ႏခံႏစင်ꩻထွူတဲင် - ဧကော ဝူပကဋ္ဌော - အုံခေါ်ဒျာႏတပါꩻလူမ်ꩻ - အာတာပီ ပဟိတတ္တော - အားထွုတ်မွေး ဝိပဿနာႏတွော့ꩻ - န စရိဿေဝ အရဟတံ အဟောသိ- တညတဝ်းခိန်ႏခါႏ ထွာစွဥ်ႏဒျာႏ ရဟန္တာႏနောဝ်ꩻသွူ။ "ဟောဝ်ငမ်းသံႏဝွေႏဂ" ၁။ အီႏထွာရဟန္တာႏ၊ ကံႏပါဒျာႏ၊ ကျင်ꩻမာႏ ထွီႏဘဝ၊ ၂။ လောကလိုꩻခမ်း၊ လိုႏချင်းနမ်း၊ ဟောဝ်ငမ်း သံႏဝွေႏဂ၊ ၃။ ဆယ်ꩻကပ်ဆရာႏ၊ လိုႏချင်းငါႏ၊ မော့ꩻဒါႏ ထာꩻဒုက္ခ။ (သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏ၊ ကုက္ကုရဝတိကသုတ်)[1][2]

အာႏကွိုꩻEdit

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၃၉၇/၄၀၀)