Wp/blk/ကန္ဒရကပရိဗိုဇ်တရာꩻ

< Wp‎ | blkWp > blk > ကန္ဒရကပရိဗိုဇ်တရာꩻ

"ကန္ဒရကသုတ် (နီဗွေႏဘုရာꩻဟော်ꩻဖေႏ ကန္ဒရကပဗိုဇ်တရာꩻ)" အွိုးခꩻတလဲင်ႏ- နီဗွေႏဘုရာꩻတွမ်ႏ တပဲ့ꩻသံဃာႏ အဝ်ႏအုံ'ဝေင်ꩻစမ္ပါႏ၊ ဂဂ္ဂရာႏထီနောင်'ထျꩻနဝ်ꩻအတွင်ꩻ 'ထိန်ꩻဆင်သားပို ပေဿတွမ်ႏ ကန္ဒရကဗိုဇ်'နဝ်ꩻ ဖျော်လွဥ်နီဗွေႏဘုရာꩻထျꩻ၊ ပေဿနဝ်ꩻ ဝုဲင်ႏဗွေႏဘုရာꩻထွူ လွေꩻအုံလင်ꩻ သင်ꩻရာꩻတထွောင်းကို။ ကန္ဒရကပရိဗိုဇ်နဝ်ꩻတဲး သꩻရောင်းသꩻရေꩻ တွမ်ႏဗွေႏဘုရာꩻစွော့ꩻတက် ဒေါ့ꩻငေါဝ်းနစ်သက်၊ ဒေါ့ꩻငေါဝ်းတောင်ꩻစွေးခရာႏထွူခါ ဆွတ်ꩻချာအုံလင်ꩻ၊ ထွားလွေꩻတော ဗွေႏသံဃာႏ၊ ကေႏညိုႏငါႏတဲင် လောဝ်းဗွေႏဘုရာꩻနုဲင်းယို- "ဩဗွေႏ ဂေါတမ- အံႏဖြာႏခရာႏ ဟောဝ်မွေးစွဥ်ႏထာꩻ၊ အံႏဖြာႏခရာႏ ဟောဝ်မွေးစွဥ်ႏထာꩻ၊ နီဗွေႏဘုရာꩻ သွဥ်သင်တပဲ့ꩻသံဃာႏ တဲပ်တဲ့ဟောဝ်ငါႏဗွေႏဩ၊ ကပွင်ꩻထွူလဲဥ်း ဗွေႏဘုရာꩻတဲ့ သွဥ်သင်လဲဥ်း တပဲ့ꩻသံဃာႏနုဲင်းယိုနေနေ၊ ကအီႏပွင်ꩻဒါႏ ဗွေႏဘုရာꩻသူꩻတဲ့ အအီႏသွဥ်သင် အတပဲ့ꩻသံဃာႏ နုဲင်းယိုနေနေ'ခွေသွဥ်းယူႏနုဲင်းနဝ်ꩻဗွေႏဩ" "ကန္ဒရကဟွေး- နာꩻကလောဝ်းငေါဝ်းနဝ်ꩻ မွေးဒျာႏ၊ ယိုခါ ဘုရာꩻခွေယို ကသွဥ်သင်တပဲ့ꩻသံဃာႏယိုအတွိုင်ꩻ ကပွင်ꩻလဲဥ်းတဲ့နဝ်ꩻ၊ ကအီႏပွင်ꩻတဲ့နဝ်ꩻ ဗွေႏဘုရာꩻသီးဖုံႏ သွဥ်သင်အတပဲ့ꩻသံဃာႏ နုဲင်းယိုလွဥ်းလွဥ်း။ ကန္ဒရကဟွေး- ခွေတပဲ့ꩻသံဃာႏဖုံႏကိုယိုနဝ်ꩻ ကထွာလဲဥ်း ရဟန္တာႏဖုံႏတဲ့ပါ၊ ကအဝ်ႏအားထွုတ်နေ သေက္ခပုဂ္ဂိုလ်ႏ (သောႏတာႏပန်ႏ၊ သကဒါႏဂါမ်ႏ၊ အနာႏဂါမ်ႏ)ဖုံႏတဲ့ပါ။ ခွုင်းကားတဲင် ခွေတပဲ့ꩻသံဃာႏဖုံႏယိုနဝ်ꩻ အသꩻပါမွေး သတိပဋ္ဌာန်ꩻလစ်ꩻပါꩻလွဥ်းလွဥ်း၊ ကျိုꩻစာꩻသောင်ႏသာ အားထွုတ်လွမွေး သတိပဋ္ဌာန်ꩻတရာꩻလစ်ꩻပါꩻလွဥ်းလွဥ်း။ အားထွုတ်သတိပဋ္ဌာန်ꩻတရာꩻ (၄)ပါꩻကရိုꩻနဝ်ꩻ- ၁။ နေးတွမ်ႏ အာရဒ္ဓဝိရယဉာဏ်ႏသတိꩻတဲင် "ယူႏထွားခူꩻလီမ်ꩻခူꩻပြန်ႏ ရုပ်အပေါင်ꩻ"နဝ်ꩻ ဟဲ့ꩻ"အားထွုတ် ကာယာနုပဿနာသတိပဋ္ဌာန်ꩻ"နောဝ်ꩻသွူ။ ၂။ နေးတွမ်ႏ အာရဒ္ဓဝိရယဉာဏ်ႏသတိꩻတဲင် "ယူႏထွားခူꩻလီမ်ꩻခူꩻပြန်ႏ ဝေဒနာႏ"နဝ်ꩻ ဟဲ့ꩻ"အားထွုတ် ဝေဒနာနုပဿနာသတိပဋ္ဌာန်ꩻ"နောဝ်ꩻသွူ။ ၃။ နေးတွမ်ႏ အာရဒ္ဓဝိရယဉာဏ်ႏသတိꩻတဲင် "ယူႏထွားခူꩻလီမ်ꩻခူꩻပြန်ႏ သꩻ"နောဝ်ꩻ ဟဲ့ꩻ"အားထွုတ် စိတ္တာနုပဿနာသတိပဋ္ဌာန်ꩻ"နောဝ်ꩻသွူ။ ၄။ နေးတွမ်ႏ အာရဒ္ဓဝိရယဉာဏ်ႏသတိꩻတဲင် "ယူႏထွားခူꩻလီမ်ꩻခူꩻပြန်ႏ သဘော်ꩻတရာꩻ"နဝ်ꩻ ဟဲ့ꩻ"အားထွုတ် ဓမ္မာနုပဿနာသတိပဋ္ဌာန်ꩻ"နောဝ်ꩻသွူ။ ထိန်ꩻဆင်သားပို 'ပေဿ'တဲ့ လောဝ်းနီဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- အံႏဖြာႏခရာႏ ဟောဝ်ငါႏဗွေႏဩ၊ လိုꩻလူꩻဗျဟ္မာႏ သတ္တဝါႏသီး ကိလေႏသာႏ ယံကကြောင်းစင်ထိုꩻ၊ ထာꩻနန်းထာꩻခီ၊ ထာꩻငွိုး-ယံကဆွိုးထိုꩻ၊ နမ်းဒုက္ခ သꩻဒုက္ခ ယံကဖေ့ငီမ်ꩻ၊ ယံကလꩻ အရိယာႏမဂ်၊ ယံကတွိုႏနိဗ္ဗာန်ႏတဲင်- ဗွေႏဘုရာꩻ ကဟော်ꩻထန်ႏဖေႏ သတိပဋ္ဌာန်ꩻ တရာꩻနုဲင်းယိုနဝ်ꩻ အကျိုꩻအဝ်ႏအာငါႏတွော့ꩻ ကွဥ်ကꩻခွမ်ꩻလာꩻဗွာ ကထွာတကာႏလိုꩻခမ်း နီသွဥ်းသီးတဲ့ သꩻအဝ်ႏစွယ်ꩻဒျာႏ၊ ယလဲင်ႏလဲင်ႏတဲ့ အားထွုတ်ဗာႏဒျာႏ၊ မဲ့ꩻအီႏကျိုꩻစာꩻထဲင်းထဲင်းဗွေႏဩ။ တိရစ္ဆာန်ႏဖုံႏနဝ်ꩻ အသꩻကထွာအတွိုင်ꩻ အွဥ်ႏနယ်စွဥ်ႏဒျာႏ၊ လဲဥ်လန်မာႏယာႏ ဟန်ဆောင်ဒါႏတဝ်း၊ တွိုႏနီသွဥ်းသီးလိုꩻယိုနဝ်ꩻ သျုတ်တန်၊ မာꩻတမျိုꩻ၊ ဒေါ့ꩻတမျိုꩻ၊ ယူႏတမျိုꩻ၊ ဝင်ꩻငါတမျိုꩻ၊ ဝင်ꩻချာတမျိုꩻ၊ လိုꩻလူꩻဗျဟ္မာႏသီး အကျိုꩻအဝ်ႏရာꩻ အီႏမာꩻဗာႏနုဲင်းမုဲင်ꩻကရိုꩻနဝ်ꩻ နီဗွေႏဘုရာꩻ အသေသွတ်ꩻ ဗွေႏဩ" "တကာႏပေဿဟွေး- တကာႏကလောဝ်းငေါဝ်းနဝ်ꩻ မွေးဒျာႏ၊ တိရစ္ဆာန်ႏနဝ်ꩻ အစွဥ်ႏတရွဥ်ႏတဲ့ လိုꩻသီးနဝ်ꩻ အသျုတ်တန်၊ လောကကိုယို ပုဂ္ဂိုလ်ႏအဝ်ႏလစ်ꩻမျိုꩻ၊ လစ်ꩻမျိုꩻကရိုꩻနောဝ်ꩻ- ၁။ ဧကစ္စော ပုဂ္ဂလော အတ္တန္တပေါ ဟောတိ- ပုဂ္ဂိုလ်ႏယင်ဟန်ႏနဝ်ꩻ မာꩻပင်ႏပန်ꩻ၊ မာꩻယပ်ꩻ မာꩻဒုက္ခချာအနမ်း၊ အနမ်းဖေႏကပင်ႏပန်ꩻ၊ ဖေႏကယပ်ꩻ၊ ဖေႏကဒုက္ခတဲ့ အဗွေႏအဝ်ႏကျိုꩻစာꩻ၊ အဝ်ႏမာꩻခူꩻလီမ်ꩻခူꩻပြန်ႏနောဝ်ꩻသွူ။ ၂။ ဧကစ္စော ပုဂ္ဂလော ပရန္တပေါ ဟောတိ- ပုဂ္ဂိုလ်ႏယင်ဟန်ႏနဝ်ꩻ မာꩻပင်ႏပန်ꩻဝင်ꩻ၊ မာꩻယပ်ꩻဝင်ꩻ မာꩻဒုက္ခဝင်ꩻ၊ ဝင်ꩻဖေႏနေးကပင်ႏပန်ꩻ၊ ဝင်ꩻဖေႏနေးကယပ်ꩻ၊ ဝင်ꩻဖေႏကဒုက္ခတဲ့ အဝ်ႏကျိုꩻစာꩻ၊ အဝ်ႏမာꩻခူꩻလီမ်ꩻခူꩻပြန်ႏနောဝ်ꩻသွူ။ ၃။ ဧကစ္စော ပုဂ္ဂလော အတ္တန္တပေါ စ ဟောတိ ပရန္တပေါ စ- ပုဂ္ဂိုလ်ႏယင်ဟန်ႏနဝ်ꩻ အနမ်းတဲ့ မာꩻပင်ႏပန်ꩻ၊ မာꩻယပ်ꩻ မာꩻဒုက္ခချာ၊ ဝင်ꩻတြ့ မာꩻပင်ႏပန်ꩻ၊ မာꩻယပ်ꩻ၊ မာꩻဒုက္ခပါ၊ နမ်းယင် ဝင်ꩻယင် ဖေႏကပင်ႏပန်ꩻ၊ ဖေႏကယပ်ꩻ၊ ဖေႏကဒုက္ခနဝ်ꩻ အဝ်ႏကျိုꩻစာꩻ၊ အဝ်ႏမာꩻခူꩻလီမ်ꩻခူꩻပြန်ႏနောဝ်ꩻသွူ။ ၄။ ဧကစ္စော ပုဂ္ဂလော နေဝတ္တန္တပေါ ဟောတိ န ပရန္တပေါ- ပုဂ္ဂိုလ်ႏယင်ဟန်ႏနဝ်ꩻ နမ်းတဲ့ မာꩻပင်ႏပန်ꩻ၊ မာꩻယပ်ꩻ မာꩻဒုက္ခတဝ်း၊ ဝင်ꩻတဲ့ မာꩻပင်ႏပန်ꩻ၊ မာꩻယပ်ꩻ၊ မာꩻဒုက္ခတဝ်း၊ နမ်းတဲ့နဝ်ꩻ ဝင်ꩻတဲ့နဝ်ꩻ ဖေႏကပင်ႏပန်ꩻ၊ ဖေႏကယပ်ꩻ၊ ဖေႏကဒုက္ခနဝ်ꩻ ကျိုꩻစာꩻတောဝ်း၊ နမ်းတဲ့ အုံဗာႏချမ်ꩻချမ်ꩻသာႏသာႏ၊ ဝင်ꩻတဲ့ အုံဗာႏချမ်ꩻချမ်ꩻသာႏသာႏနောဝ်ꩻသွူ။ "တကာႏပေဿ- ပုဂ္ဂိုလ်ႏလစ်ꩻမျိုꩻ အကိုနဝ်ꩻ နာꩻနစ်သက်အမျိုꩻမုဲင်ꩻ" "ဩဗွေႏ ခွေသွဥ်းနစ်သက်ဒျာႏ- နမ်းတဲ့ မာꩻပင်ႏပန်ꩻ၊ မာꩻယပ်ꩻ၊ မာꩻဒုက္ခတဝ်း၊ ဝင်ꩻတဲ့ မာꩻပင်ႏပန်ꩻ၊ မာꩻယပ်ꩻ၊ မာꩻဒုက္ခတောဝ်း-နဝ်ꩻတမျိုꩻလူမ်ꩻ၊ အဝ်ႏကုဲင်သိုမ်မျိုꩻနဝ်ꩻ နစ်သက်တဝ်း ဗွေႏဩ" "တကာႏပေဿ- ပုဂ္ဂိုလ်ႏသွံဖြာꩻဖုံႏနဝ်ꩻ ကွပ်ပွိုးထမုဲင်ꩻ မနစ်သက်တဝ်းတွိုးဟောင်း" "ဩဗွေႏ- ပထမတဖြာꩻနဝ်ꩻ မဥ်လꩻနမ်းချမ်ꩻသာႏတဲ့ သမ်းမာꩻဒုက္ခတောဒျာႏအနမ်း၊ ဒုတိယတဖြာꩻနဝ်ꩻ မာꩻဒုက္ခဝင်ꩻ၊ တတိယတဖြာꩻနဝ်ꩻ မာꩻဒုက္ခနမ်းယင် မာꩻဒုက္ခဝင်ꩻတဲင် နစ်သက်တဝ်းဗွေႏဩ၊ စတုတ္တတဖြာꩻနဝ်ꩻမꩻ နမ်းတဲ့ မာꩻဒုက္ခတဝ်း၊ ဝင်ꩻတဲ့ မာꩻဒုက္ခတဝ်းတဲင် နီတဲ့ချမ်ꩻသာႏ၊ ဝင်ꩻတဲ့ချမ်ꩻသာႏတွော့ꩻ နစ်သက်ဒျာႏ နဝ်ꩻတဖြာꩻလူမ်ꩻ ဗွေႏဩ။ ဩဗွေႏ- နီသွဥ်းသီး သဲင်ꩻဒွိုန်းကဗွေႏဩ၊ နီသွဥ်းသီးယိုနဝ်ꩻ ထာꩻမာꩻကိစ္စအာငါႏ ဗွေႏဩ" ပေဿသီးလောဝ်းနုဲင်းနဝ်ꩻထွူတဲင် ထွိုင်ႏသဲင်ꩻထိုꩻခန်းဒျာႏ၊ ပေဿသီးသဲင်ꩻထိုꩻ တပေါႏညတဝ်း ဗွေႏစောဝ်းဘုရာꩻရိုꩻနုဲင်းယို- "ရဟန်ꩻသီးဖုံႏဟွေး- ပေဿနဝ်ꩻ လိုꩻပညာႏအဝ်ႏ၊ လိုꩻပညာႏတန်တဲင် ခွေရေႏဟော်ꩻနယ်က ပုဂ္ဂိုလ်ႏလစ်ꩻမျိုꩻ အခရာႏအလုဲင်း၊ ဝွေꩻမဥ်ႏအုံထဲင်း တဆင်ႏငါ၊ ဝွေꩻမဥ်ႏနာႏဗာႏပါ တရာꩻအလုဲင်းနဝ်ꩻ အီႏလꩻအာမွေးမုဲင်းစွဥ်ႏ အကျိုꩻစီꩻပွါꩻ၊ ကွဲႏတွော့ꩻ ဝွေꩻနာႏဗာႏတရာꩻ တကားယိုငါတဲ့ အကျိုꩻစီꩻပွါꩻ မနဲလꩻအာဒျာႏ"ဆရာႏဗွေႏဘုရာꩻ မိန်းနဝ်ꩻသွူ။ "ဩဗွေႏ ဘုရာꩻမျတ်ဗွေႏဩ- ပုဂ္ဂိုလ်ႏလစ်ꩻမျိုꩻအလုဲင်းနဝ်ꩻ ခြုဲင်းဖေႏတော နီသွဥ်းသီးမွိုင် ဗွေႏဩ" "မွေးသွူ ရဟန်ꩻသီးဖုံႏဟွေး- ပေါႏနဝ်ꩻတဲ့ နာႏစဲင်းစဲင်းစဲ့စဲ့သွော့ ပငါပရာꩻဟုဲင်း၊ ခွေအီႏဟော်ꩻဖေႏသီယို- ရဟန်ꩻသီးဖုံႏဟွေး- ၁။ "မာꩻပင်ႏပန်ꩻနမ်း၊ မာꩻယပ်ꩻနမ်း၊ မာꩻဒုက္ခနမ်း"ကရိုꩻနဝ်ꩻ နုဲင်းမုဲင်ꩻနဲတဲင်- လောကကိုယို ပုဂ္ဂိုလ်ႏယင်ဟန်ႏနဝ်ꩻ ကွဥ်ကꩻတဝ်းခွမ်ꩻလာꩻ၊ ခြင်အနမ်း၊ နီနီꩻမꩻ အံႏတလဲင်ႏ၊ သွံနီꩻမꩻ အံႏတလဲင်ႏ၊ အံႏခါႏခါႏဒျာႏမီꩻ၊ အံႏခါႏခါႏဒျာႏ ဖိုးအေႏ၊ အုံဒျာႏ ထာꩻဆူႏပုံလောင်း၊ ဗေင်ဒင်ႏဒျာႏ ထာꩻဆူႏပုံလောင်း၊ မွူးဟာခိုႏနဝ်ꩻ လင်ꩻအုံစဲထီကို သွံလဲင်ႏသွံလဲင်ႏ 'မာꩻပင်ႏပန်ꩻနမ်း၊ မာꩻယပ်ꩻနမ်း၊ မꩻဒုက္ခနမ်း'စတဲင်နုဲင်းနောဝ်ꩻသွူ။ ၂။ "မာꩻပင်ႏပန်ꩻဝင်ꩻ၊ မာꩻယပ်ꩻဝင်ꩻ၊ မာꩻဒုက္ခဝင်ꩻ"ကရိုꩻနဝ်ꩻနုဲင်းမုဲင်ꩻနဲတဲင်- လောကကိုယို လိုꩻယင်ဟန်ႏနဝ်ꩻ ဖို့ꩻဖိုး၊ ဖို့ꩻထော့ꩻ၊ ဖို့ꩻဆျာ၊ တခွေထ၊ မာꩻသီထပေႏ၊ မာꩻသီထာꩻသားအမျိုꩻမျိုꩻ၊ မာꩻသီလိုꩻ၊ အံႏနွောင်ꩻဝင်ꩻ၊ နိစ္စက်ဝင်ꩻ-စတဲင်နုဲင်းနောဝ်ꩻဖုံႏသွူ။ ရဟန်ꩻသီးဖုံႏဟွေး- ၃။ "မာꩻဒုက္ခနမ်းယင်၊ မာꩻဒုက္ခဝင်ꩻယင်"ကရိုꩻနဝ်ꩻ နုဲင်းမုဲင်ꩻနဲတဲင်- ခွန်ဖုံႏ ပုဏ္ဏာꩻဖုံႏနဝ်ꩻ (ဝွေꩻသီးဝါႏဒ၊ ဝွေꩻသီးထာꩻယွုမ်းအံႏအတွိုင်ꩻ) ပူႏဇောႏလူꩻ၊ တင်ႏလူꩻအတွက်တာႏ ထွဥ်ႏအလိုꩻ မာꩻသီဖိုး၊ ထွဥ်ႏမာꩻသီဗဲ-စတဲင် တိရစ္ဆာန်ႏဖုံႏ အဗာႏပေါင်ꩻ ကားယိုကားနဝ်ꩻ၊ ထွဥ်ႏအလိုꩻမာꩻဖေႏလမ်းယို့ꩻ၊ မာꩻတွောင်းဟံႏ၊ သူႏဖိုးအေႏ၊ ခွန် ပုဏ္ဏာꩻတွမ်ႏ အမာဖုံႏနဝ်ꩻ ဗေင်ႏပြာႏဟံႏလောင်းနောဝ်ꩻကို၊ ကမာꩻနုဲင်းယို စတဲင်နဝ်ꩻဖုံႏနဝ်ꩻ အနမ်းတဲ့ဒုက္ခ၊ ဝင်ꩻတဲ့ဒုက္ခနောဝ်ꩻသွူ။ ၄။ နမ်းတဲ့ မာꩻဒုက္ခတဝ်း၊ ဝင်ꩻတဲ့ မာꩻဒုက္ခတဝ်းနဝ်ꩻ နီတဲ့ နမ်းသꩻချမ်ꩻသာႏ၊ ဝင်ꩻတဲ့ နမ်းသꩻချမ်ꩻသာႏနောဝ်ꩻသွူ။ ပုဂ္ဂိုလ်ႏ ၄-မျိုꩻအကို "နမ်းတဲ့ မာꩻဒုက္ခချာတဝ်း၊ ဝင်ꩻတဲ့ မာꩻဒုက္ခတဝ်း"ပုဂ္ဂိုလ်ႏစားနဝ်ꩻနဝ်ꩻ အထျꩻထျꩻထွာစွဥ်ႏဒျာႏ ဗွေႏဘုရာꩻတွမ်ႏ ဗွေႏသံခာႏသီးဖုံႏနောဝ်ꩻသွူ။ နီဗွေႏဘုရꩻနဝ်ꩻ နမ်းတွမ်ႏနမ်းဒျာႏ ကသေနာႏအတွိုင်ꩻ မွေးမွေးမဲဥ်ႏမဲဥ်ႏ ဟော်ꩻနယ်ဖေႏ လိုꩻလူꩻဗျဟ္မာႏသီးတရာꩻ၊ ဟော်ꩻခြုဲင်းဖေႏ အကျင်ꩻမျတ်တဲင် လိုꩻသီးဖုံႏ နစ်သက်သꩻရေꩻတွော့ꩻ အဝ်ႏလိုꩻလမ်းဘဝ ထင်ႏဗုဲင်လွရဟန်ꩻဖုံႏနောဝ်ꩻသွူ။ ဗုဲင်ရဟန်ꩻထွူတွော့ꩻ အုံဒျာႏတွမ်ႏသီႏလ၊ အဝ်ႏဒျာႏတွမ်ႏသိက္ခာႏ၊ ခွုမ်တဥ်ႏခါꩻဒျာႏ လောကပါလတရာꩻ (ဟိရီဩတ္တပ္ပတဲင်) မာꩻတဝ်းအကုသိုလ်ႏဒုစရဲက်၊ နေးဒျာႏမေတ္တာႏ၊ ရက်ဒျာႏသတ္တဝါႏ၊ နေးဒျာႏကရုဏာႏ-သညင်ꩻဒျာႏ သတ္တဝါႏ၊ မာꩻသီတဝ်းဝင်ꩻသက်လာꩻလာꩻ၊ လဲ့ꩻဖုဲင်းညာꩻသေႏသေႏ။ ရေႏဒျာႏထာꩻလွောင်ႏဗူႏ၊ ဒေါ့ꩻဒျာႏငေါဝ်းရျူႏ၊ ငေါဝ်းနာႏသာႏ၊ ဒေါ့ꩻဒျာႏ ငေါဝ်းအကျိုꩻထွာ၊ ဖြောဝ်ႏဒျာႏ ငွါအကျိုꩻအဝ်ႏꩻ စူꩻတဝ်းထာꩻမွန်းထာꩻပျောႏ၊ မာꩻတဝ်းအဖြေꩻအစာ၊ ကလိန်ႏကလဲ့ ချာႏမဲ့ချာႏနား-အံႏလဲဥ်ဒါႏတဝ်းဝင်ꩻ၊ တခွန်ꩻဒါႏတဝ်းထာꩻ၊ စွန်(စိုန်)ဒါႏတဝ်းထာꩻ၊ အုံဒျာႏသျင်ꩻသျင်ꩻ အပဲ့စ်ကင်ꩻကင်ꩻနောဝ်ꩻသွူ။ ထီႏတွမ်ႏမဲ့တဲ့ ကွပ်မဲ့တဲင် အကုသိုလ်ႏဖေႏကထွာမွုန်း နေးတွမ်ႏသတိꩻ ထိန်ꩻခါꩻမဲ့ဣန္ဒြေႏ၊ ဟွူန်တလေ့စားတဲ့ ထိန်ꩻခါꩻနားဣန္ဒြေႏ-စတဲင် ထိန်ꩻခါꩻသေႏသေႏ ဣန္ဒြေႏသူပါꩻနောဝ်ꩻသွူ။ လွေꩻငါတဲ့နဝ်ꩻ ဆွတ်ꩻချာတဲ့နဝ်ꩻ၊ ထွားတောက်ꩻတဲ့နဝ်ꩻ၊ ထွားတဖဲ့တ်တဲ့နဝ်ꩻ၊ ဒဲင်စူတဲ့နဝ်ꩻ၊ ဒဲင်ခင်ႏတဲ့နဝ်ꩻ သတိꩻအွဥ်ႏဒင်ႏ ဆင်ႏချင်ႏနေးဒျာႏသွူ၊ ထူႏသပိတ်တဲ့နဝ်ꩻ၊ ထူႏသင်္ကန်ꩻကုဋ်တဲ့နဝ်ꩻ၊ ထူႏအမျိုꩻမုဲင်ꩻတဲ့နောဝ်ꩻ သတိꩻအွဥ်ႏဒင်ႏ ဆင်ႏချင်ႏနေးဒျာႏသွူ။ မဥ်ႏဒေါ့ꩻလို့လို့နဝ်ꩻ အလွေꩻအသဲင်ꩻ အုံထွိုင်ႏ အုံလင်ꩻ အဒေါ့ꩻအဖြောဝ်ႏ အအုံအအောဝ်ႏ၊ လွေꩻခွဥ်ႏပေႏခွဥ်ႏတန် အစစအရာႏရာႏ နေးဒျာႏသတိꩻ ဆင်ႏချင်ႏခိꩻခိꩻဒျာႏသွူ။ မာꩻဒျာႏကုသိုလ်ႏတရာꩻ၊ ကျိုꩻစာꩻပယ်ႏကိလေႏသာႏ၊ အားထွုတ်မွေး ဝိပဿနာႏတြင် လꩻဈာန်ႏ၊ လꩻအဘိညဥ်ႏ၊ လꩻပုဗ္ဗေနိဝါသာနုဿတိဉာဏ်ႏ၊ ထီႏချာဇာတ်ရီးပန်အွဥ် ထွာလွဥ်နုဲင်းမုဲင်ꩻ၊ခြုဲင်းဖြုဲင်ꩻဒေါ့ꩻဒါႏ၊ အာငါႏဘဝ ဒုက္ခချမ်ꩻသာႏ မော့ꩻဗာႏအမျိုꩻမျိုꩻနောဝ်ꩻသွူ။ လꩻဒိဗ္ဗစက္ခုဉာဏ်ႏတဲင် ကမာꩻကာယဒုစရဲက် နမ်းအကုသိုလ်ႏသား၊ ကဒေါ့ꩻဝစီဒုစရဲက် ဖြောင်းအကုသိုလ်ႏသား၊ ကယူႏမနော်ꩻဒုစရဲက် သꩻအကုသိုလ်ႏသား၊ အကုသိုလ်ႏကံႏအလွိုက် လိုꩻမွိုက်ခမ်းနယ်ႏ ကလွေꩻဗာႏအပါယ်ႏသားဖုံႏသူꩻတဲ့ ထီႏလို့။ ကမာꩻသုစရဲက်သား၊ ကမာꩻဒါႏနကုသိုလ်ႏသား၊ သီႏလကုသိုလ်ႏ၊ သမထကုသိုလ်ႏ၊ ဝိပဿနာႏကုသိုလ်ႏသား၊ ကုသိုလ်ႏကံႏအလွိုက်၊ ထွိုက်ရာꩻကလꩻ လိုꩻချမ်ꩻသာႏ၊ လူꩻချမ်ꩻသာႏ၊ ဗျဟ္မာႏချမ်ꩻသာႏ၊ နိဗ္ဗာန်ႏချမ်ꩻသာႏဖုံႏနဝ်ꩻတဲ့ အဝ်ႏထီႏဒျာႏ၊ တွိုႏအနာလွို ထွာရဟန္တာႏ လꩻခန်းဒျာႏ နိဗ္ဗာန်ႏချမ်ꩻသာႏနောဝ်ꩻသွူ။ (၃၇၀-ယိုမာꩻငါနဝ်ꩻ သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏကို လွိုက်တဲမ်းပူႏဇောႏလွေꩻနုဲင်းယိုသွူ။)တောင်ꩻခါꩻ-လိုꩻတွိုင်ꩻဖေႏနေးကသေနာႏတဲင် တဲမ်းဗာႏနုဲင်းယိုသွူ။ [1][2]

အာႏကွိုꩻEdit

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၃၇၀/၃၇၂)