Wp/blk/ကောင်တန်တေင်သီ

< Wp‎ | blkWp > blk > ကောင်တန်တေင်သီ

"ပဗ္ဗတူပမ-ပဗ္ဗတဥပမာႏ (ကောင်တန်တေင်သီ နာꩻတွမ်ႏနီ)"

"တကာႏခွန်တန်ကောသလ- မွူးယာခိုႏတိန်ႏတိန်ႏ အခိန်ႏယိုနဝ်ꩻ အဝ်ႏမုဲင်ꩻကိုလွဥ်ဟောင်း" "ဩဗွေႏ ဘုရာꩻမျတ်ဗွေႏဩ- ခွေသွဥ်းယိုနဝ်ꩻ ဝင်ꩻဒင်ႏအရာႏ ထွာဗာႏလဲဥ်းခွန်၊ မဲ့အာႏရွုံႏ-ကမ်းသꩻထွား၊ နားအာႏရွုံႏ-ကမ်းသꩻနာႏ၊ ထော့ꩻယာႏဆျာယာႏ ခွုင်းကားတဲင် အယာႏမျိုꩻ မဥ်အံႏအမျိုꩻမုဲင်ꩻလꩻ၊ ကောဝ်ႏဟွမ်နံႏသာႏဟွမ်၊ မွန်းဟွမ်ထီဟွမ် ခွုင်းကားတဲင် အဟွမ်အမျိုꩻမျိုꩻ မဥ်ခြွိုင်းအမျိုꩻမုဲင်ꩻလꩻလို့။ ခွမ်ꩻလာꩻအဟောဝ်စား ပွို့ꩻပနဲဥ်ႏချော်ꩻပြေ၊ ဟွမ်ထာꩻဒါ အဟဝ်စား ပွို့ꩻပနဲဥ်ႏ၊ လိုꩻမူႏအတရေꩻစား ပွို့ꩻပနဲဥ်ႏ ခွုင်းကားတဲင် အခွေါင်းအရွ ပွို့ꩻပနဲဥ်ႏမျိုꩻနဝ်ꩻ အခိန်ႏရွေꩻတဝ်း ခွေါင်းရွလꩻလို့၊ ခမ်းတွက်ထီတာႏ မာꩻဒါႏနွောင်ꩻလို့၊ ခမ်းသားအလောင်း အာဖြောင်းလꩻဒျာႏ၊ အာႏဏာႏစက်အဝ်ႏလို့၊ ကွပ်နောဝ်ꩻမꩻ ယိုနောဝ်ꩻ 'အဝ်ႏအောင်ႏစဲ့ꩻပွယ်ꩻ'သဲင်ꩻလွဥ် ဗွေႏဩ"လောဝ်းကျွားမွေးစွဥ်ႏ ဗွေႏဘုရာꩻနုဲင်းနောဝ်ꩻသွူ။ "တကာႏခွန်တန်ဟွေး- ဥပမာႏ အရပ်ဆကွဥ်ႏဖဲ့ꩻ ကအဝ်ႏဒါႏ ကောင်တန်တဖြုံႏနဝ်ꩻ တကြွီႏလွဥ်မွေး ဒွုတ်ဒွုတ်တွော့ꩻ မဥ်ႏလွဥ်တေင်သီလိုꩻ ကားကအဝ်ႏဖုံႏနဝ်ꩻ နꩻခံႏဗော့ꩻအတေင်သီနဲ့၊ ဖေႏကလွစ်လꩻနဝ်ꩻ နာꩻနဲစ်လွင်းနဲ့၊ နဲစ်လွင်းတဝ်းနဲ့" "ဟူး-နဲစ်လွင်းမွိုင်မွိုင်စွဥ်ႏဗွေႏ- 'ဆကွဥ်ႏဖဲ့ꩻကောင်တန်'ကရိုꩻနဝ်ꩻ အဗွန်ပီစွဥ်ႏဒျာႏ 'ဇာတိဒုက္ခ-ကွုတ်ဒုက္ခ'နဝ်ꩻသွူ၊ လိုꩻကားကအဝ်ႏနဝ်ꩻ ကောင်တန်ဇာတိဒုက္ခ တေင်နျꩻလွဥ်းလွဥ်း၊ ဘုရာꩻရဟန္တာႏသီးသူ ကွုတ်တဝ်းဒွုမ်တဲင် ဝင်ꩻလွင်းလွစ်လို့လဲဥ်း၊ တွိုႏတကာႏနဝ်ꩻ အဝ်ႏထင်းတန်ဒျာႏ ရာႏဇာႏခွန်ဘဝ၊ ခွန်မဥ်ႏသီတဲ့ (ပေါႏထွာတဝ်းရဟန္တာႏနဝ်ꩻ) အီႏကွုတ်ဗာႏယင်း၊ အီႏဒုက္ခဗာႏယင်း၊ နာꩻလွင်းခန်းတဝ်း ဇာတိဒုက္ခ-ကောင်တန်နဝ်ꩻနဲ့။ ဆတွို့ꩻဖဲ့ꩻ 'ဇရာႏဒုက္ခ-ထာꩻဖြားဒုက္ခ'ကောင်တန်နဝ်ꩻတဲ့ တကြွီႏတေင်နျꩻ လိုꩻဖုံႏနေနေ၊ တကာႏသေယူႏနေဟောင်း၊ နာꩻကွဲဖြားဖြားလဲဥ်း၊ ဘဝငါသူꩻတဲ့ ခံႏဖြားဒုက္ခစွူစွူဗော့ꩻနဲ့၊ ကျံႏလွင်းလဲ့ꩻတဝ်းဒွုမ်နဲ့။ ဆထင်ꩻဖဲ့ꩻ 'ဗျာဓိဒုက္ခ-ထာꩻဆာဒုက္ခ'ကောင်တန်နဝ်ꩻတဲ့ တကြွီႏတေင်နျꩻ လိုꩻဖုံႏနေနေ၊ သေစဥ်ꩻစာꩻနေဟောင်း၊ တွိုႏတနီꩻနီꩻ တလာလာ အီႏဆာတဝ်ဗာႏထာꩻကွေးꩻ ဆာလွဥ်ထာꩻ အလဲင်ႏပေါင်ꩻအာလဲဥ်း၊ ဘဝပေါင်ꩻအာလဲဥ်း၊ ခံႏဆာစွူစွူဗော့ꩻနဲ့၊ အင်းလွင်းလဲ့ꩻတဝ်းဒွုမ်နဲ့။ ဆနောဝ်ဖဲ့ꩻ 'မရဏဒုက္ခ-ထာꩻသီဒုက္ခ'ကောင်တန်နဝ်ꩻတဲ့ တကြွီႏလွဥ်တေင်နျꩻသီလိုꩻလွဥ်းလွဥ်း၊ သီဗာႏထာꩻတဲ့ ဒေါ့ꩻအလဲင်ႏအလင်ႏ သူႏသေသူႏသာဒွုမ်၊ ဘဝမုဲင်ꩻဘဝမုဲင်ꩻတဲ့ အွဥ်ႏလင်ꩻမဲ့ထီ ခံႏသီတေ့ꩻတေ့ꩻဗော့ꩻနုဲင်းနဝ်ꩻနဲ့၊ ရေႏလါင်းလွစ်တဝ်းဒွုမ်နဲ့။ အီႏလꩻဗာႏ လိုꩻဘဝယို တယိုꩻတဝ်း၊ အခိန်ႏလို့တဗော့ꩻ ခမ်းကိစ္စ၊ အခိန်ႏလို့ဗော့ꩻ လမ်းကိစ္စနဝ်ꩻ ထွာလိုꩻအငိုꩻတတန်ႏတဝ်း၊ အောင်ႏစဲ့ꩻကိလေႏသာႏနဝ်ꩻမꩻ ဟဲ့ꩻ'အောင်ႏပွယ်ꩻ'၊ 'အောင်ႏကွုတ်ဖြားဆာသိ'နဝ်ꩻမꩻ ဟဲ့ꩻ'အောင်ႏပွယ်ꩻ'နောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ ပဗ္ဗတူပမသုတ်) လိုꩻတွိုင်ꩻဖေႏကသေနာႏ တဲမ်းဗာႏနုဲင်းယိုသွူ။ [1][2]

အာႏကွိုꩻEdit

  1. လိတ်ဗွောင်မဲ့နား(၅၄)
  2. ဗွေႏဗွန်-ကောဝိဒ(သီႏသဲင်ႏ)