Wp/blk/ကရီဗာႏသက်နီဆီနဝ်ꩻ

< Wp‎ | blkWp > blk > ကရီဗာႏသက်နီဆီနဝ်ꩻ

"ပရိပုဏ္ဏဝီသတိဝဿောသိ-နာꩻသက်နီဆီဗွေလဲဥ်းသွူနဲ့"ကရီဗာႏနုဲင်းနဝ်ꩻအကျောင်ꩻ(အအဲဥ်ႏ"

အွိုးခꩻတလဲင်ႏ ဝေင်ꩻရာႏဇဂျိုဟ်ႏကိုနဝ်ꩻ ဥပါလိသီး လိုꩻပေႏစွိုꩻအဝ်ႏ တဆီနွုတ်ꩻဖြာꩻ၊ ဥပါလိမွိုးဖါနဝ်ꩻ "ရက်မာႏအပို"၊ ပိုခိုပေႏ မဥ်ႏသွဥ်လိတ် မဥ်ႏသွဥ်ပညာႏနဝ်ꩻ မဲ့ꩻအသꩻဒုက္ခ၊ မဲ့ꩻအနမ်းဒုက္ခ၊ မဲ့ꩻအစူနုံဟွီ၊ မဲ့ꩻအစူဗောင်ဟွီ၊ မဲ့ꩻအမဲ့တမို့-ယူႏမာႏထာꩻနုဲင်းနဝ်ꩻတဲင် အပိုနဝ်ꩻ အွဥ်ႏတဝ်းကျောင်ꩻ၊ သွဥ်တဝ်းလိတ်။ "နီမဥ်ႏသီထိုꩻတနီꩻခါ နီပိုခိုဗွာယို ဖေႏကဒုက္ခမွုန်းနဝ်ꩻ ထင်ႏဗုဲင်ဒျာႏသျင်ႏ၊ ထင်ႏခံႏဒျာႏစင်ꩻမꩻ၊ သံဃာႏရဟန်ꩻ သျင်ႏစင်ꩻသီးသူꩻနောဝ်ꩻ သꩻတဲ့ချမ်ꩻသာႏ၊ အကျင်ꩻတဲ့ဟောဝ်၊ အံႏဗာႏဟောဝ်၊ ကိန်ꩻဗာႏဟောဝ်"ယူႏနုဲင်းနဝ်ꩻတဲင် ဥပါလိနဝ်ꩻ အွဥ်ႏဗုဲင်သျင်ႏ၊ အွဥ်ႏခံႏစင်ꩻ၊ လိုꩻလင်ဖုံႏတဲ့ ထင်ႏဗုဲင်နုဲင်းနုဲင်း အာပါꩻတန်နဝ်ꩻသွူ။ တွိုႏတရောဝ်ꩻတွော့ꩻ- "ဟို့ꩻခိုးငါႏလဲဥ်းဒဲဥ်၊ ဝွေါ့ခွေယာဂုဟုဲင်းနယ်ႏ၊ ဗွော့ꩻခွေဒဲဥ်ဟုဲင်းနယ်ႏ၊ ဖေႏခွေတခိုးဟုဲင်းနယ်ႏ"ထေအသꩻ၊ ပျꩻအစွန်ꩻ၊ ရန်ႏရောင်ရင်ထာꩻ၊ ငွိုးရောင်ရင်ထာꩻ၊ သင်ႏစွဥ်ႏအောႏအောႏအာႏအာႏ၊ နာႏထာꩻရာꩻရာꩻဟွုန်ဒွုမ်။ ဗွေႏစင်ꩻဖုံႏရိုꩻ- "ထာꩻဗော့ꩻဗော့ꩻလေသွူ၊ ယွုန်းဆောင်းတဆင်ႏငါဟုဲင်း၊ ယာဂု(ဒဲဥ်ပဲစ်ꩻ-ဆန်ပြုတ်)မဥ်ႏအောဝ်ႏတဲ့ မဲ့ꩻသီအွꩻဗာႏ၊ ဒဲဥ်မဥ်ႏအဝ်ႏတဲ့ မဲ့ꩻသီအံႏဗာႏ၊ တခိုးမဥ်ႏအဝ်ႏတဲ့ မဲ့ꩻသီစုဲင်ဗာႏ၊ တေ့ꩻခန်းလုဲင်း ငွိုးမွုန်းဒွုမ်ထာꩻဟုဲင်း" စင်ꩻဖုံႏ မဥ်ချောက်နုဲင်းမုဲင်ꩻချောက်၊ မဥ်ဒေါ့ꩻနုဲင်းမုဲင်ꩻဒေါ့ꩻ သေနာႏတဝ်း၊ ယိန်းခြောဝ်ထဲင်းအငေါဝ်း၊ ယိန်းငွိုးသန်ထဲင်းစွဥ်ႏထာꩻ၊ ပျꩻဆန္ဒ၊ အေႏလ-ဆီႏလီ၊ အခင်ႏလမ်းဗေင်ႏကိုနဝ်ꩻ တဗော့ꩻလဲ့ꩻ တဗော့ꩻလꩻ၊ စောဝ်ႏပဲ့ꩻစော်ႏပꩻထံထိမ်၊ ဗွေႏစင်ꩻဖုံႏ ဖျိုးဖေႏဗာႏ၊ ပသေဖေႏဗာႏ၊ လဲင်ꩻရွိုးရားနေးစွဥ်ႏ။ ဗွေႏဘုရာꩻရီ- "အာနန္ဒာႏ- လိုꩻပေႏဖုံႏ မငွိုးစောဝ်းငါႏထာꩻသူꩻ အထွာထမုဲင်ꩻ၊ လိုꩻပေႏလမ်းဖုံႏနဲ့" ဗွေႏအာႏနန္ဒာႏခြုဲင်းလို့လစွဥ်ႏ ဥပါလိသီးမွိုး ရက်ပိုဒါႏတဝ်းအကျောင်ꩻ၊ ဥပါလိစွိုꩻအကျောင်ꩻဖုံႏတဲင် (သွမ်ꩻယာထွူနဝ်ꩻ) ဗွေႏဘုရာꩻ ထွဥ်ႏပင်ꩻစုသံဃာႏ၊ ဗွေႏဘုရာꩻရိုꩻ- "ရဟန်ꩻသီးဖုံႏဟွေး- နီရဟန်ꩻဘဝယိုနဝ်ꩻ ယလဲင်ႏလဲင်ႏတဲ့ ခံႏတဲဝါးဗာႏ အလျားတံႏ၊ အခွꩻတံႏ တခြေ့အဲင်ႏ၊ တကျင်အဲင်ႏ၊ သံꩻအဲင်ႏ၊ ယလဲင်ႏလဲင်ႏတဲ့ ဟို့ꩻခိုးတမွိုꩻတမာꩻဗာႏထာꩻ၊ ယလဲင်ႏလဲင်ႏတဲ့ ခံႏဗာႏပါꩻငေါဝ်းခွန်း၊ ယလဲင်ႏလဲင်ႏတဲ့ ခံႏဗာႏပါꩻထီႏဖွိသွမ်ꩻသဲ့ꩻ ကဲ့ꩻရဲ့ꩻလိုꩻ၊ လိုꩻပေႏနဝ်ꩻ သူႏသေတဝ်းထာꩻ၊ ခံႏတံႏဖုံႏယို ဒါႏတဝ်း၊ အသက်နီဆီမာꩻငါမꩻ သူႏသေထာꩻ၊ ခံႏတံႏနုဲင်းနဝ်ꩻဖုံႏ အီႏနွောင်ꩻ၊ အုံတွမ်ႏဣန္ဒြေႏအီႏဒါႏ။ ရဟန်ꩻသီးဖုံႏဟွေး- ပေါႏအသက်နီဆီ တဗွေတဝ်းနဝ်ꩻ ခံႏစင်ꩻအပ်တဝ်း၊ အဝ်ႏသေသေ ပေါႏအွဥ်ႏဗုဲင်နွိုင်ႏနွိုင်ႏနဝ်ꩻ စင်ꩻတဲ့တထွာတဝ်း၊ ကအွဥ်ႏဗုဲင်ဖေႏသားဖုံႏနဝ်ꩻ သိက္ခာႏပုဒ် ဥပဒေႏအတွိုင်ꩻ ခံႏဗာႏကွေး"မိန်းစွဥ်ႏနုဲင်းနဝ်ꩻသွူ။ (ဝိနယ၊ မဟာဝဂ္ဂပါဠိ၊ မဟာခန္ဓက)[1][2]

အာႏကွိုꩻEdit

  1. လိတ်ဗွောင်မဲ့နား(၁၀)
  2. ဗွေႏဗွန်-ကောဝိဒ(သီႏသဲင်ႏ)