Wp/blk/ကန္ဒာရာယနပုဏ္ဏာꩻ

< Wp‎ | blkWp > blk > ကန္ဒာရာယနပုဏ္ဏာꩻ

"ဗွေႏမဟာကစ္စာန ဟော်ꩻဖေႏ ကန္ဒရာယနပုဏ္ဏာꩻတရာꩻ"

အွိုးခꩻတလဲင်ႏ- ဗွေႏမဟာကစ္စာနနဝ်ꩻ အဝ်ႏအုံ'မဓုရာခမ်း'၊ 'ဂုန္ဒာတခြာ'တန်ကိုအတွင်ꩻ 'ကန္ဒရာယနပုဏ္ဏာꩻဖြား'တဖြာꩻဖျော်လွဥ် ဗွေႏမဟာကစ္စာနထျꩻ၊ ပုဏ္ဏာꩻဖြားနဝ်ꩻ ဒေါ့ꩻလျားထွူစွဥ်ႏ ဗွေႏမဟာကစ္စာနနုဲင်းယို- "ခွေကဟွူန်ဖိုအတွိုင်ꩻ မွေးတန်ဗာႏ- မဟာကစ္စာနနဝ်ꩻ ကျိုႏဆွုမ်ႏတဝ်းပုဏ္ဏာꩻ၊ ထီႏထွꩻချာ ထီႏထွꩻငါ၊ ဟွုန်ထွꩻချာ ဟွုန်ထွꩻငါ၊ သက်ရွယ်ႏတန်ပုဏ္ဏာꩻဖြားဖုံႏနဝ်ꩻတဲ့ ဝုဲင်ႏတဝ်း-တဲ့၊ ဖျော်သွူအငါတဲ့ 'အုံယိုကိုဟုဲင်း'နုဲင်းနဝ်ꩻပေႏငါတဲ့ အွဥ်ႏနယ်တောဝ်းခင်ႏလမ်း-တဲ့၊ ခွေကဟွုန်ဗာႏအတွိုင်ꩻ မွေးတန်ဗာႏ။ သက်ရွယ်ႏတန် ပုဏ္ဏာꩻဖြားနုဲင်းခွေယို ဖျော်သွူအငါတဲ့ ကျိုႏတဲ့တကျိုႏဆွုမ်ႏတဝ်း၊ ဝုဲင်ႏတဲ့တဝုဲင်ႏတဝ်း၊ ခင်ႏလမ်းတဲ့ တဒါဖေႏတဝ်း၊ ဟောဝ်မာꩻတဝ်း နုဲင်းယိုအီ"ဒေါ့ꩻစွဥ်ႏနုဲင်းနောဝ်ꩻ။ ဗွေႏမဟာကစ္စာန ဒေါ့ꩻချာနုဲင်းယို- "ပုဏ္ဏာꩻဖြား- နီဗွေႏဘုရာꩻ ကအွဥ်ႏထွော့ခါꩻဒါႏ လိုꩻတန်အဆင်းအရန်း 'ဝုဒ္ဓဘူမိ'တဲ့နဝ်ꩻ၊ လိုꩻပေႏအဆင်းအရန်း'ဒဟရဘူမိ'တဲ့နဝ်ꩻ အဝ်ႏဒျာႏတကာႏပုဏ္ဏာꩻဖြားဟွေး။ အဝ်ႏနုဲင်းမုဲင်ꩻနဲးတဲင်- ပါꩻတဖြာꩻနဝ်ꩻ အသက်လꩻခန်းသွစ်ꩻဆီ၊ ကွတ်ꩻဆီ၊ တရျာꩻတဲ့ယဝ်း ပါꩻနဝ်ꩻနဝ်ꩻ နေးဒျာႏမဲ့အာႏရွုံႏ၊ နေးဒျာႏနားအာႏရွုံႏ၊ နေးဒျာႏနေ့ꩻဖူအာႏရွုံႏ၊ နေးဒျာႏဖြေꩻအာႏရွုံႏ၊ နေးဒျာႏနမ်း (အခွေါင်းအရွ)အာႏရွုံႏ၊ အဝ်ႏအုံဒျာႏလမ်း၊ အဝ်ႏဒျာႏတွမ်ႏပိုမာ၊ ရာႏဂတဏှာႏ-ကိလေႏသာႏအဝ်ႏပူꩻ။ ပေါႏအဝ်ႏရူꩻရာꩻနေက ပေါႏအဝ်ႏထိုမ်ႏနေကအာႏရွုံႏ၊ ပေါႏအဝ်ႏခံႏစာꩻနေက ကာမဂွုဏ်ႏ အာႏရွုံႏငတ်ꩻပါꩻနဝ်ꩻ သက်မဥ်တန်နုဲင်းမုဲင်ꩻတန်၊ မဥ်ဖြားနုဲင်းမုဲင်ꩻဖြား၊ ပါꩻနဝ်ꩻနဝ်ꩻ ဟဲ့ꩻဗာႏဒျာႏ 'ဗာလော-လိုꩻမွိုက်' 'န ထေရောတွေ၀-လိုꩻဖြား လိုꩻတန်မွေးတဝ်း'ဗွေႏစောဝ်းဘုရာꩻ မိန်းခါꩻနုဲင်းနဝ်ꩻသွူ။ "တကာႏပုဏ္ဏာꩻဖြားဟွေး- ပါꩻတဖြာꩻနဝ်ꩻ သက်ရွယ်ႏအဝ်ႏပေႏနေက၊ ကလူꩻအဝ်ႏဖြေင်းနေက၊ အဝ်ႏပေႏနကခန်းတဲ့ယောဝ်း စူꩻတဝ်းမဲ့အာႏရွုံႏ၊ စူꩻတဝ်းနားအာႏရွုံႏ၊ စူꩻတဝ်းနေ့ꩻဖူအာႏရွုံႏ၊ စူꩻတဝ်းဖြေꩻအာႏရွုံႏ၊ စူꩻတဝ်းနမ်း(အခွေါင်းအရွ)အာႏရွုံႏ၊ ရာႏဂတဏှာႏ ကိလေႏသာႏပူꩻတဝ်း။ ရူꩻရာꩻတဝ်း၊ ထိုမ်ႏတဝ်းအာႏရွုံႏ၊ ခံႏစာꩻတဝ်း ကာမဂွုဏ်ႏအာႏရွုံႏငတ်ꩻပါꩻ၊ ပါꩻနဝ်ꩻနဝ်ꩻ သက်ရွယ်ႏမဥ်ပေႏနုဲင်းမုဲင်ꩻပေႏတဲ့ယဝ်း ဟဲ့ꩻဗာႏ 'ပဏ္ဍိတော-လိုꩻထာꩻသူႏသေအဝ်ႏ ပဏ္ဍိတ၊ လိုꩻမျတ်လိုꩻကျသူႏတောႏကောင်ꩻ'၊ ထေရောတွေ၀ သင်္ချံ ဂစ္ဆတိ-ဟဲ့ꩻဗာႏဒျာႏ 'လိုꩻသီႏလခွေါင်ခံႏ၊ လိုꩻသမာဓိခွေါင်ခံႏ၊ လိုꩻပညာႏခွေါင်ခံႏ၊ ဟဲ့ꩻထွိုက်ဒျာႏလိုꩻတန်' ဗွေႏဘုရာꩻဖန်နုဲင်းနောဝ်ꩻသွူ။ တွိုႏနဝ်ꩻတဲင်ခါ- ကန္ဒရာယနပုဏ္ဏာꩻဖြားနဝ်ꩻ ထွိုင်ႏငါလွေꩻထေ့ တရေ့ခေါက်ꩻဝုဲင်ႏ၊ အကတူႏအွဥ်ႏနုဲင်ႏစွဥ်ႏ ဗွေႏမဟာကစ္စာန ခင်ႏတောႏထွူတွော့ꩻ 'ခွေသွဥ်းယိုနဝ်ꩻ မတ်သွော့ ဗုဒ္ဓဘာႏသာႏ ဥပါႏသကာႏအတဖြာꩻ ဗွေႏဩ'၊ ပယ်ႏထိုꩻဝွေꩻထာꩻယူႏမာႏ၊ ခံႏထွာတောစွဥ်ႏဒျာႏ 'ဗုဒ္ဓဘာႏသာႏ'တဖြာꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဒုကနိပါတ်၊ သမစိတ္တဝဂ်-၃၉)[1][2]

အာႏကွိုꩻEdit

  1. လိတ်ဗွောင်မဲ့နား(၈၅)
  2. ဗွေႏဗွန်-ကောဝိဒ(သီႏသဲင်ႏ)